EKICWEKA KY’OKWEGA 46
EKIZINA 49 Kusemeza Omutima gwa Yahwe
Ab’Oruganda—Nimukurakurana Kusobora Kuheereza nk’Abaheereza?
“Okugaba kuleeta okusemererwa kwingi kukira okuheebwa.” —EBIK. 20:35.
EBI TURAYEGA
Kwekambisa ab’oruganda ababatiziibwe kukurakurana kusobora kufooka abaheereza omu kitebe.
1. Omukwenda Paulo yayehurraga ata hali abaheereza?
ABAHEEREZA bakora emirimo y’amaani omu bitebe. Omukwenda Paulo yaroraga abasaija banu abesigwa nk’abomuhendo. Ekyokurorraho, obu akaba nahandiikira Abakristaayo omu Firipi, akaramukya abaheereza n’abagurusi.—Baf. 1:1.
2. Ow’oruganda arukwetwa Luis naayehurra ata ha bujunanizibwa bwe obw’okuheereza nk’omuheereza omu kitebe?
2 Ab’oruganda baingi ababatiziibwe, kababe bato rundi bakuru batunga okusemererwa kwingi okuruga omu kuheereza nk’abaheereza omu kitebe. Ekyokurorraho, Devan akaba aine emyaka 18 nambere yakomiirwe kuheereza nk’omuheereza omu kitebe. Ha rubaju orundi, ow’oruganda arukwetwa Luis akakomwa kuheereza nk’omuheereza omu kitebe obu akaba ali nk’omu myaka 50. Akabazaaho enyehurra baingi ei batunga naagamba ati, “Nyine omugisa gw’amaani muno kuheereza nk’omuheereza omu kitebe, kukira muno obu ntekerezaaho okugonza ab’oruganda na banyaanya itwe barukunyoleka!”
3. Bikaguzo ki ebi turukwija kubazaaho?
3 Obu oraaba oli w’oruganda ow’abatiziibwe kandi tokafookere muheereza omu kitebe, habwaki otakifoora kigendererwa kyawe? Kiki ekisobora kukwekambisa kukikora? Kandi bintu ki ebi osemeriire kubanza kuhikiiriza kusobora kufooka muheereza omu kitebe? Omu kicweka kinu nitwija kubazaaho eby’okugarukamu eby’ebikaguzo binu. Baitu ekyokubanza, katubazeeho emirimo ey’ekorwa omuheereza omu kitebe.
ABAHEEREZA BAKONYERA BATA EKITEBE?
4. Omuheereza omu kitebe aine bujunanizibwa ki? (Rora n’ekisisani.)
4 Omuheereza ali w’oruganda ow’abatiziibwe ow’akomwa omwoyo ogurukwera kukonyera abagurusi omu mirimo ey’erukwahukana omu kitebe. Abaheereza abamu bakora kyona ekirukusoboka kurora ngu abatebezi baatunga ebiikaro eby’okutebezaamu hamu n’ebitabu eby’okukozesa omu buheereza. Abandi bakonyera omu kuyonja n’okudaabiriza Ekyombeko ky’Obukama. Ekindi, abaheereza bakonyera omu kutangirra, kandi bakora na ha byoma eby’amaraka na vidiyo omu nsorrokano z’ekitebe. Baitu ekirukukira obukuru, abaheereza baba basaija b’eby’omwoyo; abarukugonza Yahwe, kandi abarukworobera endengo ze ez’okuhikirra. Ekindi, bagonza muno ab’oruganda na banyaanya itwe. (Mat. 22:37-39) Ow’oruganda ow’abatiziibwe naasobora ata kukurakurana akafooka omuheereza?
Abaheereza begera hali Yesu kuraba omu kwehayo kuheereza abandi (Rora akacweka 4)
5. Kiki ow’oruganda eki asobora kukora kusobora kufooka omuheereza omu kitebe?
5 Baibuli ebazaaho ebintu ab’oruganda basemeriire kuhikiiriza kusobora kukomwa nk’abaheereza. (1 Tim. 3:8-10, 12, 13) Nosobora kukurakurana okatunga obujunanizibwa bunu kuraba omu kwesomesaaho ebintu binu ebirukusigikirra ha Byahandiikirwe kandi okateekamu amaani kubihikiiriza. Baitu eky’okubanza, osemeriire kutekerezaaho ensonga habwaki nogonza kufooka omuheereza omu kitebe.
HABWAKI N’OGONZA KUFOOKA OMUHEEREZA OMU KITEBE?
6. Nsonga ki ey’esemeriire kukuleetera kugonza kuheereza ab’oruganda na banyaanya itwe? (Matayo 20:28; rora n’ekisisani ekya ha kyesweko.)
6 Yesu Kristo, ayatuteriireho ekyokurorraho ekirukukirayo akekambisibwa okugonza oku akaba ainiire Ise n’abantu. Okugonza oku kukamuleetera kukora n’amaani emirimo eyarorwaga nk’eya hansi. (Soma Matayo 20:28; Yohana 13:5, 14, 15) Obu oraaba noyekambisibwa okugonza, Yahwe naija kukuha emigisa kandi naija kukukonyera kuhika ha kigendererwa kyawe eky’okufooka omuheereza.—1 Kol. 16:14; 1 Pet. 5:5.
Kuraba omu kyokurorraho kye, Yesu naayegesa abakwenda be kuheereza abandi hatali okweserurra ebiikaro eby’ekitiinisa (Rora akacweka 6)
7. Habwaki kibi kugonza kuheereza nk’abaheereza omu kitebe n’ekigendererwa eky’okugonza abandi baturole nk’aba haiguru?
7 Abantu omu nsi begomba abo ab’ekurakuraniza bonka. Baitu eki tinukwo kiri omu kitebe kya Yahwe. Ow’oruganda ow’arukugonza abandi nk’oku Yesu yakozere tagonza kulema abandi rundi kugonza abandi bamurole nk’owa haiguru. Kakuba omuntu ow’aine entekereza nk’egi akomwa omu kitebe, naasobora kwanga kukora emirimo eya hansi ey’erukwetaagisibwa kusobora kurolerra entaama za Yahwe ez’omuhendo. Naasobora kwerora nk’owa haiguru muno kukora emirimo nk’egi. (Yoh. 10:12) Yahwe tasobora kuha emigisa omuntu weena anyakwine emyehembo rundi ow’arukwefaaho wenka.—1 Kol. 10:24, 33; 13:4, 5.
8. Buhabuzi ki Yesu obu yahaire abakwenda be?
8 Obwire obumu, n’abo abakaba bali banywani ba Yesu nfenanfe bakaba nibagonza kutunga obujunanizibwa obumu n’ebigendererwa ebitahikire. Tekerezaaho ekintu Yakobo na Yohana baakozere. Bakasaba Yesu kubaha ekiikaro eky’amaani omu Bukama bwe. Yesu atabasiime habw’ebigendererwa byabo eby’okwefaaho bonka. Oihireho akasoborra abakwenda 12 boona ati: “Weena arukugonza kuba mukuru omuli inywe, asemeriire kuba muheereza wanyu, kandi weena arukugonza kuba w’okubanza omuli inywe, asemeriire kuba mwiru wa boona.” (Mar. 10:35-37, 43, 44) Ab’oruganda abakurakurana n’ebigendererwa ebihikire eby’okuheereza abandi nibaija kukonyera ekitebe omu miringo nyingi.—1 Bas. 2:8.
KIKI EKISOBORA KUKUKONYERA KUGONZA KUHEEREZA AB’ORUGANDA NA BANYAANYA ITWE?
9. Nosobora ota kukurakuraniza ekihika kyawe eky’okukurakurana?
9 Hataroho kugurukyagurukya nogonza Yahwe kandi nogonza kuheereza abandi. Baitu nabwo nikisobora kukugumira kuba n’ekihika eky’okugonza kukora emirimo eyekorwa abaheereza omu kitebe. Kiki ekisobora kukukonyera kugonza kukora emirimo enu? Tekerezaaho okusemererwa okuruga omu kuheereza ab’oruganda na banyaanya itwe.Yesu akagamba ati: “Okugaba kuleeta okusemererwa kwingi kukira okuheebwa.” (Ebik. 20:35) Yesu atagarukire ha kubaza ebigambo binu baitu akabita n’omu nkora. Akatunga okusemererwa kwingi omu kuheereza abandi kandi naiwe nosobora kukutunga.
10. Yesu akooleka ata ngu kyamusemezaaga kuheereza abandi? (Marako 6:31-34)
10 Wetegereze ekyokurorraho ekirukwoleka ngu Yesu kyamusemezaaga kuheereza abandi. (Soma Marako 6:31-34.) Kiro kimu, Yesu n’abakwenda be bakaba bajwahire. Bakaba nibagenda omu kiikaro ekyesoroire nukwo bahuumuleho. Baitu ekitebe ky’abantu kikababanzaayo nibagonza Yesu abeegese. Akaba naasobora kwanga kubeegesa kandi uwe na banywani be “batatunge obwire obw’okuhuumuraho rundi obw’okulya.” Rundi Yesu yakubegeseze ebintu bike kandi abagamba bagende. Baitu habwokuba akaba naabagonza, “yatandika kubeegesa ebintu bingi.” Kandi akagumizaamu naabegesa kuhikya ‘obwire kwira.’ (Mar. 6:35) Kandi kinu atakikole ngu habwokuba nikyo akaba asemeriire kukora baitu habwokuba ‘akabakwatirwa embabazi.’ Akaba naagonza kubeegesa habw’okuba akaba naabagonza. Kuheereza abandi kikaleetera Yesu okusemererwa kwingi.
11. Yesu akakonyera ata abantu? (Rora n’ekisisani.)
11 Yesu obu akaba naaheereza abantu, atagarukire ha kubeegesa kyonka. Akabafaaho n’omu byetaago byabo eby’omubiri. Omu mulingo ogw’ekyamahano akabaha ebyokulya kandi yakozesa abegeswa be kubibagabira. (Mar. 6:41) Obu yakozere eki, akaba naayoleka abegeswa be omulingo basobora kuheereza abandi. Ekindi, akooleka ngu emirimo nk’egi ey’ekorwa abaheereza omu kitebe nayo nkuru. Tekerezaaho okusemererwa abakwenda oku baatungire obu baakozere hamu na Yesu kuha abantu ebyokulya ebikaba bibahairwe omu mulingo ogw’ekyamahano kuhikya ‘boona obu baaliire kandi baiguta’! (Mar. 6:42) Gunu gutabe mulingo gwonka Yesu oguyayebembiizeemu ebyetaago by’abandi kukira ebye. Akakozesa obwomeezi bwe bwona omu nsi kuheereza abantu. (Mat. 4:23; 8:16) Yesu akatunga okusemererwa n’okumarwa kuraba omu kwegesa abandi n’okubahikyaho ebyetaago byabo. Hataroho kugurukyagurukya, naiwe noija kutunga okusemererwa kwingi obu orayehayo kuheereza abandi nk’omuheereza omu kitebe.
Kugonza Yahwe hamu n’okuba n’ekihika eky’okuheereza abandi nibiija kukwekambisa kukonyera ab’oruganda na banyaanya itwe omu kitebe omu miringo yoona (Rora akacweka 11) a
12. Habwaki itwena tutasemeriire kutekereza ngu titwine ky’amaani eki tusobora kukora omu kitebe?
12 Obu oraaba noyehurra ngu toine busobozi bwona, otahwamu amaani, hataroho kugurukyagurukya oine emiringo ey’osobora kukozesa kukonyera ekitebe. Nosobora kugasirwa kuraba omu kusomaho entekereza ya Paulo ey’erukusangwa omu 1 Abakolinso 12:12-30. Ebigambo bya Paulo nibikyoleka kurungi ngu nk’abaheereza ba Yahwe abandi boona, naiwe oine omulimo mukuru ogw’osobora kukora omu kitebe. Obu oraaba otarukusobora kuheereza nk’omuheereza omu kitebe kasumi kanu habwokuba hakyaroho ebintu ebimu ebi osemeriire kukoraho, otahwamu amaani. Oihireho, kora kyona ekirukusoboka kuheereza Yahwe n’okukonyera ab’oruganda? Kigumye ngu abagurusi nibaija kutekerezaaho obusobozi bwawe obu baraaba nibakuha emirimo ey’orakora.—Bar. 12:4-8.
13. Oihireho abaheereza, miringo ki Abakristaayo boona ei basemeriire kukurakuraniza?
13 Wetegereze ensonga endi habwaki osemeriire kukurakurana kufooka omuheereza omu kitebe: Emiringo erukukira obwingi erukubazibwaho omu Baibuli abaheereza ei basemeriire kuba nayo, eri miringo Abakristaayo boona basemeriire kukurakuraniza. Abakristaayo boona basemeriire kwirra haihi na Yahwe, basemererwe omu kugabira abandi, kandi beetwaze omu mulingo ogurukusemeza Ruhanga. Nahabweki, nosobora kuba omazire kukurakuraniza emiringo erukukira obwingi kusobora kufooka omuheereza. Bintu ki ow’oruganda ebi asemeriire kukora kusobora kufooka omuheereza?
BIKI EBI OSOBORA KUKORA KUFOOKA OMUHEEREZA OMU KITEBE
14. Nikimanyisa ki kuba muntu w’obujunanizibwa? (1 Timoseo 3:8-10, 12)
14 Hati leka tubazeeho bimu ha bintu ebirukwetaagisa ebirukubazibwaho omu 1 Timoseo 3:8-10, 12. (Soma.) Omuheereza omu kitebe asemeriire kuba ‘w’obujunanizibwa.’ Ekigambo eki nikisobora n’okuhindurwa kumanyisa “omuntu ow’arukutekwamu ekitiinisa.” Kinu tikirukumanyisa ngu tasobora kuseka rundi kusandaara. (Mug. 3:1, 4) Baitu nabwo osemeriire kuba muntu arukwekamba kuhikiiriza obujunanizibwa. Obu oraaba okira kumaliiriza omulimo ogukuhairwe kandi okagukora kurungi, ab’oruganda na banyaanya itwe omu kitebe nibaija kukwesiga kandi bakutemu ekitiinisa.
15. Nikimanyisa ki okutaba w’endimi ibiri hamu n’okutaba w’omururu?
15 ‘Okutaba n’endimi ibiri’ kinu nikimanyisa ngu obaza amananu kandi oli mwesigwa. (Nfu. 3:32) ‘Kutaba w’omururu’ nikimanyisa ngu oba mwesigwa obu oyejumbira omu by’obusubuzi n’abandi n’omulingo okozesaamu sente. Torora enkoragana hagati yawe n’Abakristaayo bagenzi bawe nk’omugisa ogw’okubakoramu sente.
16. (a) Nikimanyisa ‘okutanywa amarwa maingi’? (b) Nikimanyisa ki kuba n’omuntu ow’omunda omurungi?
16 ‘Abatanywa amarwa maingi’ nikimanyisa ngu tosemeriire kumanywa nk’omuntu ow’arukunywa amarwa ekihinguraine. Kuba ‘n’omuntu ow’omunda omurungi’ nikimanyisa ngu n’ohondera endengo za Yahwe. N’obu kiraaba ngu tohikiriire, oyegondeza omu businge oburuga omu kuba n’enkoragana enungi na Ruhanga.
17. Nikimanyisa ki kubanza kulengwa? (1 Timoseo 3:10; Rora n’ekisisani.)
17 ‘Kubanza kulengwa’ nikimanyisa ngu abagurusi barozere ngu nohikiiriza kurungi obujunanizibwa bwawe kandi noyesigwa. Nahabweki, abagurusi obu barakuha obujunanizibwa, n’obwegendereza, hondera oburagirizi kuruga hali bo na hali ekitebe. Kigumye ngu n’omanya kyonyini eki osemeriire kukora n’akasumi osemeriire kukimaliiriza. Obu orakora kurungi omulimo ogukuhairwe kandi okagukora n’obwekambi, ab’oruganda na banyaanya itwe omu kitebe nibaija kukirora ngu oliyo n’ofooka omuntu w’obujunanizibwa. Abagurusi mukole kyona ekirukusoboka kurora mwatendeka ab’oruganda ababatiziibwe. (Soma 1 Timoseo 3:10.) Omu kitebe kyanyu harumu ab’oruganda ababatiziibwe abaine emyaka hagati ya 10 kuhika ha 14 rundi kugaruka hansi? Baine entekaniza enungi ey’okwesomesa kandi betekaniriza kurungi ensorrokano? Bakira kugarukamu omu nsorrokano kandi bejumbira omu buheereza? Obu kiraaba nukwo kiri, bahe obujunanizibwa obusemeriire emyaka yabo n’enyikara yabo. Omu mulingo ogu, ab’oruganda banu abato nibasobora kwoleka ngu nibahikiriza kurungi obujunanizibwa bwabo. Kandi hanyuma, nambere barahikiza emyaka 17 kuhika ha 19, nibasobora kuba baine ebirukwetaagisa kufooka baheereza omu kitebe.
Abagurusi nibasobora kulenga ab’oruganda ababatiziibwe kuraba omu kubaha obujunanizibwa (Rora akacweka 17)
18. Nikimanyisa ki ‘kutabaho eky’okuhanwa’?
18 ‘Bataroho ekyokuhanwa’ nikimanyisa ngu busaho muntu weena ow’arukukujunaana ngu noyejumbira omu kukora ekintu ekibi. Kyamananu ngu Abakristaayo nibasobora kuhangirirwa. Abantu bakahangirra Yesu kandi akagamba ngu ekintu nikyo kimu ekyakuhikire ha bahondezi be. (Yoh. 15:20) Baitu obu oraikara oine engeso enungi nka Yesu, noija kuba ekyokurorraho ekirungi omu kitebe.—Mat. 11:19.
19. Nikimanyisa ki kuba n’omukazi omu?
19 ‘Omusaija ow’aine omukazi omu.’ Obu oraaba oli omu buswere, osemeriire kuhondera endengo za Yahwe ezirukukwata ha buswere—eki nikyo omusaija omu, omukazi omu. (Mat. 19:3-9) Omusaija Omukristaayo tasemeriire kwejumbira omu busiihani. (Baheb. 13:4) Kinu nikimanyisa ngu, osemeriire kuba mwesigwa hali mukazi wawe, kandi tosemeriire kutandikaho enkoragana ey’embaganiza n’abakazi abandi.—Yob. 31:1.
20. Ow’oruganda ayoleka ata ngu naafaaho eka ye ‘omu mulingo omurungi’?
20 ‘Nibalema kurungi abaana baabo n’enju zaabo bonka.’ Obu oraaba oli nyineeka, osemeriire kutwara obujunanizibwa bwawe nk’ekintu ekikuru. Osemeriire kuba n’okuramya kw’eka butoosa. Tebeza na mukazi waawe n’abaana baawe nk’oku kirukusoboka. Konyera abaana baawe kuba n’enkoragana enungi na Yahwe. (Bef. 6:4) Omusaija owafaaho eka ye aba naayoleka ngu nasobora kurolerra n’ekitebe.—Lengesaniza na 1 Timoseo 3:5.
21. Obu oraaba otakatandikire kuheereza nk’omuheereza omu kitebe, kiki eki osobora kukora?
21 Ab’oruganda, obu muraaba mutarukuheereza nk’abaheereza omu kitebe, nyaburainywe musome ekicweka kinu n’obwegendereza kandi musabe Yahwe ha nsonga enu. Musomeho ebintu ebirukwetaagisibwa kufooka baheereza omu kitebe kandi mukole n’amaani kusobora kibihikiiriza. Mutekerezeeho okugonza oku mwiniire Yahwe hamu n’ab’oruganda na banyaanya itwe. Yongera ha kugonza oku oiniire ab’oruganda na banyaanya itwe kandi otekerezeeho ensonga habwaki osemeriire kubaheereza (1 Pet. 4:8, 10) Kora naamaani kufooka omuheereza kandi noija kutunga okusemererwa obu oraheereza ab’oruganda na banyaanya itwe omu kitebe. Leka Yahwe ahe omugisa amaani ag’orukutekamu kusobora kufooka omuheereza omu kitebe!—Baf. 2:13.
EKIZINA 17 “Ningonza”
a KUSOBORRA EBISISANI: Ha mukono gw’emoso, n’obwebundaazi Yesu naaheereza abegeswa bwe, ha mukono ogw’obulyo, omuheereza omu kitebe naakonyera ow’oruganda ow’akuzire omu myaka.
