OMUNTU ow’arukukora omu ofiisi y’entebereza y’obwire arora omuyaga ogw’amaani nigwija. Kandi akyetegereza ngu nigugenda kuteera ekiikaro ekirumu abantu baingi. Baitu habwokuba n’agonza abantu batahikwaho akabi akora kyona ekirukusobora kubahabura ekiyaga kitakaizire.

Omulingo nugwo gumu n’omu kasumi kanu, Yahwe aliyo nahabura abantu boona omu nsi nk’oku nihaija ekiyaga eky’akabi muno kukira ebigwererezi ebindi byona ebyakaho omu nsi. Kinu nakikora ata? Kandi nitukigumya tuta ngu ahaire abantu obwire oburukumara kusobora kwetekaniza? Kusobora kugarukamu ebikaguzo binu leka tubazeeho omulingo Yahwe y’ahabwiremu abantu omu busumi obwa kara.

Emirundi nyingi omu busumi bwakara Yahwe yarangaga kwija “kwemiyaga” ey’embaganiza rundi nk’oku yabaga ali haihi kucwera omusango abajemera ebiragiro bye. (Nfu. 10:25; Yer. 30:23) Emirundi egi yoona, akahabura abantu bukyali kara kandi yabamanyisa ekibasemeriire kukora kusobora kumworobera. (2 Bakam. 17:12-15; Neh. 9:29, 30) Emirundi egi yoona yakozesaga abaheereza be abesigwa kukonyera abantu kumanya kara eky’okukora atakabacweriire omusango.​—Am. 3:7.

Omu ha baheereza be abesigwa abayakozeseze nuwe Nuha. Akamara emyaka nyingi, n’agambira abantu abakaba bali basihani kandi abaagonzaga muno kurwana nk’oku Ruhanga akaba n’agenda kuhwerekereza ensi yoona n’akozesa Okusandaara kw’Amaizi. (Kub. 6:9-13, 17) Kandi akabagambira ekibasemeriire kukora nukwo batahwerekerra. Enu niyo nsonga habwaki Nuha yayeserwe “omudumi owokuhikirra.”​—2 Pet. 2:5.

Nuha n’obwaraaba yayekambire kubatebeza obutumwa bwa Ruhanga, bakanga kuhurra. Bakooleka ngu tibaine kwikiriza kwona. Ekyarugiremu Okusandaara kw’Amaizi obukwaizire ‘kukatwara boona.’ (Mat. 24:39; Baheb. 11:7) Empero obuyairiire haihi baali batasobora kwekwasa ngu Ruhanga akaba atabahabwire ekirukumara.

Obwire obumu Yahwe, yahaburaga abantu hasigaireyo akasumi kake “ekiyaga” ky’omusango gwe kwija. Kinu obukyabahoga, Yahwe yakigumyaga ngu abantu abarukugenda kukwatwaho abahaire obwire oburukumara obw’okwegarukamu. Ekyokurorraho, obwakaba atakaletiire ihanga lya Misiri emihito ikumi, akabagambira bukyali kara. Obwakaba atakalesere omuhito ogwa musanju Yahwe katuma Musa na Aroni kugambira Faraho n’abaheereza be nk’oku akaba nagenda kunaga orubaale orw’amaani. Hati nk’oku orubaale rwali nirugenda kutandika ekiro ekyahondireho, tugambe ngu Ruhanga atahe abantu obwire burukumara obw’okwetekaniza? Baibuli n’egamba eti: “Ayatinire ekigambo kya Mukama omu bairu ba Faraho, yairukiza abairube namagana ge omu maju: nogu atarayerinzire ekigambo kya Mukama, yaleka abairube namaganage omu bwerre.” (Kurug. 9:18-21) Kinu nikyolekera kimu ngu, Yahwe akabaha obwire oburukumara, kandi abo abayanguhire kumworobera batabonabone nk’abo abamujeemire.

Omuhito ogwa ikumu gutakaizire Yahwe akongera y’ahabura Faraho n’abairu be bukyali kara. Baitu omu budomadoma bwabo bakanga kumuhuliiriza. (Kurug. 4:22, 23) Ekyarugiremu, abaana baabo aboojo emizigaijo bakafa. Eki kakikaba kibi muno! (Kurug. 11:4-10; 12:29) Kyali nikisoboka kwerinda akabi kanu? Ego! Musa akamanyisa Abaisaleri ha muhito gunu ogwa ikumi kandi y’abagambira n’omulingo baali nibasobora kujuna  amaka gaabo. (Kurug. 12:21-28) Bantu baingaha abahondire obuhabuzi bwe? Abantu nk’obukaikuru busatu, otwaliremu Abaisaleri hamu “nekitebe ekyabanyaihanga” abatali Abaisaleri, bakakiraho baruga omu Misiri.​—Kurug. 12:38.

Ebyokurorraho binu nibyoleka kurungi ngu Yahwe yabanzaaga kuhabura abantu kandi yabahaga obwire oburukumara. (Bir. 32:4) Habwaki Yahwe yakoraga ekintu kinu? Omukwenda Petero akagamba ngu Yahwe ‘tarukugonza omuntu wena [kuhwerekerra], baitu bona bahike omu kwegarukamu.’ (2 Pet. 3:9) Ruhanga akooleka ngu n’afaaho abantu. Akaba n’agonza begarukemu kandi bahondere obuhabuzi bwe akasumi k’omusango katakahikire.​—Is. 48:17, 18; Bar. 2:4.

N’omu kasumi kanu abantu basemeriire kworobera omu bwangu obuhabuzi oburukuhebwa abantu omu nsi yoona. Yesu obw’akaba ali omu nsi, akaranga ngu obusinge bunu bulihwaho omu kasumi ‘ak’omuhito omwingi.’ (Mat. 24:21) Obwakaba n’abazaaho omusango ogw’omu kasumi ak’omu maiso, Yesu akabazaaho obunabbi oburukwoleka kurungi ebintu ebiribaho, n’ebirihika ha baheereza be akasumi ako obukaliba kali haihi kuhika. Akabazaaho ebintu eby’amaani ebiriyo nibihaho kasumi kanu omu nsi yoona.​—Mat. 24:3-12; Luk. 21:10-13.

Nk’oku obunabbi obu buliyo nibuhikirra, Yahwe n’atererra buli omu kumworobera n’okumuheereza. Nagonza abantu abaramworobera babe n’obwomeezi oburungi hati, kandi omu kasumi k’omu maiso begondeze omu migisa ey’eriba omu nsi ye empyaka ey’okuhikirra. (2 Pet. 3:13) Habwokuba Yahwe nagonza kukonyera abantu kwikiririza omu mirago ye, n’abamanyisa obutumwa oburajuna obwomeezi bwabo. Obutumwa bunu niyo ‘Enjiri ey’Obukama,’ Yesu eyiyarangire ngu “eritebezebwa omu nsi zona, okuba kaiso hali amahanga gona.” (Mat. 24:14) Ruhanga atekaniize kurungi abaheereza be ab’amananu kandi nubo arukukozesa ‘kutebeza’ obutumwa bwe omu mahanga agarukuhika omu 240. Yahwe nagonza abantu baingi borobere obuhabuzi bwe nukwo batahwerekerezebwa “ekiyaga” eky’omusango gw’okuhikirra ekiriyo nikiija.​—Zef. 1:14, 15; 2:2, 3.

Nahabweki obwakaiso nibukyolekera kimu kurungi ngu, Yahwe aha abantu obwire oburukumara korobera obuhabuzi bwe obwaba atakabacweriire omusango. Baitu ekikaguzo ekikuru kiri ngu: Abantu barayorobera obuhabuzi bwa Ruhanga obwire butakahwoireyo? Nahabweki itwe nk’abaheereza ba Ruhanga, leka tweyongere kutamu amaani kukonyera abantu abandi nukwo batahwerekerra empero y’obusinge bunu obweraija.