1. Habwaki tusemeriire kuheereza Yahwe wenka?

TUSEMERIIRE kuheereza Yahwe wenka habwokuba nuwe Muhangi waitu kandi nuwe yatuhaire obwomeezi. (Kus. 4:11) Baitu haroho obutulemesebwa. N’obukiraaba ngu nitugonza Yahwe kandi nitumutamu ekitiinisa, haroho ebintu ebisobora kutuhugura tukalemwa kuheereza we wenka. Kikuru muno tumanye omulingo kinu kisobora kubaho. Baitu leka tubanze turole kuheereza Yahwe wenka nikitwarramu ki.

2. Kusigikirra ha Matayo 4:10, obuturaaba nituheereza Yahwe wenka nitwija kukora ki?

² Kusigikirra ha Baibuli, kuheereza Yahwe wenka nikitwarramu kumugonza n’omutima gwaitu gwona. Obuturaaba nitugonza muno Yahwe, nuwe wenka turukwija kuheereza. Nahabweki titwikiriza kugonza omuntu ondi wena rundi ekintu kyona kumukira.​—Soma Matayo 4:10.

3. Nsonga ki ezituleetera kuheereza Yahwe wenka?

³ Tituheereza Yahwe wenka omu butamanya. Habwaki nitugamba tuti? Habwokuba tumuheereza nitusigikirra ha bintu ebitumwegereho. Tuhurra nitugonza kwegera ha miringo ye enungi. Tumanyire ebyagonza n’ebyatagonza kandi ebyagonza nibyo tugonza baitu eby’anoba naitwe tubinoba. Tumanyire kandi tusagika ekigendererwa kye hali abantu. Omugisa ogwatuhaire ogw’okuba banywani be gutuleetera okusemererwa kwingi. (Zab. 25:14) Buli kimu kyona ekitwega hali Ruhanga kituleetera kweyongera kumwirra haihi.​—Yak. 4:8.

4. (a) Sitaani akozesa ki kucekya okugonza kwaitu hali Yahwe? (b) Nitwija kubazaaho ki omu kicweka kinu?

 ⁴ Sitaani nuwe mulemi w’ensi enu kandi akozesa ebintu ebitukira kugonza kutwohya kwebembeza ebintu abantu b’ensi ebibarora nk’ebikuru rundi kuhondera okwegomba kwaitu okw’omubiri. (Bef. 2:1-3; 1 Yoh. 5:19) Ekigendererwa kye nikyo kutuleetera kugonza ebintu ebindi nukwo tulemwe kugonza Yahwe wenka. Leka tubazeeho emiringo ebiri nk’oku Sitaani asobora kukikora. Ogw’okubanza, atwohya kweserurra itungo, kandi ogwakabiri nugwo ngu atwohya kugonza eby’okwesemeza ebitali birungi.

5. Habwaki tusemeriire kwerinda kutandika kugonza sente?

⁵ Itwena tugonza kuba n’eby’okulya ebirukumara, engoye enungi hamu n’enju enungi. Baitu tusemeriire kwerinda kutandika kugonza sente. Abantu baingi omu nsi ya Sitaani bagonza sente hamu n’ebintu ebizigura. (2 Tim. 3:2) Yesu akaba akimanyire ngu abahondezi be nabo nibasobora kwijwamu entekereza y’okugonza sente. Akabagambira ati: “Busaho muntu asobora okukorra bakama babiri baitu alinobaho omu, nagonza ondi; rundi aligumira homu, nagaya ondi. Timurukusobora kukorra Ruhanga [n’itungo].” (Mat. 6:24) Omuntu arukuramya Yahwe baitu ha kaire nuko kamu obwire n’amaani ge ebirukukira obwingi n’abimarra omu kuserra itungo ly’ensi, aba nalengaho kukorra abakama babiri. Aba atarukuheereza Yahwe wenka.

6. Ebigambo bya Yesu hali ekitebe kya Laodikiya nibitwegesa ki?

⁶ Ha kumalirra kw’ekyasa eky’okubanza C.E., Abakristaayo ab’omu kitebe kya Laodikiya baali nibepanka nibagamba ngu: “Ndi muguda, kandi ntungire bingi, kunu tindoho ekindukusega.” Baitu omu maiso ga Yahwe hamu na Yesu bakaba bali ‘banaku, kandi  b’obujune, kandi b’amaseege, kandi bafu b’amaiso, kandi bali kwonka.’ Yesu atabahane habwokuba baali baguuda baitu akabahana habwokuba kugonza itungo kwali kubaletiire kusiisa enkoragana yabo na Yahwe. (Kus. 3:14-17) Kakuba tutandika kwijwamu entekereza ey’okugonza itungo, ahonaaho tweyihemu entekereza egi. (1 Tim. 6:7, 8) Kuba tutakikora, nitwija kutandika kugonza ebintu ebindi kandi Yahwe tarukwija kwikiriza okuramya kwaitu, habwokuba nitwija kuba tutarukumuheereza n’omutima gwaitu gwona. Yahwe nagonza omuheereze “nomutima gwawe gwona.” (Mar. 12:30) Kiki ekisobora kutuleetera kutandika kugonza sente?

7-9. Ekyokurorraho ky’omugurusi w’ekitebe arukwetwa David nikitwegesa ki?

⁷ Tekerezaaho ekyokurorraho kya David, kuruga omu ihanga lya United States kandi anyakuli omugurusi w’ekitebe omwekambi. Nagamba ngu yayekambaga muno ha mulimo gwe. Omu kampuni ey’akaba nakorramu bakamukuza kandi akamanywa omu ihanga lyona nk’omu h’abantu abakaba nibakirayo kukora kurungi omulimo ogu. David nagamba ati: “Omu kasumi ako, ebitiinisa na sente ezinkaba nintunga habw’omulimo gwange natekerezaga ngu migisa kuruga hali Yahwe.” Baitu mali ekaba migisa kuruga hali Yahwe?

⁸ David akatandika kukyetegereza nk’oku omulimo gwe gwali gutandikire kusiisa enkoragana ye na Yahwe. Nagamba ati: “Obunabaga ndi omu nsorrokano rundi omu buheereza, nayesangaga nintekerezaaho ebizibu ebya ha mulimo. N’obukiraaba ngu nkaba nintunga sente nyingi, naikaraga nyeralikiriire kandi nkatandika kutunga ebizibu omu ka yange.”

⁹ David akakyetegereza ngu asemeriire kuhinduramu ha bintu eby’akaba n’ayebembeza omu bwomeezi bwe. David nagamba ati: “Nkakora  encwamu y’amaani kusobora kuhindura enyikara yange.” David akagambira mukama we nk’oku akaba nagonza ahinduleho obwire y’amaraga nakora. Kiki ekyarugiremu? Mukama we akamubiinga. Kiki David ekiyakozere? Nagamba ati: “Ekiro ekyahondiireho, nkaijuza foomu ey’okuheereza kapayoniya omukonyenzi ntarukuleka.” Kusobora kutunga sente David na mukazi bakatandika kukora omulimo gw’okuyonja omu byombeko ebikooto. Hanyuma y’akasumi, akatandika kuheereza nka payoniya ow’akasumi koona kandi na mukazi we akahika yafooka payoniya w’akasumi koona. David na mukazi we tibatiina kukora omulimo ogw’abantu baingi bagayaga habwokuba ekika ky’omulimo tinikyo kikuru halibo. N’obukiraaba ngu nibatunga sente ntaito muno kukira ezibatungaga kara, buli kwezi basobora kwehikyaho ebyetaago byabo. Bacweriremu kimu kwebembeza Yahwe eby’agonza kandi beroliire bonka omulingo Yahwe arolerramu abo abebembeza Obukama.​—Mat. 6:31-33.

10. Nitusobora tuta kulinda omutima gwaitu?

¹⁰ Tube twine itungo lingi rundi litaito, itwena tusemeriire kulinda emitima yaitu. Omu mulingo ki? Oyerinde kugonza itungo. Otaikiriza omulimo gwawe kuba mukuru muno haliiwe kukira kuheereza Yahwe. N’osobora ota kumanya obworaaba otandikire kugonza itungo? Wekaguze ebikaguzo binu: ‘Nkira kutekerezaaho omulimo gwange obumba ndi omu buheereza rundi omu nsorrokano? Nyikara nyeralikiriire ngu tindukwija kuba na sente ezirukumara omu kasumi ak’omu maiso? Sente hamu nitungo biretiire eka yange kubamu ebizibu? Ninsobora kwikiriza kukora omulimo ogwa hansi kusobora kwongera ha bwire ndukumara nimpereza Yahwe?’ (1 Tim. 6:9-12) Obuturaaba nitutekerezaaho ebikaguzo binu, twijuke ngu Yahwe natugonza kandi araganiize boona abamuheereza n’omutima gumu ati: “Tindikuleka na kake, kunu tindikuhemukira na kake.” Kandi enu niyo nsonga habwaki omukwenda Paulo yagambire ati: “Omu kutekereza kwanyu muleke okwegomba erupiya.”​—Baheb. 13:5, 6.

11. Eby’okwesemeza nibisobora bita kukwataho omuntu?

¹¹ Yahwe nagonza otunge okusemererwa omu bwomeezi kandi eby’okwesemeza nibisobora kukuletera okusemererwa. Kandi na Baibuli n’egamba eti: “Tiharoho ekigasira omuntu okira okulya nokunywa nokulisa obwomezi bwe ebirungi omu kutalibanakwe.” (Mug. 2:24) Baitu eby’okwesemeza  eby’ensi ebirukukira obwingi nibisobora kuba by’akabi haliitwe. Birumu engeso embi, kandi nibisobora kuleetera abantu kwikiriza rundi kugonza ebikorwa ebirukutangwa omu Baibuli.

12. Kusigikirra ha 1 Abakolinso 10:21, 22, habwaki tusemeriire kwegendereza obuturukuba nitukomamu eby’okwesemeza?

¹² Nitugonza kuheereza Yahwe wenka, nahabweki titusobora kulya ha “meza ya [Yahwe],” hamu “nemeza yabacwezi.” (Soma 1 Abakolinso 10:21, 22.) Kulya n’omuntu ekiihuro kakira kuba kokurorraho k’obunywani. Kakuba tucwamu kwesemeza n’ebintu ebirukukurakuraniza, okurwana, oburaguzi, obusihani, rundi kwegomba okubi hamu n’entekereza embi nituba nitusisana nk’abarukulya ekiihuro ekicumbirwe abanyanzigwa ba Yahwe. Ekintu kinu ky’akabi muno haliitwe kandi kisiisa enkoragana yaitu na Yahwe.

13-14. Kusigikirra ha Yakobo 1:14, 15, habwaki tusemeriire kwegendereza obuturaaba nitukomamu eby’okwesemeza? Bazaaho ekyokurorraho.

¹³ Tekereza omulingo eby’okwesemeza birukusisanamu eby’okulya. Twine obugabe okucwamu ekintu ekituralya. Baitu obutumara kubirya tuba tutakyasobora kucwamu omulingo eby’okulya binu birakozesebwa omu mubiri gwaitu. Eby’okulya ebirumu ekiriisa bitukonyera kuba n’obwomeezi oburungi baitu kandi ebitaine kiriisa by’akabi ha bwomeezi bwaitu. Nitusobora kutarora akabi k’eby’okulya ebi ahonaaho, baitu nitusobora kukarora hanyuma y’akasumi.

¹⁴ Omulingo nugwo gumu, nitusobora kwecweramu ebintu ebiturayesemeza nabyo baitu hanyuma y’okwesemeza titusobora kucwamu omulingo birakwataho entekereza hamu n’enyehurra yaitu. Eby’okwesemeza ebirungi nibisobora kutuleetera kwehurra kurungi baitu ebibi byakabi hali itwe. (Soma Yakobo 1:14, 15.) Akabi ak’eby’okwesemeza ebibi nikasobora kutarorwa ahonaaho baitu nikasobora kurorwa hanyuma y’akasumi. Enu niyo ensonga habwaki Baibuli etutererra eti: “Mutalibihwabihwa ebisuba; Ruhanga taterwa enaku: baitu omuntu ebyasiga nibyo aligesa. Baitu anyakusigira omubirigwe wenka, aligesa omu mubiri okujunda.” (Bag. 6:7, 8) Nahabweki kikuru muno kwangira kimu eby’okwesemeza byona ebirumu ebintu Yahwe eby’anoba.​—Zab. 97:10.

15. Kisembo ki Yahwe eky’atuhaire ekitusobora kukozesa kwesemeza?

¹⁵ Abaheereza ba Yahwe baingi bagonza kurora tivi yaitu eya ha mukuru eya JW Broadcasting^®, enyakuroho eby’okwesemeza ebirungi byonka. Munyaanya itwe arukweta Marilyn akagamba ati: “JW Broadcasting enkonyire kweyongera kuba n’entekereza enungi, kandi ninsobora kurora buli kimu kyona ekiroho habwokuba byona birungi. Obunyehurra nyine amasu rundi mpwoirwemu amaani, ndora orubazo rundi vidiyo erukukwata ha kwekebiija ekyahandiikirwe kya buli kiro, nukwo ngarukwamu amaani. Kinu kindetera kweyongera kwirra haihi na Yahwe hamu n’ekitebe kye. Tivi enu ehinduliire kimu obwomeezi bwange.” Naiwe ekisembo kinu kuruga hali Yahwe nikikugasira? Tivi eya JW Broadcasting ebaho puroguramu empyaka buli kwezi, vidiyo nyingi, ebintu ebikwasirwe omu maraka hamu n’ebizina ebirukugarramu amaani.

16-17. Habwaki tusemeriire kwerinda kumara obwire bwingi omu by’okwesemeza, kandi kiki ekisobora kutukonyera?

¹⁶ Oihireho kwegendereza ekika ky’eby’okwesemeza, tusemeriire n’okutekerezaaho obwire turukumara omu by’okwesemeza. Kakuba tutegendereza, nitusobora kwesanga nitumara obwire bwingi omu by’okwesemeza kukira n’obutumara omu kuheereza Yahwe. Baingi kibagumira kumara obwire obusemeriire omu by’okwesemeza. Munyaanya itwe arukweta Abigail anyakwine emyaka 18 nagamba  ati: “Obumba mazire ekiro kyona ninkora, kurora tivi kinkonyera kuhuumuzaaho ebitekerezo. Baitu obumba ntegendeseriize nyesanga mazire esaaha nyingi muno nindora tivi.” Ow’oruganda omuto arukwetwa Samuel nagamba ati: “Nkira kwesanga mazire esaaha nyingi nindora obuvidiyo obugufu ha intaneti. Ntandika nigamba ngu nigenda kurora kamu konka baitu nyesanga mazire esaaha isatu rundi ina.”

¹⁷ Bintu ki ebisobora kutukonyera kwerinda kumara obwire bwingi omu by’okwesemeza? Eky’okubanza tusemeriire kumanya obwire tumara omu by’okwesemeza. Habwaki otahandiika obwire obw’omara omu by’okwesemeza buli wiiki? N’osobora kuhandiika ha kalenda yaawe obwire obw’omara n’orora tivi, oli ha intaneeti, orundi n’ozaana emizaano ey’aha simu rundi tabuleeti. Ekyakabiri, obworasanga ngu n’omara obwire bwingi muno omu by’okwesemeza, n’osobora kwekorra puroguramu y’obwire osemeriire kumara. Omu puroguramu yaawe tandika n’ebintu ebirukukira obukuru nukwo hanyuma otekemu eby’okwesemeza. Obworamara, saba Yahwe akukonyera kuhondera puroguramu ey’okozere. Obw’orakora oti n’oija kutunga obwire n’amaani ag’okwesomesa Baibuli, kuba n’okuramya kw’eka, kugenda omu nsorrokano, hamu n’okuheereza Yahwe omu mulimo gw’okutebeza. Kandi noija kweyongera kutunga okusemererwa omu by’okwesemeza byawe habwokuba obandize kukora Yahwe eby’agonza.

18-19. Nitusobora kwoleka tuta ngu nitugonza Yahwe n’omutima gwaitu gwona?

¹⁸ Omukwenda Petero obuyamazire kuhandiikaho ensi empyaka erukwija hamu n’okuhwerekerezebwa kw’ensi ya Sitaani akagamba ati: “Abarukugonzebwa, obumurukutegereza ebi mwekambe okusangwa omu businge, mutanyina kamogo nobugwakuba omusango omu maisoge.” (2 Pet. 3:14) Obutworobera obuhabuzi bunu tukaikara tuli becumi omu ngeso hamu n’omu by’omwoyo, twoleka ngu nitugonza Yahwe n’omutima gwaitu gwona.

¹⁹ Sitaani hamu n’ensi ye nibaija kwikara nibatwohya kwebembeza ebintu ebindi omu kiikaro ky’okwebembeza Yahwe. (Luk. 4:13) Baitu titurukwija kwikiriza kugonza omuntu wena rundi ekintu kyona kukira Yahwe. Kandi nitwija kugumizaamu nituheereza we wenka habwokuba nuwe wenka asemeriire kuramibwa!