EKICWEKA KY’OKWEGA 41
Ikara Oli Mwesigwa omu Kasumi ‘ak’Omuhito Omwingi’
“Mugonze [Yahwe], inywena abarukwerabe: [Yahwe] alinda abo kwesiga.”—ZAB. 31:23.
EKIZINA 129 Nitwija Kwikara Nitugumiisiriza
EBITURAYEGA *
1-2. (a) Omu kasumi akatali kahara abebembezi b’ensi nibaija kukora kurangirra ki? (b) Bikaguzo ki ebiturukwija kugarukamu?
TERAMU akasisani abebembezi b’ensi bamazire kurangirra ngu: “Mirembe, busaho kabi.” Nibehemba ngu basoboire kuleeta obusinge omu nsi yoona. Abebembezi banu nibagonza tutekereza ngu nibasobora kumaraho ebizibu byona ebiri omu nsi. Baitu tibasobora kutanga ekintu ekirahonderaho. Habwaki? Obunabbi bwa Baibuli nibwoleka ngu, ‘kuhwerekerra okwa bwangu kulibaizira, . . . kunu tibalikira na kake.’—1 Bas. 5:3.
2 Kikuru muno tutunge ebigarukwamu eby’ebikaguzo binu ebikuru: Kiki ekiraabaho omu kasumi ‘ak’omuhito omwingi’? Yahwe naija kuba nagonza tukole ki omu kasumi ako? Nitusobora tuta kwetekaniza hati nukwo tusobole kwikara tuli besigwa omu kasumi ak’omuhito omwingi?—Mat. 24:21.
KIKI EKIRAABAHO OMU KASUMI ‘AK’OMUHITO OMWINGI’?
3. Kusigikirra ha Okusuku’rwa 17:5, 15-18, Ruhanga alihwerekereza ata “Baburoni orukuru”?
3 Soma Okusuku’rwa 17:5, 15-18. “Baburoni orukuru” nirwija kuhwerekerezebwa! Nk’oku tusangirwe tugambire, abebembezi b’ensi tibarukwija kusobora kutanga ekintu kinu kubaho. Habwaki? Habwokuba ‘Ruhanga [alikita] omu mitima yabo okukora ebiyahanwire.’ Kiki ekiyahanwire? Kuhwerekereza ediini zoona ez’ebisuba otwaliremu n’ezo ezefoora kuba z’Ekikristaayo. * Ruhanga nuwe alita ekitekerezo kye omu mitima ‘y’amahembe ikumi’ ag’ekisoro ekirukutukura. Amahembe ikumi nigakikirra gavumenti zoona ezirukusagika “ekisoro.” Ekisoro kinu nikimanyisa Ekitebe ky’Amahanga Ageteraine. (Kus. 17:3, 11-13; 18:8) Gavumenti zinu obuziritahirra amadiini ag’ebisuba nuko kaliba kokurorraho akurukwoleka ngu omuhito omwingi gutandikire. Ekintu kinu kiribaho bwangu kandi kiritiinisa ensi yoona.
4. (a) Kusobora kuhwerekereza ediini ez’ebisuba abebembezi b’ensi nibasobora kwekwasa ki? (b) Abakaba bali bahondezi b’amadiini ag’ebisuba nibasobora kukora?
4 Titumanyire ensonga eziraletera gavumenti kutahirra Baburoni Orukooto. Nibasobora kwekwasa ngu amadiini nigalemesa entekaniza zaabo ez’okuleeta obusinge rundi ngu nigetahya muno omu by’obulemi. Rundi nibasobora kugamba ngu amadiini gatungire itungo erihinguraine. (Kus. 18:3, 7) Nikizooka ngu amahanga obugaratahirra amadiini, tigarukwija kuhwerekereza abantu boona abali omu madiini ganu. Baitu nikizooka ngu nigaija kuhwerekereza amadiini ganu gonka. Amadiini ganu obugaramara kuhwerekerezebwa, abahondezi baago nibasobora kugecwaho kandi bakyetegereza nk’oku abebembezi baabo ab’ediini bababiihire.
5. Yahwe araganize kukora ki omu kasumi ak’omuhito omwingi kandi habwaki?
5 Baibuli terukwoleka akasumi amahanga galimara nigahwerekereza Baburoni Orukooto, baitu tukimanyire ngu nikiija kutwara akasumi kake. (Kus. 18:10, 21) Yahwe araganiize ngu naija ‘kucwaho ebiro’ y’omuhito omwingi nukwo ‘abakome’ be hamu n’ediini ey’amananu bitahwerekerezebwa. (Mar. 13:19, 20) Yahwe naija kuba nagonza tukole ki, omuhito omwingi obuguratandika kuhikira kimu ha bulemu bwa Haramagedoni?
IKARA NOSAGIKA OKURAMYA OKW’AMANANU
6. Habwaki kwecwaho ediini ez’ebisuba kitarukumara?
6 Nk’oku twasangirwe tubalizeeho omu kicweka ekihoire, Yahwe nagonza abaheereza be becwereho kimu ediini ez’ebisuba. Baitu kuzecwaho tikirukumara. Tusemeriire kucweramu kimu kwikara nituheereza Yahwe omu diini ey’amananu. Leka turole emiringo ebiri ei tusobora kukikoramu.
Tutalireka kusorrokana hamu n’omu bwire obugumangaine (Rora akacweka 7) *
7. (a) Nitusobora tuta kwoleka ngu nitusagika endego za Yahwe ezirukukwata ha ngeso? (b) Kusigikirra ha Abaheburaniya 10:24, 25 habwaki kikuru muno kusorrokana hamu kukira muno omu kasumi kanu?
7 Ogw’okubanza, tusemeriire kugumira ha ndengo za Yahwe ez’okuhikirra ezirukukwata ha ngeso. Titusemeriire kusagika engeso ez’abantu b’ensi ezirukukwata ha kuterana. Ekyokurorraho, titusagika obusihani omu mulingo gwona, otwaliremu obuswere hagati y’abantu abarukusisana omu buhangwa nk’omusaija kuswera omusaija hamu n’ebikworwa byona eby’obukuuhya. (Mat. 19:4, 5; Bar. 1:26, 27) Ekyakabiri, tusemeriire kugumizaamu nituramiza hamu n’Abakristaayo bagenzi baitu. Tukora kyona ekirukusoboka kusorrokana hamu omu Byombeko by’Obukama, rundi obukibakyetagisize omu maka g’Abakristaayo bagenzi baitu, kandi obutulemesebwa tusorrokanira omu kwesereka. N’obuharaabaho ki, titurukwija kuleka kusorrokana hamu kuramya. Habwokuba twine kusorrokana hamu “nkoku [niturora] ekiro kiri haihi nokuhika.”—Soma Abaheburaniya 10:24, 25.
8. Obutumwa obuturukutebeza nibusobora buta kuhinduka omu kasumi ak’omu maiso?
8 Omu kasumi ak’omuhito omwingi obutumwa obuturukutebeza hati nibusobora kuhinduka. Hati nitutebeza amakuru amarungi ag’Obukama kandi nitulengaho kufoora abantu abegeswa. Baitu omu kasumi ak’omuhito omwingi nikisoboka kuba ngu nitwija kutebeza obutumwa oburukusaliza nk’orubaale. (Kus. 16:21) Nitusobora kutandika kurangirra nk’oku ensi ya Sitaani eri haihi kuhwerekerezebwa. Omu kasumi ak’omu maiso nubwo turamanya obutumwa obuturukugenda kutebeza. Titumanyire obuturaaba nitwija kugumizaamu nitukozesa emiringo ey’okutebeza eitwikaire nitukozesa kumara emyaka erukuhingura omu kikumi, rundi obutulikozesa emiringo endi. Nikizooka ngu omulingo gwona ogutulikozesa, tulisobora kutunga omugisa ogw’okutebeza obutumwa bwa Yahwe obw’omusango!—Ez. 2:3-5.
9. Abebembezi b’ensi nibasobora kwetwaza bata habw’obutumwa bwaitu, baitu kiki ekiturukugumiza kimu?
9 Nikizooka ngu obutumwa bwaitu nibwija kubiihiza gavumenti kandi zirengeho kutuhwerekereza nukwo tuleke kutebeza. Nk’oku turukwesiga Yahwe kutukonyera kutebeza hati, nukwo turukwija kumwesiga n’omu kasumi ako. Nitukigumiza kimu ngu Ruhanga waitu alituha amaani agalitusobozesa kukora eby’agonza.—Mik. 3:8.
IKARA OYETEKANIRIIZE OKUTAHIRIRWA KW’ABANTU BA RUHANGA
10. Nk’oku kyolekerwe omu Luka 21:25-28, abantu abarukukira obwingi nibaija kwetwaza bata omu kasumi ak’omuhito omwingi?
10 Soma Luka 21:25-28. Omu kasumi ak’omuhito omwingi, abantu balihunirra muno obubalirora ebintu byona ebibaali nibatekereza ngu birikaraho nibihwerekerra. Nibaija kuhikwaho ‘omuhito’ habw’okweralikirra ngu nibagenda kuhwerekerra omu kasumi akakyakizireyo kuba kabi omu byafaayo by’ensi. (Zef. 1:14, 15) Omu kasumi ako, n’obwomeezi bwa bantu ba Yahwe nibwija kweyongera kuguma. Habwokuba tituli kicweka ky’ensi nitwija kutunga emitalibaine. Kandi nikisoboka kuba ngu titurukwija kutunga bimu habyetaago byaitu.
11. (a) Habwaki abantu boona amaiso gaabo baligateeka h’Abakaiso ba Yahwe? (b) Habwaki tutasemeriire kutiina omuhito omwingi?
11 Akasumi kalihika nambere abantu abakaba bali omu madiini agahwerekereziibwe barukwija kubihirwa muno habw’okurora ediini y’Abakaiso ba Yahwe eky’aroho. Busaho kugurukyagurukya balyesalinga kandi bakibazeeho muno ha mikuru y’okubalizaho. Abebembezi b’ensi, hamu n’omulemi wabo Sitaani, nibaija kubihiirwa muno kurora ediini yaitu eky’aroho. Nibaija kuba balemerwe kuhikiriza ekigendererwa kyabo eky’okumarraho kimu ediini zoona omu nsi. Buli omu wena naija kututekaho amaiso. Omu kasumi ako, amahanga gali fooka Gogi owa Magogi. * Goona nigaija kwesorooza hamu kandi gakwatanize omu kutahirra abantu ba Yahwe. (Ez. 38:2, 14-16) Nitusobora kutandika kweralikirra habwokuba titumanyire kiki kyonyini ekiribaho omu kasumi ak’omuhito omwingi. Baitu, titusemeriire kutiina omuhito omwingi, habwokuba nitukigumya ngu Yahwe naija kutuha oburagirizi oburatukonyera kujunwa. (Zab. 34:19) Nitwija kwemerra, ‘twimukye emitwe [yaitu]’ habwokuba ‘okucungurwa kwaitu kuliba [kuli haihi] okuhika.’ *
12. “Omwiru omwesigwa kandi ow’amagezi” aikaire n’atukonyera ata kwetekaniriza ebirukwija omu maiso?
12 “Omwiru omwesigwa kandi ow’amagezi” aikaire natukonyera kumanya nk’oku tusobora kwikara tuli besigwa omu muhito omwingi. (Mat. 24:45, NW) Kinu akikozere omu miringo nyingi. Omulingo gumu nugwo kuraba omu puroguramu ey’ensorrokano enkooto ezabaireho 2016-2018. Embazo ezabaire omu nsorrokano ezi zikatutererra kweyongera kukurakuraniza emiringo eiturukwetaaga, ekiro kya Yahwe kitakahikire. Leka tweyijukyemu emiringo egi.
WEYONGERE KUBA MWESIGWA, KUGUMIISIRIZA HAMU N’OKUBA MUMANZI
Kusobora kuraba omu “omuhito omwingi,” osemeriire kwetekaniza hati (Rora akacweka 13-16) *
13. Nitusobora tuta kugumya obwesigwa bwaitu hali Yahwe kandi habwaki tusemeriire kukikora hati?
13 Obwesigwa: Orusorrokano orukooto orw’omwaka 2016 rukaba rwine omutwe ogurukugamba ngu “Ikara Oli Mwesigwa Hali Yahwe!” Puroguramu enu ekatwegesa ngu enkoragana yaitu na Yahwe obweraaba egumire, nitwija kwikara tuli besigwa haliwe. Tukaijukibwa ngu nitusobora kweyongera kwirra haihi na Yahwe kakuba tusaba kuruga ha mutima hamu n’okwekamba kwesomesa Baibuli. Kukora ebintu binu kitukonyera kugumira ebizibu n’obu birukuba biri by’amaani kwingana nka. Nk’oku omuhito omwingi gweyongiire kwirra haihi, nitunihira ngu obwesigwa bwaitu hali Yahwe n’Obukama bwe nibwija kweyongera kulengwa. Abantu nibaija kwikara nibatusekereza. (2 Pet. 3:3, 4) Emu ha nsonga enkuru ey’eribaletera kutusekereza eri ngu titurukusagika kicweka kyona eky’ensi ya Sitaani. Obuturaaba nitugonza kwikara tuli besigwa omu kasumi k’omuhito omwingi, tusemeriire kugumya obwesigwa bwaitu hati.
14. (a) Mpindahinduka ki eribaho omu b’oruganda abarukutwebembera omu nsi? (b) Habwaki kiritwetagisa kuba besigwa omu kasumi ako?
14 Omu kasumi ak’omuhito omwingi halibaho empindahinduka omu b’oruganda abarukutwebembera hanu omu nsi. Akasumi kalihika abaseserweho amagita boona batwarwe omu iguru kulema n’okweteraniza omu kurwana obulemu bwa Haramagedoni. (Mat. 24:31; Kus. 2:26, 27) Eki nikimanyisa ngu Akatebe Akalemi kaliba katakyali naitwe omu nsi. Baitu ab’ekitebe ekingi balikara batekaniziibwe kurungi. Ab’oruganda ab’omu ntaama ezindi abaine obujunanizibwa nubo balyebembera. Kiritwetagisa kwoleka ngu tuli besigwa kuraba omu kuhondera oburagirizi obubalituha kuruga hali Ruhanga. Kusobora kujunwa nikiija kutwetagisa kuhondera obuhabuzi bwabo!
15. Nitusobora tuta kweyongera kuba bantu abarukugumiisiriza, kandi habwaki kikuru tukikole hati?
15 Okugumiisiriza: Orusorrokano orukooto orw’omwaka 2017 rukaba rwine omutwe ogurukugamba ngu, “Otajwaha!” Puroguramu enu ekatukonyera kumanya omulingo tusobora kweyongera kugumiisiriza okulengesebwa kwona. Tukeega ngu okugumiisiriza kwaitu tikusigikirra ha nyikara eiturumu. Nitusobora kweyongera kugumiisiriza kakuba twesigira kimu Yahwe. (Bar. 12:12) Leka twijukege ngu Yesu akaraganiza ati: ‘[Aligumiisiriza] okuhika ha mpero, nuwe alijunwa.’ (Mat. 24:13) Kinu nikimanyisa ngu n’obuturaaba twine ekizibu kya mulingo ki, tusemeriire kugumiisiriza. Okwikiriza kwaitu nikwija kweyongera kuguma kakuba tugumiisiriza ebizibu byona ebituratunga, omuhito omwingi gutakaizire.
16. Obumanzi bwaitu busigikirra hali ki, kandi nitusobora tuta kweyongera kuba bamanzi omu kasumi kanu?
16 Obumanzi: Orusorrokano orukooto orw’omwaka 2018 rukaba rwine omutwe ogurukugamba ngu “Ba Mumanzi!” Omu rusorrokano runu tukaijukibwa ngu obumanzi bwaitu tibusigikirra ha busobozi n’obukugu bwaitu nk’abantu. Kusisanaho n’okugumiisiriza, obumanzi bwonyini, nabwo buruga omu kwesiga Yahwe. Kiki ekisobora kutukonyera kweyongera kwesigira kimu Yahwe? Tusemeriire kusoma Ekigambo kye buli kiro n’okwecumitirizaaho omulingo Yahwe yajuniremu abaheereza be abakara. (Zab. 68:20; 2 Pet. 2:9) Nukwo amahanga obugaratutahirra omu kasumi ak’omuhito omwingi, nitwija kwoleka obumanzi kandi twesige Yahwe kukira na kara. (Zab. 112:7, 8; Baheb. 13:6) Kakuba twega kwesigira kimu Yahwe hati, nikiija kutukonyera kwikara tuli bamanzi Gogi obw’aratutahirra. *
IKARA OLINDIRIIRE N’EKIHIKA OKUJUNWA KWAWE
Yesu hamu n’ihe lye ery’omu iguru bali haihi kwejumbira omu bulemu bwa Haramagedoni bahwerekereze abanyanzigwa ba Ruhanga! (Rora ekicweka ky’okwega 41, akacweka 17)
17. Habwaki tutasemeriire kutiina obulemu bwa Haramagedoni? (Rora ekisisani ekya ha kyesweko.)
17 Nk’oku twarozere omu kicweka ekihoire, abarukukira obwingi obwomeezi bwaitu bwona tubumazire omu biro bya hanyuma. Kandi nitunihira ngu nitwija kuraba n’omu muhito omwingi. Obulemu bwa Haramagedoni niyo eriba empero ey’obusinge bunu. Baitu titusemeriire kutiina ekintu kyona. Habwaki? Habwokuba obulemu bunu bwa Ruhanga kandi tikiritwetagisa kurwana. (Nfu. 1:33; Ez. 38:18-20; Zek. 14:3) Yahwe obw’aliha ekiragiro ky’okurwana, Yesu naija kwebembera ihe lya Ruhanga omu bulemu. Alyeteranizibwaho abaseserweho amagita boona abaliba bamazire kuhumbuka hamu n’enkumi n’enkumi za bamalaika. Boona hamu, balirwanisa Sitaani, badaimoni n’amahe gaabo ag’omu nsi.—Dan. 12:1; Kus. 6:2; 17:14.
18. (a) Kiki Yahwe ekyaraganiize? (b) Ekyahandiikirwe ekiri omu Okusuku’rwa 7:9, 13-17 nikitukonyera kita kulindirra akasumi ak’omu maiso tugumire?
18 Yahwe aturaganiize ati: “Ekyokurwanisa ekirukukorwa okurwanisa iwe tikiribona omugisa na kake.” (Is. 54:17) “Ekitebe kingi” eky’abaheereza ba Yahwe abesigwa “[baliruga] omu muhito omwingi” bali bomeezi! Kandi baligenda omu maiso n’okuheereza Yahwe. (Soma Okusuku’rwa 7:9, 13-17.) Baibuli n’etuha ensonga nyingi habwaki tusemeriire kukigumiza kimu ngu omu kasumi k’omu maiso tulijunwa! Tukimanyire kurungi ngu “[Yahwe] alinda abokwesiga.” (Zab. 31:23) Boona abagonza Yahwe kandi abamukugiza balisemererwa muno obubalirora ibara lya Yahwe erirukwera lyeziibwe.—Ez. 38:23.
19. Omu kasumi akatali kahara nitwija kwegondeza omu bwomeezi bwa mulingo ki?
19 Tekerezera omulingo ebigambo ebiri omu 2 Timoseo 3:2-5 bisobora kuhindurwamu obu nibibazaaho abantu abaliba omu nsi empyaka etarumu Sitaani n’entekereza ye. (Rora akasanduko “ Omulingo Abantu Balyetwazaamu omu Nsi Empyaka.”) Ow’oruganda George Gangas, ayaheeriizeho h’Akatebe Akalemi akabazaaho ensi empyaka ati: “Ensi egi eriba nungi muno habwokuba buli omu wena aliba naramya Yahwe! Omu kasumi akatali kahara nogenda kutunga omugisa gw’okwikara omu nsi empyaka. Oyomeere nka Yahwe. Nitwija komeera ebiro n’ebiro.” Mali okunihira kunu kakurungi muno!
EKIZINA 122 Ogume Kandi Otatiina!
^ kac. 5 Tukimanyire nk’oku omu kasumi akatali kahara, “omuhito omwingi” nigwija kwizira abantu boona. Kiki ekirihika h’abantu ba Yahwe omu kasumi ako? Yahwe naija kuba nagonza tukole ki? Miringo ki ei tusemeriire kukurakuraniza hati nukwo tusobole kwikara tuli besigwa omu kasumi ako? Ekicweka kinu nikiija kugarukamu ebikaguzo binu.
^ kac. 3 AMAKURU G’EKIGAMBO: Ebigambo amadiini agefoora ag’Ekikristaayo nibimanyisa ediini zoona ezigamba ngu nizihondera Kristo baitu tizirukwegesa abantu omulingo oguhikire ogw’okuramyamu Yahwe kusigikirra ha ndengo ze.
^ kac. 11 AMAKURU G’EKIGAMBO: Ekigambo Gogi owa Magogi (omu bugufu, Gogi) nikimanyisa amahanga agaliba gesoroize hamu kurwanisa abaheereza ba Yahwe omu kasumi ak’omuhito omwingi.
^ kac. 11 Kumanya ebirukukiraho ha bintu ebiribaho obulemu bwa Haramagedoni butakatandikire, rora esuura 21 ey’ekitabu God’s Kingdom Rules! Kumanya ebirukukiraho ha kutahirra kwa Gogi owa Magogi kandi n’omulingo Yahwe alirindamu abantu be omu kasumi ka Haramagedoni, rora esuura 17 na 18 ey’ekitabu Pure Worship of Jehovah—Restored At Last!
^ kac. 16 Orusorrokano orukooto orw’omwaka 2019, orwine omutwe “Okugonza Tikuhwaho!” rukatugumya ngu nitusobora kwikara hansi y’obulinzi bwa Yahwe habw’ebiro n’ebiro.—1 Kol. 13:8.
