BULI mwaka, entaama nyingi ez’omuhendo zigarurwa omu kitebe Ekikristaayo. Tekerezaaho “okusemererwa [okw’amaani okubaho] omu iguru” buli ntaama obwegaruka! (Luk. 15:7, 10) Obworaaba ogarwirwe omu kitebe, okigumye ngu Yesu, bamalaika, hamu na Yahwe basemererwa habwokuba oyongiire wafooka kicweka ky’ekitebe. Baitu, omu kwongera kwombeka enkoragana yaawe na Yahwe, nosobora kutangatangana ebizibu. Bizibu ki ebimu eby’osobora kutunga, kandi kiki ekirakukonyera?

Ab’oruganda na banyaanya itwe baingi, behurra bahwoirwemu amaani na hanyuma y’okugarurwa omu kitebe. Nosobora kuba noyetegereza omulingo Omukama Daudi yayehuliire. Hanyuma y’okuganyirwa ebibi bye, akagamba ati: “Ebyokusiisa byange bintangisize.” (Zab. 40:12; 65:3) Hanyuma y’omuntu kugaruka hali Yahwe nasobora kugumizaamu nayecwera omusango rundi nahurra aswaire kumara emyaka nyingi. Isabelle ayabingirwe omu kitebe kumara emyaka erukuhingura omu 20. * Akagamba ati: “Kikangumira muno kukiikiriza ngu Yahwe akaba nasobora kunganyira.” Kakuba ohwamu amaani, nosobora kwongera kuceka omu by’omwoyo. (Nfu. 24:10) Lengaho kutaikiriza eki kukubaho.

Abamu batiina habw’ebintu ebibasemeriire kukora kwongera kugarraho enkoragana yabo na Yahwe. Antoine obuyagarwirwe omu kitebe akagamba ati: “Nkehurra ngu nkaba nyeberwe ebintu bingi ebinkaba nyegere rundi ebinakoraga obunkaba nkyali omu h’Abakaiso ba Yahwe.” Habw’enyehurra nka zinu, abamu nibasobora kutiina kwejumbira omu bintu eby’omwoyo.

Ekyokurorraho, kakuba enju y’omuntu esiiswa ihunga ery’amaani, nasobora kwetuntura muno obwarukutekerezaaho amaani n’obwire ebirukwetaagisibwa kwongera kugyombeka. Omu mulingo  nugwo gumu, enkoragana yaawe na Yahwe obweraaba yasisikaire habw’ekibi eky’amaani, nosobora kwehurra ngu kwongera kugigarraho nikiija kukwetaagisa kuteekamu amaani maingi muno. Baitu obukonyezi buroho.

Yahwe n’aturaaliza ati: “Muije nu, [tuterekereze ensonga] hamu.” (Is. 1:18) Haroho ebintu eby’omazire kukora kusobora kuterekereza ensonga. Kandi Yahwe n’akugonza habw’amaani ag’otairemu. Kitekerezeeho: Habwokuba ogarukire hali Yahwe, nasobora kukukozesa nk’ekyokurorraho kwoleka ngu Sitaani mubiihi w’ebisuba!​—Nfu. 27:11.

Kugaruka hali Yahwe, nikyoleka ngu omazire ira kwirra haihi na Yahwe kandi na uwe n’araganiza kukwirra haihi. (Yak. 4:8) Kisemeza abandi kurora ngu oyongiire wagaruka omu kitebe, baitu noyetaaga kukora ekintu ekindi ekirukukiraho. Oine kugumizaamu nogumya okugonza okwoiniire Yahwe, So kandi Munywani wawe. Kinu nosobora kukikora ota?

Lengaho kweteraho ebigendererwa eby’osobora kuhikaho. N’osobora kuba n’okyaijuka amananu agarukubandirizibwaho agawayegere agarukukwata hali Yahwe hamu n’omurago gwe ogw’Orugonjo Orurungi. Baitu hati, nikikwetaagisa kwongera kuba n’entekaniza enungi nk’ey’okutebeza butoosa, kugenda omu nsorrokano, hamu n’okumara obwire n’Abakristaayo bagenzi baawe. Tekerezaaho ebigendererwa binu.

Baza na Yahwe butoosa. Yahwe n’akyetegereza ngu kakuba oikara noyejunaana habw’ekibi ekiwakozere nikisobora kukulemesa kumusaba. (Bar. 8:26) Eki obukiraaba nukwo kiri, ‘oyekambe omu kusaba,’ obu n’omugambira nk’oku orukugonza muno kuba munywani we. (Bar. 12:12) Andrej nagamba ati: “Nkaba ninyejunaana muno kandi nimpurra nswaire. Baitu buli murundi nasabaga, enyehurra ezi zakeehaga. Nahurraga obusinge bwingi muno.” Obworaaba otamanyire eky’okusaba, tekerezaaho esaara ez’Omukama Daudi ow’akaba ayegarukiremu ezirukusangwa omu Zabuli esuura eya 51 n’eya 65.

Wesomese Baibuli butoosa. Kinu nikiija kukukonyera kugumya okwikiriza kwawe kandi n’okugonza okwoiniire Yahwe kweyongere. (Zab. 19:7-11) Felipe akagamba ati: “Kutaba n’entekaniza ey’eby’omwoyo eya butoosa, nikyo kyandetiire kuceka omu by’omwoyo n’okubiihiza Yahwe. Nkaba ntarukugonza kwongera kubiihiza Yahwe, nahabweki nkacwamu kwikara ninyesomesa butoosa.” Naiwe nikyo osobora kukora. Obworaaba noyetaaga obuhabuzi oburakukonyera kumanya amasomo ag’osobora kwesomesaaho, habwaki otasaba omunywani ow’akuzire omu by’omwoyo kukukonyera?

Yongera kwombeka obunywani bwawe n’Abakristaayo bagenzi baawe. Abamu abagaruka omu kitebe, beralikirra ngu abandi nibaija kubarora kubi. Larissa akagamba ati: “Nk’aswara muno. Nkehurra ngu nsaalize muno Abakristaayo bagenzi bange. Nk’aikara n’enyehurra zinu kumara akasumi kaingi.” Ikara n’okigumya ngu abagurusi b’ekitebe, hamu n’Abakristaayo abandi abakuzire omu by’omwoyo betegekere kukukonyera kwongera kwombeka enkoragana na yaawe na Yahwe. (Rora akasanduuko “ Kiki Abagurusi b’Ekitebe Ekibasobora Kukora?”) Basemeriirwe habwokuba ogarukire, kandi nibagonza oikale oine okusemererwa!​—Nfu. 17:17.

Kiki ekisobora kukukonyera kwirra haihi n’ekitebe? Wejumbire omu bintu Abakristaayo bagenzi baawe ebibakora nk’okugenda omu nsorrokano, hamu n’omu buheereza obutoosa. Kinu kirakukonyera kita? Felix akagamba ati: “Ab’oruganda na banyaanya itwe, baali bandindiriire n’ekihika kugaruka. Nkehurra ndi w’omuhendo muno. Boona bakankonyera kwongera kuba kicweka ky’ekitebe, kuhurra nganyirwe, kandi n’okugumizaamu nimpeereza Yahwe.”​—Rora akasanduuko “ Kiki eky’Osobora Kukora?”

Sitaani naija kugumizaamu n’akusindikira ebizibu kulengaho kukucekya obworukuba noyongera kwombeka enkoragana yaawe na Yahwe. (Luk. 4:13) Ikara oyetekaniize kurabira omu kugumya obunywani bwawe na Yahwe.

Yahwe n’araganiza entaama ze ati: “Ndiserra eyabuzire, ndigarra eyabingirwe, ndiboha eyahendekere, ndigarramu amani eyalemerwe.” (Ez. 34:16) Yahwe akonyiire abandi baingi kugarraho enkoragana yabo hamu na uwe. Kigumye ngu n’agonza kukukonyera kugumizaamu n’oyombeka enkoragana ey’amaani hamu na uwe.