Abaisaleri Abaakara Bakarwana Obulemu—Habwaki Itwe Tutarukwikirizibwa?
OMU Bulemu obw’Ensi Yoona Obwakabiri, omukuru omu ihe ery’abanazi, akacoomera Abakaiso ba Yahwe nagamba ati: “Omuntu wena omulinywe obwarayanga kurwanisa Bufaransa rundi Bungereza inywena nimwija kwitwa.” N’obukiraaba ngu abaserikale Abanazi abakaba baine emundu, bakaba bemeriire haihi, busaho n’omu h’ab’oruganda ayaikiriize. Kinu kiketaagisa obumanzi obw’amaani! Ekyokurorraho Kinu ekirungi nikyoleka omulingo Abakaiso ba Yahwe baroramu obulemu: Twangirakimu kwejumbira omu bulemu obw’ensi enu. Abantu n’obubatugamba ngu nibaija kutwita kakuba tutarwana, twanga kugwera orubaju omu bulemu bw’ensi.
Tibali boona abeyeta Abakristaayo abaikiranganiza n’entekereza enu. Baingi baikiriza ngu Omukristaayo nasobora kandi asemeriire kulinda ihanga lye. Nibasobora kugamba bati, ‘Abaisaleri abaakara bakaba bali bantu ba Ruhanga kandi barwanaga obulemu, hati habwaki Abakristaayo ab’omu kasumi kanu batasemeriire kurwana?’ N’osobora kubagarukamu ota? Nosobora kubasoborra ngu enyikara ey’Abaisaleri abaakara n’eyahukanira kimu n’enyikara ey’abantu ba Ruhanga kasumi kanu. Tekerezaaho embaganiza zinu itaano.
1. ABANTU BA RUHANGA BOONA BAKABA BALI IHANGA LIMU
Omu busumi bwakara, Yahwe akasorooza abantu be kuba ihanga limu kandi eryo niryo ihanga lya Isaleri. Akeeta Abaisaleri ekintu kye “[eky’omuhendo], okubaganizibwa omu mahanga gona.” (Kurug. 19:5) Ekindi, Ruhanga akaba abahaire ekiikaro kimu kyonka eky’okwikaramu. Nahabweki Ruhanga obuyaragiraga Abaisaleri kurwanisa amahanga agandi, baabaga batarukurwanisa rundi kwita abantu abarukuramya Yahwe bagenzi baabo. *
Kasumi kanu, abantu abarukuramya Yahwe baruga “omu mahanga gona, nenganda, nabantu, nendimi.” (Kus. 7:9) Kakuba abantu ba Ruhanga bejumbira omu bulemu, nibasobora kuba nibarwanisa kandi nibaita abaheereza ba Yahwe bagenzi baabo.
2. YAHWE YARAGIRAGA ABAISALERI KUGENDA OMU BULEMU
Omu busumi bwakara, Yahwe yacwamuga nidi kandi n’ensonga habwaki Abaisaleri nibetaaga kugenda omu bulemu. Ekyokurorraho, Ruhanga akaragira Abaisaleri kurwanisa Abakanaani kubafubira habwokuba bakaba bahinguraine omu kuramya abadaimoni, kwejumbira omu bikworwa ebibi muno eby’obusihani, hamu n’okuhonga abaana. Yahwe akaragira Abaisaleri kuhwerekereza abantu abakoraga ebintu binu ebibi omu nsi ey’ekaba eraganiziibwe nukwo batabahabisa nabo kubikora. (Lev. 18:24, 25) Hanyuma y’Abaisaleri kutaaha omu Nsi ey’ekaba Eraganiziibwe, obwire obumu Ruhanga yabaragiraga kugenda omu bulemu kusobora kulinda Isaleri hali abanyanzigwa abaabaga babatahiriire. (2 Sam. 5:17-25) Baitu, busaho omurundi n’ogumu Yahwe obuyaikiriize Abaisaleri kwecweramu bonka kugenda omu bulemu. Obubakikoraga, emirundi erukukira obwingi harugamuga ebizibu eby’amaani.—Kubar. 14:41-45; 2 Byom. 35:20-24.
Kasumi kanu, Yahwe taragira abantu kugenda omu bulemu. Amahanga garwana kuhikiiriza ebigendererwa byago hatali ebya Ruhanga. Bagenda omu bulemu kurwanirra itaka, kwekorra sente, rundi habw’ensonga ey’obulemi. Baitu Ruhanga arora ata abo abarwana omu ibara lya Ruhanga kulinda ediini yaabo rundi kwita abanyanzigwa ba Ruhanga? Yahwe nuwe arukwija kurwanirra abaheereza be ab’amananu kandi ahwerekereze abanyanzigwa be omu bulemu obwa Haramagedoni omu kasumi ak’omu maiso. (Kus. 16:14, 16) Omu bulemu obu, ihe lya Ruhanga niriija kubamu ebihangirwe eby’omwoyo byonka hatali abaheereza be ab’omu nsi.—Kus. 19:11-15.
3. ABAISALERI TIBAITAAGA ABO ABAYOLEKAGA NGU NIBAIKIRIIRIZA OMULI YAHWE
Omu bulemu obw’akasumi kanu, baleka kwita abantu abaine okwikiriza nk’okwa Rahabu hamu n’eka ye nk’oku Yahwe yakozere omu bulemu bwe hali Yeriko?
Omu busumi bwakara, ihe erya Isaleri lyakiraga kwoleka embabazi hali abo abayolekaga ngu nibaikiririza omuli Ruhanga kandi baita abo Ruhanga abayacwamuga ngu basemeriire kufa. Wetegereze ebyokurorraho binu bibiri. N’obukiraaba ngu Yahwe akaragira Abaisaleri kuhwerekereza Yeriko, Abaisaleri bataite Rahabu hamu n’eka ye habwokuba akoleka okwikiriza. (Yos. 2:9-16; 6:16, 17) Hanyuma, orubuga rwona orwa Gibeoni rutahwerekerezebwe habwokuba Abagibeoni bakoleka ngu nibatiina Ruhanga.—Yos. 9:3-9, 17-19.
Kasumi kanu, amahe gaita n’abantu abooleka okwikiriza. Kandi obwire obumu, baita abantu aba buli kiro abataine musango omu bulemu bwabo.
4. ABAISALERI BAKABA BASEMERIIRE KUHONDERA EBIRAGIRO BYA RUHANGA EBY’OBULEMU
Omu busumi bwakara, Yahwe akaragira abaserikale Abaisaleri kurwana nibasigikirra ha buragirizi bwe. Ekyokurorraho, obwire obumu Ruhanga yabaragiraga kuha omugisa orubuga orubarukurwanisa, omugisa ogw’okugarraho ‘obusinge.’ (Bir. 20:10) Ekindi, Yahwe akaba nanihirramu abaserikale Abaisaleri kwikara bali becumi hamu n’okulinda endengo ze ezirukukwata ha ngeso. (Bir. 23:9-14) N’obukiraaba ngu amahe ag’amahanga agaali gabetoroire gakiraga kuhamba abakazi kuruga omu bicweka ebibaabaga basingwire, Yahwe ataikirize Abaisaleri kukora ekintu nk’eki. Amananu gali, bakaba batasemeriire kuswera omukazi kuruga omu rubuga oruhambirwe kuhikya harabireho okwezi kumu.—Bir. 21:10-13.
Kasumi kanu, amahanga agarukukira obwingi gatekaho omukono endagaano ezirumu ebiragiro ebirukukwata ha bulemu. N’obukiraaba ngu ebiragiro binu bitekwaho kulinda abantu aba buli kiro, amahanga gakira kucwa ebiragiro binu.
5. RUHANGA YARWANIRRAGA IHANGA LYE
Haroho ihanga lyona Ruhanga eryarwanirra kasumi kanu nk’oku yarwaniriire Isaleri ha rubuga rwa Yeriko?
Omu busumi bwakara, Yahwe yarwanirraga Abaisaleri, emirundi ey’erukukira obwingi yakoraaga ebyamahano kubakonyera kusingura. Ekyokurorraho, Yahwe akakonyera ata Abaisaleri kusingura orubuga rwa Yeriko? Nk’oku Yahwe akaba abaragiire, Abaisaleri ‘obubatokere nobwogo bwingi, muhuruzi ekagwa hansi,’ ekyabanguhire kukwata orubuga. (Yos. 6:20) Kandi bakasingura bata Abamoli? “[Yahwe] yanaga orubale orukoto halibo okuruga haiguru . . . Abo abafire orubale bakakira obwingi abo abatemerwe abana ba Isareri nobwogi obwa busitama.”—Yos. 10:6-11.
Kasumi kanu, busaho ihanga lyona Yahwe elya rwanirra omu nsi. Obukama Bwe oburukulemwa Yesu nk’Omukama, tibuli kicweka ky’ensi. (Yoh. 18:36) Baitu ohireho, Sitaani nuwe aine obusobozi hali gavumenti ez’abantu zoona. Obulemu oburumu ebikorwa eby’obukaali nibyoleka emiringo ya Sitaani.—Luk. 4:5, 6; 1 Yoh. 5:19.
ABAKRISTAAYO AB’AMANANU BALINZI B’OBUSINGE
Nk’oku turozere, enyikara yaitu kasumi kanu n’eyahukanira kimu hali ey’Abaisaleri abakara. Baitu, embaganiza zinu tizirinizo ensonga zonka habwaki tutagenda omu bulemu. Haroho n’ensonga ezindi. Ekyokurorraho, Ruhanga akaranga ngu omu biro ebya ha mpero abo abayegesa “tibalyega obundi okurwana,” rundi n’okwejumbira omu bulemu. (Is. 2:2-4) Ekindi, Kristo akagamba ngu abegeswa be tibakubaire kicweka ky’ensi; ekirukumanyisa ngu tibakugweriire rubaju omu nsonga ez’eby’obulemu.—Yoh. 15:19.
Kristo akongera yatererra abahondezi be kukora ekintu ekirukukiraho. Akabaragira kwerinda entekereza ezakubaletiire kwahura enzigu, ekiniga, hamu n’okurwana. (Mat. 5:21, 22) Ekindi, akaragira abahondezi be kuba bantu abarukulinda obusinge kandi abarukugonza abanyanzigwa baabo.—Mat. 5:9, 44.
Itwe kinu nitusobora kukikora tuta? Nikisoboka kuba ngu titurukugonza kurwana omu bulemu, baitu haroho obutwehurra ngu omuntu omu kitebe munyanzigwa waitu? Leka twikale nitulengaho n’amaani kweyihamu enyehurra nk’ezi.—Yak. 4:1, 11.
Omu kiikaro ky’okwejumbira omu bulemu obw’amahanga, tukurakuranize obusinge n’okugonza hagati yaitu. (Yoh. 13:34, 35) Leka tucweremu kimu kwikara tutarukugwera orubaju obutulindiriire ekiro Yahwe obwalimaraho obulemu bwona habw’ebiro n’ebiro.—Zab. 46:9.
^ Obwire obumu, enganda z’Abaisaleri zarwanisagangana, baitu obulemu bunu bwabiihizaga Yahwe. (1 Bakam. 12:24) Baitu obwire obumu, yasagikaga obulemu bunu habwokuba enganda ezimu zabaga zimurugireho rundi zikozere ekibi eky’amaani.—Bac. 20:3-35; 2 Byom. 13:3-18; 25:14-22; 28:1-8.
