1-2. (a) Gavumenti ezimu zihakaniize zita abantu ba Yahwe, baitu ubo betwaize bata? (b) Okuhiganizibwa nikusobora kuta kurugamu okusemererwa? (Bazaaho n’ekisisani ekya ha kyesweko.)

 KASUMI kanu, omu mahanga agarukuhingura omu 30 omu nsi yoona, omulimo gwaitu gutairweho ebiragiro eby’amaani rundi gutangiirwe kimu. Omu gamu h’amahanga ago, ab’obusobozi bataire ab’oruganda na banyaanya itwe omu nkomo. Musango ki ogubaakozere? Tibaine musango gwona ogubaakozere omu maiso ga Yahwe. Ekibaakozere, nukwo kusoma n’okwesomesa, kugambiraho abandi enyikiriza zaabo, n’okusorrokanira hamu n’Abakristaayo bangenzi baabo. Ekindi, bangire kugwera orubaju omu by’obulemi. N’obukiraaba ngu nibaraba omu kuhiganizibwa okw’amaani, abaheereza ba Ruhanga banu abesigwa bagumizeemu nibalinda obwesigwa bwabo​—ekirukumanyisa ngu bacweriiremu kimu kuheereza Yahwe. Kandi eki kibaletera okusemererwa!

² N’osobora kuba okaroraho ebisisani by’abamu h’abaheereza ba Yahwe banu abamanzi kandi wakyetegereza nk’oku bakaba bataire akaseko h’amatama. Baine okusemererwa habwokuba bakimanyire ngu kulinda obwesigwa bwabo hali Yahwe nikimusemeza. (1 Byom. 29:17a) Yesu akagamba ati: “Banyina omugisa abahigwa obwokuhikirra . . . Musemererwe, mukyanganuke muno: baitu empera yanyu nyingi omu iguru.”​—Mat. 5:10-12.

3. Nk’oku kyolekerwe omu Engeso Ezabakwenda 4:19, 20, abakwenda baketwaza bata obubahiganiziibwe omu kyasa eky’okubanza, kandi habwaki bayetwaize bati?

³ Ab’oruganda n’abanyaanya itwe nibaraba omu nyikara nizo  zimu abakwenda ba Yesu ezibarabiremu omu kyasa ky’okubanza obubaahiganiziibwe habw’okutebeza hali Yesu. Emirundi nyingi, abacwi b’emisango kuruga omu kooti enkuru ey’Abayudaaya ‘babaragiraga okutagamba omu ibara lya Yesu.’ (Eng. 4:18; 5:27, 28, 40) Abakwenda baketwaza bata? (Soma Engeso Ezabakwenda 4:19, 20.) Bakaba bakimanyire ngu omuntu arukubakira obusobozi nuwe akaba ‘abaragiire kutebeza abantu, n’okuba bakaiso’ ba Kristo. (Eng. 10:42) Nahabweki, Petero na Yohana abaali nibabakiikirra n’obumanzi bakagamba ngu basemeriire kworobera Ruhanga okukira abacwi b’emisango abo kandi babagambira ngu bakaba batarukwija kuleka kubazaaho Yesu. Omu mulingo ogu, bakasisana nk’abarukukaguza ab’obusobozi abo bati, ‘Nimulengaho kumanyisa ngu ebiragiro byanyu nibikira ebya Ruhanga?’

4. Nk’oku kyolekerwe omu Engeso Ezabakwenda  5:27-29, kyokurorraho ki abakwenda ekibaateriireho Abakristaayo ab’amananu, kandi nitusobora tuta kubegeraho?

⁴ Abakwenda bakatekaho ekyokurorraho ekirungi Abakristaayo boona ab’amananu ekibaikaire nibahondera kuruga obu, ekirukugamba ngu, “kituhikiriire okuhurra Ruhanga okukira abantu.” (Soma Engeso Ezabakwenda 5:27-29.) Hanyuma y’okubateera habw’okulinda obwesigwa bwabo, abakwenda bakaruga omu kooti enkuru ey’Abayudaaya, “basemeriirwe obwokutekerezebwa basemeriire okugizibwa ensoni habwibara [lya Yesu],” kandi bakagumizaamu nibatebeza!​—Eng. 5:40-42.

5. Bikaguzo ki ebiturukwetaaga kugarukamu?

⁵ Ekyokurorraho abakwenda ekibaatuteriireho nikituleetera kwekaguza ebikaguzo ebimu. Ekyokurorraho, bakasobora bata kworobera Ruhanga kukira abantu, kandi ha murundi nugwo gumu bakoorobera ekiragiro eky’omu Baibuli ekirukugamba ngu “omuntu wena ahurrege abalemi abakuru”? (Bar. 13:1) Nitusobora tuta omu kasumi kanu “okworoberaga abalemi nabobusobozi,” nk’oku omukwenda Paulo yagambire, kandi omu kasumi nuko kamu tukalinda obwesigwa bwaitu hali Ruhanga nk’omulemi arukukirrayo kimu?​—Tit. 3:1.

6. (a) “Abalemi abakuru” abarukubazibwaho omu Abarumi 13:1 nibaha, kandi tusemeriire kubatwaza tuta? (b) Kiki ekitusemeriire kumanya hali abalemi boona ab’ensi?

⁶ Soma Abarumi 13:1. Omu rukarra runu, ebigambo “abalemi abakuru” nibimanyisa abalemi b’abantu abanyakwine obusobozi hali abantu abandi. Abakristaayo basemeriire kworobera abalemi banu. Abalemi banu balinda obusinge, bakigumya ngu abantu balinda ebiragiro, kandi obwire obumu barwanirra abantu ba Yahwe. (Kus. 12:16) Nahabweki nituragirwa kusasura emisoro, empooza, kubatamu ekitiinisa hamu n’okutiinwa okubasemeriire. (Bar. 13:7) Baitu, gavumenti zinu ziine obusobozi habwokuba Yahwe nuwe aziikiriize kuba nabwo. Yesu akooleka kurungi omusingi gunu Omulemi w’Abarooma Pontio Pirato obwakaba namukaguza. Pirato obuyagambire ngu akaba aine obusobozi bw’okumuganyira rundi kumwita, Yesu akamugambira ati: “Tokubaire nobusobozi bwona hali nyowe, kakuba butarakuhairwe okuruga ha iguru.” (Yoh. 19:11) Nk’oku kyabaire hali Pirato, n’omu kasumi kanu, obusobozi bw’abalemi b’ensi boona n’ab’eby’obulemi bwine obugarukiro.

7. Nyikara ki nambere tutasemeriire kworobera abalemi, kandi kiki ekibasemeriire kumanya?

⁷ Abakristaayo basemeriire kworobera abalemi omu nsonga ezitarukucwa ebiragiro bya Ruhanga. Baitu titusemeriire kworobera abantu kakuba baturagira kukora Ruhanga ekyarukututanga, rundi kututanga Ruhanga ekyarukuturagira. Ekyokurorraho, nibasobora kuragira ensingaanto boona kutaaha amahe. * Rundi nibasobora kutanga Baibuli yaitu, n’ebitabu byaitu ebirukusigkirra ha Baibuli kandi bakatutanga kutebeza n’okusorrokana hamu. Abalemi obubakozesa kubi obusobozi bwabo, nk’okuhiganiza abahondezi ba Yesu, Ruhanga nuwe arukwija kubajunaana. Yahwe n’abarora!​—Mug. 5:8.

8. Mbaganiza ki enyakuli hagati ‘y’obukuru’ na “Anyakuli haiguru muno,” kandi habwaki kinu kikuru kukyetegereza?

⁸ Ekigambo “obukuru” nikimanyisa “obusobozi rundi amaani.” Baitu tikirukumanyisa “obusobozi rundi amaani agarukukirrayo kimu.” Eki nikyahukana n’ekitiinisa “Anyakuli haiguru muno.” N’obukiraaba ngu gavumenti z’abantu zibazibwaho ‘nk’abalemi abakuru,’ haroho obulemi obukuzikirra kimu obusobozi. Emirundi ena, Baibuli ekozesa ekitiinisa “Anyakuli haiguru muno” kubazaaho Yahwe Ruhanga. Dan. 7:18, 22, 25, 27.

9. Biki nabbi Danieri ebiyarozere omu kwolekwa?

⁹ Nabbi Danieri akatunga okwolekwa okwakyolekiire kimu ngu Yahwe aine obusobozi oburukukirra kimu obusobozi obundi bwona. Danieri akabanza kurora ebisoro bbina ebikooto ebirukukikirra obulemi kirimaani obwakara n’oburoho hati obu nubwo Baburoni, Abamedi n’Abaperesi, Buyonani, Roma, hamu n’oburoho kasumi kanu, Bungereeza n’Amerika. (Dan. 7:1-3, 17) Hanyuma Danieri akarora Yahwe Ruhanga aikaliire ha kitebe kye omu kooti omu iguru. (Dan. 7:9, 10) Nabbi ogu omwesigwa ekiyarozere ekirukwongeraho kisemeriire kuhabura abalemi boona kasumi kanu.

10. Kusigikirra ha Danieri 7:13, 14, 27, nibaha Yahwe abakwasa obulemi obw’ensi, kandi kinu nikigumya ki hali Uwe?

¹⁰ Soma Danieri 7:13, 14, 27. Ruhanga aihaho gavumenti zoona ez’abantu obusobozi kandi abuha ababusemeriire kandi abarukukira  amaani. Abuha baha? Abuha “omu arukusisana nkomwana womuntu,” Yesu Kristo, hamu ‘n’abarukwera abogu Anyakuli haiguru muno,’ kandi abo nubo 144,000 abaralema “ebiro nebiro.” (Dan. 7:18) Hataroho kugurukyagurukya, Yahwe nuwe “Anyakuli haiguru muno,” habwokuba nuwe wenka aine obusobozi obw’okukora ekintu nk’eki.

11. Kintu ki ekindi Danieri ekiyahandiikire ekirukwoleka nk’oku Yahwe nuwe Anyakuli haiguru muno hali amahanga goona?

¹¹ Ebintu Danieri yarozere omu kwolekwa nibikwatagana n’ekintu ekiyasangirwe abalizeho kara. Danieri akagamba ati: “Ruhanga owomu iguru . . .  aihaho abakama, kandi aimukya abakama.” Akongera yahandiika ati: “Anyakuli haiguru muno nuwe arukulema omu bukama bwabantu, kandi abuha owagonza wena.” (Dan. 2:19-21; 4:17) Haroho obusumi nambere Yahwe yaihireho rundi yataireho abalemi? Ego!

12. Bazaho ekyokurorraho ekirukwoleka omulingo Yahwe yaihireho abakama obulemi bwabo omu busumi bwakara. (Rora ekisisani.)

¹² Yahwe akyolekiire kimu nk’oku nuwe Anyakuli haiguru muno okukira “abalemi abakuru.” Tekerezaaho ebyokurorraho binu bisatu. Faraho wa Misiri akatwaza abantu ba Yahwe nk’abairu kandi emirundi nyingi akanga kubalekera. Baitu Ruhanga akabaiha omu bwiru kandi yaletera Faraho okudikira omu Nyanja Erukutukura. (Kurug. 14:26-28; Zab. 136:15) Omukama Berisaza owa Baburoni akakora obugenyi kandi yayepankiraho Mukama womu iguru kandi ‘yakugiza abacwezi befeza nabezabu’ omu kiikaro kya Yahwe. (Dan. 5:22, 23) Baitu Ruhanga akabundaaza omusaija ogu ow’emyehembo. “Ha kiro eki,” Berisaza akaitwa kandi obukama bwe bwaheebwa Abamedi n’Abaperesi. (Dan. 5:28, 30, 31) Omukama Herode Agulipa I owa Palestine akaita omukwenda Yakobo kandi hanyuma yateeka omukwenda Petero omu nkomo, n’ekigendererwa eky’okumwita. Baitu Yahwe akalemesa Herode kuhikiiriza ekigendererwa kye. ‘Malaika wa Yahwe akamutera,’ kandi yafa.​—Eng. 12:1-5, 21-23.

13. Bazaaho ekyokurorraho ekirukwoleka nk’oku Yahwe yasingwire abalemi baingi abeteraniize hamu.

¹³ Yahwe ayolekere nk’oku nuwe Anyakuli haiguru muno na hali abalemi baingi abeteraniize hamu. Akakonyera Isaleri kusingura  abakama 31 Abakanaani abakaba beteraniize hamu kandi n’okusingura ekicweka ekikooto eky’Ensi ey’Ekaba Eraganiziibwe. (Yos. 11:4-6, 20; 12:1, 7, 24) Ekindi, Yahwe akakonyera Isaleri kuhwerekereza kimu Omukama Ben-hadadi hamu n’abakama abandi aba Aramu 32.​—1 Bakam. 20:1, 26-29.

14-15. (a) Kiki Omukama Nebukadeneza n’Omukama Daliyo ekibagambire ha obulemi bwa Yahwe? (b) Kiki omuhandiiki wa Zabuli ekiyabalize hali Yahwe n’ihanga Lye?

¹⁴ Emirundi nyingi, Yahwe akyolekiire kimu ngu nuwe Anyakuli haiguru muno! Omukama Nebukadeneza owa Baburoni obuyayepankire ‘habwobusobozi bwamani ge, kandi habwekitinisa ekyobukuru bwe’ omu kiikaro ky’okukiikiriza n’obwebundaazi ngu Yahwe nuwe asemeriire kukugizibwa, Ruhanga akamuletera kugwa iraru. Hanyuma y’okukira, Nebukadeneza ‘akasiima Anyakuli haiguru muno’ kandi yaikiriza ngu “okulema [kwa Yahwe] kulema okutalihwaho.” Akongeraho ati: “Busaho arukusobora okutanga omukonogwe.” (Dan. 4:30, 33-35) Hanyuma y’obwesigwa bwa Danieri kulengwa na Yahwe kumujuna omu obwingira bw’entale, Omukama Daliyo akarangirra ati: “Abantu batukumirege, batinege omu maiso ga Ruhanga wa Danieri: baitu nuwe Ruhanga omwomezi, nagumaho ebiro nebiro, nobukamabwe nubwo butalihwerekerezebwa, nokulemakwe kulihikya empero.”​—Dan. 6:7-10, 19-22, 26, 27.

¹⁵ Omuhandiiki wa Zabuli akagamba ati: “[Yahwe] aburanganiza okucwa amagezi okwamahanga: adibya ebitekerezo ebyabantu.” Akongeraho ati: “Lihebwa omugisa ihanga erinyakuina [Yahwe] okuba Ruhanga walyo; abantu abayakomeremu okuba obugwetwabwe wenka.” (Zab. 33:10, 12) Mali, egi eri nsonga nungi habwaki tusemeriire kulinda obwesigwa bwaitu hali Yahwe!

16. Kiki ekiturukugumya ha “omuhito omwingi,” kandi habwaki? (Rora ekisisani.)

¹⁶ Tusomere ha bintu Yahwe ebiyakozere  omu busumi bwakara. Hati, kiki ekitusemeriire kunihira omu kasumi ak’omu maiso? Nitusobora kukigumya ngu Yahwe naija kujuna abaheereza be abesigwa omu kasumi ‘ak’omuhito omwingi’ akarukwija. (Mat. 24:21; Dan. 12:1) Kinu naija kukikora amahanga ageteraniize hamu agarukumanywa nka Gogi wa Magogi, obugaratahirra abaheereza ba Yahwe abesigwa omu nsi yoona n’ekigendererwa eky’okubahwerekereza. Amahanga ago n’obugaratwarramu amahanga goona 193 aganyakuli omu kitongole eky’Amahanga Ageteraine, tigarukwija kusobora kusingura Anyakuli haiguru muno n’amahe ge ag’omu iguru! Yahwe n’araganiza ati: “Ndyenyumiza nyenka, ninyeyeza nyenka, kandi ndyemanyisa nyenka omu maiso gamahanga maingi; kandi balimanya ngu ninyowe [Yahwe].”​—Ez. 38:14-16, 23; Zab. 46:10.

17. Kiki Baibuli eky’erukubazaaho h’akasumi ak’omu maiso ak’abakama b’ensi hamu naabo abalinda obwesigwa bwabo hali Yahwe?

¹⁷ Okutahirra kwa Gogi nikwija kuletera obulemu obwa Haramagedoni okutandika nambere Yahwe arukugenda okuhwerekereza “abakama abensi zona.” (Kus. 16:14, 16; 19:19-21) Baitu, “abamazima balitaha ensi, [n’abalinda obwesigwa] baliikara omu.”—Nfu. 2:21.

18. Kiki Abakristaayo baingi ab’amananu ekibaikaire behaireyo okukora, kandi habwaki? (Danieri 3:28)

¹⁸ Kuruga kara, Abakristaayo ab’amananu baingi baikaire betekaniize kufeerwa obugabe bwabo kandi bataire obwomeezi bwabo omu kabi habw’okugonza okubainiire Yahwe Omuhangi wabo ow’arukukirrayo kimu. Balinda obwesigwa bwabo kandi bacweriiremu kimu nk’Abayudaaya abasatu abajunirwe kuruga omu murro habw’okwikara bali besigwa hali ogu Anyakuli haiguru muno.​—Soma Danieri 3:28.

19. Kiki Yahwe eky’arukwija kusigikirraho kucwera abantu be omusango, kandi kiki ekitusemeriire kukora kasumi kanu?

¹⁹ Omuhandiiki wa zabuli Daudi akahandiika ha bukuru obw’okulinda obwesigwa bwaitu hali Ruhanga ati: “[Yahwe] acwera abantu ebyobulyo: oncwere omusango, ai [Yahwe], nkokuhikirra kwange okukuli. [N’obwesigwa bwange obuli] omuli nyowe.” (Zab. 7:8) Daudi akongera yahandiika ati: “[Obwesigwa] namananu bindindege.” (Zab. 25:21) Kuba n’obwomeezi oburukukirayo oburungi, tusemeriire kwikara tuli besigwa hali Yahwe n’obutuhikwaho enyikara ezitulenga! Hanyuma nitwija kwehurra nk’omuhandiiki wa zabuli ayahandiikire ati: “Banyina omugisa [abalinda obwesigwa] . . . , abanyakugenda omu biragiro bya [Yahwe].”​—Zab. 119:1.