1. Kunihira ki Yahwe okw’atuhaire?

 YAHWE atuhaire okunihira okurungi muno okw’obwomeezi obutahwaho. Abamu baine okunihira okw’okwomeera omu iguru habw’ebiro n’ebiro nk’ebihangirwe eby’omwoyo ebitafa. (1 Kol. 15:50, 53) Baitu abarukukira obwingi baine okunihira okw’okwikara omu nsi ebiro n’ebiro omu bwomeezi obuhikiriire n’okusemererwa. (Kus. 21:3, 4) Katube tulindiriire obwomeezi obutahwaho omu iguru rundi omu nsi, okunihira kwaitu kw’omuhendo muno haliitwe.

2. Okunihira kwaitu nikusigikirra hali ki, kandi habwaki nitugamba tuti?

² Ekigambo “kunihira,” ekikozesebwa omu Baibuli, nikisobora kumanyisa, “kutegereza ngu ebintu ebirungi nibiija kubaho.” Nitukigumiza kimu ngu okunihira kwaitu okw’omu kasumi ak’omu maiso nikwija kuhikirra habwokuba nikuruga hali Yahwe. (Bar. 15:13) Tumanyire kiki eky’aturaganiize kandi tumanyire ngu aikara nahikiiriza ebyaba araganiize. (Kubar. 23:19) Nitukigumya ngu Yahwe nagonza kandi aine amaani ag’okuhikiriza buli kimu kyona ekiyaraganiize. Okunihira kwaitu tikusigikirra ha ntekereza yaitu rundi ebintu ebiturukugonza bibeho; baitu kusigikirra habwakaiso obugumire hamu n’amananu.

3. Nitugenda kubazaaho ki omu kicweka kinu? (Zabuli 27:14)

³ Isiitwe ow’omu iguru n’atugonza kandi nagonza tumwesige. (Soma Zabuli 27:14.) Okunihira kwaitu omuli Yahwe obukuraaba kugumire, nitwija kusobora kugumira ebirengo kandi n’akasumi ak’omu maiso nitwija kukarabamu twine obumanzi n’okusemererwa. Katurole omulingo okunihira kwaitu kutulinda. Leka tubanze turole omulingo okunihira kwaitu kusisana n’enanga hamu n’enkofiira. Hanyuma nitwija kubazaaho omulingo tusobora kugumya okunihira kwaitu.

4. Okunihira kwaitu nikusisana kuta nk’enanga? (Abaheburaniya 6:19)

⁴ Omu bbaruha ye hali Abaheburaniya, omukwenda Paulo akasisaniza okunihira kwaitu nk’ekyesibiko rundi enanga. (Soma Abaheburaniya 6:19.) Yakiraga kugendera ha nyanja enkooto, nahabweki Paulo akaba amanyire kurungi nk’oku enanga zikozesebwa kukonyera amaato kutatwarwatwarwa ihunga. Kiro kimu obwakaba ali omu lyato ihunga ery’amaani likateera. Omu ihunga eri, akarora abavugi b’eryato nibanaga enanga omu maizi kutanga eryato kutatwarwatwarwa liketeera h’amabaale. (Eng. 27:29, 39-41) Nk’oku enanga ekonyera eryato kutatwarwatwarwa, okunihira kwaitu kutukonyera kutatwarwatwarwa kuruga hali Yahwe obutuba nituraba omu bizibu eby’amaani. Okunihira kwaitu kutukonyera kwikara tutekaine obutuba nituraba omu bizibu. Habwokuba nitukigumya ngu omu kasumi ak’omu maiso ebintu nibiija kusemera. Ijuka ngu Yesu akagamba nitwija kuhiganizibwa. (Yoh. 15:20) Nahabweki kwecumitirizaaho empeera Yahwe ey’aturaganiize ey’omu kasumi ak’omu maiso, nikiija kutukonyera kwikara nitumuheereza.

5. Okunihira kukakonyera kuta Yesu kuguma obwakaba nagenda kwitwa?

⁵ Tekerezaaho omulingo okunihira kwakonyire Yesu kwikara ali mwesigwa n’obukiraaba ngu akaba akimanyire ngu nagenda kwitwa omu mulingo ogw’obusaasi. Ha kiro kya Pentekoti eya 33 Yesu Amazire Kuzaarwa (Y.A.K.), omukwenda Petero akabazaaho obunabbi kuruga omu kitabu kya Zabuli oburukusoborra omulingo Yesu akaba atekaine kandi agumire, oburukugamba buti: “Ninyija kwikara nyine okunihira; habwokuba tolindeka omu kituuro, rundi kwikiriza omwesigwa wawe kurora okujunda. . . . Olinyijuza okusemererwa ndi omu maiso gaawe.” (Eng. 2:25-28, NWT; Zab. 16:8-11) N’obukiraaba ngu Yesu akaba akimanyire ngu naija kufa, akaba aine okunihira okugumire ngu Ruhanga akaba naija kumuhumbuura kandi atunge okusemererwa okw’okwongera kuba hamu na Ise omu iguru.​—Baheb. 12:2, 3.

6. Kiki ow’oruganda omu ekiyagambire ha kunihira?

⁶ Okunihira kwaitu okw’Ekikristaayo kukonyire ab’oruganda na banyaanya itwe baingi kugumiisiriza. Tekerezaaho ekyokurorraho eky’ow’oruganda omwesigwa Leonard Chinn, ayaikaraga omu Bungereza. Omu kasumi ak’Obulemu obw’Ensi Yoona obw’Okubanza, akateekwa omu nkomo habw’okwanga kutaaha amahe. Kumara emyezi ebiri, bakamusibira omu kisiika wenka, kandi hanyuma bamuhambiriza kukora emirimo ey’amaani. Akahandiika ati: “Ebinarabiremu bikankonyera kukyetegereza nk’oku turukwetaaga okunihira kusobora kugumiisiriza. Twine ekyokurorraho ekya Yesu, abakwenda, banabbi, hamu n’emirago ey’omuhendo erukusangwa omu Baibuli. Binu byona bituha okunihira okw’amaani okw’omu kasumi ak’omu maiso kandi bitukonyera kugumiisiriza.” Okunihira kukaba nk’enanga hali Ow’oruganda Leonard, kandi nikusobora kuba nk’enanga na haliitwe.

7. Ebirengo bigumya bita okunihira kwaitu? (Abarumi 5:3-5; Yakobo 1:12)

⁷ Okunihira kwaitu kweyongera kuguma hanyuma y’okugumira ebirengo kandi tukarora omulingo Yahwe atukonyiremu n’omulingo arukutusiimamu. (Soma Abarumi 5:3-5; Yakobo 1:12.) Nahabweki hati, okunihira kwaitu kweyongiire kuguma kukira omu kasumi nambere twaikiriize amakuru amarungi. Sitaani nagonza ebirengo byaitu bituhinguraneho, baitu habw’obukonyezi bwa Yahwe nitusobora kubigumira byona.

8. Okunihira nikusisana kuta n’enkofiira? (1 Abasesalonika 5:8)

⁸ Baibuli erengesaniza okunihira kwaitu  n’enkofiira. (Soma 1 Abasesalonika 5:8.) Omuserukale ajwara enkofiira kulinda omutwe gwe nukwo abanyanzigwa bataguhutaaza. Omu bulemu bwaitu obw’eby’omwoyo, nitwetaaga kulinda ebitekerezo byaitu hali okutahirra okwa Sitaani. Akozesa ebintu bingi ebirukwahukana kutwohya n’okusiisa enteekereza yaitu. Nk’oku enkofiira erinda omutwe gw’omuserukale, okunihira kwaitu kulinda ebitekerezo byaitu, nukwo tusobole kwikara tuli besigwa hali Yahwe.

9. Kiki ekibaho abantu obubaba bataine okunihira?

⁹ Okunihira kwaitu okw’obwomeezi obutahwaho nikwija kutukonyera kukora encwamu enungi. Baitu kakuba okunihira kwaitu kuceka, kandi tukaijuza omu bitekerezo byaitu okwegomba okw’omubiri, nitusobora kwebwa okunihira kwaitu okurukukwata ha bwomeezi obutahwaho. Tekerezaaho ekyabaireho, h’Abakristaayo abamu ababaireho omu Kolinso eya kara. Bakaleka kwikiririza omu murago gwa Ruhanga omukuru muno​—ogw’okunihira okw’okuhumbuuka. (1 Kol. 15:12) Paulo akagamba ngu abo abataikiririza omu kuhumbuuka, ekigendererwa omu bwomeezi bwabo kiba ky’okuhikiiriza okwegomba kwabo. (1 Kol. 15:32) Kasumi kanu abantu baingi abataine okunihira omu mirago ya Ruhanga bakora kyona ekibarukusobora kutunga okusemererwa omu bwomeezi bwabo. Baitu itwe tuteeka okunihira kwaitu omu mirago ya Yahwe ey’omu kasumi ak’omu maiso. Okunihira kwaitu nikusisana n’enkofiira ey’erinda ebitekerezo byaitu kandi ey’etukonyera kuteetekerezaaho itwenka ekisobora kusiisa enkoragana yaitu na Yahwe.​—1 Kol. 15:33, 34.

10. Okunihira nikusobora kuta kutulinda hali entekereza ezitahikire?

¹⁰ Ekindi, enkofiira yaitu ey’okunihira etukonyera kwerinda kutekereza ngu titusobora kusemeza Yahwe. Ekyokurorraho, abamu nibasobora kutekereza bati: ‘Tinsobora kuba omu hali abo abarayomeera ebiro n’ebiro. Tinsobora kukora ebintu Ruhanga ebyarukugonza nkole.’ Ijuka Erifaazi ow’akaba nayefoora ngu nahumuuza Yobu, akamugambira ebigambo nibyo bimu. Erifaazi akagamba ati: “Omuntu kiki, abe asemiire?” Akongera yagamba hali Ruhanga ati: “Dora, tarukwesiga abarukwerabe; ego, iguru tirisemiire omu maisoge.” (Yob. 15:14, 15) Binu bisuba eby’amaani! Ijuka ngu Sitaani nuwe arukugonza tutekereze tuti. Akimanyire ngu kakuba oikara notekereza oti, noija kufeerwa okunihira kwawe. Nahabweki, yangira kimu ebisuba nk’ebi, kandi oteeke omutima ha mirago ya Yahwe. Otalirengaho kugurukyagurukya ngu nagonza oyomeere ebiro n’ebiro kandi ngu naija kukukonyera kuhikiriza ekigendererwa eki.​—1 Tim. 2:3, 4.

11. Habwaki tusemeriire kugumiisiriza obuturaaba tulindiriire okunihira kwaitu kuhikirra?

¹¹ Tikyanguhire kwikaza okunihira kwaitu kugumire. Nitusobora kufooka bantu abatarukugumiisiriza obuturuba tulindiire Ruhanga kuhikiriza emirago ye. Baitu habwokuba Yahwe aikaireho ebiro n’ebiro, akasumi akazooka nkakaraihire haliitwe, kaba kake haluwe. (2 Pet. 3:8, 9) Naija kukora byona ebiyaraganiize omu mulingo ogurukukirrayo kimu oburungi. Baitu nasobora kutabikora omu kasumu akaturukumunihirramu kubikora. Kiki ekisobora kutukonyera kwikaza okunihira kwaitu kugumire, obu tulindiire n’obugumiisiriza Ruhanga kuhikiriza emirago ye?​—Yak. 5:7, 8.

12. Kusigikirra ha Abaheburaniya 11:1, 6, okunihira kwine kakwate ki n’okwikiriza?

¹² Nitwija kwikaza okunihira kwaitu kugumire obuturaikara haihi na Yahwe habwokuba nuwe arahikiiriza eby’atunihiize. Kusobora kuba n’okunihira, tusemeriire kuba n’okwikiriza ngu Ruhanga aroho, kandi ngu “[aha empeera] abo abanyakumuserra.” (Soma Abaheburaniya 11:1, 6.) Obuturaikiriza ngu mali Yahwe aroho, nitwija  kweyongerra kimu kumwesiga ngu naija kukora byona ebyaraganiize. Leka turole ebitusobora kukora kugumya enkoragana yaitu na Yahwe kandi tukaikaza okunihira kwaitu kugumire.

13. Nitusobora tuta kwirra haihi na Ruhanga?

¹³ Saba hali Yahwe, kandi osome Ekigambo kye. N’obukiraaba ngu titusobora kurora Yahwe, nitusobora kumwirra haihi. Nitusobora kubaza na uwe omu saara zaitu obu nitukigumya ngu naija kutuhuliiriza. (Yer. 29:11, 12) Nitusobora kuhuliiriza Ruhanga kuraba omu kusoma Baibuli n’okugyecumiitirizaaho. Obuturasomaho omulingo Yahwe yafiireho abo abakaba bali besigwa haluwe omu busumi obwakara, okunihira kwaitu nikwija kweyongerra kimu kuguma. Byona ebiri omu Baibuli “bikahandikwa obwokwegesa itwe, nukwo tube nokunihira obwokugumisiriza nobwokuhumura okwomu byahandikirwe.”​—Bar. 15:4.

14. Habwaki kirungi kuteekerezaaho ebintu Yahwe eby’akoliire abandi?

¹⁴ Wecumiitirizeeho omulingo Yahwe aikaire nahikiiriza emirago ye. Tekerezaaho Ruhanga ekiyakoliire Iburahimu na Sara. Bakaba bakuzire muno batakyasobora kuzaara. Baitu, Ruhanga akabaraganiza ngu bakutungire omwana. (Kub. 18:10) Iburahimu aketwaza ata? Baibuli n’egamba ngu: “Ogu ayaikiriize nanihira ekitarukunihirwa, afoke isenkuru wamahanga maingi.” (Bar. 4:18) N’obukiraaba ngu Iburahimu akaba atamanyire nk’oku omurago gwa Ruhanga gurahikirra, akaba nakigumya ngu Yahwe yakuhikiriize ekiyaraganiize. Yahwe atahemukire omusaija ogu omwesigwa. (Bar. 4:19-21) Ebyokurorraho nk’ebi nibitwegesa kwikara nitwesiga Yahwe kuhikiriza emirago ye, n’obukiraaba ngu enyikara n’esobora kuzooka haliitwe nk’ey’etarukusoboka.

15. Habwaki tusemeriire kuteekerezaaho ebintu Ruhanga eby’amazire kutukorra?

¹⁵ Tekerezaaho ebintu Yahwe ebyakukoliire.  Tekerezaaho omulingo ogasiirwe omu mirago ya Ruhanga enyakuli omu Baibuli ey’emazire kuhikirra. Ekyokurorraho, Yesu akaraganiza ngu Ise naija kukuha ebyetaago byawe. (Mat. 6:32, 33) Ekindi, Yesu akakugumya ngu Yahwe naija kukuha omwoyo gwe ogurukwera obw’oragumusaba. (Luk. 11:13) Yahwe ahikiriize emirago egi. Kandi nosobora kutekerezaaho emirago endi ey’ahikiriize habwawe. Ekyokurorraho, naraganiza kukuganyira ebibi byawe, kukuhuumuza, hamu n’okukuliisa omu by’omwoyo. (Mat. 6:14; 24:45; 2 Kol. 1:3) Obwoyecumiitirizaaho ebintu Yahwe eby’amazire kukukorra, noija kugumya okunihira kwawe okw’ebintu ebyarukwija kukukorra omu kasumi ak’omu maiso.

16. Habwaki okunihira, kisembo eky’omuhendo mwingi?

¹⁶ Okunihira kwaitu okw’okwomeera ebiro n’ebiro kisembo eky’omuhendo muno kuruga hali Ruhanga. Tulindiriire akasumi ak’omu maiso akarungi kandi nitukigumya ngu nikaija kubaho kwo. Okunihira kwaitu kuli nk’enanga, kutukonyera kutatwarwatwarwa nukwo tugumire ebirengo, okuhiganizibwa, n’okufa. Okunihira kuli nk’enkofiira, kulinda ebitekerezo byaitu, kutukonyera kuleka kukora ebintu ebigwire kandi tukakora ebihikire. Okunihira kwaitu okurukusigikirra ha Baibuli kutwiriza haihi na Yahwe kandi kutwoleka nk’oku Yahwe atugonza. Tugasirwa muno obutwikaza okunihira kwaitu kugumire.

17. Habwaki okunihira kwaitu kutuleetera okusemererwa?

¹⁷ Omukwenda Paulo akekambisa Abarooma omu bbaruha ye ati: ‘Musemererwege omu kunihira.’ (Bar. 12:12) Paulo akaba nasobora kusemererwa habwokuba akaba nakigumya ngu kakuba aikara ali mwesigwa naija kutunga obwomeezi obutahwaho omu iguru. Naitwe nitusobora kusemerererwa omu kunihira kwaitu habwokuba nitukigumiza kimu ngu Yahwe naija kuhikiriza emirago ye. Omuhandiiki wa Zabuli ahandiika ati: “Anyina okusemererwa ogu . . . Anyakunihirra omuli Yahwe Ruhanga we, . . . Ogu aikara ali mwesigwa ebiro byona.”​—Zab. 146:5, 6, NWT.