1. Okusemererwa kwaitu kwine kakwate ki n’ekyetaago kyaitu eky’eby’omwoyo?

 OKUSEMERERWA kwonyini teri nyehurra enungi ey’eija bwija kandi ekamara ekagenda. Okusemererwa kwonyini kwikaraho omu bwomeezi bw’omuntu bwona. Omu mulingo ki? Yesu akakubazaaho omu Kwegesa kwe Okwa ha Rusozi, obuyagambire ati: “Baine okusemererwa abamanyire obwetaago bwabo obw’eby’omwoyo.” (Mat. 5:3, NWT) Yesu akaba akimanyire ngu abantu bakahangwa n’ekyetaago eky’okumanya hamu n’okuramya Omuhangi wabo, Yahwe Ruhanga. Eki nikyo ‘ekyetaago kyaitu eky’eby’omwoyo.’ Kandi nk’oku Yahwe ali “Ruhanga ow’asemeriirwe,” abo abamuramya nibasobora kuba n’okusemererwa.​—1 Tim. 1:11, NWT.

2-3. (a) Kusigikirra hali Yesu, nibaha abandi abasobora kutunga kusemererwa? (b) Biki ebiturukugenda kubazaaho omu kicweka kinu, kandi habwaki nibyetaagwa?

² Nitwetaaga kuba twine enyikara enungi omu bwomeezi bwaitu nukwo tusobole kuba n’okusemererwa? Nangwa. Omu Kwegesa kwe Okwa ha Rusozi, Yesu akabazaaho ekintu ekirukuhuniiriza. ‘Abo abaganya’​—obundi habw’okutuntuzibwa ebibi byabo rundi habwokuba nibaraba omu bizibu eby’amaani—​nabo nibasobora kuba n’okusemererwa. Yesu akabaza ekintu nikyo kimu hali abo “abahigwa obwokuhikirra” rundi ‘abajumwa’ habwokuba bahondezi be. (Mat. 5:4, 10, 11) Baitu nikisoboka kita kuba n’okusemererwa kwonyini omu nyikara nka zinu?

³ Yesu akaba n’atwegesa ngu okusemererwa tikuruga omu kuba n’enyikara enungi omu bwomeezi bwaitu, baitu kuruga  omu kwigusa ekyetaago kyaitu eky’eby’omwoyo n’okwirra haihi na Ruhanga. (Yak. 4:8) Eki nitusobora kukikora tuta? Omu kicweka kinu nitugenda kubazaaho ebintu bisatu ebiturukwetaaga kukora kusobora kuba n’okusemererwa kwonyini.

4. Kintu ki eky’okubanza ekitusobora kukora kusobora kutunga okusemererwa kwonyini? (Zabuli 1:1-3)

⁴ EKINTU 1: Kusobora kutunga okusemererwa kwonyini, tusemeriire kweriisa omu by’omwoyo. Ebisoro n’abantu betaaga ebyokulya kusobora kuba bomeezi. Baitu abantu bonka nubo bagasirwa omu ebyokulya eby’omwoyo. Kandi mali nitubyetaaga. Egi niyo ensonga habwaki Yesu yagambire ati: “Omuntu taba mwomezi nebyokulya, baitu nekigambo kyona ekiruga omu kanwa ka Ruhanga.” (Mat. 4:4) Nahabweki, titusemeriire kumara ekiro tuteriisize ebyokulya eby’omwoyo kuruga omu Kigambo kya Ruhanga eky’omuhendo, Baibuli. Omuhandiiki wa Zabuli akagamba ngu omuntu ow’ayegondeza omu biragiro bya Yahwe kandi akabisoma nyamusana n’ekiro, nuwe aine okusemererwa.​—Soma Zabuli 1:1-3.

5-6. (a) Biki ebitusobora kwega kuruga omu Baibuli? (b) Kusoma Baibuli nikusobora kutukonyera omu miringo ki?

⁵ Habwokuba Yahwe atugonza, atwolekere omu Baibuli ebitusemeriire kukora kusobora kutunga okusemererwa omu bwomeezi. Nitwega ekigendererwa habwaki yatuhaire obwomeezi. Nitwega omulingo tusobora kumwirra haihi hamu n’ekiturukwetaaga kukora nukwo atuganyire ebibi byaitu. Kandi nitwegaho okunihira okurungi okw’aturaganiize habw’akasumi ak’omu maiso. (Yer. 29:11) Amananu ganu agatwega omu kwesomesa Baibuli gasemeza emitima yaitu!

 ⁶ Kandi nk’oku tukimanyire, Baibuli eijwiremu obuhabuzi obusobora kutukonyera omu bwomeezi bwaitu obwa buli kiro. Obutuhondera obuhabuzi obu, tutunga okusemererwa. Obwohurra ohoirwemu amaani habw’ebizibu eby’omu nsi, yongera habwire obwomara n’osoma Ekigambo kya Yahwe n’okukyecumiitirizaaho. Yesu akagamba ati: “Banyina omugisa abarukuhurra ekigambo kya Ruhanga nibakikwata!”​—Luk. 11:28.

7. N’osobora ota kugasirwa omu bwijwire omu bwire oyeteriireho okwesomesa Ekigambo kya Ruhanga?

⁷ Obworaaba n’osoma Ekigambo kya Ruhanga, twara obwire bwawe kwegondeza omu by’orukusoma. Ekyokurorraho, wakahikwahoga ekintu nka kinu? Omuntu acumba ebyokulya eby’orukugonza muno. Baitu obundi n’osobora kuba otaine obwire oburukukumara kulya rundi ohugwirwe habw’ebintu ebindi eby’orukutekerezaaho, kandi obirya bwangu bwangu otarukuhuliiriza obunuzi. Hanyuma y’okumara kulya, okyetegereza nk’oku oliire bwangu bwangu kandi oyeijukya ngu kakuba oliire mpora mpora okegondeza omu bunuzi. Wakasomahoga Baibuli bwangu bwangu, kandi okalemwa kwetegereza eby’orukusoma? Tunga obwire oburukumara oyegondeze omu kusoma Ekigambo kya Ruhanga; teeramu akasisani, ohuliirize amaraka, kandi otekerezeeho ebintu ebyorukusoma. Obworakora eki, nikiija kwongera ha kusemererwa kwawe.

8. “Omwiru omwesiga kandi ow’amagezi” nahikiriza ata obujunanizibwa bwe? (Rora n’obugambo obwa hansi.)

⁸ Yesu akakoma omwiru omwesigwa kandi ow’amagezi kutuha ebyokulya eby’omwoyo omu kaire akahikire kandi mali nituliisibwa kurungi muno omu by’omwoyo. * (Mat. 24:45) Ebyahandiikirwe nikyo kirungo ekikuru omu bintu byona omwiru omwesigwa ebyaturukya. (1 Bas. 2:13) Nahabweki ebyokulya eby’omwoyo bitukonyera kumanya entekereza ya Yahwe nk’oku eyolekerwe omu Baibuli. Egi niyo ensonga habwaki tusoma magaziini za Awake!, Omunaara gw’Omulinzi, hamu n’ebicweka ebiri ha jw.org. Tutekaniza ensorrokano ez’ekitebe eza hagati omu wiiki hamu n’eza ha wiikendi. Kandi turora puroguraamu eya buli kwezi eya JW Broadcasting^® obutuba tugiine. Kweriisa omu by’omwoyo nikiija kutukonyera kuhika ha kintu ekyakabiri ekiratuleetera okusemererwa kwonyini.

9. Kintu ki ekyakabiri ekituleetera okusemererwa kwonyini?

⁹ EKINTU 2: Kutunga okusemererwa kwonyini, tusemeriire kworobera endengo za Yahwe. Omuhandiiki wa Zabuli akagamba ati: “Ayina omugisa wena anyakutina [Yahwe], anyakugendera omu mihandaye.” (Zab. 128:1) Kutiina Yahwe nikimanyisa kumuteekamu muno ekitiinisa ekituleetera kwerinda kukora ekintu kyona ekimubiihiza. (Nfu. 16:6) Nahabweki, tusemeriire kugumizaamu nitwekamba kworobera endengo za Yahwe ezirukukwata ha bihikire n’ebigwire nk’oku zolekerwe omu Baibuli. (2 Kol. 7:1) Nitwija kutunga okusemererwa kakuba tukora ebintu Yahwe eby’agonza n’okunoba ebintu eby’anoba.​—Zab. 37:27; 97:10; Bar. 12:9.

10. Kwongerra ha kumanya Ruhanga eby’agonza, kintu ki ekindi ekitusemeriire kukora? (Abarumi 12:2)

¹⁰ Soma Abarumi 12:2. Omuntu nasobora kuba akimanyire ngu Yahwe aine obusobozi bw’okucwamu endengo ezirukukwata ha bihikire n’ebigwire, baitu nabwo asemeriire kwikiriza kuzoorobera. Ekyokurorraho, omuntu nasobora kuba akimanyire ngu gavumenti niyo eine obusobozi obw’okutaho ebiragiro ebirukukwata ha supiidi ey’esemeriire kukozesebwa ha nguudo. Baitu nasobora kuba atarukugonza  kwikiriza ebiragiro ebi ebitairweho. Ekirugamu, avugira ha supiidi ey’amaani muno kukira ey’asemeriire. Twoleka kuraba omu bikorwa byaitu ngu nitwikiriza nk’oku kuhondera endengo za Yahwe nikyo kintu ekirukukirrayo kimu oburungi. (Nfu. 12:28) Daudi akehurra omulingo nugwo gumu obuyabalizeeho Yahwe ati: “Olinyoleka omuhanda ogwobwomezi: namberoli haroho okuniha okusemererwa; omu mukono gwawe ogwobulyo numwo harumu ebinyakusemeza ebiro nebiro.”​—Zab. 16:11.

11-12. (a) Obutuba twetuntwire rundi tuhoirwemu amaani, kintu ki ekitusemeriire kwerinda? (b) Ebigambo ebirukusangwa omu Abafiripi 4:8 nibisobora kutukonyera bita obutuba nitukomamu eby’okwesemeza?

¹¹ Obutuba twetuntwire rundi tuhoirwemu amaani, nitusobora kwetaaga kukora ekintu ekiratukonyera kuleka kweraliikirra habw’ebizibu byaitu. Eki nikyetegerezebwa, baitu tusemeriire kwerinda kukora ebintu Yahwe eby’anoba.​—Bef. 5:10-12, 15-17.

¹² Omu bbaruha ye hali Abafiripi, omukwenda Paulo akatererra Abakristaayo kugumizaamu nibatekerezaaho ebintu “byona ebyobulyo, byona ebisemiire, byona ebirukugonzebwa, [kandi] byona ebirikusimwa.” (Soma Abafiripi 4:8.) Nobukiraaba ngu Paulo akaba atarukuhandiikaho eby’okwesemeza, ebiyahandiikire bisemeriire kukwataho ebintu ebitukomamu kwesemeza nabyo. Lengaho kinu: Hoona nambere hali ekigambo “byona” omu rukarra runu, teekaho ekigambo “ebizina,” “filimu,” “ebitabu eby’okusoma,” rundi “emizaano eya vidiyo.” Obuturakora kinu, nikiija kutukonyera kumanya ebintu Yahwe ebyarukwikiriza n’ebyatarukwikiriza. Nitugonza kuhondera endego za Yahwe eza haiguru muno. (Zab. 119:1-3) Hati n’omuntu ow’omunda omurungi, nitusobora kugenda ha kintu ekindi ekituleetera okusemererwa kwonyini.​—Eng. 23:1.

13. Kintu ki ekyakasatu ekituleetera okusemererwa kwonyini? (Yoh. 4:23, 24)

¹³ EKINTU 3: Kigumize kimu ngu wayebembeza kuramya Yahwe omu bwomeezi bwawe. Yahwe nuwe yatuhangire, kandi habw’ensonga egi tusemeriire kumuramya. (Kus. 4:11; 14:6, 7) Nahabweki, ekintu ekikuru muno omu bwomeezi bwaitu kisemeriire kuba kuramya Yahwe omu mulingo ogw’arukugonza kandi ogu nugwo, “omu mwoyo namananu.” (Soma Yohana 4:23, 24.) Nitugonza omwoyo gwa Ruhanga gwebembere okuramya kwaitu nukwo kukwatagane n’amananu agarukusangwa omu Kigambo kye. Tusemeriire kwebembeza okuramya kwaitu nobukiraaba ngu nambere turukwikara omulimo gwaitu gutairweho ebiragiro eby’amaani rundi gutangiirwe kimu. Kasumi kanu, ab’oruganda n’abanyaanya itwe abarukuhingura omu 100 bali omu nkomo habw’okuba Bakaiso ba Yahwe. * Eki n’obukiraaba nukwo kiri, baine okusemererwa habwokuba bakora kyona ekibarukusobora kusaba, kwesomesa, n’okugambiraho abandi hali Ruhanga n’Obukama bwe. Abantu obubatujuma rundi bakatuhiiganiza, tusemererwa habw’okuba nitukimanya ngu Yahwe ali naitwe kandi naija kutuha empeera.​—Yak. 1:12; 1 Pet. 4:14.

14. Kiki ekyahikire hali Ow’oruganda omuto kuruga omu Tajikistan, kandi habwaki?

¹⁴ Ebyokurorraho ebyabaireho kwo nibigumya ngu ebintu bisatu ebitwakaruga kubazaaho nibisobora kutuleetera okusemererwa kwonyini katube tuli omu nyikara ki. Tekererezaaho ekyahikire hali Ow’oruganda Jovidon Bobojonov ow’emyaka 19 kuruga omu Tajikistan, ayayangire kutaaha amahe. Omu  Okitobba 4, 2019, bakamuhambiriza kuruga omu ka ye, bamutwara omu nkomo kumara emyezi, kandi bamutwaza nk’omucwi w’ebiragiro. Abanyamakuru bakararangya obutalibwinganiza bunu omu mahanga maingi. Kikateekwa omu makuru ngu akateerwa obubakaba nibamuhambiriza kuteera ekirahiro eky’okutaaha amahe n’okujwara yunifoomu y’amahe. Hanyuma y’eki, kooti ekacwamu ngu omusango gumusingire kandi yatwarwa omu nkomo kuhikya omukuru w’ihanga obuyamuganyiire kandi yaragira ngu alekerwe. Omu kasumi ako koona, Ow’oruganda Jovidon akaikara ali mwesigwa kandi aine okusemererwa. Eki kikasoboka kita? Kuraba omu kwikara nafaaho ekyetaago kye eky’eby’omwoyo.

15. Ow’oruganda Jovidon akeriisa ata omu by’omwoyo obwakaba ali omu nkomo?

¹⁵ Obwakaba ali omu nkomo, Jovidon akagumizaamu nayeriisa omu by’omwoyo, nobukiraaba ngu akaba ataine Baibuli rundi kimu ha bitabu byaitu ebirukusigikirra ha Baibuli. Eki kikasoboka kita? Ab’oruganda n’abanyaanya itwe ab’omu kitebe kye abaamuleeteraga ebyokulya, bahandikaga ekyahandiikirwe ekya buli kiro ha nsaho ezibaleeteramuga ebyokulya. Nahabweki, eki kyamusobozesaaga kusoma n’okwecumitirizaaho Baibuli buli kiro. Hanyuma y’okulekerwa kuruga omu nkomo, akaha abo abatakahikirweho ebirengo eby’amaani obuhabuzi bunu: “Kikuru muno kukozesa  obugabe bwawe omu bwijwire kweyongera kumanya hali Yahwe kuraba omu kusoma Ekigambo kye n’okusoma ebitabu byaitu ebirukusigikirra ha Baibuli.”

16. Kiki Ow’oruganda Jovidon ekiyataireho omutima?

¹⁶ Ow’oruganda onu akoorobera endengo za Yahwe. Omu kiikaro ky’okuteeka omutima ha kwegomba okubi n’okwejumbira omu ngeso embi, akateeka omutima hali Yahwe n’ebi eby’agonza. Jovidon yayecumiitirizaahoga ebintu ebirungi Yahwe ebiyahangire. Buli nyenkyakara yaimukaga kuhuliiriza ebinyonyi nibizina. Omu bwire bw’ekiro yaroraga okwezi n’enyunyuzi. Akagamba ati: “Ebisembo ebi kuruga hali Yahwe bikandeetera okusemererwa kwingi kandi byangarramu amaani.” Obutusiima ebintu eby’omwoyo hamu n’eby’omubiri Yahwe eby’atuha, tutunga okusemererwa omu mutima, kandi okusemererwa oku nikusobora kutukonyera kugumiisiriza.

17. Ebigambo ebinyakuli omu 1 Petero 1:6, 7 nibisobora kukwataho bita omuntu anyakuli omu nyikara nk’eya Jovidon?

¹⁷ Ekindi, Jovidon akebembeza okuramya Yahwe omu bwomezi bwe. Akaba amanyire obukuru bw’okulinda obwesigwa bwe hali Ruhanga ow’amananu. Yesu akagamba ati: “Oramyege [Yahwe] Ruhanga wawe, nuwe oherezege wenka.” (Luk. 4:8) Abakuru omu mahe hamu n’abamahe abandi bakaba nibagonza Ow’oruganda Jovidon kulekeraaho kuba omu h’Abakaiso ba Yahwe. Baitu, yasabaga muno nyamusana n’ekiro, nasaba Yahwe kumukonyera atamwehakana n’okwikara ali mwesigwa. Nobukiraaba ngu akatwazibwa omu mulingo ogutali gw’obwinganiza, Jovidon akaikara ali mwesigwa. Ekyarugiremu, hati n’ayegondeza omu kuba n’ekintu eky’akaba ataine obwakaba atakakwasirwe kwihwa omu ka ye, atakatiirwe, kandi atakatairwe omu nkomo, kandi eki nikyo okwikiriza okulengerwe.​—Soma 1 Petero 1:6, 7.

18. Nitusobora tuta kwikara tusemeriirwe?

¹⁸ Yahwe amanyire ebiturukwetaaga kusobora kutunga okusemererwa kwonyini. Obworahondera ebintu ebituleetera okusemererwa kwonyini, noija kwikara oine okusemererwa n’obworaaba n’oraba omu bizibu eby’amaani. Hanyuma naiwe noija kusobora kugamba oti: “Bayina omugisa abantu abayina Ruhanga wabu nuwe [Yahwe]!”​—Zab. 144:15.