Ab’oruganda ha Beseri bakaba bamazire akasumi akarukuhingura omu mwaka gumu nibombeka rediyo eya WBBR omu Staten Island, omu rubuga rwa New York. Hanyuma y’okutema emiti, bakombeka enju enkooto ey’abakozi hamu n’ekyombeko ekindi eky’ebyoma. Omulimo gunu obu gwahoire, ab’oruganda bakatandika kuteraniza hamu ebyoma ebirukwetaagisa nukwo “bagende ha mbeho.” Baitu hakaba haroho ebizibu ebi bakaba baine kusingura.

Ab’oruganda bakakizoora ngu kwombeka omurongooti omukuru ogwa rediyo kikaba kitanguhire. Omurongooti gunu ogukaba guraihire kuhika mita 91 (fuuti 300) gukaba gusemeriire kuhanikwa hagati y’ebikondo by’emiti bibiri, kandi buli kimu kikaba kiraihire kuhika mita 61 (fuuti 200). Bakakirengaho ha kubanza baitu kyalema. Baitu habw’obukonyezi bwa Yahwe, bakasobora kugwombeka. Calvin Prosser, ayakozere ha purojekiti enu akagamba ati: “Kakuba twasoboire kuhanika omurongooti gunu ha murundi ogw’okubanza, twakwenyumiize itwenka kandi tugamba tuti, ‘Dora eki tusoboire kukora!’” Ab’oruganda bakakyetegereza ngu bakasobora kukora omulimo gunu habw’obukonyezi bwa Yahwe. Baitu bakaba baine ekizibu ekindi.

Kukozesa rediyo nubwo kukaba kwakatandika kandi kikaba kitanguhire kugura ebyoma ebirukwetaagisa. Nahabweki ab’oruganda bakatunga ekyoma ekikuru ekirukutwara amaraka ekya watt-500 ekikaba kikozerwe omuntu. Omu kiikaro ky’okugura omuzindaaro, bakacwamu kukozesa ogw’esimu eya buli kiro. Kiro kimu omu Febwali, ab’oruganda bakacwamu kulengesa ebyoma ebi bakaba bekoliire. Bakaba nibetaaga puroguraamu ey’okuteeka ha mbeho, nahabweki  bakacwamu kuzina ebizina eby’Obukama. Ow’oruganda Ernest Lowe akabazaaho ekyabaireho kiro eki. Akagamba ngu obu bakaba nibazina, Omuramuzi Rutherford, b akabaterra esimu obu yahuliire nibazinira ha rediyo omu Brooklyn, haihi nka kilomita 25 (mairo 15) kuruga nambere akaba naikara.

Akabagambira ati: “Mulekere aho kuzina, nimuzina nk’ebijangu!” Ab’oruganda bakaswara kandi baayemereza puroguraamu, baitu bakaba nibakigumya ngu rediyo ekaba n’ekora kandi bakaba betekaniriize puroguraamu yabo ey’okubanza.

Omu Febwali 24, 1924, puroguraamu ey’okubanza obu ekaba neegenda omu maiso, Ow’oruganda Rutherford akagamba ngu rediyo enu ekaba niija kukozesebwa kukora omulimo Kristo Omukama wabo ogu akaba abahaire. Kandi ngu ekigendererwa kya rediyo nikyo “kukonyera abantu kwetegereza Baibuli n’obusumi obukuru obu turumu.”

Puroguraamu egi ey’okubanza ekagenda kurungi. Kandi omu myaka 33 eyayongiireho, rediyo ya WBBR ekakozesebwa kuhikyaho abantu puroguraamu z’Abakaiso ba Yahwe.

Omu Julaayi 1924, Abeegi ba Baibuli bakatunga orusorrokano orukooto omu Columbus, Ohio. Abagenyi bakaruga omu nsi yoona kandi bakahurra embazo omu ndimi zinu: Arabic, English, French, German, Greek, Hungarian, Italian, Lithuanian, Polish, Russian, endimi ezimu ez’omu Scandinavia, hamu na Ukrainian. Bimu ha bicweka bya puroguraamu bikahulirwa ha rediyo kandi entekaniza zikakorwa nukwo orupapura rwa makuru orurukumanywa nka Ohio State Journal ruturukyege ebicweka ebirukukwata ha rusorrokano orukooto buli kiro.

Ha kiro Kyakana, Julaayi 24, Ab’oruganda na banyaanya itwe abarukuhingura omu 5,000 bakejumbira omu buheereza kiro eki. Bakagaba ebitabu ebirukuhika haihi nka 30,000 kandi bakatandika kwegesa abantu baingi Baibuli. Watch Tower ekeeta ekiro kinu “ekicweka ekikyakizireyo kuleeta okusemererwa ha rusorrokano orukooto.”

Ekintu ekindi ekirukusemeza kikabaho Kyakataano Julaayi 25 nambere Ow’oruganda Rutherford yasomere n’obumanzi ekihandiiko ekirukujumirra abebembezi b’amadiini. Omu kihandiiko eki akajunaana abebembezi b’amadiini, ab’eby’obulemi, n’ab’eby’obusuubuzi “kulemesa abantu kwega ha Bukama bwa Ruhanga obw’alikozesa kuha abantu emigisa.”  Kwongerraho, ekihandiiko kikooleka ngu bakaba batahikire habwokuba bakaba nibasagika ekitongole kya League of Nations kandi baagambaga ngu nugwo mulingo Ruhanga yakozesaaga kwebembera abantu omu nsi. Kyali nikyetaagisa Abeegi ba Baibuli kuba n’obumanzi kusobora kutwara obutumwa bunu hali abantu.

Omu bugufu Watch Tower ekabazaaho omulingo orusorrokano runu rwakwasireho ab’oruganda na banyaanya itwe. Ekagamba eti: “Orusorrokano runu rugumize okwikiriza kwa guruupu enu ey’ab’oruganda na banyaanya itwe abekambi. Kandi rukabaha obumanzi obw’okutebeza n’obu kiraaba ngu bakaba nibahakanizibwa.” Leo Claus, ow’akaba ali ha rusorrokano runu akagamba ati: “Tukaruga ha rusorrokano twine ekihika eky’okugambiraho abali omu kicweka kyaitu obutumwa bunu.”

Omu Okitobba, Abeegi ba Baibuli bakatandika kugaba obukaikuru n’obukaikuru bwa turakiti eya Ecclesiastics Indicted, Ow’oruganda Rutherford ei yabalizeeho kandi ey’ekaba etiirwe ha mpapura. Ow’oruganda Frank akamalirra kugaba turakiti omu dakiika 20 abatebezi abandi batakamutabaliire omu tawuni entaito eya Cleveland, Oklahoma. Akaba atasobora kwemerra omu rwijwire habwokuba abasaija abakaba bamukwatiirwe ekiniga habw’okwejumbira omu mulimo ogw’okutebeza bakaba nibamuseera. Ow’oruganda Johnson akacwamu kugenda omu kanisa ey’ekaba eri haihi. Obu yakyetegeriize ngu busamu muntu, akasigamu kopi za turakiti eya Ecclesiastics Indicted omu Baibuli y’omusomesa w’ekanisa na ha buli ntebe. Akakikora omu bwangu, yarugamu yagenda. Habwokuba akaba akyaine obwire, akagenda omu kanisa ezindi ibiri yakora ekintu nikyo kimu.

Frank akanguha yagenda ha kiikaro nambere ab’oruganda bakaba basemeriire kumusanga. Akesereka enyuma y’ekyoma ky’amafuta obu naikaza eriiso h’abasaija abakaba nibamuserra. Abasaija banu bakavuga baarabaho, baitu batasobole kumurora. Hanyuma y’okugenda, ab’oruganda abaali nibatebeza omu kiikaro ekikaba kiri haihi bakaija baamutabarra baagenda.

Omu h’ab’oruganda abaabaireho akagamba ati: “Obu tukaba nitugenda, tukarabaho ekanisa isatu. Ha buli kanisa, hakaba haroho abantu abarukuhika 50 bemeriire omu maiso gaayo. Abamu bakaba nibasoma turakiti. Kandi abandi nibagyoleka omusomesa wabo. Tukarahuka kugenda kusobora kwetantara ebizibu! Baitu tukasiima Yahwe Ruhanga waitu habw’okutulinda n’okutuha amagezi ag’okwiruka abanyanzigwa batatukwasire.”

Omu mahanga agandi, Abeegi ba Baibuli na bo bakatebeza n’obumanzi. Omu France ey’amatemba, Józef Krett akatebeza abakozi abaahaigaga eby’obuguuda omu itaka abakaba barugire Poland. Nuwe akaba naagenda kuha orubazo orwine omutwe “Hasigaireyo Akacu Kake Abafu Bahumbuuke.” Ab’oruganda na banyaanya itwe obu baahaire abantu b’omu tawuni kaadi ez’okubaraaliza, omupaadiri akaragira abahondezi be kutagenda ha rusorrokano. Baitu batamuhuliirize. Abantu abarukuhingura 5,000 bakaija kuhuliiriza orubazo, otwaliiremu n’omupaadiri! Ow’oruganda Krett akaraaliza omupaadiri kwija kurwanirra enyikiriza ze, baitu akanga. Ow’oruganda Krett akaha abantu ebitabu byona ebi akaba aine habwokuba bakaba nibagonza kumanya ebirukukiraho kuruga omu Kigambo kya Ruhanga—Amosi 8:11.

Omu Afrika, Claude Brown akatwara amakuru amarungi omu kiikaro ekyayetwaga Gold Coast, hati ekirukumywa nka Ghana. Embazo ze hamu n’ebitabu ebi yagabire bikakonyera kurarangya bwangu amananu omu ihanga eri. John Blankson, ow’akaba naasoma eby’emibazi akabaho kuhuliiriza rumu ha  mbazo z’Ow’oruganda Brown. Ahonaaho akakyetegereza ngu azoire amananu. Akagamba ati: “Amananu gakandetera kuhurra nsemeriirwe, kandi nkagagambiraho abandi omu isomero lyaitu ery’emibazi.”

Kiro kimu, John akagenda ha kanisa y’Abapurotesitanti kukaguza omupaadiri ha nyegesa y’obusatu, hati John ei akaba naamanya ngu tehikire kusigikirra ha byahandiikirwe. Omupaadiri akamubinga obu naatokera haiguru naagamba ati: “Iwe toli Mukristaayo; oli wa Sitaani. Ruga hanu ogende!”

John obu yagarukire omuka, akahandiikira omupaadiri ebbaruha naamuraaliza kwija kurwanirra enyegesa y’obusatu omu rwijwire. Omupaadiri akagarukamu naayeta John omu ofiisi y’omwegesa omukuru omu isomero, nambere omwegesa ogu yakaguliize John obu araaba nuwe yahandiikiire omupaadiri ebbaruha.

John akamugarukamu ati: “Ego, ninyowe.”

Omwegesa akagambira John ahandiike ebbaruha naasaba omupaadiri ekiganyiro. Nahabweki John akamuhandiikira naagamba ati:

“Ow’Ekitiinisa, Omwegesa wange ansabire kukuhandiikira ninkusaba ekiganyiro, baitu nyeteekaniize kukikora kakuba oikiriza ngu ebi orukwegesa bisuba.”

Omwegesa akahunirra kandi yakaguza John ati, “Blankson, binu nibyo orukugonza kuhandiika?”

“Ego, ebi nibyo ndukugonza kuhandiika.”

“Noija kubingwa omu isomero linu. N’osobora ota kubazaaho kubi omupaadiri anyakuli omu diini gavumenti ey’erukusagika?”

John akamugarukamu ati: “Mwegesa, . . . obu mutwegesa amasomo kandi hakabaho ebintu ebituteetegeriize titwikirizibwa kukaguza ebikaguzo?”

Omwegesa akamugarukamu ati: “Ego mwikirizibwa.”

“Waitu mwegesa, eki nikyo kyabaireho. Omupaadiri akaba naatwegesa Baibuli kandi nyowe namukaguza ekikaguzo. Obu araaba atarukusobora kukigarukamu, habwaki nsemeriire kumuhandiikira ebbaruha nimmusaba ekiganyiro?”

Blankson akamalirra atabingirwe. Kandi atahandiike ebbaruha y’okusaba ekiganyiro.

Watch Tower obu ekaba n’ebazaaho ebikaba bikozerwe omu mwaka, ekagamba eti: “Kusisanaho na Daudi, na itwe nitusobora kugamba tuti: ‘Baitu iwe okantega amani omunda okurwana.’ (Zabuli 18:39) Omwaka gunu gutugarwiremu muno amaani habwokuba tweroliire omukono gwa Mukama . . . Abaheereza be abesigwa . . . baikaire nibatebeza amakuru amarungi n’okusemererwa.”

Omwaka ogu obu gukaba guli haihi kuhwa, ab’oruganda bakakora enteekaniza ey’okuba na rediyo endi kusobora kwongera ha buheereza. Bakombekwa rediyo endi omu Chicago. Rediyo enu empyaka ekaba neeyetwa EKIGAMBO. Rediyo enu ekaba n’ekozeza ekyoma ekirukutwara amaraka ekya watt 5,000, kandi kyatwaraga amakuru g’Obukama na hali abantu abaikaraga omu biikaro ebya hara muno kuhikira kimu Canada ey’amatemba.

Omu mwaka 1925, Yahwe akakonyera ab’oruganda kwetegereza kurungi ekitabu kya Okusuku’rwa esuura 12. Habw’enyetegereza egi empyaka, abamu batagumizeemu kuheereza Yahwe. Baitu, abaingi bakasemererwa habw’okwetegereza kurungi ebintu ebyabaireho omu iguru n’omulingo kyakwasireho abantu ba Ruhanga omu nsi.