1-2. Kiki ekyabaireho abegeswa ba Yesu babiri obu bakaba nibagenda Emau?

 KIRI kiro kya Nisani 16, 33 Y.A.K. abegeswa ba Yesu nibaganya kandi batiinire. Babiri hali bo baruga Yerusalemu bagenda Emau, ekyaro ekiri nka kilomita 11 (mairo 7) kuruga Yerusalemu. Abasaija banu bahoirwemu amaani habwokuba Yesu, omusaija ou baikaire nibahondera nubwo yakaruga kwitwa. Bakaba nibanihira ngu Masiya akaba naija kukorra Abayudaaya ebirukuhuniiriza. Baitu ahonaaho ebintu bihinduka.

² Omusaija abeteranizaaho kandi arubata na bo. Abegeswa bamugambira ebintu ebibi ebihikire hali Yesu kandi ebibamaziremu amaani. Omusaija atandika kubagambira ebigambo ebi batalyebwa. “Kutandikira hali Musa na banabbi boona,” yabasoborra habwaki Masiya akaba asemeriire kubonabonesebwa kandi aitwe. Abasaija banu basatu obu baahikire Emau, omusaija ogu ou batamanyire abagambira ngu nuwe Yesu ow’ahuhumbuukire. Mali kikabasemeza muno kukimanya ngu Masiya akaba ali mwomeezi.—Luk. 24:​13-35.

3-4. Kiki ekyahikire h’abageswa ba Yesu kandi kiki eki turayega omu kicweka kinu? (Ebikorwa by’Abakwenda 1:3)

³ Yesu akeyoleka abegeswa be emirundi nyingi omu biro 40 eby’okumalirra omu nsi. a (Soma Ebikorwa by’Abakwenda 1:3.) Yesu akagarramu amaani abegeswa be abakaba bahoirwemu amaani kandi batiinire. Bakasemererwa kandi baatunga  amaani ag’okugumizaamu nibatebeza n’okwegesa abandi ha Bukama.

⁴ Tugasirwa obu twega ha bintu Yesu yakozere omu kasumi ako. Omu kicweka kinu, nitwija kurora omulingo Yesu yakozeseze obwire bwe (1) kugarramu abegeswa be amaani, (2) kubakonyera kwetegereza Ebyahandiikirwe, (3) n’okubatendeka kusobora kutunga obujunanizibwa obundi. Omu buli nyikara, nitwija kurora omulingo tusobora kwegera ha kyokurorraho kya Yesu.

GARRAMU ABANDI AMAANI

5. Habwaki abageswa ba Yesu bakaba nibetaaga kugarurwamu amaani?

⁵ Abegeswa ba Yesu bakaba nibetaaga kugarurwamu amaani. Habwaki? Abamu bakaba balekereho amaka gabo, abanyabuzaale, na bizineesi zaabo nukwo bafooke bahondezi ba Yesu obwomeezi bwabo bwona. (Mat. 19:27) Abandi baatwazibwaga kubi habw’okufooka bahondezi be. (Yoh. 9:22) Baakefeereza habwokuba bakaba bamanyire ngu Yesu nuwe akaba ali Masiya ow’akaba araganiziibwe. (Mat. 16:16) Baitu Yesu obu yaisirwe, bakasaasa kandi baahwamu amaani habwokuba bakaba batamanyire ekikaba nikigenda kubaho.

6. Kiki Yesu eki yakozere hanyuma y’okuhumbuuka?

⁶ Busaho kugurukyagurukya Yesu akarora okuganya kw’abegeswa be hatali nk’akorurorraho ak’okuba baceke omu by’omwoyo baitu nk’ekintu ekibaho hanyuma y’omuntu kufeerwa. Nahabweki kiro eki kyonyini obu yahumbuukire, akatandika kugarramu banywani be amaani. Ekyokurorraho, akeyoleka hali Malyamu Magadalene obu akaba narra ha kituuro. (Yoh. 20:​11, 16) Ekindi, akeyoleka hali abegeswa babiri ababaziibweho ha kutandika kw’ekicweka kinu. Kandi akeyoleka hali omukwenda Petero. (Luk. 24:34) Kiki eki turukwegerea ha kyokurorraho kya Yesu? Tekerezaaho ekyabaireho obu yayeyolekere hali Malyamu Magadalene.

7. Nk’oku kyolekerwe omu Yohana 20:​11-16, Yesu akarora Malyamu naakora ki nyenkyakara Nisani 16, kandi kikamuleetera kukora ki? (Rora ekisisani.)

⁷ Soma Yohana 20:​11-16. Nyenkyakara Nisani 16, abakazi abamu bakagenda ha kituuro nambere bakaba baabyamize omutumbi gwa Yesu. (Luk. 24:​1, 10) Leka tubazeeho ebyahikire hali omu h’abakazi arukwetwa Malyamu Magadalene. Malyamu obu yahikire ha kituuro akasanga busamu kantu. Hanyuma, akairuka yagambira Petero na Yohana abairukire nibagenda ha kituuro kandi na uwe yabahondera. Hanyuma y’okukigumya ngu omu kituuro busamu kantu, Petero na Yohana bakagaruka omu ka. Baitu Malyamu atagaruke omu ka.  Akaikaraho ha kituuro narra. Baitu akaba atakimanyire ngu Yesu naamurora. Yesu akarora omukazi onu omwesigwa narra. Nahabweki akeyoleka Malyamu kandi yakora ekintu ekyamugarwiremu amaani. Akabaza na uwe kandi yamuha obujunanizibwa obukuru obw’okugambira abegeswa abandi ngu Yesu ahumbuukire.—Yoh. 20:​17, 18.

8. Nitusobora tuta kwegera hali Yesu?

⁸ Nitusobora tuta kwegera hali Yesu? Nitusobora kugira bingi ebi tusobora kukora kwekambisa ab’oruganda na banyaanya itwe kugumizaamu nibaheereza Yahwe kakuba, nka Yesu, tulengaho kumanya obu baraaba betuntwire kandi tukabahuumuza. Tekerezaaho ekyokurorraho kya munyaanya itwe arukwetwa Jocelyn mugenzi we obu yaferiire omu butandwa. Naagamba ati: “Kumara emyezi nyingi, naikaraga mbiihiirwe muno.” Baitu ow’oruganda na mukazi we obu baayetegeriize eki akaba naarabamu, bakamuraaliza omuka yabo, baamuhuliiriza kurungi kandi baamugumya ngu w’omuhendo muno hali Ruhanga. Jocelyn naagamba ati: “Nkehurra oti rundi Yahwe akaba naakozesa ow’oruganda na munyaanya itwe kunjuna kuruga omu ihunga ery’amaani ha nyanja banteeka omu lyato erirungi. Bakankonyera kwongera kugumizaamu nimpeereza Yahwe n’obwekambi.” Naitwe nitusobora kugarramu abandi amaani kuraba omu kubahuliiriza kurungi obu barukuba nibatugambira ebibali ha mutima kandi tukababaliza omu mulingo ogurukuhuumuza n’ekigendererwa eky’okubakonyera kugumizaamu nibaheereza Yahwe.—Bar. 12:15.

KONYERA ABANDI KWETEGEREZA EBYAHANDIIKIRWE

9. Kizibu ki abegeswa ba Yesu eki baatangatangaine, kandi Yesu akabakonyera ata?

⁹ Abegeswa ba Yesu bakaikiriza Ekigambo kya Ruhanga kandi baayekamba kuteeka omu nkora ebi baayegere omu bwomeezi bwabo. (Yoh. 17:6) Baitu nabwo, bateetegereze habwaki Yesu yafeeriire ha muti nk’enkozi y’ebibi. Yesu akakyetegereza ngu okugurukyagurukya kwabo kukaba kutarukuleetwa kutaba n’okwikiriza, baitu habw’okuteetegereza Ebyahandiikirwe. (Luk. 9:​44, 45; Yoh. 20:9) nahabweki akabakonyera kwetegereza amakuru g’Ebyahandiikirwe. Wetegereze omulingo yakikozere obu yayeyolekere hali abegeswa babiri abayatangatangaine omu ruguudo orukaba nirugenda Emau.

10. Yesu akakonyera ata abegeswa be kukimanya ngu nuwe Masiya? (Luka 24:​18-27)

¹⁰ Soma Luka 24:​18-27. Wetegereze ngu Yesu ahonaaho atagambire abasaija banu nuwe oha. Oihireho akabakaguza ebikaguzo. Habwaki? Obundi akaba naagonza babaze ebi barukuteekereza n’ebibali ha mutima. Kandi nikyo baakozere. Bakamugambira ngu bakaba nibanihira Yesu kucungura Isaleri kuruga omu bulemi bw’Abarooma. Hanyuma y’okumugambira omulingo bakaba nibehurra, Yesu akakozesa Ebyahandiikirwe kubakonyera kwetegereza ekikaba kibaireho. b Hanyuma rwebagyo oru, Yesu akamara obwire naasoborra abegeswa abandi amakuru g’obunabbi oburukukwata ha kufa kwe. (Luk. 24:​33-48) Kinu nikitwegesa ki?

11-12. (a) Isomo ki eri turukwegera ha mulingo Yesu yayegeseze amananu kuruga omu Baibuli? (Rora ebisisani.) (b) Ow’oruganda omu akakonyera ata Nortey?

¹¹ Nitusobora tuta kwegera hali Yesu? Eky’okubanza, obu turaaba nitwegesa abeegi ba Baibuli, tusemeriire kubakaguza ebikaguzo ebiraabaleetera kubaza eki barukuteekereza n’ekibali ha mutima. (Nfu. 20:5) Hanyuma y’okumanya omulingo barukwehurra, booleke omulingo basobora kutunga Ebyahandiikirwe  ebirabakonyera omu nyikara yabo. Wetantale kubagambira eky’okukora. Oihireho, bakonyere kwetegereza Ebyahandiikirwe n’okurora omulingo basobora kuteeka omu nkora emisingi ya Baibuli. Tekerezaaho ekyokurorraho ky’ow’oruganda arukwetwa Nortey kuruga Ghana.

¹² Nortey obu akaba aine emyaka 16, akatandika kwega Baibuli. Baitu hanyuma y’akacu kake, eb’eka ye bakatandika kumuhakaniza. Kiki ekyamukonyiire kugumizaamu naayega Baibuli? Ow’oruganda ow’akaba naamwegesa akaba akozeseze Matayo esuura 10 kumusoborra ngu Abakristaayo ab’amananu nibaija kuhiiganizibwa. Nortey naagamba ati: “Okuhiiganizibwa obu kwatandikire, nkakigumiza kinu ngu nzoire amananu.” Ekindi, ow’oruganda akamwoleka ekyahandiikirwe ekiri omu Matayo 10:16 ekisobora kumukonyera kuba mwekengi obu arukuba naabazaaho ensonga ezirukukwataho ediini omuka. Hanyuma y’okubatizibwa, Nortey akagonza kuheereza nka payoniya baitu ise akaba naagonza agende ha yunivasite. Omu kiikaro ky’okugambira Nortey eky’okukora, ow’oruganda akamukaguza ebikaguzo kumukonyera kukozesa emisingi ya Baibuli kusobora kukora encwamu ey’ehikire. Kiki ekyarugiremu? Nortey akacwamu kutaaha obuheereza obw’akasumi koona. Ise akamubinga omuka. Hati Nortey naayehurra ata ha bintu ebyabaireho? Naagamba ati: “Ninkigumya ngu nkakora encwamu ey’ehikire.” Naitwe obu twekambisa abandi kwecumiitirizaaho Ebyahandiikirwe, nitusobora kubakonyera kufooka Bakristaayo abagumire omu by’omwoyo.—Bef. 3:​16-19.

KONYERA AB’ORUGANDA KUFOOKA ‘BISEMBO OMU BANTU’

13. Kiki Yesu eki yakozere kurora ngu omulimo gwa Ise gwagumizaamu nigukorwa? (Abefeso:8)

¹³ Yesu obu akaba ali omu nsi, akakora ebintu byonyini ise ebi akaba naagonza akole. (Yoh. 17:4) Baitu Yesu akaba ataine nyehurra ey’erukugamba eti: ‘Obu oraaba noogonza ekintu kikorwe kurungi, osemeriire kukyekorra.’ Emyaka esatu n’ekicweka ei yamazire naatebeza omu nsi, akatendeka n’abandi kukora omulimo nugwo gumu. Obu akaba atakagarukire omu iguru, akaha bamu hali bo abasobora kuba bakaba bali omu myaka nka 20, obujunanizibwa obw’okurolerra entaama za Yahwe ez’omuhendo n’okwebembera omulimo ogw’okutebeza n’okwegesa. (Soma Abefeso 4:8.) Yesu akakozesa ata ebiro 40 eby’okumalirra kukonyera  abasaija banu ebehaireyo, abesigwa kandi abarukukora n’amaani kufooka ‘bisembo omu bantu’?—Rora study note on Abefeso 4:8.

14. Yesu akakonyera ata abegeswa be kukurakurana omu by’omwoyo omu biro bye 40 eby’okumalirra omu nsi? (Rora ekisisani.)

¹⁴ Yesu akaha abegeswa be obuhabuzi obu bakaba nibetaaga kuhurra. Ekyokurorraho, akakyetegereza ngu abamu bakaba baine engeso ey’okugurukyagurukya nahabweki akabaha obuhabuzi. (Luk. 24:​25-27; Yoh. 20:27) Akabatererra kuteeka muno omutima ha kugarramu ab’oruganda amaani omu kiikaro ky’okuguteeka muno ha mirimo yabo. (Yoh. 21:15) Akabaijukya kutateeka omutima ha bujunanizibwa abandi obu basobora kutunga omu buheereza bwabo hali Yahwe. (Yoh. 21:​20-22) Kandi akabakonyera kuhindura entekereza ey’etahikire ei bakaba baine ha Bukama nukwo bateeke omutima ha kutebeza amakuru amarungi. (Eng. 1:​6-8) Kiki abagurusi eki basobora kwegera hali Yesu?

15-16. (a) Miringo ki abagurusi basobora kwegera hali Yesu? Soborra. (b) Obuhabuzi bukagasira buta Patrick?

¹⁵ Abagurusi nibasobora bata kwegera hali Yesu? Basemeriire kukonyera n’okutendeka ab’oruganda, otwaliiremu naabo abakyali bato kusobora kuhikiiriza obujunanizibwa omu kitebe. c Abagurusi tibanihirramu ab’oruganda kuba abahiiriire. Basemeriire kuha ab’oruganda abato obuhabuzi nukwo nabo basobole kwega kuba bebundaazi, besigwa kandi beteekaniize kukonyera abandi.—1 Tim. 3:1; 2 Tim. 2:2; 1 Pet. 5:5.

¹⁶ Wetegereze omulingo obuhabuzi bwakonyiire ow’oruganda ow’arukwetwa Patrick. Obu akaba akyali muto, yakiraga kubaza kubi n’okwetwaza omu mulingo ogw’obukaali na hali banyaanya itwe. Omugurusi omu akakyetegereza ngu Patrick akaba aine kuhinduramu enyetwaza ye kandi yamuha obuhabuzi omu mulingo ogw’embabazi. Patrick naagamba ati: “Nikinsemeza ngu omugurusi akanyoleka nk’oku nsemeriire kuhinduramu. Nahwamuga amaani obu naroraga ab’oruganda abandi nibatunga obujunanizibwa obu nkaba ningonza. Baitu obuhabuzi bw’omugurusi bukankonyera  kuteeka omutima ha kuheereza ab’oruganda na banyaanya itwe omu kiikaro ky’okuguteeka ha kutunga obujunanizibwa omu kitebe.” Ekyarugiremu, Patrick akakomwa kuheereza nk’omugurusi obw’akaba akyali omu myaka 20.—Nfu. 27:9.

17. Yesu akooleka ata ngu naayesiga abegeswa be?

¹⁷ Yesu atahe abegeswa be obujunanizibwa obw’okutebeza kyonka, baitu n’okwegesa. (Rora “teaching them” study note on Matayo 28:20.) Abegeswa nibasobora kuba baayehuliire nk’abatarukusobora kuhikiiriza obujunanizibwa obu. Baitu, Yesu akaba naabesiga ngu nibasobora kubuhikiiriza kandi yabubaha. Habwokuba akaba naabesigira kimu ngu nibasobora kubuhikiiriza, akagamba ati: “Nk’oku Isenyowe yantumire, na nyowe nimbatuma.”—Yoh. 20:21.

18. Abagurusi nibasobora bata kwegera hali Yesu?

¹⁸ Abagurusi nibasobora bata kwegera hali Yesu? Abagurusi ab’amagezi batendeka abandi kuhikiiriza obujunanizibwa. (Baf. 2:​19-22) Ekyokurorraho, abagurusi nibasobora kusaba abato kwejumbira omu kuyonja n’okudaabiriza Ekyombeko ky’Obukama. Hanyuma yabagurusi kuha abandi obujunanizibwa, nibasobora kubatendeka kandi bakabesiga ngu nibaija kubuhikiiriza kurungi. Omugurusi omuhyaka ow’arukwetwa Matthew naagamba ngu naasiima abagurusi abateekamu amaani kumutendeka kukora omulimo kandi hanyuma bakamuleka kugumaliiriza. Naagamba ati: “Obu nakozere ensobi, bakankonyera kurora omulingo nsobora kuzeegeraho n’okurora omulingo nsobora kusemezaamu.” d

19. Kiki eki tusemeriire kucweramu kimu kukora?

¹⁹ Yesu akakozesa ebiro bye 40 eby’okumalirra omu nsi kugarramu abandi amaani, kubeegesa n’okubatendeka. Naitwe leka tucweremu kimu kuhondera ekyokurorraho kye. (1 Pet. 2:21) Naija kutukonyera. Uwe wenka akaturaganiza ati: “Ndi hamu na inywe kuhikya ha mpero ey’obusinge bunu.”—Mat. 28:20.