EKICWEKA KY’OKWEGA 43
EKIZINA 90 Katugarranganemu Amaani
Omulingo Osobora Kusingura Okugurukyagurukya
“Mulenge byona.”—1 BAS. 5:21.
EBI TURAYEGA
Omulingo tusobora kusingura okugurukyagurukya okusobora kukwataho obuheereza bwaitu hali Yahwe.
1-2. (a) Kugurukyagurukya kwa mulingo ki abaheereza ba Yahwe oku basobora kutunga? (b) Bintu ki ebi turukwija kubazaaho omu kicweka kinu?
OBWIRE obumu, haroho obu tugurukyagurukya a ka tube tuli bato rundi bakuru. Ekyokurorraho, tekerezaaho omutebezi omuto naagurukyagurukya Yahwe obu araaba naamufaaho. Kandi eki nikisobora kumuleetera kwekaguza obu araaba asemeriire kubatizibwa. Rundi tekerezaaho ow’oruganda ayacwiremu kwebembeza kuheereza Yahwe obu akaba akyali muto omu kiikaro ky’otunga omulimo ogw’amaani. Hati akuzire kandi aine sente ez’okuhikyaho eka ye ebyetaago zonka. Naasobora kwekaguza obu araaba yakozere encwamu ey’ehikire obu akaba akyali muto. Tekerezaaho munyaanya itwe ow’akuzire omu myaka anyakuli muceke kandi ow’atakyaine amaani. Naasobora kuhurra ahoirwemu amaani habwokuba takyakora ebintu ebi yakoraga kara. Wakekaguzaaga ebikaguzo binu: ‘Mali Yahwe naanfaaho? Okwefeereza okunakozere habwa Yahwe kurugirwemu ebirungi? Nkyali w’omugaso hali Yahwe?’
2 Kakuba ebikaguzo nka binu bitagarukwamu, nikiija kukwataho muno okuramya kwaitu. Omu kicweka kinu, nitwija kubazaaho omulingo kuteeka omutima ha misingi ya Baibuli esobora kutukonyera kakuba tuba nitugurukyagurukya ngu (1) Yahwe naatufaaho, (2) encwamu ezi twakozere kara zikaba zitali nungi, rundi (3) titukyali b’omugaso hali Yahwe.
OMULINGO OSOBORA KURWANISA OKUGURUKYAGURUKYA
3. Mulingo ki ogumu ogu tusobora kurwanisa okugurukyagurukya?
3 Gumu ha miringo tusobora kurwanisa okugurukyagurukya nukwo kuserra eby’okugarukamu by’ebikaguzo byaitu kuruga omu Baibuli. Obu turaakora eki, nitwija kweyongera kugumya okwikiriza kwaitu omuli Yahwe, tweyongere kukura omu by’omwoyo kandi nitwija kusobora ‘kwemerraga omu kwikiriza.’—1 Kol. 16:13.
4. Nitusobora tuta ‘kulenga byona’? (1 Abasesalonika 5:21)
4 Soma 1 Abasesalonika 5:21. Wetegereze ngu Baibuli etutererra eti: “Mulenge byona.” Kinu nitusobora kukikora tuta? Nitusobora kugumya ngu ebi turukwikiririzaamu bihikire kuraba omu kubirengesaniza na Baibuli eki egamba. Ekyokurorraho, tekerezaaho omutebezi omuto ow’arukugurukyagurukya Ruhanga obu araaba naamufaaho. Asemeriire kwikiriza ngu Yahwe tarukumufaaho? Nangwa, asemeriire ‘kulenga byona’ kuraba omu kumanya omulingo Yahwe amuroramu.
5. Nitusobora tuta kutunga eby’okugarukamu by’ebikaguzo byaitu kuruga hali Yahwe?
5 Obu tuba nitusoma Ekigambo kya Ruhanga, tuba “nituhurra” Yahwe naatubaliza. Baitu kusobora kumanya entekereza ye ha kikaguzo ekiturukwekaguza nikyetaagisa kutamu amaani. Tusemeriire kuteeka omutima ha kusoma ebintu omu Baibuli ebirukugarukamu ekikaguzo kyonyini eki turukwekaguza. Nitusobora kukora okuseruliiriza nitukozesa ebikwato eby’okukozesa kwesomesa ebituhairwe ekitebe kya Yahwe. (Nfu. 2:3-6) Tusemeriire kusaba Yahwe kutukonyera kutunga eky’okugarukamu ky’ekikaguzo kyaitu. Hanyuma, nitusobora kuserra emisingi ya Baibuli ey’eratukonyera omu nyikara ei turukurabamu. Ekindi, nitusobora kugasirwa kakuba tusomaho abantu abarukubazibwaho omu Baibuli abaarabire omu nyikara nk’eyaitu.
6. Ensorrokano zitukonyera zita kusingura okugurukyagurukya?
6 Ekindi, “tuhurra” Yahwe naatubaliza obutuba tuli omu nsorrokano. Kakuba tugenda omu nsorrokano butoosa, nitusobora kugira eki twahurra omu rubazo, rundi omu ky’okugarukamu ky’omuntu ondi ekiratukonyera kusingura okugurukyagurukya oku twine. (Nfu. 27:17) Hati leka tubazeeho omulingo tusobora kusingura kumu ha kugurukyagurukya oku tusobora kuba twine.
OBU OBA N’OGURUKYAGURUKYA YAHWE OBU ARAABA NAAKUFAAHO
7. Kikaguzo ki abamu eki basobora kwekaguza?
7 Wakekaguzaaga, ‘Maali Yahwe naanfaaho?’ Kakuba oba nooyehurra nk’ow’ataine mugaso, nikisobora kukugumira kukiikiriza ngu noosobora kuba munywani w’Omuhangi w’ensi n’iguru. Nikisobora kuba ngu n’Omukama Daudi na uwe akaba aine entekereza nk’egi. Kikamuhuniiriza muno kukimanya ngu Yahwe naafaaho abantu, kandi yakaguza ati: “[Yahwe], omuntu kiki, iwe okumuijuka? Rundi omwana womuntu, iwe okumutaho ekitinisa?” (Zab. 144:3) Ninkaha nambere osobora kutunga eky’okugarukamu ky’ekikaguzo kinu?
8. Kusigikirra hali 1 Samuiri 16:6, 7, 10-12, kiki Yahwe eki arora omu bantu?
8 Baibuli etwegesa ngu Yahwe afaaho abo abazooka nk’abatali b’omugaso hali abandi. Ekyokurorraho, Yahwe akatuma Samuiri hali enju ya Yese kuseesaho omu ha batabanibe amagita ayaakufookere omukama wa Isaleri. Yese akeeta batabani be musanju omu batabani be munaana kutangatangana Samuiri baitu yasigayo omuto wabo Daudi. b Baitu, Daudi nuwe Yahwe akaba akomeremu. (Soma 1 Samuiri 16:6, 7, 10-12.) Yahwe akarora kiki Daudi eki akaba ali omu mutima—omusigazi omuto ayagonzaaga muno ebintu eby’omwoyo.
9. Habwaki nookigumya ngu Yahwe naakufaaho? (Rora n’ekisisani.)
9 Tekerezaaho omulingo Yahwe ayolekere ngu naakufaaho. Akuha obuhabuzi obw’orukwetaaga kusigikirra ha nyikara yaawe. (Zab. 32:8) Eki naasobora kukikora kakuba aba atarukukumanya kurungi? (Zab. 139:1) Obu oteeka omu nkora obuhabuzi bwa Yahwe kandi okarora omulingo bukukonyiire, noija kukigumya ngu naakufaaho. (1 Byom. 28:9; Eng. 17:26, 27) Yahwe arora byona ebi okora kusobora kumuheereza n’okumworobera. Ekindi, arora emiringo yaawe enungi kandi naagonza kuba munywani waawe. (Yer. 17:10) Kandi nikiija kumusemeza muno kakuba oikiriza kuba munywani we.—1 Yoh. 4:19.
“Obwolimuserra [Yahwe], olimuzora”—1 Byom. 28:9 (Rora akacweka 9) c
OBU OGURUKYAGURUKYA ENCWAMU EZI WAKOZERE
10. Obu tutekerezaaho encwamu ezi twakozere kara, bikaguzo ki ebi tusobora kwekaguza?
10 Obwire obumu, abamu nibasobora kwekaguza obu baraaba baakozere encwamu ez’amagezi. Obundi bakeerekesa omulimo ogw’amaani rundi bizineesi kusobora kuheereza Yahwe omu bwijwire. Kandi nihasobora kuba harabireho emyaka nyingi muno. Nibasobora kurora banywani baabo abaakozere encwamu ez’okwebembeza emirimo baine sente nyingi kandi bali kurungi omu by’entaahya. Kandi ekirugamu, nibasobora kwekaguza: ‘Ekaba eri ncwamu y’amagezi kwefeereza omulimo ogw’amaani kusobora kuheereza Yahwe? Rundi naakutairemu amaani kukora nukwo nsobole kutunga sente nyingi?’
11. Habwaki omuhandiiki wa Zabuli 73 akaba ahoirwemu amaani?
11 Obu oraaba nooyekaguza ebikaguzo nibyo bimu, tekerezaaho omulingo omuhandiiki wa Zabuli 73 yayehuliire. Akarora abandi abatarukuramya Yahwe nibegondeza omu bwomeezi oburungi, bali baguuda kandi busaho ekirukuberaliikiriza. (Zab. 73:3-5, 12) Obu yarozere ngu ebintu nibibagendera kurungi, kikamuleetera kwehurra ngu amaani akaba naateekamu kuheereza Yahwe gakaba nigafa busa. Entekereza enu ey’erukumaramu amaani ekamuleetera ‘kusaalizibwa obukyabukya.’ (Zab. 73:13, 14) Akasobora ata kusingura enyehurra zinu embi?
12. Kiki ekyakonyiire omuhandiiki wa Zabuli 73:16-18, kusingura enteekereza ey’etahikire?
12 Soma Zabuli 73:16-18. Omuhandiiki wa Zabuli akagenda harukwera ha Yahwe. Obu akaba ali oku n’abantu ba Yahwe, akasobora kutunga entekereza ey’ehikire. Akakyetegereza ngu n’obu kiraaba ngu obwomeezi bwabo bukaba nibuzooka nk’oburungi, bakaba bataine okunihira okw’obusumi obw’omumaiso. Eki kikamukonyera kuleka kuhwamu amaani kandi yakigumya ngu encwamu ey’okwebembeza kuheereza Yahwe niyo erukukirayo oburungi. Ekyarugiremu, akacweramu kimu kugumizaamu naaheereza Yahwe.—Zab. 73:23-28.
13. Kiki eki osobora kukora kakuba oba noyeijukya habw’encwamu ezimu ezi wakozere kara? (Rora n’ekisisani.)
13 Kusisanaho n’omuhandiiki wa Zabuli, naiwe noosobora kusingura enyehurra embi obu nookonyerwa Ekigambo kya Ruhanga. Omu mulingo ki? Ijuka ebintu ebirungi obi oine otwaliiremu emigisa ey’otunga kuruga hali Yahwe, kandi ogirengesanize n’ebirugamu hali abo abatarukuheereza Yahwe kandi abataine bukonyezi bwe. Nibasobora kwesigira kimu ebintu ebibakozere omu nsi enu habwokuba tibaine okunihira okw’obusumi obw’omumaiso. Baitu iwe, Yahwe naakuraganiza kukuha emigisa nyingi muno omu kasumi ak’omumaiso kukira nk’oku orukunihira. (Zab. 145:16) Ekindi, tekerezaaho kinu: Mali nitusobora kumanya omulingo obwomeezi bwaitu bwakubaire kakuba twakozere encwamu ezindi? Baitu haroho ekintu kimu eki turukugumya: Abo abakora encwamu nibasigikirra ha kugonza oku bainiire Ruhanga n’omutaahi, baikara baine ebintu ebibaleetera okusemererwa omu bwomeezi.
Tekerezaaho emigisa Yahwe ey’akuraganiize (Rora akacweka 13) d
OBU OBA N’OGURUKYAGURUKYA OBU ORAABA OLI W’OMUGASO HALI YAHWE
14. Abamu bali omu nyikara ki, kandi kikaguzo ki eki basobora kwekaguza?
14 Abamu h’abaheereza ba Yahwe tibakyasobora kukora ebintu ebibaakoraga kara habw’okukura omu myaka, habw’oburwaire rundi baine obulema. Eki nikisobora kubaleetera kwehurra nk’abataine mugaso omu maiso ga Yahwe. Nibasobora kwekaguza, ‘Mali nkyali w’omugaso hali Yahwe?’
15. Kiki omuhandiiki wa Zabuli 71 eki akaba naagumya?
15 Omuhandiiki wa Zabuli 71 akaba aine enyehurra niyo emu. Akasaba Yahwe ati: “Otalindeka amani gange obugalihwerra.” (Zab. 71:9, 18) Baitu nabwo, omuhandiiki wa zabuli akaikara naakigumya ngu kakuba agumiizaamu naaheereza Yahwe n’obwesigwa, Yahwe yakumwebembiire kandi amusagika. Omuhandiiki wa zabuli akeega ngu Yahwe asemererwa habw’abo abeehayo kumuheereza kusigikirra ha nyikara yabo.—Zab. 37:23-25.
16. Abakuzire omu myaka b’omugaso hali Yahwe omu miringo ki? (Zabuli 92:12-15)
16 Obu oraaba okukuzire omu myaka, tekerezaaho omulingo Yahwe akuroramu. Naasobora kukukonyera kugumizaamu n’omuheerereza n’obu kiraaba ngu oine obuceke omu mubiri. (Soma Zabuli 92:12-15.) Omu kiikaro ky’okuteeka omutima ha bintu ebi otakyasobora kukora, teeka omutima hali ebi ebi osobora kukora. Ekyokurorraho, noosobora kugarramu abandi amaani habw’ekyokurorraho kyawe eky’obwesigwa n’omulingo ofaaho abandi. Noosobora kubazaaho omulingo Yahwe akukonyiire kumara emyaka nyingi kandi ogambireho abandi emirago ya Baibuli ey’olindiriire kurora n’ehikirra omu busumi obw’omumaiso. Ekindi, oteebwa ngu esaara zaawe ezirukuruga ha mutima nizisobora kukonyera abandi. (1 Pet. 3:12) Ka tube tuli omu nyikara za mulingo ki, itwena twine eki tusobora kukorra Yahwe hamu n’abandi.
17. Habwaki tutasemeriire kwerengesaniza n’abandi?
17 Kakuba oyehurra ohoirwemu amaani habwokuba tosobora kuheereza Yahwe omu bwijwire, kigumye ngu naasiima kyona eki osobora kukora. Noosobora kulengaho kulengesaniza ebi osobora kukora n’eby’abandi basobora kukora. Baitu eki otakikora! Habwaki? Habwokuba Yahwe takulengesaniza n’abandi. (Bag. 6:4) Ekyokurorraho, Malyamu akaha Yesu ekisembo eky’amagita ag’omuhendo kandi agarukuboya kurungi. (Yoh. 12:3-5) Kwahukanaho, omufakati akahayo obunusu obutaito muno kandi obw’omuhendo muke muno. (Luk. 21:1-4) Baitu, ebisembo binu bibiri Yesu akabirora nk’ebirukwoleka ngu buli omu hali bo akaba aine okwikiriza. Mali na Ise, Yahwe, na uwe arora ekintu kyona eki okora kandi ekikwekambisa kumuheereza n’okumugonza, nk’eky’omuhendo n’obu oraaba nookirora nk’ekitaito.
18. Kiki ekiratukonyera kusingura okugurukyagurukya? (Rora n’akasanduuko “ Ekigambo kya Yahwe Nikisobora Kukukonyera Kusingura Okugurukyagurukya.”)
18 Obwire obumu, itwena tugurukyagurukya. Baitu nk’oku turozere, Ekigambo kya Ruhanga eky’okwesiga kandi eky’amananu Baibuli, nikisobora kutukonyera kukusingura. Nahabweki kora kyona ekirukusoboka kurwanisa okugurukyagurukya, noija kwehurra ogumire omu kiikaro ky’okweraliikirra. Yahwe akumanyire kurungi. Naasiima habw’encwamu zoona ez’okozere kumwebembeza omu bwomeezi bwawe kandi naija kuhikiiriza omurago gwe ogw’okukuha empeera. Kigumye ngu Yahwe agonza abaheereza be boona abesigwa, abarora nk’ab’omugaso, kandi abafaaho.
EKIZINA 111 Ebituletera Okusemererwa
a AMAKURU G’EBIGAMBO EBIMU: Omu kicweka kinu nitubazaaho kugurukyagurukya okutuleetera kutekereza ngu tituli b’omugaso hali Yahwe, rundi habw’encwamu ezitwakozere kara ezi turukuteekereza ngu zitabe z’amagezi. Kunu tikuli kugurukyagurukya okurukubazibwaho omu Baibuli okurukwoleka ngu omuntu tarukwikiririza omuli Yahwe n’emirago ye.
b N’obu kiraaba ngu Baibuli tetugambira emyaka Daudi ey’akaba aine Yahwe obu yamukomere, nikisobora kuba ngu akaba akyali nsinganto.—Rora Watchtower eya Sebutemba 1, 2011, rup. 29, kac. 2.
