EKICWEKA KY’OKWEGA 40
EKIZINA 30 Ise Nyowe, Ruhanga Wange, Kandi Enganjani Yange
Yahwe “Akiza Abayina Emitima Ecwekere”
“Akiza abayina emitima ecwekere; Kandi aboha ebihuta byabu.”—ZAB. 147:3.
EBI TURAYEGA
Yahwe afaaho muno abo abehurra benuubire muno. Ekicweka kinu nikiija kutwoleka omulingo atuhuumuza obu tuba twenuubire n’omulingo atusobozesa kuhuumuza abandi.
1. Yahwe ayehurra ata hali abaheereza be?
KIKI Yahwe aki arora obu aba naarora abaheereza be omu nsi? Aturora obu tuba tusemeriirwe n’obu tuba tubiihiirwe. (Zab. 37:18) Obu arora nitukora kyona ekirukusoboka kumuheereza n’obu tuba twenuubire, kimusemeza muno! Ekindi aikara ayeteekaniize kutukonyera n’okutuhuumuza.
2. Yahwe akorra ki abo ab’emitima ecwekere, kandi nitusobora tuta kugasirwa omu buhabuzi bwe?
2 Zabuli 147:3 neegamba ngu Yahwe ‘aboha ebihuta’ eby’abo ab’emitima ecwekere. Ekyahandiikirwe kinu kyoleka omulingo Yahwe akonyera abo abenuubire. Kiki eki tusemeriire kukora kusobora kugasirwa omu miringo Yahwe ayoleka ngu naatufaaho? Tekererezaaho ekyokurorraho kinu. Dakitaali omukugu naasobora kukora kyona ekirukusoboka kukonyera omuntu ow’atungire obutandwa kukira. Baitu omuntu ogu kusobora kugasirwa asemeriire kuhondera kurungi oburagirizi bwa dakitaali. Omu mulingo nugwo gumu naitwe tusemeriire kuhondera oburagirizi bwa Yahwe kusobora kutunga obusinge omu biteekerezo. Omu kicweka kinu, nitwija kurora Yahwe eki agamba kuraba omu Kigambo kye hali abo abenuubire kandi nitwija n’okurora omulingo tusemeriire kuteeka omu nkora obuhabuzi bwe obw’okugonza.
YAHWE ATUGUMYA NGU TULI B’OMUHENDO MUNO HALI UWE
3. Habwaki abantu abamu beehurra nk’abataine mugaso?
3 Nitwikara omu nsi nambere abantu baingi batarukugonza bataahi baabo, kandi babaleetera kwehurra nk’abataine mugaso. Munyaanya itwe arukwetwa Helen a naagamba ati: “Nkakurra omuka ey’etarumu kugonza. Ise nyowe akaba ali mukaali kandi buli kiro yaikaraga naatugambira nk’oku tutali b’omugaso.” Obundi, kusisanaho na Helen, naiwe omuntu aikaire naakutwaza kubi rundi naakubazaaho kubi ekikuleetiire kwehurra ngu torukugonzebwa. Obu kiraaba nukwo kiri, nikisobora kukugumira kukiikiriza ngu haroho omuntu ow’asobora kukwoleka ngu mali naakugonza.
4. Kusigikirra ha Zabuli 34:18, Yahwe ayehurra ata hali ab’omutima ogucwekere, kandi naaraganiza kubakorra ki?
4 N’obu kiraaba ngu abandi bakutwaize kubi, noosobora kukigumya ngu Yahwe naakugonza kandi naakurora nk’ow’omuhendo. Yahwe “aikara haihi nabo abomutima ogucwekere.” (Soma Zabuli 34:18.) Kakuba oyehurra ‘ocwekere omutima,’ ijuka ngu Yahwe akarora ebirungi omu mutima gwawe kandi yakwiriza haihi na uwe. (Yoh. 6:44) Aikara ayeteekaniize kukukonyera habwokuba naakugonza muno.
5. Kiki eki turukwegera ha mulingo Yesu yatwaizeemu abo abaatwazibwaga nk’abataine mugaso?
5 Nitusobora kumanya omulingo Yahwe ayehurra kuraba omu kwetegereza ekyokurorraho kya Yesu. Yesu obu akaba ali omu buheereza bwe omu nsi, akarora abo abaatwazibwaga nk’abataine mugaso kandi yabatwaza omu mulingo ogw’embabazi. (Mat. 9:9-12) Omukazi ow’akaba arwaire oburwaire obw’amaani obu yakwasire ha kijwaro kye obu naanihira kukira, Yesu akamuhuumuza kandi yamusiima habw’okwikiriza kwe. (Mar. 5:25-34) Yesu ahondera ekyokurorraho kya Ise kikumi ha kikumi. (Yoh. 14:9) Nahabweki noosobora kukigumya ngu Yahwe akurora nk’ow’omuhendo kandi arora emiringo yaawe enungi otwaliiremu okwikiriza kwawe n’okugonza okw’omwiniire.
6. Kiki eki osobora kukora kakuba oyehurra nk’ow’ataine mugaso?
6 Kiki eki osobora kukora kakuba ogumizaamu nooyehurra nk’ow’ataine mugaso? Soma enkarra za Baibuli ezikugumya ngu oli w’omuhendo hali Yahwe kandi ozecumiitirizeeho. b (Zab. 94:19) Obu oraaba ohoirwemu amaani habwokuba olemerwe kuhikiiriza ekigendererwa kyawe rundi tosobora kuheereza muno nk’abandi, otateeka omutima ha by’otasobora kukora. Yahwe tarukukunihirramu kukora ebintu ebi otarukusobora. (Zab. 103:13, 14) Obu oraaba watwaziibwe kubi, otecwera omusango habw’ogu ayakutwaize kubi. Etabe nsobi yaawe! Ijuka ngu Yahwe naija kucwera omusango abo abatwaza kubi abandi kandi akonyere abo abatwaziibwe kubi. (1 Pet. 3:12) Sandra, ayatwaziibwe kubi abazaire be obu akaba akyali muto naagamba ati: “Buli kiro nsaba Yahwe kunkonyera kwerora omu mulingo oguhikire, nk’oku uwe andora.”
7. Nitusobora tuta kukozesa ebiturabiremu omu bwomeezi kuheereza Yahwe?
7 Otaligurukyagurukya ngu Yahwe naasobora kukukozesa kukonyera abandi. Akuhaire omugisa ogw’okukorra hamu na uwe omu buheereza. (1 Kol. 3:9) Ebizibu ebi orabiremu omu bwomeezi nibisobora kuba bikukonyiire kwega kusaalirirwa abandi n’okumanya omulingo basobora kuba nibehurra. Haroho bingi ebi osobora kukora kubakonyera. Helen, ou tusangirwe tubalizeeho, akatunga obukonyezi kuruga hali Yahwe n’ab’oruganda, kandi hati na uwe naasobora kukonyera abandi. Naagamba ati: “Nayehurraga nk’ow’ataine mugaso, baitu Yahwe ankonyiire kwehurra ningonzebwa kandi nankozesa kukonyera abandi.” Hati Helen naayegondeza omu kuheereza nka payoniya ow’akasumi koona.
YAHWE NAAGONZA TWIKIRIZE OKUGANYIRA KWE
8. Yahwe atugambira ki omu Isaya 1:18?
8 Bamu h’abaheereza ba Yahwe betuntura muno habw’ebibi ebi baakozere kara batakabatiziibwe rundi hanyuma y’okubatizibwa. Baitu tusemeriire kukiijuka ngu Yahwe akahayo ekicunguro habwokuba naatugonza muno. Nahabweki naagonza twikirize ekisembo eki. Yahwe atugambira ngu hanyuma ‘y’okuhanuura hamu’ c na uwe ensonga, atuganyirra kimu. (Soma Isaya 1:18.) Mali nitusiima muno Yahwe habw’okutaikara naijuka ebibi byaitu ebya kara! Kandi ha murundi nugwo gumu, tayebwa ebirungi ebi twakozere.—Zab. 103:9, 12; Baheb. 6:10.
9. Habwaki tutasemeriire kwikara nituteekerezaaho ebibi ebi twakozere kara?
9 Obu oraaba noyentuntura habw’ebibi ebi wakozere kara, lengaho kuteeka omutima ha bintu ebi osobora kukora hati, n’ebi osobora kukora omu kasumi ak’omumaiso. Teekerezaaho ekyokurorraho ky’omukwenda Paulo. Aketuntura habw’okuhiiganiza muno Abakristaayo, baitu akaba akimanyire ngu Yahwe akaba amuganyiire. (1 Tim. 1:12-15) Akagumizaamu naatekerezaaho ebibi ebi akaba akozere kara? Nangwa. Atagumiizeemu naatekerezaaho ebibi ebi nk’oku ataragumizeemu naatekerezaaho ebintu ebi akaba ahikireho omu diini ey’Ekiyudaaya. (Baf. 3:4-8, 13-15) Oihireho, Paulo akagumizaamu n’obwekambi omu buheereza bwe kandi akateeka omutima h’akasumi ak’omumaiso. Nka Paulo, tosobora kuhindura eby’enyuma. Baitu nosobora kuhaisa Yahwe ekitiinisa omu nyikara ez’orumu hati kandi olindirre obusumi obw’omumaiso obu akuraganiize.
10. Kiki eki tusobora kukora kakuba ebitwakozere kara bikasaaliza abandi?
10 Nosobora kwetuntura habw’ebibi ebi wakozere kara kandi byasaaliza abandi. Kiki eki sobora kukukonyera? Kora kyona eki orukusobora kubaleetera kwehurra kurungi, otwaliremu n’okubasaba ekiganyiro. (2 Kol. 7:11) Saba Yahwe akonyera abo abawasaaliize. Naasobora kukukonyera n’okukonyera abo abawasaaliize kugumiisiriza n’okwongera kutunga obusinge.
11. Kiki eki tusobora kwegera ha kyokurorraho kya nabbi Yona? (Rora ekisisani ekya kyesweko.)
11 Yegera ha nsobi zaawe eza kara, kandi oikale oyetekaniize kwikiriza Yahwe kukukozesa omu mulingo gwona ogu aragonza. Tekerezaaho ekyokurorraho kya nabbi Yona. Omu kiikaro ky’okugenda Nineve nambere Yahwe akaba amuragiire, akacwamu kugenda omu kiikaro ekindi. Yahwe akahana Yona kandi akegera ha nsobi ye. (Yon. 1:1-4, 15-17; 2:7-10) Yahwe ataleke kukozesa Yona nka nabbi we. Akamuha omugisa ogundi ogw’okugenda Nineve, kandi ahonaaho Yona akoorobera Yahwe. Ataleke ensobi ei yakozere kara kumulemesa kwikiriza obujunanizibwa kuruga hali Yahwe.—Yon. 3:1-3.
Hanyuma ya nabbi Yona kukiraho omunda y’encu enkooto muno, Yahwe akongera yamugambira kugenda Nineve kurangirra obutumwa Bwe (Rora akacweka 11)
YAHWE ATUHUUMUZA NAAKOZESA OMWOYO OGURUKWERA
12. Yahwe atuha ata obusinge obu tuhikwaho ekizibu eky’amaani? (Abafiripi 4:6, 7)
12 Yahwe atuhuumuza obu tuhikwaho ekizibu eky’amaani naakozesa omwoyo gwe ogurukwera. Tekerezaaho ekyokurorraho kya Ron na Carol. Mutabani wabo akeyita. Nibagamba bati: “Tukaba turabire omu bizibu eby’amaani enyuma, baitu kinu nikyo kikyakizireyo. Haroho obutwaburwaga oturo omu bwire bw’ekiro, nahabweki twasabaga Yahwe kandi twayehurraga twine obusinge oburukubazibwaho omu Abafiripi 4:6, 7.” (Soma.) Obu oraaba nooraba omu kirengo eky’amaani noosobora kuseesera Yahwe omutima gwawe kuraba omu kusaba obwire bwona obw’orukugonza. (Zab. 86:3; 88:1) Ikara noosaba Yahwe omwoyo gwe ogurukwera. Naija kwikara naakukonyera.—Luk. 11:9-13.
13. Omwoyo ogurukwera nigusobora guta kutukonyera kugumizaamu nituheereza Yahwe n’obwesigwa? (Abefeso 3:16)
13 Ohikirweho ekirengo eky’amaani kandi kyakuleetera kuhwamu amaani? Omwoyo ogurukwera nigusobora kukuha amaani agorukwetaaga kugumizaamu noheereza Yahwe n’obwesigwa. (Soma Abefeso 3:16.) Teekerezaaho eky’okurorraho ekya munyaanya itwe arukwetwa Flora. Uwe na iba bakaba nibaheereza nk’abamiisani, iba obu yasihaine kandi baagaitururwa. Naagamba ati: “Nkahurra ekiniga eky’amaani habw’omulingo yangobiizeemu. Nkasaba Yahwe kumpa omwoyo gwe ogurukwera nukwo nsobole kugumiisiriza. Yahwe akampuumuza kandi n’obu kiraaba ngu kikazooka nk’ekitarukusoboka ha kubanza, nkagarukwamu amaani kandi naayeyongera kugumiisiriza.” Naayehurra ngu Ruhanga amukonyiire kweyongera kumwesiga naakigumiza kandi kimu ngu naija kumukonyera omu birengo byoona ebi aratunga. Ayongera agamba ati: “Ebigambo ebirukusangwa omu Zabuli 119:32 ebirukugamba ngu: ‘Ndairukiraga omu muhanda ogwebiragiro byawe, obwoligalihya omutima gwange,’ bikankonyera.”
14. Nitusobora tuta kwikiriza omwoyo gwa Ruhanga kutukonyera?
14 Kiki eki osemeriire kukora hanyuma y’okusaba Yahwe kukuha omwoyo ogurukwera? Kora ebintu ebirakukonyera kutunga omwoyo gwa Ruhanga. Binu nibitwarramu kugenda omu nsorrokano n’okutebeza. Soma Ekigambo kya Ruhanga buli kiro, eki nikiija kukukonyera kukyecumiitirizaaho. (Baf. 4:8, 9) Obu oraaba n’osoma, wetegereze abantu abaahikirweho ebirengo abarukubazibwaho omu Baibuli, kandi oyecumiitirizeeho omulingo Yahwe yabakonyiire kubigumira. Sandra, ou tusangirwe tubalizeeho akatunga ebizibu bingi omu bwomeezi. Naagamba ati: “Ekyokurorraho kya Yusufu kingarramu amaani. Ataikirize ebirengo n’obutalibwinganiza ebyamuhikireho kucekya enkoragana ye na Yahwe.”—Kub. 39:21-23.
YAHWE NAAKOZESA AB’ORUGANDA KUTUHUUMUZA
15. Ab’oruganda na banyaanya itwe nibasobora bata kutuhuumuza? (Rora n’ekisisani.)
15 Obutuba nitubonabona, ab’oruganda nibasobora kutuhuumuza. (Bak. 4:11) Gumu ha miringo Yahwe ayoleka ngu naatugonza nukwo kuraba omu b’oruganda na banyaanya itwe. Nibasobora kutuhuumuza kuraba omu kutuhuliiriza n’embabazi rundi nibatusagika kuraba omu kubaho obutuba nitubetaaga. Nibasobora kutusomera ekyahandiikirwe ekirukugarramu amaani rundi nibasaba hamu na itwe. d (Bar. 15:4) Obwire obumu ow’oruganda rundi munyaanya itwe naasobora kutwijukya omulingo Yahwe aroramu ensonga kandi eki nikitukonyera kugumizaamu nitugumiisiriza. Ekindi, ab’oruganda na banyaanya itwe nibasobora kutukonyera omu miringo endi nk’okutuleetera ebyokulya.
Abanywani abesigwa kandi abakuzire omu by’omwoyo nibasobora kutuhuumuza kandi nibatukonyera (Rora akacweka 15)
16. Kiki eki tusemeriire kukora kusobora kutunga obukonyezi bw’abandi?
16 Kusobora kutunga obukonyezi kuruga hali abandi tusemeriire kububasaba. Ab’oruganda na banyaanya itwe nibatugonza kandi nibagonza kutukonyera. (Nfu. 17:17) Baitu nibasobora kutamanya omulingo turukwehurra rundi kumanya ebiturukwetaaga. (Nfu. 14:10) Obu oraaba oyenuubire, noosobora kugambiraho banywani baawe abakuzire omu by’omwoyo omulingo orukwehurra. Bagambire ekyorukutekereza ngu nikisobora kukukonyera. Nosobora okugambiraho omu rundi babiri h’abagurusi abarukukwanguhira. Banyaanya itwe bakizoire ngu kibakonyera muno obu babazaaho na munyaanya itwe ondi ow’akuzire omu by’omwoyo.
17. Bintu ki ebimu ebisobora kutulemesa kutunga obukonyezi obu turukwetaaga, kandi nitusobora tuta kubiasingura?
17 Wetantale kwesoroora. Obwire obumu nosobora kwehurra ngu obiihiirwe kandi otarukugonza kumara obwire n’abandi. Obwire obumu ab’oruganda na banyaanya itwe nibasobora kutakwetegereza kurungi, rundi nibakubaliza ekintu ekirukusaaliza. (Yak. 3:2) Baitu eki otakiikiriza kukulemesa kugarurwamu amaani kuruga omu b’oruganda na banyaanya itwe. Omugurusi arukwetwa Gavin, ow’aine oburwaire obw’okwenuuba, naagamba ati: “Kubaza na banywani kiri kimu ha bintu ebi ntekerezaaho ha kumalirra.” Baitu, Gavin ayekamba kuba n’ab’oruganda kandi agasirwa obu aba hamu na bo. Munyaanya itwe arukwetwa Amy naagamba ati: “Kingumira kwesiga abantu habw’ebintu ebi narabiremu kara. Baitu ndiyo ninyega kwesiga ab’oruganda na banyaanya itwe nka Yahwe. Nkimanyire ngu kimusemeza kandi na nyowe nikinsemeza.”
EMIRAGO YA YAHWE N’ESOBORA KUTUHUUMUZA
18. Kiki ekitulindiriire omu kasumi ak’omumaiso, kandi kiki eki tusobora kukora hati?
18 Nitusobora kulindirra obusumi obw’omumaiso n’ekihika nambere Yahwe aturaganiize ngu naija kwihiraho kimu ebintu ebituleetera kwetuntura n’obusaasi. (Kus. 21:3, 4) Omu kasumi ako, ebintu byona ebirukusaaliza ebi turabiremu, “tibiriijukwa.” (Is. 65:17) Nk’oku turozere, na kasumi kanu, Yahwe ‘aboha ebihuta byaitu.’ Yahwe atuhaire ebintu bingi ebisobora kutuhuumuza n’okutukonyera. Kigumye ngu waikiriza obukonyezi bwe. Otaligurukyagurukya ngu naakufaaho.—1 Pet. 5:7.
EKIZINA 7 Yahwe, Nuwe Maani Gaitu
a Amabara gahindwirwe.
b Rora akasanduuko “ Yahwe Akurora nk’Ow’Omuhendo.”
c Kusobora “kuterekereza ensonga” na Yahwe, tusemeriire kwoleka ngu twegarukiremu kuraba omu kumusaba kutuganyira ebibi byaitu n’okuhinduramu engeso zaitu. Ekindi, kakuba tukora ekibi ky’amaani, tusemeriire kuserra obukonyezi kuruga omu bagurusi b’ekitebe.—Yak. 5:14, 15.
