Ekisasi kyali kicweka ky’omulyango ogwataahaga aharukukira Okwera omu yekaru. Kusigikirra mpidura za Baibuli eya New World Translation of the Holy Scriptures ezatiirwe omwaka 2023 gutakahikire, “ekisasi ekikaba kiri omumaiso g’enju, okuraiha kwakyo nk’okugaliha kw’enju kikaba kiri emikono 20, noburaibura bwakyo 120.” (2 Byom. 3:4) Empindura ezindi na zo zoleka ngu ekisasi kinu kikaba kiine oburaiha “bw’emikono 120” ekirukumanyisa gukaba guli munaara ogurukwingana mita 53 (fuuti 175)!

Baitu Baibuli eya New World Translation oruteerwa rwa 2023 yo n’egamba eti ha kisasi kya yekaru ya Sulemani: “Okuraiha kwakyo emikono 20,” rundi haihi nka mita 9 (Fuuti 30). a Tekerezaaho ensonga eyalesereho empindahinduka enu.

Oburaiha bw’ekisasi tiburukubazibwaho omu 1 Ekyabakama 6:3. Omu rukarra oru, Yeremiya abazaaho okuraiha n’okugaliha kw’ekisasi, hatali okuraiha kwakyo kuruga hansi kuhika haiguru. Hanyuma omu suura erukuhonderaho, abazaaho omu bwijwire ebintu ebindi ebirukuhuniiriza ebya yekaru otwaliiremu n’Enyanja eyagere, entebe ikumi ez’emiringa, n’enyomyo ibiri ez’emiringa ezikaba ziri aheeru y’ekisasi. (1 Bakam. 7:​15-37) Ekisasi kinu obu kiraaba kikaba nikihinguza mita 50 kuraiha kandi nikikira yekaru kuraiha, habwaki Yeremiya atarabalizeeho kuraiha kwakyo? Na hanyuma y’ebyasa bingi, Abahandiiki by’ebyafaayo Abayudaaya bakahandiika ngu ekisasi kikaba kitaraihire kukira yekaru ya Sulemani.

Abaseruliiriza bagurukyagurukya obu kiraaba ngu ebisiika bya yekaru bikaba bisagikirwe ekisasi ekiraihire kwingana emikono 120. Ebyombeko eby’amabaale n’amatafaali ebiraihire omu busumi obwa kara nk’amalembo ga yekaru omu Misiri bikaba biine hansi hagalihire kandi haiguru hafunzire rundi hataito. Baitu yekaru ya Sulemani ekaba n’eyahukana. Abaseruliiriza nibagamba ngu ebisiika byayo bikaba bitarukuhinguza omuguna gw’emikono 6 rundi 2.7 (fuuti 9). Omunyabyafaayo w’ebyombeko arukwetwa Theodor Busink naagamba ati: “Kusigikirra ha muguna [gw’omulyango] gwa Yekaru, ekisasi tikisobora kuba ngu kikaba nikihinguza [okuraiha] okw’emikono 120.”

Nikisobora kuba ngu ebigambo ebiri omu 2 Ekyebyomubusinge 3:4 bikakopororwa kubi. N’obu kiraaba ngu ebihandiiko ebimu birumu “120” omu rukarra runu, ebihandiiko ebindi ebirukwesigwa nka fifth-century Codex Alexandrinus na sixth-century Codex Ambrosianus, byo birumu “emikono 20.” Habwaki omuhandiiki naasobora kuba yahandiikire “120”? Ekigambo “kikumi” na “emikono” nibisisana omu Ruheburaniya. Nahabweki omuhandiiki naasobora kuba yahandikire ekigambo “kikumi” omu kiikaro kya “emikono.”

Kyamananu ngu, n’obu turaaba nitulengaho kwetegereza ebintu binu omu bwijwire hamu na yekaru ya Sulemani nk’oku ekaba niingana, tuteeka muno omutima hali eki eky’ekaba n’ekiikirra, kandi egi niyo yekaru ya Yahwe ey’eby’omwoyo. Mali nitusiima muno ngu Yahwe araaliize abaheereza be boona kumuheereza omu yekaru egi!—Baheb. 9:​11-14; Kus. 3:12; 7:​9-17.