1, 2. (a) Bintu ki ebisobora kutuletera kwekaguza: “Kuhikya nkaha?” (b) Habwaki ebyokurorraho eby’abaheereza ba Ruhanga aba kara nibitugarramu amaani?

“OKUHIKYA nkaha?” Ekikaguzo kinu kikakaguzibwa nabbi Isaya na nabbi Habakuki, abakaba bali baheereza ba Yahwe abesigwa. (Isaya 6:11; Habakuki 1:2) Omukama Daudi obu yahandikire Zabuli 13, nauwe akakuguza ekikaguzo nikyo kimu emirundi ena. (Zabuli 13:1, 2) Kandi na Yesu obwakaba ayetoroirwe abantu abataine okwikiriza, akakaguza ngu: “Ndihikya nkaha?” (Matayo 17:17) Naitwe omu kasumi kanu nitusobora kwesanga nitwekaguza ekikaguzo nikyo kimu.

² Kiki ekisobora kutuletera kukaguza, “Okuhikya nkaha?” Nitusobora kuba tuhikirweho ekintu ekitali ky’obwinganiza, turwaire, rundi tukuzire muno omu myaka. Rundi nitusobora kuba twetuntwire habwokuba tuli omu biro ebya ha mpero “ebyakabi kaingi.” (2 Timoseo 3:1) N’okwikara omu nsi enu enyakurumu abantu abaine entekereza embi nakyo nikisobora kutujwahya rundi kutumaramu amaani. Kyona ekiraaba  kituletiire kwekaguza ekikaguzo kinu, twijuke ngu Yahwe atajunaane abahereza be abakikagwize.

3. Nitusobora kukora ki obu turukuba tuli omu bwire obugumire muno?

³ Nitusobora kukora ki obu turukuba tuli omu bwire obugumire muno? Yahwe akakozesa Yakobo mugenzi wa Yesu kututererra ati: “Nukwo bene baitu mugume, okuhikya okuija kwa Mukama.” (Yakobo 5:7) Nahabweki twine kugumisiriza. Baitu obugumisiriza nibutwarramu ki, kandi nitusobora kukurakuraniza tuta omulingo gunu omurungi?

4, 5. (a) Obugumisiriza nibutwarramu ki, kandi nitusobora kubwoleka tuta? (b) Yakobo akasoborraho ata obugumisiriza? (Rora ekisisani ekiri ha rupapura 3.)

⁴ Baibuli eyoleka ngu obugumisiriza buletwa omwoyo gwa Ruhanga. Kakuba Ruhanga atatukonyera, nikisobora kutugumira kugumisiriza omu bwire obugumire muno habwokuba tituhikiriire. Obugumisiriza kisembo ekiruga hali Ruhanga kandi obu tukikozesa, twoleka ngu nitumugonza kandi nitugonza n’abantu bagenzi baitu. Baitu obututagumisiriza, okugonza hagati yaitu n’abandi kuceka. (1 Abakolinso 13:4; Abagaratiya 5:22) Baitu okugumisiriza nikutwarramu ki? Kutwarramu kuguma twine entekereza ehikire n’omu bwire obutanguhire. (Abakolosai 1:11; Yakobo 1:3, 4) Obugumisiriza butukonyera kwikara tuli besigwa hali Yahwe n’omu bwire obw’ebizibu bingi muno. Kandi butukonyera kwetantara kuhoora enzigu obutuba nitubonabonesebwa. Baibuli egamba ngu twine kuba nomutima gw’okugumisiriza. Ensonga enu enkuru negambwaho omu Yakobo 5:7, 8. (Soma.)

⁵ Habwaki tusemeriire kulindirra Yahwe ahikirize emirago ye? Omukwenda Yakobo natulengesaniza n’omulimi. Nobukiraaba ngu omulimi akora muno obwaba nabyara ebimera, taine obusobozi bw’okuhindura obwire bw’enjura n’omusana rundi kwanguhyaho okukura kw’ebimera bye. Obwarukuba nagonza kutunga “ebyana ebyensi ebyomuhendo omwingi”, aine kulinda n’obugumisiriza. Nikyo kimu naitwe, obu kirukuhika ha kulinda emirago ya Yahwe kuhikirizibwa, haroho ebintu bingi ebi tutaineho obusobozi. (Marako 13:32, 33; Engeso Ezabakwenda 1:7) Naitwe tusemeriire kugumisiriza nk’omulimi.

6. Ekyokurorraho kya Mika nikitwegesa ki?

⁶ Nabbi Mika nauwe akaba aine kugumisiriza obusumi obugumire nka itwe omu kasumi kanu. Akabaho omu bulemi bw’omukama Ahazi. Omukama onu akaba ali mubi muno ekyaleteriize obuli bw’enguzi kukanyira kimu omu ihanga linu. Kumanya ngu ebintu byali bitali birungi, Baibuli egamba ngu obu kyahikaga ha kibi, abantu ‘bakikoraga omu bwekambi.’ (Soma Mika 7:1-3.) Mika akaba akimanyire ngu nauwe tasobora kwihaho ebintu binu. Akacwamu kukora ki? Natugambira ngu: “Baitu nyowe, nditegereza Mukama; Ndirinda Ruhanga owokujunwa kwange: Ruhanga wange alimpurra.” (Mika 7:7) Naitwe tusemeriire kuba nka Mika ‘tulindirre Ruhanga.’

7. Habwaki tutasemeriire kulinda nk’abarukuhikya omukoro kwonka?

⁷ Obu turaaba twine okwikiriza nk’okwa Mika, nitwija kulindirra Yahwe n’ekihika. Titurukwija kulinda nk’omunyankomo anyakuli omu kadukuru alindiriire ekiro kye ky’okwitwa. Omunyankomo onu n’aba  ahambiriziibwe buhambirizibwa kulinda ekiro eki baitu tasobora kukirinda n’okusemererwa. Itwe titusemeriire kulinda omu mulingo ogu! Tulindirre Yahwe n’ekihika habwokuba tumanyire n’aija kuhikiriza omurago gwe ogw’okutuha obwomeezi obutahwaho ha bwire bwonyini! Tweyongere “kugumira kimu n’obugumisiriza hamu n’okusemererwa.” (Abakolosai 1:11, 12, NW) Baitu n’obu turaaba nitulinda, twerinde kutontorooma nitugamba ngu Yahwe akereriirwe. Kinu nikiija kumubihiza.​—Abakolosai 3:12.

8. Abaheereza ba Yahwe aba kara nitubegeraho ki?

⁸ Kiki ekiratukonyera kuba n’omutima gw’okulinda? Nitusobora kutekerezaho abahereza ba Yahwe ab’omu busumi bwa kara abagumisiriize balinda Yahwe ahikirize emirago ye. (Abarumi 15:4) Obu turaaba nitubazaho ebyokurorraho byabo, kirungi tutekerezeho n’akasumi akabamazire nibalinda, n’omulingo Yahwe yabahaire emigisa habw’okugumisiriza.

9, 10. Iburahimu na Sara bakalindirra Yahwe kumara akasumi ki?

⁹ Katubazeho ekyokurorraho kya Iburahimu na Sara. Bakahabwa “omurago” “obwokuikiriza nokuguma.” Baibuli n’etusoborra ngu Iburahimu “obuyamazire okugumisiriza,” Yahwe akamuraganiza kumuha omugisa n’okumufoora ise w’ihanga erikooto. (Abaheburaniya 6:12, 15) Habwaki kyali nikyetagisa Iburahimu kugumisiriza? Habwokuba omurago ogu gukaba nigugenda kumara akasumi karaira  gutakahikiriziibwe. Ha Nisani 14 omwaka 1943 Yesu atakaizire omu nsi, Iburahimu na Sara hamu n’abantu abakaba ali nabo bakacwanganiza Ekyambu Furati bataaha omu Nsi Ekaba Ebaraganiziibwe. Baitu Iburahimu akaba nagenda kulinda emyaka 25 omutabani Isaaka atakazairwe kandi akaba aine kulinda emyaka endi 60 abaijukuru be Esau na Yakobo batakazairwe.​—Abaheburaniya 11:9.

¹⁰ Iburahimu akagweterwa ekicweka ekirukwingana nkaha eky’Ensi Ekaba Eraganiziibwe? Baibuli n’egamba ngu Yahwe “atamuhe obugwetwa munu, nobuhokuba hokulibatira ekigere: yaraga okugimujweka uwe nabanabe hanyumaye, obwakaba atakazaire mwana.” (Engeso Ezabakwenda 7:5) Hakarabaho emyaka 430 Iburahimu amazire kucwanganiza Ekyambu Furati nubwo abaijukuru be batandikire kwikara omu nsi engi nk’ihanga.​—Okuruga 12:40-42; Abagaratiya 3:17.

11. Habwaki Iburahimu yasoboire kulindirra Yahwe, kandi n’aija kurora migisa ki kuruga omu kugumisiriza kwe?

¹¹ Iburahimu akaba ayehaireyo kulinda habwokuba akaba nakigumya ngu Yahwe akaba nagenda kuhikiriza emirago ye. Akaba naikiririza omu Yahwe. (Soma Abaheburaniya 11:8-12.) Iburahimu kikamusemeza kulinda n’obukiraaba ngu akaba nagenda kufa atakarozere buli kimu kyona Yahwe akaba amuraganiize nikihikirra. Hati teramu akasisani orole omulingo Iburahimu alisemererwa hanyuma y’okuhumbuuka akatandika kwikara omu nsi empyaka. Kirimuhuniriza kurora ngu ebirukumukwataho uwe n’eka ye bikahandikwa omu Baibuli. * (Rora obugambo obuli hansi.) Kandi tekereza omulingo alisemererwa obwalimanya obujunanizibwa obwakaba aine omu kuhikiriza ekigendererwa kya Yahwe ekirukutwarramu Masiya ow’akaba araganiziibwe! Nitukigumya alirora omulingo okugumisiriza kwe kwarugiremu ebirungi.

12, 13. Habwaki Yusufu kyali nikimwetagisa kugumisiriza, kandi ntekereza ki ehikire ei yayolekere?

¹² Mwijukuru wa Iburahimu arukwetwa Yusufu nauwe akaba ayehaireyo kugumisiriza. Akahikwaho obutali bwinganiza obw’amaani. Obw’okubanza, obwakaba aine emyaka 17, bagenzi be bakamutunda omu bwiru. Ekyakabiri, haroho obu bamutwaire omu nkomo habwokuba mukazi wa mukama we akamuhangirra ngu akalengaho kumuhamba. (Okubanza 39:11-20; Zabuli 105:17, 18) Yusufu n’obwaraaba yali muheereza wa Yahwe omwesigwa, akasisana nk’arukufubirwa omu kiikaro ky’okuhabwa emigisa. Baitu obu harabireho emyaka 13, ebintu bikahinduka. Yusufu bakamulekera kuruga omu nkomo kandi bamufoora muntu wakabiri arukukirayo ebitiinisa omu nsi ya Misiri yoona.​—Okubanza 41:14, 37-43; Engeso Ezabakwenda 7:9, 10.

¹³ Yusufu akerya omujuju habw’obutali bwinganiza obwamuhikireho? Notekereza akaijwamu ekitekerezo ekirukugamba ngu Yahwe akaba amweberwe? Nangwa. Yusufu akalindirra omu kugumisiriza. Kiki ekyamukonyire? Kukaba kwikiriza kwe okwakaba aine omu Yahwe. Akakyetegereza ngu ensonga zikaba ziri omu mikono ya Yahwe.  Kinu nitukimanya habw’ebigambo binu ebiyagambiire bagenzi be: “Mutatina: baitu nyowe ndi omu kikaro kya Ruhanga? Nobu muraaba mwali mukigenderiire kumpikyaho akabi, Ruhanga akaba n’agonza harugemu ebirungi akize obwomeezi bw’abantu baingi nk’oku arukukora hati.” (Okubanza 50:19, 20) Yusufu akaba akimanyire ngu kulinda emigisa ya Yahwe kukaba kutali kusiisa obwire.

14, 15. (a) Habwaki nitusobora kugamba ngu mali Daudi akagumisiriza? (b) Kiki ekyakonyiire Daudi kulinda n’okugumisiriza kwona?

¹⁴ Omukama Daudi nauwe akahikwaho obutali bwinganza omu miringo nyingi. Obwakaba akyali muto, Yahwe akamusesaho amagita yamufoora mukama wa Isareri. Baitu Daudi akabanza kulinda emyaka 15 kurabaho atakatandikire kulema n’oburwakuba oruganda rwe. (2 Samuiri 2:3, 4) Omu myaka egi, Daudi akaba aine kwiruka nukwo ayesereke habwokuba Omukama Saulo akaba nagonza kumwita. * (Rora obugambo obuli hansi.) Kinu kikarugiramu Daudi kuburwa eka eye habwe. Akaba aine kwirukira omu ihanga lindi rundi kugenda omu irungu ayesereke omu bwingira. Obwire bukahika Saulo yafeera omu bulemu. Baitu nabwo Daudi akaba aine kulinda emyaka endi musanju atakafokere mukama w’ihanga lyona erya Isareri.​—2 Samuiri 5:4, 5.

¹⁵ Habwaki Daudi yasoboire kulinda n’obugumisiriza? Eky’okugarukamu nitukisanga omu Zabuli ei yahandikire nambere yakagwize emirundi ena ngu: “Ndihikya nkaha?” Akagamba ati: “Baitu nyowe nkesiga okuganyira kwawe; omutima gwange gurasemererwa obwokujuna kwawe: ndazinira Mukama, baitu akangirra embabazi nyingi.” (Zabuli 13:5, 6) Daudi akaba amanyire ngu Yahwe yamugonzaga kandi ngu akaba atasobora kuleka kumwoleka obwesigwa. Akaijuka emirundi yoona Yahwe yamusagikire nukwo kyamukonyera kuleka Yahwe nuwe amaleho emihito ye. Daudi akaba amanyire ngu kulindirra emigisa ya Yahwe kukaba kutali kusisa obwire.

16, 17. Yahwe Ruhanga na Yesu Kristo bolekere bata ngu bagumisiriza?

¹⁶ Yahwe tasobora kutwetagisa kukora ekintu kandi kunu uwe atarukukikora. Nuwe kyokurorraho ekirukukirayo eky’omuntu arukugumisiriza. (Soma 2 Petero 3:9.) Ekyokurorraho, ira muno omu rugonjo rwa Adeni, Setani akagamba ngu Yahwe tali mwinganiza. Yahwe alindiriire n’obugumisiriza kuhikya ibara lye obu liryezebwa. Kinu kirireta emigisa hali abo “bona abamutegereza.”​—Isaya 30:18.

¹⁷ Yesu nauwe aine omutima gw’okugumisiriza. Obwakaba ali omu nsi akasigara ali mwesigwa kuhikya okufa kwe. Omu mwaka 33, akahayo omuhendo gw’ekihongwa kye hali Yahwe omu iguru. Baitu  akaba aine kulinda atakatandikire kulema nk’omukama kuhikya 1914. (Engeso Ezabakwenda 2:33-35; Abaheburaniya 10:12, 13) Hati nobwaraaba yatandikire kulema, Yesu aine kubanza kugumisiriza kuhikya emyaka rukumi ey’obulemi bwe obwerihwaho nubwo abanyanzigwa be balihwerekerezebwa. (1 Abakolinso 15:25) Mali aine kulinda habw’akasumi karaira. Baitu emigisa erirugamu eryoleka ngu mali kikaba kirungi kulinda.

18, 19. Kiki ekiratukonyera kulinda n’obugumisiriza?

¹⁸ Kinu nikyolekera kimu ngu Yahwe n’agonza tugumisirize kandi tube n’omutima gw’okulinda. Kiki ekiratukonyera kugumisiriza? Tusemeriire kusaba Yahwe atuhe omwoyo gwe ogurukwera. Kandi twijuke ngu obugumisiriza buletwa omwoyo gwa Ruhanga ogurukwera. (Abefeso 3:16; 6:18; 1 Abasesalonika 5:17-19) Nahabweki wesengereze Yahwe akukonyere kugumisiriza!

¹⁹ Kandi oikale noijuka ekyakonyire Iburahimu, Yusufu, hamu na Daudi kugumisiriza kuhikya emirago ya Yahwe obu yahikiriziibwe. Okwikiriza n’okwesiga Yahwe nikyo ekyabakonyire. Batefeho bonka n’ebyetago byabo bonka. Obuturayecumitiriza ha birungi ebi batungire, naitwe nitwija kutunga amaani g’okweyongera kuba n’omutima gw’okulinda.

20. Kiki ekitumaliriire kukora?

²⁰ Nahabweki n’obu turaaba nituraba omu bizibu, twine kuba n’omutima gw’okugumisiriza. Obwire obumu nitusobora kwekaguza, “Mukama wange, okuhikya nkaha?” (Isaya 6:11) Baitu omwoyo ogwa Ruhanga ogurukwera nigusobora kutukonyera kuhondera ekyokurorraho kya nabbi Yeremiya nitugamba: “Mukama nugwo mugabo gwange,” kandi “ndamutegerereza.”​—Empamo 3:21, 24.