1. Nk’omu mwaka gwa 95 C.E., omukwenda Yohana akaba ali omu nyikara ki?

NK’OMU mwaka gwa 95 C.E., omukwenda Yohana akaba ali omu nyikara ey’egumangaine. Akaba agurusire, asibirwe nk’omunyakomo ha kizinga ekirukwetwa Patimo, kandi nasobora kuba nuwe mukwenda wenka ow’akaba akyali mwomeezi. (Kus. 1:9) Akaba akimanyire ngu abahakani baali nibegesa ebisuba kandi nibaletera Abakristaayo kwebaganizaamu. Kyali nikizoka ngu omu kasumi akatali kahara Abakristaayo ab’amananu baali nibagenda kuhweraho kimu.​—Yud. 4; Kus. 2:15, 20; 3:1, 17.

2. Kusigikirra ha Okusuku’rwa 7:9-14, Yohana akatunga kwolekwa kwa mulingo ki? (Rora ekisisana ekya ha kyesweko.)

² Yohana obwakaba ali omu nyikara enu ey’egumire Yahwe akamwoleka ebintu ebirungi eby’ali nibigenda kubaho omu kasumi ak’omu maiso. Omu kwolekwa kunu, akarora malaika n’agambira bamalaika bandi bbana, kukwata emiyaga ena ey’omuhito omwigi kuhikya ekitebe ky’abairu ba Ruhanga obubaramara kutekwaho akokurorraho. (Kus. 7:1-3) Ekitebe kinu nubo abaseserweho amagita 144,000 abarukwija kulema hamu na Yesu omu iguru. (Luk. 12:32; Kus. 7:4) Hanyuma Yohana akabazaaho ekitebe ekindi, ekikooto ati: “Dora!”​—ekigambo kinu nikyoleka ngu ekiyarozere kikamuhuniriza muno kandi akaba atarukukinihira. Yohana akarora ki? “Ekitebe kingi omuntu wena ekyatasobora okubara, barugire omu mahanga gona, nenganda, nabantu, nendimi, bemeriire omu maiso gekitebe kyobukama, nomu maiso Gomwana Gwentama.” (Soma Okusuku’rwa 7:9-14.) Ekintu kinu, kiine kuba kyasemiize muno Yohana habwokuba akakimanya ngu omu kasumi ak’omu maiso abantu baingi baali nibagenda kuramya Yahwe omulingo oguhikire.

3. (a) Habwaki okwolekwa kwa Yohana kusemeriire kugumya okwikiriza kwaitu? (b) Nitwija kubazaaho ki omu kicweka kinu?

³ Okwolekwa kunu kwine kuba kwagumize okwikiriza kwa Yohana. Naitwe kusemeriire kugumya okwikiriza kwaitu habwokuba nikukwataho ebiro eby’okumalirra ebiturumu. Omu kasumi kanu  obukaikuru n’obukaikuru bw’abantu beteranizeeho ekitebe kya Yahwe kandi baine okunihira okwokuraba omu muhito omwingi n’okwomeera ebiro n’ebiro omu nsi. Omu kicweka kinu nitwija kurora omulingo Yahwe yakonyire abaheereza be kwetegereza kurungi ekitebe kinu ekingi emyaka nka kinaana enyuma. Kandi nitwija n’okurora ebintu bibiri ebirukukwata ha kitebe kinu: (1) obukooto bwakyo kandi (2) nk’oku kirumu abantu kuruga omu nsi yoona. Kubazaaho ensonga zinu nikiija kwongera kugumya okwikiriza okw’abo boona abaine okunihira okw’okuba omu kitebe kinu Yahwe eky’ahaire omugisa.

4. Amadiini egefoora kuba ag’Ekikristaayo galemerwe kwetegereza mananu ki agali omu Baibuli, baitu habwaki Abeegi ba Baibuli bo baali bembaganiza?

⁴ Amadiini agefoora kuba ag’Ekikristaayo tigegesa amananu agali omu Baibuli agarukwoleka nk’oku akasumi kalihika abantu abarukworobera Ruhanga baikale omu nsi ebiro n’ebiro. (2 Kol. 4:3, 4) Kandi agarukukira obwingi hali ganu gegesa ngu, abantu abarungi obubafa bagenda omu iguru. Baitu gurupu entaito ey’Abeegi ba Baibuli abaturukyaga Watch Tower kutandika n’omwaka 1879 baali batarukwegesa enyegesa egi. Bakakyetegereza ngu Ruhanga akaba nagenda kwongera afoole ensi orugonjo orurungi kandi obukaikuru n’obukaikuru obw’abantu abamworobera baikale hanu omu nsi hatali omu iguru. Baitu kikabatwarra akasumi kwetegereza kurungi nibaha bonyini abakaba nibagenda kwikara omu nsi.​—Mat. 6:10.

5. Abeegi ba Baibuli baketegereza ki ha 144,000?

⁵ Abeegi ba Baibuli bakongera bakyetegereza nk’oku Ebyahandikirwe nibyoleka ngu haroho abantu abamu “abaguzirwe [kuruga] omu nsi” kugenda omu iguru kulema hamu na Yesu. (Kus. 14:3) Abantu banu nubo Abakristaayo abaseserweho amagita 144,000 abekambi kandi abehaireyo kuheereza Yahwe bakyali omu nsi. Baitu ekitebe ekingi bakyetegerezaga bata?

6. Abeegi ba Baibuli baali nibetegereza bata ekitebe ekingi?

⁶ Omu kwolekwa, Yohana akarora ekitebe kinu eky’abantu “bemeriire omu maiso gekitebe ekyobukama nomu maiso Gwomwana Gwentama.” (Kus. 7:9) Ebigambo binu bikaletera Abeegi ba Baibuli kutekereza ngu Abakristaayo abali omu kitebe ekingi nabo nibagenda kwikara hamu n’abaseserweho amagita 144,000 omu iguru. Baitu abaseserweho amagita 144,000 bakwahukaine bata hali ekitebe ekingi kakuba boona baali nibagenda omu iguru? Abeegi ba Baibuli batekerezaaga ngu ekitebe ekingi kyali kirumu Abakristaayo abaali batorobiire Ruhanga omu bwijwire obubakaba bakyali omu nsi. Batekerezaaga ngu abantu banu baali baine engeso enungi obubakaba bakyali omu nsi n’obukiraaba ngu bakaba baali omu madiini ag’ebisuba agayeforaga kuba g’Ekikristaayo. Abeegi ba Baibuli baikirizaaga ngu abantu nka banu baali nibagonza Ruhanga baitu batarukumugonza ekirukumara kusobora kulema hamu na Yesu. Nahabweki bakaba nibagenda kwirizibwa kugenda kwikara omu iguru omu maiso g’ekitebe ky’Obukama baitu bakaba batarukugenda kwikirizibwa kwikarra ha bitebe by’Obukama.

7. Abeegi ba Baibuli baali nibaikiriza ngu nibaha abakwikaire omu nsi omu kasumi ak’Obulemi bwa Kristo obw’Emyaka Rukumi, kandi kiki eki baali nibaikiriza ha baheereza ba Yahwe abakara?

⁷ Hati nibaha abakaba nibagenda kwikara omu nsi? Abeegi ba Baibuli baali nibaikiriza ngu hanyuma y’Abakristaayo 144,000 hamu n’ab’ekitebe ekingi kugenda omu iguru, obukaikuru n’obukaikuru bw’abantu abandi baali nibaija kutunga omugisa ogw’okwikara omu nsi nukwo begondeze hansi y’Obulemi bwa Kristo obw’Emyaka Rukumi. Abeegi ba Baibuli batekerezaaga ngu abantu banu abakwikaire omu nsi nubo abaali batarukuhereza Yahwe Obulemi bwa Kristo obw’Emyaka Rukumi butakatandikire kulema. Baitu baali nibagenda kwegesebwa ebirukukwata hali Yahwe omu kasumi ak’Obulemi bwa Kristo  obw’Emyaka Rukumi. Nukwo hanyuma y’emyaka rukumi abakwikiriize kukora Yahwe eby’agonza batunge obwomeezi obutahwaho kandi abakumujemiire bahwerekerezebwe. Ekindi baali nibatekereza ngu abamu ha bantu abakuheriize ‘nk’abalemi’ omu nsi omu kasumi ak’Obulemi bwa Kristo obw’Emyaka Rukumi nabo bakugenzere omu iguru hanyuma y’emyaka rukumi. Kandi baali nibaikiriza ngu “abalemi” banu bali nibatwarramu abamu ha basaija abaheriize Yahwe n’obwesigwa, Kristo atakaizire omu nsi abakuhumbukire omu kasumi ak’emyaka rukumi.​—Zab. 45:16.

8. Abeegi ba Baibuli baali nibaikiriza ngu haroho ebitebe bingaha?

⁸ Kinu nikimanyisa ngu, Abeegi ba Baibuli baali nibatekereza ngu haroho ebitebe bisatu: (1) 144,000, abaali nibagenda kulema hamu na Yesu omu iguru; (2) ekitebe ekingi eky’Abakristaayo abaali batarukwekamba muno, abaali nibagenda kwemererra omu maiso g’ekitebe kya Yesu eky’Obukama omu iguru; hamu (3) n’obukaikuru bw’abantu abakwegesiibwe ebirukukwata ha bintu Yahwe eby’agonza omu kasumi ak’emyaka rukumi. * Baitu Yahwe akahika y’abakonyera kwetegereza kurungi ensonga enu.​—Nfu. 4:18.

9. (a) Ekitebe ekingi kyemerra kita “omu maiso gekitebe ekyobukama nomu maiso Gwomwana Gwentama”? (b) Habawaki ensoborra empyaka ey’Okusuku’rwa 7:9 eyanguhire kwetegereza?

⁹ Omu mwaka gwa 1935 Abakaiso ba Yahwe baketegereza kurungi nibaha abali omu kitebe ekingi Yohana ekiyarozere omu kwolekwa. Bakakyetegereza ngu ab’ekitebe ekingi kwemerra “omu maiso gekitebe ekyobukama nomu maiso Gwomwana Gwentama” tikirukumanyisa ngu bali omu iguru. Baitu kwemerra “omu maiso g’ekitebe kyobukama” nikimanyisa ngu n’obukiraaba ngu balikara omu nsi, bakimanyire nk’oku Yahwe nuwe Mulemi w’obuhangwa bwona kandi niborobera obulemi bwe. (Is. 66:1) Bemerra omu maiso “Gwomwana Gwentama” kuraba omu kwikiririza omu kicunguro kya Yesu. Kinu nikisisana n’ekiri omu Matayo 25:31, 32, nambere ha rukugamba ngu “amahanga gona” otwaliremu n’abantu ababi, “galisorolezebwa” omu maiso g’ekitebe kya Yesu eky’Obukama. Busaho kugurukyagurukya amahanga ganu goona gali omu nsi hatali omu iguru. Ensoborra enu empyaka eyanguhire kwetegereza. N’etukonyera kwetegereza habwaki Baibuli etarukwoleka ngu abo abaali omu kitebe ekingi nibagenda omu iguru. Abakristaayo 144,000 nubo bonka abarukwija kutunga obwomeezi obutahwaho omu iguru kandi “balirema ensi nk’abakama” hamu na Yesu.​—Kus. 5:10, NW.

10. Habwaki abo abali omu kitebe ekingi basemeriire kwegesebwa Yahwe eby’agonza akasumi ak’Obulemi bwa Kristo obw’Emyaka Rukumi katakahikire?

¹⁰ Kuruga omu 1935, Abakaiso ba Yahwe bakakyetegereza ngu ekitebe ekingi Yohana ekiyarozere nikimanyisa Abakristaayo boona abesigwa abaine okunihira okw’okutunga obwomeezi obutahwaho omu nsi. Abantu abali omu kitebe kinu kusobora kukiraho ha muhito omwingi, basemeriire kwegesebwa Yahwe eby’agonza akasumi ak’Obulemi bwa Kristo obw’Emyaka Rukumi katakahikire. Kandi basemeriire kwoleka okwikiriza okw’amaani nukwo basobole “okukira ebi byona ebirihikirra” akasumi ak’Obulemi bwa Kristo obw’Emyaka Rukumi katakahikire.​—Luk. 21:34-36.

11. Habwaki Abeegi ba Baibuli batekerezaaga ngu abantu abamu bakugenzere omu iguru hanyuma y’Obulemi bwa Yesu obw’Emyaka Rukumi?

¹¹ Kandi enyikiriza erukugamba ngu abamu ha baheereza ba Yahwe abesigwa ab’omu nsi baali bokugenda omu iguru hanyuma y’Obulemi bwa Kristo obw’Emyaka Rukumi, ehikire? Ensonga enu ekabazibwaho omu Watch Tower eya Febwali 15, 1913. Omuntu akaba nasobora kwekaguza  ati: “Nikisoboka kita Abakristaayo abamu kugenda omu iguru baitu kandi abaheereza ba Yahwe abakara abaali bamuheerize n’obwekambi kubakira bakaikara omu nsi?’ Omu kasumi ako batekerezaaga bati habwokuba baali nibaikiriza ebintu binu ebitahikire: (1) baali nibatekereza ngu abantu abali omu kitebe ekingi bakaba nibagenda kwikara omu iguru (2) kandi ngu kitebe ekingi kyali kirumu Abakristaayo abaali batali bekambi ekirukumara.

12-13. Kiki Abakristaayo abaseserweho amagita hamu na b’ekitebe ekingi ekibamanyire ha mpeera ei baratunga?

¹² Baitu nk’oku turozere, kutandika n’omwaka 1935, Abakaiso ba Yahwe bakakyetegereza kurungi ngu abo abarakiraho ha bulemu bwa Haramagedoni nubo bali omu kitebe ekingi Yohana ekiyayolekerwe. Banu nubo baliruga “omu muhito omwingi” oguliba hanu omu nsi kandi nibaija ‘kwamirra niraka erihango nibagamba ngu okujuna kube hali Ruhanga waitu, anyakwikaliire ha kitebe ky’Obukama, na hali Omwana gw’Entaama.’ (Kus. 7:10, 14) Ekindi Ebyahandiikirwe nibyoleka ngu abo abahumbuka kugenda omu iguru batunga “ekirukukira oburungi” kukira abaheereza ba Yahwe abakara. (Baheb. 11:40) Kinu kikaletera ab’oruganda omu kasumi ako kutandikiraho kwekamba kuraliza abo abaine okunihira okw’okwikara omu nsi ebiro n’ebiro nabo kwija kuheereza Yahwe.

¹³ Ab’ekitebe ekingi baine okusemererwa kwingi habw’okunihira okubaine. Kandi nibakyetegereza kurungi ngu Yahwe nuwe wenka acweramu abaheereza be nambere baramuheerereza, omu iguru rundi omu nsi. Abakristaayo abaseserweho amagita hamu na b’ekitebe ekingi bakimanyire ngu empeera yoona eibaratunga batagikolerre baitu nibaija kugitunga habw’embabazi za Yahwe y’atwolekere obuyatuhaire ekicunguro kya Yesu Kristo.​—Bar. 3:24.

14. Hanyuma y’omwaka 1935, habwaki abantu abarukukira obwingi bayekagwize omulingo obunabbi oburukukwata ha kitebe ekingi burahikirizibwamu?

¹⁴ Hanyuma y’omwaka 1935, abaheereza ba Yahwe obumazire kwetegereza kurungi ekitebe ekingi, baingi baali nibekaguza omulingo abantu ab’ekitebe ekingi baali nibagenda kukanyamu. Ekyokurorraho Ow’oruganda Ronald Parkin akaba aine emyaka 12 nambere ekitebe ekingi bakyetegereriize. Nagamba ati: “Omu kasumi ako abatebezi omu nsi yoona baali 56,000 kandi nikizoka abarukukira obwingi baali baseserweho amagita. Nahabweki kyali nikizoka ngu ab’ekitebe ekingi baali bataito muno.”

15. Ekitebe ekingi kyeyongire kita kukanya?

¹⁵ Omu myaka eyahondireho, abamisani baingi bakasindikwa kutebeza omu mahanga maingi, kandi omuhendo gw’Abakaiso ba Yahwe gukaikara nigweyongera. Kandi omu 1968, hakatandikaho entekaniza ey’okukozesa akatabu The Truth  That Leads to Eternal Life kwegesa abantu Baibuli. Akatabu kanu kasoborraga amananu agali omu Baibuli omu mulingo ogwanguhire kandi kinu kikaleetera abantu baingi kugonza kuheereza Yahwe kukira na kara. Omu myaka ena yonka abantu abarukuhingura omu 500,000 bakabatizibwa. Ekeleziya Enkatuliki obuyatandikire kuhwamu amaani omu biikaro bya Latin Amerika kandi n’omulimo gwaitu obugwaikiriziibwe omu mahanga maingi ag’omu bicweka bya Burugaizoba bwa Bulaaya hamu na Afrika, obukaikuru bw’abantu omu bicweka binu bakabatizibwa. (Is. 60:22) Omu myaka nke ey’ehingwireho ekitebe kya Yahwe kiturukize ebikwato bingi ebikonyire abantu kwega amananu agali omu Baibuli. Busaho kugurukyagurukya ekitebe ekingi hati ekirukuhingura omu bukaikuru munaana kimazire kusorozebwa.

16. Ekitebe ekingi nikisorozebwa kuruga nkaha?

¹⁶ Yohana obuyahandikire okwolekwakwe, akagamba ngu ekitebe ekingi kyali kirumu abantu kuruga “omu mahanga gona, nenganda, nabantu, nendimi.” Na nabbi Zakaliya akasangwa arangireho ekintu nka kinu. Akagamba ati: “Omu biro biri, abantu ikumi abomundimi zona ezamahanga, balikwata ha rugoye rwogu ali Omuyudaya, nibagamba ngu tuligenda hamu nainywe, baitu tuhuliire ngu Ruhanga ali nainywe.”​—Zak. 8:23.

17. Kiki ekirukukorwa kukonyera abantu kuruga omu mahanga goona n’endimi?

 ¹⁷ Abakaiso ba Yahwe bakimanyire kurungi ngu abantu kuruga omu mahanga goona kusobora kusorozebwa, amakuru amarungi gasemeriire kutebezebwa omu ndimi nyingi. Tumazire emyaka erukuhingura omu 130 nituhindura ebitabu erukwegesaho Baibuli omu ndimi nyingi, kandi omu kasumi kanu niitwe turukukirrayo kimu kuhindura ebintu omu nkumi n’enkumi z’endimi. Busaho kugurukyagurukya Yahwe nuwe arukukora ekyamahano kinu eky’okusoroza abantu kuruga omu mahanga goona b’aketeranizaaho ekitebe ekingi. Abantu banu boona nibaramya Yahwe omu bumu n’obubaraaba nibaruga omu mahanga agarukwahukana habwokuba twine Baibuli hamu n’ebitabu ebirukugisoborra omu ndimi nyingi. Kandi Abakaiso ba Yahwe bamanyirwe habw’okutebeza n’obwekambi hamu n’okugonzangana nk’ab’oruganda. Kinu nikitugarramu muno amaani.​—Mat. 24:14; Yoh. 13:35.

18. (a) Nk’oku kyolekererwe omu Isaya 46:10, 11, habwaki kitarukutuhuniriza ngu Yahwe ahikiriize obunabbi oburukukwata ha kitebe ekingi? (b) Habwaki abo abarukunihira kutunga obwomeezi obutahwaho omu nsi batarukuhurra ngu baine ekibaferiirwe?

¹⁸ Obunabbi oburukukwata ha kitebe ekingi nibutuletera okusemererwa kwingi muno. Baitu tikirukutuhuniriza kurora ngu Yahwe ahikirize obunabbi bunu omu mulingo ogw’embaganiza. (Soma Isaya 46:10, 11.) Ab’ekitebe ekingi nibasiima muno Yahwe habw’okunihira okurungi okw’abahaire. Tibarukwehurra ngu baine ekibabuzirweho habwokuba tibaseserweho amagita kugenda kulema hamu na Yesu omu iguru. Omu Baibuli harumu ebyokurorraho bingi eby’abaheereza ba Ruhanga abaterekerezebwaga omwoyo gurukwera baitu kandi tibali bamu ha 144,000. Omu hali banu ni Yohana Omubatizi. (Mat. 11:11) Ondi nuwe Omukama Daudi. (Eng. 2:34) Banu hamu n’abandi baingi nibaija kuhumbuka baikale omu nsi empyaka. Banu boona hamu n’ekitebe ekingi nibaija kutunga omugisa ogw’okwoleka obwesigwa bwabo hali Yahwe n’obulemi bwe.

19. Kiki ekitusemeriire kukora, hanyuma y’okwetegereza okwolekwa kwa Yohana okurukukwata ha kitebe ekingi?

¹⁹ Gunu nugwo murundi gw’okubanza omu byafaayo, Yahwe kusorooza obukaikuru n’obukaikuru bw’abantu kuruga omu mahanga goona kumuramya omu bumu. Tube twine okunihira okw’okugenda omu iguru rundi kwikara omu nsi, itwena tusemeriire kukonyera abandi baingi kweteranizaaho ekitebe ekingi ‘eky’entaama ezindi.’ (Yoh. 10:16) Omu busumi obutali bwa hara, Yahwe naija kuleeta omuhito omwingi ogurahwerekereza gavumenti zoona hamu n’amadiini goona agaletiire abantu kubonabona. Ab’ekitebe ekingi nibaija kutunga omugisa gw’amaani ogw’okuheereza Yahwe omu nsi habw’ebiro n’ebiro.​—Kus. 7:14.