1-2. Kusigikirra ha 1 Timoseo 6:20, Timoseo akaba ahairwe ki?

TUKIRA kuha abantu abandi obujunaanizibwa obw’okutulindira ebintu byaitu eby’omuhendo. Ekyokurorraho, nitusobora kwahura sente zaitu omu bbanka. Obutukora eki, tuba nitunihira ngu sente zaitu niziija kulindwa kurungi, tizirukwija kubura rundi kwibwa. Nahabweki nitumanya amakuru ag’okwahuza omuntu ondi ekintu ekiturukutwara kuba eky’omuhendo.

² Soma 1 Timoseo 6:20. Omukwenda Paulo akaijukya Timoseo ngu akaba atungire ekintu eky’omuhendo, kandi eki nikyo okumanya okuhikire okurukukwata ha kigendererwa kya Ruhanga hali abantu. Yahwe akaba ahaire Timoseo omugisa ‘ogw’okutebeza ekigambo’ n’okukora “omulimo gwomugambizi wenjiri.” (2 Tim. 4:2, 5) Paulo akatererra Timoseo kulinda eki ekikaba kimwahuziibwe. Nka Timoseo, naitwe twahuziibwe ebintu eby’omuhendo. Ebintu ebi nibiha? Kandi habwaki tusemeriire kulinda eky’obuguuda Yahwe eky’atuhaire?

3-4. Nsonga ki ezimu eziretera amananu ag’omu Baibuli kuba ag’omuhendo?

³ Yahwe atuhaire omugisa ogw’okumanya amananu ag’omuhendo agali omu Kigambo kye Baibuli. Amananu ganu g’omuhendo habwokuba gatukonyera kutunga enkoragana enungi na Yahwe kandi n‘okumanya omulingo tusobora kutunga okusemererwa kwonyini. Kakuba twikiriza amananu ago kandi tukagahondera, titurukwija kuhabisibwa enyegesa ez’ebisuba kandi nitwija kwerinda engeso embi.​—1 Kol. 6:9-11.

⁴ Ensonga endi habwaki amananu agali omu Kigambo kya Ruhanga g’omuhendo eri ngu, Yahwe agooleka abantu abebundaazi bonka, abaine “entekereza enungi.” (Eng. 13:48, NW) Abantu  nk’abo baikiriza ngu omu kasumi kanu, Yahwe ataireho omwiru omwesigwa kandi ow’amagezi kutwegesa amananu ago. (Mat. 11:25; 24:45) Titusobora kwega amananu tutakonyirwe omuntu ondi, kandi busaho kintu eky’omuhendo ekirukugaingana.​—Nfu. 3:13, 15.

5. Kintu ekindi Yahwe eky’atwahwize?

⁵ Yahwe atuhaire n’omugisa ogw’okwegesa abantu abandi amananu agarukumukwataho hamu n’ebigendererwa bye. (Mat. 24:14) Obutumwa obututebeza bw’omuhendo muno habw’okuba bukonyera abantu kweteraniza ha ka ya Yahwe kandi bubaha omugisa ogw’okutunga obwomeezi obutahwaho. (1 Tim. 4:16) Katube nitukora muno omu buheereza rundi kataito, tukimanye ngu nitukonyera kusagika omulimo ogurukukirayo obukuru omu kasumi kanu. (1 Tim. 2:3, 4) Kamugisa gw’amaani kuba bakozi hamu na Ruhanga!​—1 Kol. 3:9.

6. Kiki ekyahikire hali abantu abamu abalemerwe kwikara bulindaara?

⁶ Omu kasumi ka Timoseo, Abakristaayo abamu batatwale omugisa ogw’okuba bakozi hamu na Yahwe kuba mukuru. Dema akagonza muno ensi, kandi yaleka omugisa ogw’akaba aine ogw’okuheereza hamu n’omukwenda Paulo. (2 Tim. 4:10) Kandi nikizooka ngu Fugero na Heremogene bakaleka obuheereza bwabo habwokuba bakatiina ngu nibaija kuhiganizibwa nk’omukwenda Paulo. (2 Tim. 1:15) Humenayo, Alegezanda, hamu na Fireto bakecwaho ekitebe kandi baleka kuheereza Yahwe. (1 Tim. 1:19, 20; 2 Tim. 2:16-18) Nikizooka ngu abantu banu boona ha kubanza bakaba bagumire omu by’omwoyo, baitu baleka kutwara ebintu Yahwe eby’akaba abahaire kuba eby’omuhendo.

7. Miringo ki Sitaani ey’akozesa kulengaho kutuhabisa?

⁷ Sitaani alengaho ata kutuletera kulekaho ebintu eby’omuhendo Yahwe eby’atwahwize? Wetegereze emu ha mitego ya Sitaani. Akozesa eby’okwesemeza hamu n’amakuru kukurakuraniza entekereza hamu n’engeso ezarukunihira ngu niziija kutuletera kuceka mpora mpora kandi n’okuruga omu mananu. Alengaho kukozesa okusindikirizibwa hamu n’okuhiganizibwa kututinisiriza nukwo tuleke kutebeza. Kandi alengaho n’okutuletera kugonza kuhuliiriza “ebigambo ebi ebibeta amagezi” kuruga omu bantu abecwireho ekitebe nukwo turuge omu mananu.​—1 Tim. 6:20, 21.

8. Ekyokurorraho eky’ow’oruganda arukwetwa Daniel nikitwegesa ki?

⁸ Kakuba tutegendereza, nitusobora kutandika kuruga omu mananu mpora mpora. Tekerezaaho ekyokurorraho eky’ow’oruganda Daniel, * ayagonzaaga muno emizaano eya ha kompyuta rundi video game. N’agamba ati:  “Nkatandika kuzaana video game nyine emyaka nka ikumi. Ha kubanza, n’azaanaga emizaano etali mbi. Baitu mpora mpora nk’atandika kuzaana emizaano ey’erumu kurwana hamu n’amasitaani.” Obwire bukahika, y’atandika kuzaana emizaano enu kumara esaaha 15 buli kiro. Daniel n’agamba ati: “Omu mutima gwange, nkaba kimanyire ngu emizaano enu n’obwire ndukumara nibisisa mpora mpora enkoragana yange na Yahwe. Baitu, omutima gwange gukaba gumazire kugumangana habwokuba natekerezaga ngu emisingi ya Baibuli terukunkwataho.” Nahabweki kakuba tutegendereza, eby’okwesemeza nibisobora kutuletera kulekera amananu. Kakuba eki kibaho, nitusobora kufeerwa ebintu eby’omuhendo Yahwe eby’atuhaire.

9. Kusigikirra ha 1 Timoseo 1:18, 19, omukwenda Paulo akalengesaniza Timoseo na ki?

⁹ Soma 1 Timoseo 1:18, 19. Omukwenda Paulo akalengesaniza Timoseo n’omuserikale kandi akamutererra ngu ‘arwane okurwana okurungi.’ Okurwana oku kukaba kutali kwarana kunu okwa buli kiro, baitu kukaba okw’eby’omwoyo. Abakristaayo nibasisana bata n’abaserikale abali omu bulemu? Nk’abaserikale ba Kristo tusemeriire kukurakuraniza miringo ki? Leka twetegereze amasomo ataano agatusobora kwega omu kyokurorraho ky’omukwenda Paulo. Amasomo ganu nigasobora kutukonyera kukwatira kimu amananu obutalekera.

10. Habwaki nitwetaaga kuba besigwa hali Ruhanga?

¹⁰ Kurakuraniza obwesigwa hali Ruhanga. Omuserikale omurungi aikara ali mwesigwa. Arwana n’amaani ge goona kulinda omuntu ow’arukugonza rundi ekintu eky’atwara kuba ky’omuhendo. Omukwenda Paulo akekambisa Timoseo kukurakuraniza obwesigwa hali Ruhanga ekirukumanyisa kugumira hali Ruhanga. (1 Tim. 4:7) Obuturayeyongera kugonza n’okuba besigwa hali Ruhanga, nitwija kweyongera kugonza kukwatira kimu amananu obutalekera.​—1 Tim. 4:8-10; 6:6.

11. Habwaki nitwetaaga kwetendeka?

¹¹ Wetendeke kukora ebihikire. Omuserikale asemeriire kwikara n’ayetendeka nukwo aikale ayetekaniriize obulemu. Timoseo akasobora kurwanisa emitego ya Sitaani habwokuba akakorra ha buhabuzi bw’omukwenda Paulo obw’okwiruka okwegomba okubi, kukurakuraniza emiringo enungi, kandi n’okumara obwire n’abandi omu kitebe. (2 Tim. 2:22) Ebintu ebi bikamwetaagisa kwetendeka. Naitwe nitwetaaga kwetendeka kusobora kusingura okwegomba kwaitu okubi. (Bar. 7:21-25) Kwongerra hali ebi, nitwetaaga kwetendeka kusobora kujuura omuntu ow’aira kandi n’okujwara omuhyaka. (Bef. 4:22, 24) Kandi obutuba tujwahire hanyuma y’okukora muno, nikisobora kutwetaagisa kwehambiriza kugenda omu rusorrokano.​—Baheb. 10:24, 25.

12. Miringo ki emu eitusobora kusemezaamu omulingo tukozesa Baibuli?

¹² Omuserikale n’ayetaaga kwikara n’ayerengesaamu kukozesa eby’okurwanisa bye. Kandi kusobora kufooka mukugu, asemeriire kukikora buli kiro. Omu mulingo nugwo gumu, naitwe tusemeriire kwega kukozesa kurungi Ekigambo kya Ruhanga. (2 Tim. 2:15) Nitusobora kwega emu ha miringo egi kuraba omu nsorrokano zaitu. Baitu obuturaaba nitugonza kukonyera abandi kurora omugaso gw’amananu agali omu Baibuli, tusemeriire kugumira ha ntekaniza yaitu ey’okwesoma Baibuli buli kiro. Tusemeriire kukozesa Baibuli kugumya okwikiriza kwaitu. Kinu tikirukugarukira ha kusoma busoma kwonka. Baitu nikyetaagisa kwecumitirizaaho ebitusomere, kukora okuseruliiriza omu bitabu byaitu nukwo tusobole  kwetegereza kurungi, kandi n’okuteeka omu nkora Ebyahandiikirwe. (1 Tim. 4:13-15) Obu nubwo turasobora kukozesa kurungi Ekigambo kya Ruhanga kwegesa abandi. Kinu nakyo tikirukumanyisa kusomera busomera abantu Ekyahandiikirwe. Baitu kirungi kubakonyera kukyetegereza kandi bakarora omulingo kirukubakwataho. Nahabweki, obuturaikara nitwesomesa Baibuli buli kiro, nitwija kusemezaamu omulingo twegesa Ekigambo kya Ruhanga.​—2 Tim. 3:16, 17.

13. Kusigikirra ha Abaheburaniya 5:14, habwaki tusemeriire kuba abekengi?

¹³ Ba mwekengi. Omuserikale asemeriire kurora kara akabi kandi akakerinda. Omu mulingo nugwo gumu, naitwe tusemeriire kwega kumanya enyikara ezisobora kuturugirramu akabi kandi tukazerinda. (Nfu. 22:3; soma Abaheburaniya 5:14.) Ekyokurorraho, tusemeriire kukozesa amagezi obuturaaba nitukomamu eby’okwesemeza. Emizaano eya tivi rundi filimu, zikira kubamu engeso ez’obusihani. Engeso ezi zibiihiza Ruhanga kandi niziija kuturugirramu akabi. Nahabweki, twetantale eby’okwesemeza ebisobora kucekya mpora mpora okugonza okutwiniire Yahwe.​—Bef. 5:5, 6.

14. Okwekenga kukakonyera kuta Daniel?

¹⁴ Daniel outubalizeehoga, akatandika kukyetegereza ngu kuzaana video game ezirumu kurwana hamu n’amasitaani ky’akabi. Akakora okuseruliiriza omu Watchtower Library ha bintu ebisobora kumukonyera kuruga omu kizibu eki. Eki kikamukwataho kita? Akaleka kuzaana emizaano ey’erumu ebintu ebibi. Kandi yayecwaho n’abantu abayazaanaga nabo. Daniel n’agamba ati: “Omu kiikaro eky’okuzaana emizaano video game, nkatandika kuzaana emizaano erukwetaaga kugenda aheeru hamu n’okukora ebintu ebindi n’abanywani bange ab’omu kitebe.” Daniel hati n’aheereza nka payoniya kandi mugurusi w’ekitebe.

15. Habwaki ebisuba by’akabi muno?

¹⁵ Nka Timoseo, tusemeriire kwetegereza akabi akali omu butumwa obutahikire kuruga omu bantu abecwireho ekitebe. (1 Tim. 4:1, 7; 2 Tim. 2:16) Ekyokurorraho, nibasobora kulengaho kujanjaaza ebisuba ebirukukwata h’ab’oruganda rundi kutuletera kugurukyagurukya ekitebe kya Yahwe. Obutumwa nk’obu nibusobora kucekya okwikiriza kwaitu. Tusemeriire kwerinda kuhabisibwa ebisuba ebi. Habwaki? Habwokuba obutumwa obu nibujanjazibwa abantu “abasisikaire amagezi, abaihiibweho  amazima.” Ekigendererwa kyabo kiri ky’okuteera empaka n’okukungana. (1 Tim. 6:4, 5) Nibagonza twikiririze omu bisuba byabo kandi tutandike kwekengera ab’oruganda.

16. Bintu ki ebitusemeriire kwerinda bitatuhugura?

¹⁶ Werinde ebintu ebirukuhugura. “Nkomurwani omurungi owa Kristo Yesu,” Timoseo akaba asemeriire kwikaza omutima gwe ha mulimo ogw’okutebeza hatali kuhugurwa okuserra itungo rundi ebigendererwa ebindi. (2 Tim. 2:3, 4) Nka Timoseo tutaikiriza kuhuguka habw’okwegomba itungo. ‘Ebisuba ebiitungo’ nibisobora kucekya okugonza okutwiniire Yahwe, Ekigambo kye, kandi nibisobora n’okutuletera kuleka kutebeza. (Mat. 13:22) Tusemeriire kuba n’obwomeezi obwanguhire, kandi tukozese kurungi obwire bwaitu n’amaani omu kwebembeza ‘kuserra Obukama.’​—Mat. 6:22-25, 33.

17-18. Kiki ekitusobora kukora kwerinda kuhikwaho akabi omu by’omwoyo?

¹⁷ Manya kara eky’okukora. Omuserikale asemeriire kutekaniza kara omulingo arayerindamu. Obuturaaba tuli b’okulinda ebintu Yahwe atwahwize, tusemeriire kumanya kara eky’okukora akabi obukaraija. Kiki ekisobora kutukonyera kukikora? Tusemeriire kutekaniza kara omulingo turayerindamu, akabi obukaraija.

¹⁸ Ekyokurorraho, obutuba tugenzere ha mukoro, obuguba gutakatandikire abantu bakira kusabwa kumanya omulyango ogubali haihi ogurukugenda aheeru. Habwaki? Nukwo basobole kuruga omu kyombeko eki bwangu kakuba habaho akabi. Omu mulingo nugwo gumu, tusemeriire kumanya kara eky’okukora kakuba ebisisani eby’obusihani, eby’okurwana rundi obutumwa obw’abantu abayecwireho ekitebe bwija obuturukuba nitukozesa intaneeti, rundi obutuba niturora filimu rundi puroguraamu endi ha tivi. Kakuba twetekaniza kara, nitusobora kugira ekitwakoraho bwangu kulinda enkoragana yaitu na Yahwe kandi n’okusigara tuli becumi omu maiso ge.​—Zab. 101:3; 1 Tim. 4:12.

19. Migisa ki eiturukwija kutunga kakuba tulinda kurungi ebintu eby’omuhendo Yahwe eby’atuhaire?

¹⁹ Tusemeriire kulinda ebintu eby’omuhendo Yahwe eby’atuhaire​—amananu ag’omuhendo kuruga omu Baibuli, hamu n’omugisa ogw’okugegesa abantu abandi. Obuturakora eki, nitwija kuba n’omuntu ow’omunda omwecumi, obwomeezi obw’ekigendererwa, kandi nitwija kutunga okusemererwa habw’okukonyera abandi kumanya Yahwe. Habw’obukonyezi bwe, nitwija kusobora kulinda kurungi ebintu ebiyatwahwize.​—1 Tim. 6:12, 19.