1-2. Omugambizi 11:6 nirukwataho ruta omulimo ogw’okutebeza amakuru amarungi ag’Obukama?

OMU mahanga agamu, abantu baingi basemererwa obubahurra amakuru amarungi ag’Obukama. Eki kyonyini nikyo baba balinzire! Baitu omu mahanga agandi, abantu tibagonza kumanya ebirukukwata hali Ruhanga rundi ha Baibuli. Nambere oikara, abantu betwaza bata obubahurra amakuru amarungi? Omulingo betwazaamu tikiri kikuru, baitu ekikuru kiri ngu Yahwe n’agonza tugumizeemu nitutebeza kuhikya obw’aligamba ngu omulimo guhoire.

² Yahwe akamara kutaho obwire nambere omulimo ogw’okutebeza gulihwera kandi hanyuma “empero erihika.” (Mat. 24:14, 36) Obwire obu butakahikire, nitusobora tuta kworobera ebigambo “otatanga omukono gwawe”? *​—Soma Omugambizi 11:6.

3. Omu kicweka kinu, nitwija kubazaaho ki?

³ Ekicweka ekyahoire kikabazaaho ebintu bbina ebitusemeriire kukora kufooka “abasohi” barungi ab’abantu. (Mat. 4:19) Ekicweka kinu nikiija kubazaaho emiringo esatu nk’oku tusobora kugumya encwamu yaitu ey’okutebeza n’omu nyikara ezigumangaine. Nitwija kwega habwaki kikuru (1) kwebembeza omulimo ogw’okutebeza, (2) kugumiisiriza, kandi (3) n’okwikara twine okwikiriza okugumire.

4. Habwaki tusemeriire kwikara nitwebembeza omulimo Yahwe atuhaire?

⁴ Yesu akaranga ebintu hamu n’enyikara ezikaba nizigenda kubaho omu biro ebya ha mpero kandi akaba akimanyire ngu nibisobora kuhugura abahondezi be kuruga ha mulimo gw’okutebeza.  Enu niyo nsonga y’atereriire abegeswa be ati: “Nukwo murolege.” (Mat. 24:42) Omu kasumi kanu haroho ebintu ebikusisana n’ebyali biroho omu kasumi ka Nuha eby’alemeseze abantu kuteeka omutima ha butumwa Nuha akaba n’abagambira. (Mat. 24:37-39; 2 Pet. 2:5) Nahabweki, tusemeriire kwikara nitwebembeza omulimo Yahwe atuhaire.

5. Kusigikirra ha Engeso Ezabakwenda 1:6-8, amakuru amarungi nigaija kutebezebwa kuhika ha rulengo ki?

⁵ Kasumi kanu, tusemeriire kuteeka muno omutima ha kutebeza. Yesu akagamba ngu omulimo gunu gwali nigugenda kugumizaamu hanyuma y’okufa kwe, kandi gweyongerre kimu. (Yoh. 14:12) Hanyuma y’okufa kwa Yesu, bamu h’abegeswa be bakagarukayo omu kusoha encu. Yesu obuyahumbukire, akakora ekyamahano y’akonyera abegeswa be kukwata encu nyingi muno. Akakozesa akagisa kanu kuboleeka ngu omulimo ogw’okusoha abantu gwali mukuru muno kukira omulimo ogundi gwona. (Yoh. 21:15-17) Obuhakaba nihaburayo obwire buke Yesu agende omw’iguru, akagambira abegeswa be ngu omulimo ogw’okutebeza oguyatandikire gukaba nigugenda kuhika omu mahanga agali aheru ya Isaleri. (Soma Engeso Ezabakwenda 1:6-8.) Hanyuma y’emyaka, Yesu akaha omukwenda Yohana okwolekwa kumumanyisa ebikaba nibigenda kubaho ‘omu kiro kya Mukama waitu.’ * Kimu ha bintu Yohana yarozere kikaba nikihuniriza muno, akarora malaika nayebembera omulimo ogw’okutebeza “enjiri eyebiro nebiro” hali ‘amahanga goona, n’enganda, n’endimi, n’abantu.’ (Kus. 1:10; 14:6) Eki nikyoleka ngu omu kasumi kanu, Yahwe n’agonza twejumbire omu mulimo ogw’amaani ogw’okutebeza kuhikya obugulihwa.

6. Nitusobora tuta kwikara nitwebembeza omulimo ogw’okutebeza?

⁶ Nitusobora kwikara nitwebembeza  omulimo ogw’okutebeza kakuba tutekerezaaho byona Yahwe eby’arukukora kutukonyera. Nk’ekyokurorraho, n’atuha ebyokulya eby’omwoyo omu bwingi kurabira omu bitabu ebitiirwe ha mpapura n’ebiri ha byoma ebyakalimagezi, amaraka agakwasirwa, vidiyo, hamu na puroguraamu eziturukira ha mukura gwaitu. Kitekerezeeho: Ha mukura gwaitu, haroho obutumwa obuli omu ndimi ezirukuhingura omu 1,000! (Mat. 24:45-47) Omu nsi enu ey’ebaganizibwemu habw’eby’obulemi, ediini, eby’entahya, abaheereza ba Ruhanga abarukuhingura omu bukaikuru munaana, nibakwataniza hamu. Ekyokurorraho, Kyakataano, Apuli 19, 2019, Bakaiso ba Yahwe omu nsi yoona, bakekebiija hamu ekyahandiikirwe ekya buli kiro. Rwebagyo oru, abantu abarukuhika 20,919,041 bakesorooza kwijuka okufa kwa Yesu. Obututekerezaaho omugisa ogutwine ogw’okurora ebintu binu ebirukuhuniriza kandi n’okubyejumbiramu, nikitwekambisa kwikara nitwebembeza omulimo gw’Obukama.

7. Ekyokurorraho kya Yesu nikitukonyera kita kwikara nitwebembeza omulimo ogw’okutebeza?

⁷ Omulingo ogundi ogusobora kutukonyera kwebembeza omulimo ogw’okutebeza nukwo kuhondera ekyokurorraho kya Yesu. Ataikirize ekintu kyona kumuhugura ha mulimo gwe ogw’okutebeza. (Yoh. 18:37) Ataikirize Sitaani kumusoonasoona obuyamuhaire “obukama bwona obwomunsi zona, nekitinisa kyabwo”; kandi ataikirize abantu obubagondeze kumufoora mukama. (Mat. 4:8, 9; Yoh. 6:15) Atahabisibwe okwegomba itungo kandi atatiine n’obuyahiganizibwe muno. (Luk. 9:58; Yoh. 8:59) Kakuba okwikiriza kwaitu kulengesebwa, nitusobora kwikara tugumire kakuba twijuka obuhabuzi obw’omukwenda Paulo. Akatererra Abakristaayo kuhondera ekyokurorraho kya Yesu nukwo ‘baleke okujwaha n’okugwa ensazi!’​—Baheb. 12:3.

8. Okugumiisiriza nikimanyisa ki, kandi habwaki nitukwetaaga muno omu kasumi kanu?

⁸ Kugumiisiriza nikimanyisa kulindirra n’obuculeezi kuhikya enyikara obw’ehinduka. Nitwetaaga kugumiisiriza obutuba tulindiriire enyikara ey’etali nungi kuhwaho rundi ekintu ekitutaaha nitwegomba kuhikirra. Nabbi Habakuki akaba nayegomba kurora engeso eby’abantu okurwanisangana omu Yuda, n’ehwaho. (Hab. 1:2) Abegeswa ba Yesu bakaba nibanihira ngu Obukama bukaba nibugenda “kuzooka aho n’aho” kandi bubajune kuruga omu bulemi bw’Abaroma. (Luk. 19:11, NW) Tulindiriire n’ekihika akasumi nambere Obukama bwa Ruhanga buliihaho ebintu ebibi, buleteho ensi empyaka ey’erumu okuhikirra. (2 Pet. 3:13) Baitu tusemeriire kugumiisiriza tukalinda obwire Yahwe obw’ataireho kukora ebintu ebi. Tekerezaaho emiringo emu nk’oku Yahwe atwegesa kugumiisiriza.

9. Byokurorraho ki ebirukwoleka ngu Yahwe agumiisiriza?

⁹ Yahwe atuterireho ekyokurorraho ekirukukirrayo kimu oburungi eky’okugumiisiriza. Akaha Nuha obwire oburukumara kwombeka eryato kandi n’okuheereza ‘nk’omuduumi w’okuhikirra.’ (2 Pet. 2:5; 1 Pet. 3:20) Yahwe akaikara n’ahuliiriza Iburahimu obuyamukagwize emirundi nyingi ha ncwamu Ye ey’okuhwerekereza abantu ababi abaikaraga omu mbuga embi eza Sodomu na Gomora. (Kub. 18:20-33) Kumara emyaka nyingi muno, Yahwe akagumiisiriza muno ihanga lya Isaleri erikaba litaine obwesigwa. (Neh. 9:30, 31) N’omu kasumi kanu nitukirora ngu Yahwe n’agumiisiriza habwokuba ahaire abantu boona ab’arukugonza kufooka banywani be obwire, nukwo “bahike omu kwegarukamu.” (2 Pet. 3:9; Yoh. 6:44; 1 Tim. 2:3, 4) Ekyokurorraho kya Yahwe nikitwoleka ngu twine kugumiisiriza  obuturaaba nitugumizaamu omu kutebeza n’okwegesa. Kandi n’ayongera n’atwegesa okugumiisiriza kuraba omu kyokurorraho ekiri omu Kigambo kye.

10. Ekyokurorraho eky’omulimi ekiri omu Yakobo 5:7, 8, nikitwegesa ki?

¹⁰ Soma Yakobo 5:7, 8. Ekyokurorraho eky’omulimi nikitwegesa kugumiisiriza. Ky’amananu ngu ebirimwa ebimu bikura bwangu baitu ebirukukira obwingi, kukira muno ebyana ebijuma bitwara obwire bwingi kwera. Omu Isaleri, sizoni y’okulima y’amaraga ameezi nka mukaaga. Omulimi yabyaraga embibo hagati ya Okitobba enjura ey’okubanza obuyatandikaga kandi yagesaga hagati ya Apuli hanyuma y’enjura ey’okumalirra. (Mar. 4:28) Nitwija kwoleka amagezi kakuba twega okugumiisiriza nk’omulimi. Baitu kinu, nikisobora kutanguha.

11. Okugumiisiriza nikwija kutukonyera kuta omu buheereza bwaitu?

¹¹ Abantu abatahikiriire bagonza kurora aho n’aho ebirungi nibiruga omu kwekamba kwabo. Baitu kakuba nitugonza omusiri gaitu gwere kurungi, tusemeriire kugufaaho obutoosa kuraba omu kulima, kubyara, kwombera, hamu n’okuseserra amaizi. Omulimo ogw’okufoora abantu abegeswa, nagwo nigwetaagisa kwikara nitutamu amaani. Nikyetaagisa obwire kurora twakonyera abaturukwegesa kuleka kusoroora kandi n’okwega kwoleka okugonza. Okugumiisiriza nikwija kutukonyera kutahwamu amaani abantu obubanga kutuhuliiriza. Kandi n’obu batuhuliiriza, nabwo twine kwoleka okugumiisiriza. Titusobora kuhambiriza abeegi ba Baibuli kutunga okwikiriza. Obwire obumu, n’abegeswa ba Yesu kyabatwarraga obwire kwetegereza ebyakaba n’abegesa. (Yoh. 14:9) Twijuke ngu nitusobora kubyara, kandi tukaseserra amaizi, baitu Ruhanga nuwe akuza.​—1 Kol. 3:6.

12. Nitusobora tuta kwoleka ngu nitugumiisiriza obuturukuba nitutebeza abanyabuzale baitu abatali Bakaiso ba Yahwe?

¹² Nikisobora kutugumira kwoleka  okugumiisiriza obuturukuba nitutebeza abanyabuzaale baitu abatali Bakaiso ba Yahwe. Omusingi ogurukusangwa omu Omugambizi 3:7 nigusobora kutukonyera. Nigugamba ngu haroho “akasumi akokuculerramu, kandi akasumi akokugambiramu.” Nitusobora kubatebeza kuraba omu bikorwa byaitu ebirungi baitu twikale twetekaniize kukozesa buli mugisa gwona kubazaaho amananu. (1 Pet. 3:1, 2) Tusemeriire kwekamba omu kutebeza n’okwegesa, baitu tusemeriire kugumiisiriza buli omu otwaliremu n’abanyabuzaale baitu.

13-14. Byokurorraho ki ebimu eby’okugumiisiriza ebitusobora kwegeraho?

¹³ Nitusobora kwega okugumiisiriza kuruga omu byokurorraho eby’abaheereza ba Yahwe abesigwa ab’omu Baibuli hamu n’aba hati. Habakuki akaba n’agonza ebikorwa ebibi bihweho baitu akooleka okugumiisiriza obuyagambire ati: “Ndayemerra handukulindira.” (Hab. 2:1) Omukwenda Paulo akagamba ngu akaba n’agonza kumalirra obuheereza bwe. Baitu, akagumiisiriza yagumizaamu “okumanyisa enjiri.”​—Eng. 20:24.

¹⁴ Tekerezaaho ekyokurorraho eky’ow’oruganda na mukazi we abatendekiirwe omu isomero lya Gilead hanyuma basindikwa omu ihanga nambere Bakaiso ba Yahwe bakaba bali bataito muno kandi n’abantu abarukukira obwingi bakaba batali Bakristaayo. Bantu bake muno abakaba nibagonza kwegesebwa Baibuli. Baitu bagenzi baabo abaatendekerwe hamu nabo abaali nibaheereza omu mahanga agandi ba bagambiraga ha beegi baabo aba Baibuli abarungi kandi abaizire omu mananu. Baitu ow’oruganda na mukazi we banu, bakagumiisiriza bagumizaamu nibatebeza n’obukiraaba ngu abantu ab’omu kiikaro eki tibahulirizaaga. Hanyuma y’okumara emyaka munaana nibatebeza abantu abatarukufaayo kuhuliriza, bakahika batunga okusemererwa habw’okurora omu h’abeegi baabo aba Baibuli n’abatizibwa. Ebyokurorraho binu eby’aira n’ebya kasumi kanu nibitwegesa ki? Abantu banu abesigwa bataleke kwekamba rundi batatange emikono yabo kandi Yahwe akabaha omugisa habw’okugumiisiriza. Leka itwena tukuratirege “omulingo gwabo abagwetwa emirago obwokuikiriza nokuguma.”​—Baheb. 6:10-12.

15. Mulingo ki ogumu okwikiriza kugumya encwamu yaitu ey’okugumizaamu nitutebeza?

¹⁵ Twikiririza omu butumwa obututebeza, nahabweki twine ekihika eky’okutebeza abantu baingi nk’oku turukusobora. Nitwikiriza emirago ey’eri omu Kigambo kya Ruhanga. (Zab. 119:42; Is. 40:8) Turozere obunabbi bwa Baibuli nibuhikirra omu kasumi kanu. Kandi turozere omulingo obwomeezi bw’abantu busemera obubateeka omu nkora obuhabuzi bwa Baibuli. Obwakaiso bunu butuletera kweyongera kwikiriza ngu amakuru amarungi ag’Obukama butumwa buli omu arukwetaaga kuhurra.

16. Kusigikirra ha Zabuli 46:1-3 okwikiriza kwaitu omuli Yahwe hamu na Yesu kugumya kuta encwamu yaitu ey’okutebeza?

¹⁶ Twine n’okwikiriza omuli Yahwe ayatuhaire obutumwa obuturukutebeza kandi n’omuli Yesu, Yahwe ouyataireho kuba Mukama w’Obukama bwe. (Yoh. 14:1) N’obuturahikwaho enyikara ezigumire, Yahwe naija kwikara ali bwirukiro bwaitu kandi maani gaitu. (Soma Zabuli 46:1-3.) Ekindi, nitukigumiza kimu ngu Yesu nuwe arukwebembera omulimo ogw’okutebeza n’asigikirra omu iguru, n’akozesa amaani n’obusobozi Yahwe eby’amuhaire.​—Mat. 28:18-20.

17. Bazaaho ekyokurorraho ekirukwoleka ngu tusemeriire kugumizaamu nitutebeza.

¹⁷ Okwikiriza kutukonyera kukigumya ngu  Yahwe naija kutuha emigisa, kandi obwire obumu omu miringo ei tutarukunihira. (Mug. 11:6) Ekyokurorraho, enkumi n’enkumi z’abantu barora emeeza n’obugaali ebitukozesa kutebeza. Kirungi kutebeza omulingo gunu? Ego! Akatabu ak’Obuheereza Bwaitu obw’Obukama aka Novemba 2014 kakabazaaho omwegi omuto owa yunivasite ow’akaba n’agonza kuhandikaho Abakaiso ba Yahwe. Omwisiki onu atasobole kuzoora Ekyombeko ky’Obukama, baitu akarora akagaali ak’okutebeza ha yunivasite yabo kandi y’atunga eby’akaba n’agonza kutuhandikaho. Ha kumalirra, akafooka omu h’ABakaiso ba Yahwe ow’abatizibwe kandi hati n’aheereza nka payoniya ow’akasumi koona. Ebyokurorraho nk’ebi nibitwekambisa kugumizaamu nitutebeza habwokuba nibyoleka ngu ha ky’aliyo abantu abarukwetaaga kuzoora amananu.

18. Habwaki nitukigumya ngu omulimo ogw’okutebeza enjiri ey’Obukama nigwija kuhwa omu bwire Yahwe arukugonza?

¹⁸ Nitukigumya ngu omulimo ogw’okutebeza enjiri ey’Obukama nigwija kuhwa omu bwire obuhikire. Tekerezaaho eky’abaireho omu bwire bwa Nuha. Yahwe akooleka nk’oku ali Mulinzi w’Obwire omurungi. Obu haali nihaburayo emyaka nka 120, Yahwe akatekaho obwire Okusandaara kw’Amaizi kwali nikugenda kwija. Hanyuma y’emyaka nyingi kurabaho, Yahwe akagambira Nuha kwombeka eryato. Nuha akagumizaamu nayekamba habw’emyaka nka 40 rundi 50 Okusandaara kw’Amaizi kutakaizire. N’obukiraaba ngu abantu bakaba batakumuhuliriza, akagumizaamu n’atebeza obutumwa obw’okubahabura, kuhikya Yahwe obuyagambire ngu atahye ebisoro omu lyato. Habwire bwonyini, ‘Mukama akamukingira’ omu lyato.​—Kub. 6:3; 7:1, 2, 16.

19. Bintu ki ebiturukunihira kutunga kakuba tutatanga omukono gwaitu?

¹⁹ Omu bwire obutali bwa hara, Yahwe naija kutumanyisa nk’oku omulimo ogw’okutebeza guhoire. Hanyuma, naija kuhwerekereza ensi ya Sitaani kandi aleete ensi empyaka ey’okuhikirra. Obwire obu butakahikire, leka twegere ha kyokurorraho kya Nuha, Habakuki, hamu n’abandi abataratangire emikono yabo. Leka twikale nitwebembeza omulimo ogw’okutebeza, tugumiisirize, kandi twikale n’okwikiriza okugumire omuli Yahwe n’emirago ye.