1. Nkoragana ki abantu abesigwa eibasobora kutunga na Yahwe?

EKA ya Yahwe n’etwarra Yesu, anyakuli “omuzigaijo omuli ebihangirwe byona,” hamu na bamalaika baingi muno. (Bak. 1:15; Zab. 103:20) Yesu obwakaba ali omu nsi akakyoleka ngu abantu abesigwa nibasobora kurora Yahwe nka Isebo. Obwakaba n’abaza n’abegeswa be, Yesu akeeta Yahwe ‘Ise, kandi Ise bo.’ (Yoh. 20:17) Ekindi, obutwayehaireyo hali Yahwe kandi twabatizibwa, tukafooka kicweka ky’eka ey’aboruganda na banyaanya itwe ey’erumu okugonza.​—Mar. 10:29, 30.

2. Kiki ekiturukwija kubazaaho omu kicweka kinu?

² Abamu kibagumira kurora Yahwe nka Isebo ow’okugonza. Abandi nibasobora kuba batamanyire omulingo ogw’okwolekamu Abakristaayo bagenzi baabo okugonza. Omu kicweka kinu nitugenda kubazaaho omulingo Yesu atukonyera kurora Yahwe nka Isiitwe ow’okugonza, kandi outusobora kwirra haihi. Kandi nitwija n’okwega emiringo tusobora kwegera ha kyokurorraho kya Yahwe ha mulingo tusemeriire kutwazaamu ab’oruganda na banyaanya itwe.

3. Esaara ya Mukama waitu etwiriza eta haihi na Yahwe?

³ Yahwe ali Isiitwe ow’okugonza. Yesu n’agonza turole Yahwe omu mulingo na uwe amuroramu, tumurole nk’omuzaire ow’embabazi kandi ow’okugonza outusobora kubaza na uwe obwire bwona, hatali nk’omuntu ow’ataine mbabazi ow’aturagira buragira eky’okukora. Kinu nikyeyoleka omw’ebi Yesu yayegeseze abegeswa be kusaba. Akatandika esaara ya Mukama waitu n’ekigambo: “Isitwe.” (Mat. 6:9) Yesu akaba n’asobora kutugambira kweta Yahwe “Owobusobozi bwona,” ‘Omuhangi,’ rundi “Omukama owobusinge bwona”​—ebitiinisa binu  byona bimusemeriire, kandi nibisigikirra ha Byahandiikirwe. (Kub. 49:25; Is. 40:28; 1 Tim. 1:17) Baitu Yesu akatugambira kweta Yahwe “Isitwe.”

4. Nitukimanya tuta ngu Yahwe n’agonza tumwirre haihi?

⁴ Kikugumira kurora Yahwe nka So ow’okugonza? Abamu omuliitwe kitugumira. Nikisobora kukugumira kutekerezaaho taata ow’okugonza kakuba so ayakuzaire akakutwaza omu mulingo ogutali gw’embabazi. Mali kanikihuumuza kukimanya ngu Yahwe n’ayetegereza kurungi omulingo turukwehurra! N’agonza kutwirra haihi. Egi niyo ensonga habwaki Ekigambo kye kitutererra kiti: “Muirre haihi Ruhanga, nauwe alibairra haihi.” (Yak. 4:8) Yahwe n’atugonza, kandi atuha omugisa ogw’okufooka Isiitwe ow’arukukirrayo kimu oburungi.

5. Kusigikirra ha Luka 10:22, Yesu n’asobora ata kutukonyera kwirra haihi na Yahwe?

⁵ Yesu n’asobora kutukonyera kwirra haihi na Yahwe. Amanyire Yahwe kurungi muno kandi akooleka emiringo ya Ise kikumi ha kikumi, enu niyo nsonga habwaki yagambire ati: “Anyakundozire nyowe, buli arozire Isenyowe.” (Yoh. 14:9) Nka mugenzi waitu omukuru, Yesu atwegesa omulingo tusobora kuteekamu Isiitwe ekitiinisa, kumworobera, kumusemeza, kandi n’okwerinda kumubiihiza. Omulingo Yesu y’ayetwaizeemu obwakaba ali omu nsi nigutwoleka nk’oku Yahwe aine embabazi nyingi hamu n’okugonza. (Soma Luka 10:22.) Leka tubazeeho ebyokurorraho ebimu.

6. Nitumanya tuta ngu Yahwe akahuliiriza Yesu? Bazaaho ebyokurorraho.

⁶ Yahwe ahuliriiza abaana be. Tekerezaaho omulingo Yahwe y’ahuliriize Omwana we omuzigaijo. Yahwe aine kuba y’ahuliire esaara nyingi muno ez’Omwana we obwakaba ali omu nsi. (Luk. 5:16) Akahuliriza Yesu obwakaba n’asaba atakakozere encwamu ez’amaani, nk’obwakaba atakakomere abakwenda be 12. (Luk. 6:12, 13) Kandi Yahwe akahurra esaara za Yesu obwakaba ayetuntwire. Yesu obwakaba atakagobeziibwe akasaba muno  hali Ise, habw’ekirengo eky’amaani ekyali nikigenda kumuhikaho. Yahwe atagarukire ha kuhurra esaara za Yesu kyonka baitu akatuma n’amalaika kugarramu Omwana we omugonzebwa amaani.​—Luk. 22:41-44.

7. Oyehurra ota kukimanya ngu Yahwe ahuliiriza esaara z’abantu be?

⁷ N’omu kasumi kanu, Yahwe n’agumizaamu kuhuliriza esaara z’abaheereza be, kandi abagarukamu omu kasumi akahikire hamu n’omu mulingo ogurukukirayo oburungi. (Zab. 116:1, 2) Munyaanya itwe omu India akarora omulingo Yahwe y’agarukiremu esaara ze. Akaba aine ekizibu eky’okwetuntura muno, kandi akasaba muno hali Yahwe ha nsonga egi. Akahandiika ati: “Puroguraamu eya JW Broadcasting^® eya Maayi 2019 ey’ekaba n’ekwata ha kweralikirra hamu n’okwetuntura, nikyo ekintu ekinkaba ninyetaaga kyonyini. Yahwe akaba agarukiremu esaara zange.”

8. Yahwe akooleka Yesu okugonza omu miringo ki?

⁸ Yahwe atugonza kandi atufaaho muno, nk’oku y’agondeze Yesu kandi y’amufaaho obwakaba ali omu nsi. (Yoh. 5:20) Akaha Yesu ebyetaago bye byona, eby’omwoyo n’eby’omubiri, kandi akamugarramu amaani. Ekindi, Yahwe akagambira Omwana we nk’oku akaba n’amugonza, kandi amusemereriirwe. (Mat. 3:16, 17) Yesu atehurre ali wenka habwokuba akaba akimanyire ngu Ise ow’omu iguru kandi ow’okugonza yabaga ali na uwe obwire bwona.​—Yoh. 8:16.

9. Bwakaiso ki oburukwoleka ngu Yahwe n’atugonza?

⁹ Nka Yesu, naitwe turozere okugonza kwa Yahwe omu miringo nyingi. Kitekerezeeho: Yahwe akatucunda kwija hali uwe, atuhaire eka ey’erumu okugonza hamu n’obumu, kandi ey’etugarramu amaani obutuba tuli omu bizibu. (Yoh. 6:44) Ekindi Yahwe atuha buli kimu ekiturukwetaaga kusobora kwikaza okwikiriza kwaitu kugumire. Kandi atukonyera butoosa kutunga ebyetaago byaitu eby’omubiri. (Mat. 6:31, 32) Obututekerezaaho okugonza Yahwe okw’atwiniire, naitwe kituleetera kweyongera kumugonza.

10. Kiki ekitusobora kwegera ha mulingo Yahwe atwazaamu ab’oruganda na banyaanya itwe?

¹⁰ Yahwe agonza ab’oruganda na banyaanya itwe. Baitu obwire obumu nikisobora kutugumira kubooleka kandi n’okubagambira nk’oku nitubagonza. Kinu kiri kiti habwokuba tukakurra omu biikaro hamu n’omu nyikara ezirukwahukana. Kandi itwena tukora ensobi ezibiihiza kandi zikasaaliza abandi. Baitu nabwo, nitusobora kwekamba kugumya okugonza okuli omu ka yaitu ey’eby’omwoyo. Omu mulingo ki? Kuraba omu kwegera ha kyokurorraho kya Isiitwe eky’okugonza ab’oruganda na banyaanya itwe. (Bef. 5:1, 2; 1 Yoh. 4:19) Leka turole ebitusobora kwegera ha kyokurorraho kya Yahwe.

11. Yesu akooleka ata ‘embabazi’ nk’eza Yahwe?

¹¹ Yahwe ayoleka ‘embabazi.’ (Luk. 1:78) Omuntu ow’embabazi akwatwaho obw’arora abantu nibabonabona; kandi aserra emiringo ey’okubakonyera n’okubahuumuza. Omulingo Yesu y’atwaizeemu abantu, gukooleka nk’oku Yahwe n’abafaaho. (Yoh. 5:19) Kiro kimu Yesu obuyaboine ekitebe ky’abantu, ‘akabakwatirwa embabazi, baitu bakaba bajwahire nibararanga nk’entaama ezitanyina muliisa.’ (Mat. 9:36) Embabazi za Yesu zitagarukire ha nyehurra kwonka. Akakiza abarwaire kandi y’ahuumuza ‘abajwahire nabalemeriirwe.’​—Mat. 11:28-30; 14:14.

12. Bazaaho ekyokurorraho nk’oku tusobora kwoleka embabazi.

¹² Kakuba tutekerezaaho ebizibu Abakristaayo  bagenzi baitu ebi baine, nitwija kusobora kubooleka embabazi. Ekyokurorraho munyaanya itwe n’asobora kuba aine oburwaire obw’amaani. Ekizibu kye takibazaaho nakake, baitu nikisobora kumusemeza muno kakuba omuntu amukonyera. Wekaguze, n’asobora kurolerra ebyetaago by’eka ye? Nitusobora kumukonyera kucumba rundi kuyonja enju ye? Ow’oruganda n’asobora kuba atakyaine mulimo. Nitusobora kumuha ekisembo eky’akasente tutamugambiire nk’oku niitwe tuzimuhaire, kakamukonyera kuhikya obw’aratunga omulimo ogundi?

13-14. Nitusobora tuta kuhondera ekyokurorraho kya Yahwe eky’okugaba?

¹³ Yahwe mugabi. (Mat. 5:45) Titusemeriire kulinda ab’oruganda na banyaanya itwe kutusaba obukonyezi nukwo tukabooleka embabazi. Nka Yahwe nitusobora kubakonyera batakatusabire. Buli kiro izooba lijwa tutabandize kumusaba! Kandi izooba ligasira buli omu otwaliiremu naabo abatamusiima. Kurabira omu kutuha ebyetaago byaitu Yahwe atwoleka ngu n’atugonza. Nitugonza muno Yahwe habwokuba aine embabazi nyingi kandi mugabi!

¹⁴ Ab’oruganda na banyaanya itwe beegera ha kyokurorraho kya Yahwe, kandi bagabira abandi. Ekyokurorraho, omu 2013, ekiyaga eky’amaani eky’ayeserwe Haiyan kikatera ihanga lya Philippines. Ab’oruganda na banyaanya itwe baingi bakafeerwa amaka gaabo hamu n’ebintu byabo. Baitu eka yabo ey’eby’omwoyo ey’omu nsi yoona ekarahuka kubakonyera. Baingi bakahayo sente, kandi abandi bayejumbira omu mulimo ogw’amaani ogw’okwombeka. Ekyarugiremu, omu mwaka gumu gwonka n’obutahika baali bongiire badabiriza kandi bayombeka amaka agarukuhika 750! Omu kasumi ak’oburwaire bwa COVID-19, Abakaiso ba Yahwe bakekamba kusagika Abakristaayo bagenzi baabo. Obutwanguha kusagika Abakristaayo bagenzi baitu, twoleka ngu nitubagonza.

15-16. Mulingo ki omukuru ogutusobora kwegera hali Isiitwe ow’iguru?

¹⁵ Yahwe aine embabazi kandi aganyira. (Soma Zabuli 86:5.) Buli kiro Isiitwe  ow’omu iguru atuganyira. (Zab. 103:10-14) Abahondezi ba Yesu bakaba batahikiriire baitu akabooleka embabazi kandi y’abaganyira. Akaikiriza n’okuhayo obwomeezi bwe nukwo tuganyirwe ebibi byaitu. (1 Yoh. 2:1, 2) Embabazi n’okuganyira Yahwe na Yesu ebibatwoleka bituleetera kwirra haihi nabo.

¹⁶ Tugumya okugonza okuli omu ka yaitu ey’eby’omwoyo kuraba ‘omu kuganyirangana.’ (Bef. 4:32) Obwire obumu, kuganyira abandi nikisobora kuguma, nahabweki nitwetaaga kwekamba kukikora. Munyaanya itwe omu akagamba ngu ekicweka eky’aiziire omu Watchtower ekikaba kiine omutwe “Muganyirengana” kikamukonyera kukikora. * Akahandiika ati: “Ekicweka kinu kikankonyera kwetegereza omulingo ngasirwa obunganyira abandi. Kikasoborra ngu kuganyira abandi tikirukumanyisa ngu n’osagika enyetwaza yabo embi rundi n’ogurukya amaiso ebizibu ebyarugiremu. Baitu ngu kuganyira nikimanyisa kutaahura enzigu n’okwikara oine obusinge.” Obutuganyira ab’oruganda na banyaanya itwe, twoleka ngu nitubagonza, kandi nitwegera ha kyokurorraho kya Isiitwe Yahwe.

17. Kusigikirra ha Matayo 5:16, nitusobora kuteekamu tuta Isiitwe ow’omu iguru ekitiinisa?

¹⁷ Twine omugisa gw’amaani ogwokuba omu ka ey’ensi yoona ey’erumu okugonza. Nitugonza abantu baingi nk’oku kirukusoboka kutweteraniza omu kuramya Yahwe. Nahabweki tutalikora ekintu kyona ekisobora kuleetera abantu kutekerezaaho kubi Yahwe rundi abantu be. Nitwija kulengaho muno kwetwaza omu mulingo oguraleetera abantu kugonza amakuru amarungi.​—Soma Matayo 5:16.

18. Kiki ekisobora kutukonyera kutebeza n’obumanzi?

¹⁸ Obwire obumu abantu nibasobora kuturabyamu amaiso rundi kutuhiganiza, habw’okworobera Isiitwe ow’omu iguru. Kiki ekitusobora kukora kakuba tuba nitutiina kugambiraho abantu abandi enyikiriza zaitu? Tukigumye ngu Yahwe hamu n’Omwana we nibaija kutukonyera. Yesu akagambira abegeswa be ngu bakaba batasemeriire kweralikirra  habw’omulingo barabazaamu rundi ekibarabaza. Habwaki? Yesu akasoborra ati: “Kiribahebwa omu kasumi ako ekimuligamba. Baitu tibali inywe mubaza, baitu omwoyo gwa Isinywe nuwe abaliza omuliinywe.”​—Mat. 10:19, 20.

19. Bazaaho ekyokurorraho eky’omuntu ayatebiize n’obumanzi.

¹⁹ Tekerezaaho ekyokurorraho kya Robert. Omu kasumi k’enyuma obwakaba nubwo akyatandikire kwega Baibuli kandi amanyire bike muno, akatwarwa omu kooti y’amahe omu South Africa. Akasoborra kooti n’obumanzi ngu akaba nagonza kusigara atagweriire rubaju habw’okugonza okw’ainiire ab’oruganda bagenzi be. Ekiikaro eky’aine omu ka yaitu ey’eby’omwoyo akakitwara kuba ky’omuhendo! Omuramuzi akamukaguza aho naaho ati: “Ab’oruganda bagenzi baawe nubo baha?” Robert akaba atarukunihira ekikaguzo eki, baitu akaijuka ekyahandiikirwe eky’ekiro eki. Kikaba kiri Matayo 12:50 orukugamba ngu: “Baitu anyakukora wena Isenyowe ali omu iguru ebyagonza, nuwe mugenzi wange, nuwe munyanya nyowe, nuwe mau.” Nobukiraaba ngu Robert akaba ali mwegi wa Baibuli, omwoyo gwa Yahwe gukamukonyera kugarukamu ekikaguzo eki, hamu n’ebindi bingi eby’akaba atetekaniriize. Yahwe n’ateekwa kuba y’asemeriirwe habwa Robert! Kandi naitwe tusemeza Yahwe obutumwesiga kandi tukatebeza n’obumanzi omu nyikara ezigumangaine.

20. Kiki ekitusemeriire kucweramu kimu kukora? (Yohana 17:11, 15)

²⁰ Leka tugumizeemu nitusiima habw’omugisa ogutwine ogwokuba omu ka ey’eby’omwoyo ey’erumu okugonza. Twine Isiitwe arukukirrayo kimu oburungi hamu n’ab’oruganda na banyaanya itwe abarukutugonza. Tutalireka kwikara nitusiima habw’ebintu binu. Sitaani hamu n’abahondezi be ab’enobi balengaho kutuleetera kutekereza ngu Isiitwe tarukutugonza kandi n’okusiisa obumu obuturukwegondezaamu. Baitu Yesu akatusabira, n’ayesengereza Ise kutulinda nukwo eka yaitu esobole kwikara omu bumu. (Soma Yohana 17:11, 15.) Yahwe n’agarukamu esaara egi. Nka Yesu tutaligurukyagurukya ngu Isiitwe ow’omu iguru n’atugonza kandi n’atusagika. Leka tucweremu kimu kugumizaamu nitwirra haihi n’eka yaitu ey’omwoyo.