1. Omuntu ayehurra ata omunyabuzaale we obw’abingwa omu kitebe?

HAROHO omuntu oworukugonza ow’abingirwe kuruga omu kitebe? Mali eki nikisaaliza muno! Munyaanya itwe Hilda nagamba ati: “Iba nyowe omwesigwa outukaba tumazire hamu emyaka 41 omu buswere obuyafiire, nk’atekereza ngu obu nubwo busaasi obukaba nibukirrayo kimu obunsobora kutunga. * Baitu mutabani wange obuyarugire omu kitebe, y’anagaho mukazi we n’abaana nkasaasa muno n’okukiraho.”

2-3. Kusigikirra ha Zabuli 78:40, 41, Yahwe ayehurra ata abaheereza be obubamurugaho?

² Tekerezaaho omulingo Yahwe y’asaliirwe muno abamu ha bamalaika abakaba bali kicweka ky’eka ye obubamujemiire! (Yud. 6) Kandi tekerezaaho omulingo y’asaliirwemu, Abaisaleri abayagonzaaga muno obubaikaraga nibamujeemera emirundi nyingi. (Soma Zabuli 78:40, 41.) Okigumize kimu ngu Isiitwe ow’okugonza ow’omu iguru na uwe asaalirwa omuntu oworukugonza obwamurugaho. N’ayetegereza obusaasi obw’orukurabamu. Omu mulingo ogw’embabazi naija kukugarramu amaani, kandi akuhe n’obusagiki obworukwetaaga.

³ Omu kicweka kinu, nitwija kubazaaho ebintu ebitusobora kukora kutunga obukonyezi bwa Yahwe omuntu outurukugonza obwaleka kuheereza Yahwe. Kandi nitwija kwetegereza omulingo tusobora kukonyera abandi omu kitebe abarukuraba omu kizibu kinu. Baitu leka tubanze tubazeeho entekereza ey’etahikire ei tusemeriire kwetantara.

4. Abazaire baingi behurra bata omwana wabo obwaruga hali Yahwe?

⁴ Omwana ow’omuhendo obwaruga hali Yahwe, kya buli kiro abazaire kwekaguza obubaraaba bakozere kyona ekirukusoboka  kumukonyera kwikara omu mananu. Hanyuma ya mutabani we kubingwa, ow’oruganda Luke akagamba ati: “Nkejunaana. Nkatunga n’ebirooto ebibi ha nsonga enu. Obwire obumu narraga kandi nsaalirwa muno omu mutima.” Munyaanya itwe Elizabeth, ayarabire omu nyikara niyo emu, akaikara n’atekereza ati: “Nyowe nka nyina, nsobi ki ei n’akozere? Nkatekereza ngu ntakole ekirukumara kwegesa mutabani wange kugonza Yahwe.”

5. Noha asemeriire kujunaanwa omuntu obwaruga hali Yahwe?

⁵ Tusemeriire kukiijuka ngu Yahwe ahaire buli omu ekisembo eky’okwecweramu. Kinu nikimanyisa ngu nitusobora kwecweramu kumworobera rundi kwanga. Abato abamu abaakuziibwe abazaire abatarabateriireho ekyokurorraho ekirungi, basoboire kucwamu kuheereza Yahwe kandi n’okwikara omu mananu. Abato abandi obubakura baruga omu mananu n’obukiraaba ngu bazaire baabo bakakora kyona ekibarukusobora kubakuza nibasigikirra ha misingi ya Baibuli. Nahabweki buli muntu asemeriire kwecweramu wenka kuheereza Yahwe. (Yos. 24:15) Nahabweki abazaire, muleke kutekereza ngu eky’ahikire ha mwana wanyu ekaba nsobi yanyu!

6. Omwana n’asobora kwehurra ata kakuba omuzaire we aleka kuheereza Ruhanga?

⁶ Obwire obumu, omuzaire aruga omu mananu, kandi anagaho eka ye. (Zab. 27:10) Kinu nikisobora kumaramu muno abaana amaani habwokuba bamuroraga nk’ekyokurorraho. Esther, anyakwine Ise ay’abingirwe n’agamba ati: “Nakiraga kurra muno habwokuba nkakyetegereza ngu akaba atarukuhuguka mpora mpora kuruga omu mananu. Baitu akacwamu akigenderiire kuruga hali Yahwe. Ngonza muno Ise nyowe, nahabweki obuyabingirwe naikaraga nyeralikiriire nk’oku ali. Naikaraga nincweka n’enkizi.”

7. Yahwe ayehurra ata ha mwana ow’aine omuzaire ow’abingirwe omu kitebe?

⁷ Abato, omu h’abazaire banyu obwaraaba abingirwe, nitusaalirwa hamu nainywe! Kandi mukigumize kimu ngu Yahwe n’ayetegereza kurungi obusaasi bwanyu. N’abagonza muno kandi n’asiima habw’obwesigwa bwanyu, kandi naitwe Abakristaayo bagenzi banyu nukwo turukwehurra. Ekindi, mwijuke ngu timwine musango habw’encwamu z’omuzaire wanyu. Nk’oku tusangirwe turozere ha kubanza, Yahwe ahaire buli omu obugabe obw’okwecweramu. Kandi buli omu wena ay’ayehaireyo kandi yabatizibwa aine ‘kwetweka [omugugu gwe] wenka.’​—Bag. 6:5.

8. Abanyabuzaale abesigwa nibasobora kukora ki obubarukuba balindiriire omuntu wabo kugaruka hali Yahwe? (Rora n’akasanduuko “ Garuka Hali Yahwe.”)

⁸ Omuntu oworukugonza obwaruga hali Yahwe, kya buli kiro kwikara nonihira ngu kiro kimu aligaruka hali Uwe. Kiki eky’osobora kukora omu kasumi obworukuba oky’alindiriire? Kora kyona ekyorukusobora kwikaza okwikiriza kwawe kugumire. Obworakora oti, noija kuteraho abanyabuzaale baawe abandi ekyokurorraho ekirungi kandi obundi na hali ogu anyakubingirwe. Kandi noija n’okutunga amaani agorukwetaaga kugumira obusaasi obwoine. Leka tubazeeho ebintu ebimu eby’osobora kukora kwikaza okwikiriza kwawe kugumire.

9. Biki eby’osobora kukora kwikara oine okwikiriza okugumire? (Rora n’akasanduuko “ Enkarra Ezisobora Kukuhuumuza Omuntu Wawe Obwabingwa.”)

⁹ Ikara oine entekaniza enungi ey’eby’omwoyo. Kikuru muno kugumizaamu nogumya okwikiriza kwawe, hamu n’okw’ab’omu ka yaawe. Kinu nosobora kukikora ota? Ikara oine entekaniza enungi ey’okwesomesa ekigambo kya Ruhanga, kukyecumitirizaaho, hamu n’okugenda omu nsorrokano, kinu nikiija kukukonyera kutunga amaani kuruga hali Yahwe. Joanna anyakwine Ise hamu na mugenzi omwisiki omukuru abaarugire omu mananu nagamba ati: “Mpurra natekaana obunsomaho abaheereza ba Yahwe nka Abigairi, Esiteri, Yobu, Yusufu, hamu na Yesu. Ebyokurorraho byabo bingarramu amaani kandi binkonyera kuba n’entekereza enungi. Kandi n’ebizina byaitu ebindi eby’omwoyo bingarramu muno amaani.”

10. Zabuli 32:6-8 n’etukonyera eta kugumira obusaasi?

¹⁰ Gambira Yahwe buli kimu kyona ekirukukweralikiriza. Obworahurra oine obusaasi, otaleka kumusaba. Wesengereze Ruhanga waitu akukonyere kurora enyikara ey’orumu omu mulingo agiroramu, kandi ‘kukwegesa, n’okukuragirraga omuhanda ogworarabamuga.’ (Soma Zabuli 32:6-8.) Ky’amananu nikisobora kuba nikikusaaliza muno, kugambira Yahwe omulingo gwonyini ogw’orukwehurramu. Baitu Yahwe n’ayetegereza kurungi obusaasi obuli omu mutima gwawe. N’akugonza kandi n’akwekambisa kumugambira buli kimu kyona ekiri ha mutima gwawe.​—Kurug. 34:6; Zab. 62:7, 8.

11. Kusigikirra ha Abaheburaniya 12:11, habwaki tusemeriire kwesiga okuhana kwa Yahwe okw’okugonza? (Rora n’akasanduuko “ Kubinga omu Kitebe Kyoleka Okugonza Yahwe Atwiniire.”)

¹¹ Sagika encwamu y’abagurusi b’ekitebe.  Kubinga omu kitebe ntekaniza kuruga hali Yahwe. Kuhana kwe okurukusigikirra ha kugonza kugasira buli omu, otwaliiremu n’omusiisi. (Soma Abaheburaniya 12:11.) Abamu omu kitebe nibasobora kugamba ngu abagurusi batakole encwamu ey’ehikire kuhana omuntu ogu, baitu oijuke ngu abantu nkabo tibakira kubaza ebintu ebibi omusiisi ogu eby’akozere. Amananu gali, titumanyire kiki kyonyini eky’abaireho. Wesige ngu abagurusi abaakozere encwamu bakekamba kuhondera emisingi ya Baibuli, kandi n’okucwa omusango habwa Yahwe.​—2 Ebyom. 19:6.

12. Birungi ki abamu ebibatungire habw’okusagika entekaniza ya Yahwe ey’okuhana?

¹² Kusagika encwamu y’abagurusi ey’okubinga omuntu ow’orukugonza kuruga omu kitebe, nikisobora kumukonyera kugaruka hali Yahwe. Elizabeth outusangirwe tubalizeeho nagamba ati: “Kuleka kukoragana na mutabani waitu omukuru, kyali kigumire muno. Baitu obuyamazire kugaruka hali Yahwe akagamba ngu mali kyali kihikire bamubinge. Hanyuma y’akasumi akagamba ngu kikamukonyera kwega amasomo maingi amarungi. Nkeega ngu okuhana kwa Yahwe kuhikire obwire bwona.” Iba arukwetwa Mark, nayongerraho ati: “Hanyuma y’akasumi, mutabani wange akangambira ati kimu ha bintu eby’amukonyire kugaruka, kikaba itwe kumwecweraho kimu. Nyine okusemererwa kwingi habwokuba Yahwe akatukonyera kuba bahulizi.”

13. Kiki ekisobora kukukonyera kugumira obusaasi?

¹³ Baza n’abanywani abarakwetegereza. Mara obwire n’Abakristaayo abakuzire omu by’omwoyo abarakukonyera kwikara oine entekereza enungi. (Nfu. 12:25; 17:17) Joanna, outusangirwe tubalizeeho n’agamba ati: “Omu mutima nkehurra ndi nyenka. Baitu kubaza n’abanywani abandukwesiga kikankonyera muno kuguma.” Kiki eky’osobora kukora kakuba abamu omu kitebe bakubaliza ebintu ebikwongera obusaasi?

14. Habwaki tusemeriire kugumizaamu nitugumiisirizangana kandi nituganyirangana?

¹⁴ Gumiisiriza Abakristaayo bagenzi baawe. Titusobora kunihira buli omu kubazaaga ebintu ebihikire byonka. (Yak. 3:2) Itwena tituhikiriire, nahabweki kitakuhuniiriza kakuba abamu baburwa eky’okukugambira rundi bakubaliza ekintu batakigenderiire ekikwongera obusaasi. Ijuka okutererra kw’omukwenda Paulo: “[Mugumizeemu nimugumisirizangana] kandi nimuganyirangana inywenka, rundi haroho wena anyina ekigambo hali mutahiwe.” (Bak. 3:13) Munyaanya itwe omu anyakwine omunyabuzaale ow’akaba abingirwe, n’agamba ati: “Yahwe ankonyire kuganyira ab’oruganda abaalengereho kukora ekintu ekihikire omu mulingo ogw’okutahikirra.” Ekitebe nikisobora kukonyera kita abanyabuzaale abesigwa?

15. Kiki ekitusobora kukora kukonyera abanyabuzaale ab’omuntu ayakabingwa omu kitebe?

¹⁵ Tangirra kurungi abanyabuzaale abesigwa.  Munyaanya itwe Miriam akagamba ngu akeralikirra kugenda omu nsorrokano hanyuma ya muto we omwojo kubingwa omu kitebe. Nasoborra ati: “Nkatiina abantu ekibaragamba. Baitu hali haroho abanywani abarungi abasaalirwe hamu nanyowe kandi abatarabalizeeho kubi mugenzi wange. Kandi bakankonyera kutehurra ndi nyenka omu kuganya kwange.” Munyaanya itwe ondi nagamba ati: “Hanyuma ya mutabani waitu kubingwa, banywani baitu abagonzebwa bakaija batuhuumuza. Bakatugambira ngu tibamanyire eky’okubaza. Bakarra hamu nanyowe rundi bampandiikira ebbaruha ezirukugarramu amaani. Ekibaakozere kikankonyera muno!”

16. Ekitebe nikisobora kita kugumizaamu nikisagika abanyabuzaale abesigwa?

¹⁶ Gumizaamu n’osagika abanyabuzaale abesigwa. Nibetaaga okugonza kwawe n’okugarurwamu amaani kukira na kara. (Baheb. 10:24, 25) Obwire obumu, abanyabuzaale ab’omuntu ow’abingirwe behurra ngu nabo ekitebe kibecwireho. Otaikiriza eki kubaho! Abato abaine abazaire abaarugire omu mananu nibetaaga kusiimwa kandi n’okugarurwamu amaani. Maria, ow’aine iba ay’abingirwe omu kitebe kandi y’abanagaho, nagamba ati: “Abamu h’abanywani bange bakaija omu ka, batucumbira, kandi bankonyera kwegesa abaana bange. Bakasaalirwa hamu na nyowe kandi barra na nyowe. Bakantonganirra abantu obubatandikire kumbazaaho ebisuba. Mali bakangarramu muno amaani!”​—Bar. 12:13, 15.

17. Kiki abagurusi b’ekitebe ekibasobora kukora kuhuumuza abo abaine obujune?

¹⁷ Abagurusi be kitebe, mukozese buli kagisa koona kugarramu abanyabuzaale abesigwa amaani. Mwine obujunaanizibwa obw’embaganiza obw’okuhuumuza Abakristaayo abo. (1 Bas. 5:14) Mutunge obwire obw’okubagarramu amaani ensorrokano zitakatandikire kandi na hanyuma yazo. Mubabungire omu maka gaabo kandi musabe hamu nabo. Mutebeze nabo, rundi obwire obumu mubaraalize kuba hamu nainywe omu kuramya kwanyu okw’eka. Abagurusi nibetaaga kwoleka embabazi, okugonza, hamu n’okufaayo hali abo abaine obujune.​—1 Bas. 2:7, 8.

18. Kusigikirra ha 2 Petero 3:9, kiki Yahwe ekyarukugondeza abaalekere kumuheereza?

¹⁸ Yahwe “[tarukugonza] muntu wena [okuhwerekerra], baitu bona bahike omu kwegarukamu.” (Soma 2 Petero 3:9.) Omuntu n’obwaraaba akozere ekibi eky’amaani, obwomeezi bwe bukyali bw’omuhendo hali Ruhanga. Ijuka ngu Yahwe akasasurra buli omu wena omuhendo ogw’amaani obu nubwo obwomeezi obw’Omwana we omugonzebwa. Omu mulingo ogw’embabazi Yahwe alengaho kukonyera abo abamurugireho kugaruka hali uwe. Nanihira ngu nibaija kugaruka nk’oku kyolekerwe omu kyokurorraho kya Yesu eky’omwana ow’akaba azaahire. (Luk. 15:11-32) Baingi abakaba abarugire omu mananu bakahika bagaruka hali Ise bo ow’omu iguru ow’okugonza. Kandi ekitebe kikasemererwa muno kubatangirra. Elizabeth, outusangirwe tubalizeeho akasemererwa muno mutabani we obuyagarukire omu kitebe. Nagamba ati: “Nyine okusemererwa kwingi habwokuba baingi bakanyekambisa kwikara ninihira.”

19. Habwaki nosobora kugumizaamu noyesiga Yahwe?

¹⁹ Twikale nitwesiga Yahwe obwire bwona. Tasobora kutuha obuhabuzi oburaturugiramu akabi. Ali Isiitwe omugabi, ow’embabazi, kandi ow’agonza muno abo boona abamugonza kandi abamuramya. Okigumize kimu ngu Yahwe tasobora kukunagiriiza omu kaire ak’obujune. (Baheb. 13:5, 6) Mark outusangirwe tubalizeeho nagamba ati: “Yahwe atatunageho. Kandi aikara haihi naitwe obutuba nituraba omu bizibu.” Yahwe naija kugumizaamu nakuha “amani agali amaingi muno.” (2 Kol. 4:7) Ego, nosobora kwikara oli mwesigwa, kandi oine okunihira omuntu oworukugonza n’obwaruga hali Yahwe.