EKICWEKA KY’OKWEGA 40
‘Kuhindura Baingi Hali Okuhikirra’
“Nabo abahindura baingi hali okuhikirra balyangasana nkenyunyuzi ebiro nebiro.”—DAN. 12:3.
EKIZINA 151 Alibeeta
EBITURAYEGA *
1. Bintu ki ebirukusemeza ebirukugenda kubaho omu Bulemi obw’Emyaka Rukumi?
KAKIRIBA kiro ky’okusemererwa okuhumubuuka obukulitandika hanu omu nsi, omu Bulemi bwa Kristo obw’Emyaka Rukumi! Abo boona abaaferiirwe abagonzebwa baabo baine ekihika eky’okubarora omurundi ogundi. Kandi na Yahwe nukwo ayehurra ati. (Yob. 14:15) Teramu kasisani orole omulingo buli omu alyehurra obwalirora abantu abarukugonza bahuumbwirwe. Nk’oku twayegere omu kicweka ekyahoire, “abahikiriire,” abaine amabara gaabo gahandiikirwe omu kitabu ky’obwomeezi, nibaija kutunga “okuhumbuka okwobwomezi.” (Eng. 24:15; Yoh. 5:29) Obundi baingi h’abantu baitu abaafiire nibaija kuhumbuurwa omu nsi omu kaire kake hanyuma ya Haramagedoni. * Kwongerezaaho, “abatahikiriire,” nk’abo abataratungire omugisa ogw’okumanya Yahwe rundi kumuramya nibaija kutunga “okuhumbuka okwomusango.”
2-3. (a) Nk’oku kyolekerwe omu Isaya 11:9, 10, kiki ekirukwija kwegesebwa omu ntekaniza ey’okwegesa ey’amaani ey’etakabahoga omu nsi, kandi habwaki? (b) Biki ebiturukwija kubazaaho omu kicweka kinu?
2 Abo boona abaliba bahumbukire nibaija kwetaaga kwegesebwa. (Is. 26:9; 61:11) Nahabweki, entekaniza ey’okwegesa ey’amaani ey’etakabahoga omu nsi neija kubaho. (Soma Isaya 11:9, 10.) Habwaki? Habwokuba, abatahikiriire nibaija kwetaaga kwega hali Yesu Kristo, Obukama bwa Ruhanga, ekicunguro kya Yesu Kristo, obukuru bw’ibara lya Yahwe, hamu n’ensonga habwaki nuwe wenka asemeriire kulema. Abahikiriire nabo nibaija kwetaaga kwega ebintu Yahwe aizire n’ayegesa abantu be mpora mpora ebirukukwata ha kigendererwa kye eky’ensi. Bamu h’abaheereza ba Yahwe banu bakafa kara muno Baibuli etakamazire kuhandiikwa. Boona abahikiriire n’abatahikiriire nibaija kuba n’ebintu bingi eby’okwega.
3 Omu kicweka kinu, nitwija kubazaaho ebikaguzo binu: Omulimo gunu ogw’okwegesa ogw’amaani, nigwija kukorwa guta? Kiki ekirahika h’abantu abarayorobera entekaniza enu? Kandi kiki ekirahika h’abantu abarajeemera entekaniza enu? Ebigarukwamu eby’ebikaguzo binu bisemeriire kuba bikuru muno haliitwe omu kasumi kanu. Nitwija kurora obumu ha bunabbi oburukuhuniriza obuhandiikirwe omu kitabu kya Danieri hamu n’ekya Okusuku’rwa omulingo buratukonyera kwetegereza kurungi biki ebiraabaho abaafiire obubarahumbuurwa. Eky’okubanza, leka tubazeeho ebintu ebirukuhuniriza ebyarangirwe ebiri omu kitabu kya Danieri 12:1, 2.
“ABO ABAGWIJAGIRA OMU CUCU . . . BALISISIMUKA”
4-5. Ekyahandiikirwe ekiri omu Danieri 12:1 nikyoleka ki habirukukwata h’akasumi ka ha mpero?
4 Soma Danieri 12:1. Ekitabu kya Danieri nikyoleka orukarra rw’ebintu ebirukuhuniriza ebiraabaho omu kasumi ka ha mpero. Ekyokurorraho, Ekyahandiikirwe ekiri omu Danieri 12:1 nikyoleka ngu Mikaeri ogu nuwe Yesu Kristo, “alyemerra” habwabana ba Ruhanga.’ Ekicweka ky’obunabbi obu kikatandika kuhikirra omu mwaka 1914 Yesu obuyakomerwe nk’Omukama w’Obukama bwa Ruhanga.
5 Baitu, Danieri akagambirwa ngu Yesu “alyemerra” omu ‘kasumi ak’obujune, akatakabahoga ihanga likaba okubaho n’okuhikya ebiro biri.’ “Akasumi akobujune” nugwo “omuhito omwingi” ogurukubazibwaho omu Matayo 24:21. Yesu “alyemerra,” rundi alirwanirra abantu ba Ruhanga omu kasumi k’obujune, ekirukumanyisa h’akasumi ka Haramagedoni. Ekitabu kya Okusuku’rwa kibazaaho abantu banu nk’ekitebe ekingi ‘ekiruga omu muhito mwingi.’—Kus. 7:9, 14.
6. Kiki ekiraabaho hanyuma y’ekitebe ekingi kukiraho omuhito omwingi? Soborra. (Rora n’ekicweka “Ebikaguzo Kuruga omu Basomi Baitu” ekirukubazaaho okuhuumbuka okuraabaho omu nsi.)
6 Soma Danieri 12:2. Kiki ekiraabaho hanyuma y’ekitebe ekingi kukiraho akasumi kanu ak’obujune? Obunabbi bunu tiburukumanyisa okuhumbuuka okw’akokurorraho, rundi okugarurwa buhyaka okw’abaheereza ba Ruhanga omu by’omwoyo okubaho omu biro eby’okumalirra, nk’oku twali tumanyire kara. * Oihireho ebigambo binu nibimanyisa okuhumbuuka okw’abafu okuraabaho omu nsi empyaka ey’erukwija. Habwaki nitugamba tuti? Ebigambo “omu cucu” ebikozesiibwe n’omu Yobu 17:16 nibimanyisa “ekituuro.” Habwokuba ebigambo omu cuucu nibimanyisa ekituuro, ekyahandiikirwe ekiri omu Danieri 12:2 kiine kuba nikibazaaho okuhumbuuka kwonyini okulibaho hanyuma y’ebiro ebya ha mpero na hanyuma y’obulemu obwa Haramagedoni.
7. (a) Abamu nibaija kuhumburwa omu mulingo ki hali “obwomeezi obwebiro nebiro”? (b) Mulingo ki “okuhumbuka kunu kurukukira oburungi”?
7 Baitu hati Ekyahandiikirwe ekiri omu Danieri 12:2 nikimanyisa ki obukigamba ngu abamu balihumbuurwa kutunga “obwomeezi obwebiro nebiro”? Nikimanyisa ngu abo abarahumbuurwa kandi bakamanya rundi bakagumizaamu nibamanya kandi bakorobera Yahwe hamu na Yesu omu kasumi ak’emyaka 1,000 nibaija kutunga obwomeezi obw’ebiro n’ebiro ha kumalirra. (Yoh. 17:3) Kunu nukwija kuba “okuhumbuka okurukira oburungi” kukira oku nambere abantu abamu bahumbwirwe omu busumi bwa kara. (Baheb. 11:35) Habwaki? Habwokuba abantu abo abaahumbwirwe omu busumi obwa kara bakongera bafa.
8. Abamu nibaija kuhumbuurwa bata “hali ensoni nokugaywa okwebiro nebiro”?
8 Baitu abahumbukire abamu tibarukwija kwikiriza kwegesebwa Yahwe. Obunabbi bwa Danieri bukagamba ngu abamu bakuhumbukire “hali ensoni nokugaywa okwebiro nebiro.” Habwokuba nibaija kujeemera Yahwe, amabara gaabo tigarukwija kuhandiikwa omu kitabu ky’obwomeezi kandi tibarukwija kutunga obwomeezi obw’ebiro n’ebiro. Oihireho nibaija kutunga ‘okugaywa okwebiro nebiro,’ rundi okuhwerekerezebwa. Nahabweki Ekyahandiikirwe ekiri omu Danieri 12:2 nikibazaaho kiki ekiraahika habahumbwirwe ha kumalirra kusigikirra ha bibarakora hanyuma y’okuhumbuuka. * (Kus. 20:12) Abamu nibaija kutunga obwomeezi obutahwaho kandi abandi tibarukwija kubutunga.
‘KUHINDURA BAINGI HALI OKUHIKIRRA’
9-10. Kiki ekindi ekiraabaho hanyuma y’omuhito omwingi, kandi nibaha ‘abalyangasana nkokwangasana kwa haiguru’?
9 Soma Danieri 12:3. Kiki ekindi ekiraabaho hanyuma ‘y’akasumi ak’obujune’? Kwongerereza ha Danieri 12:2, orukarra 3 rubazaaho ekintu ekindi ekiraabaho hanyuma y’omuhito omwingi.
10 Nibaha ‘abalyangasana nkokwangasana kwa haiguru’? Ekyahandiikirwe ekiri omu Matayo 13:43 kitukonyera kwetegereza nubo baha obukigamba kiti ‘nubwo abantu abahikiriire balyangasana nkizoba omu Bukama obwa Isebo.’ Omu bigambo binu, Yesu akaba nabazaaho ‘abana bobukama,’ bagenzi be abaseserweho amagita, abaraheereza na uwe omu Bukama bw’omu iguru. (Mat. 13:38) Nahabweki ekyahandiikirwe ekiri mu Danieri 12:3 kiine kuba nikibazaaho abaseserweho amagita hamu n’omulimo ogubalikora omu kasumi ak’Obulemi obw’Emyaka Rukumi.
Abaseserweho amagita nibaija kukwataniza na Yesu omu kwebembera omulimo gw’okutebeza ogurukwija kubaho omu myaka 1,000 (Rora akacweka 11)
11-12. Abaseserweho amagita nibaija kukora mulimo ki omu kasumi ak’emyaka 1,000?
11 Abaseserweho amagita barahindura bata baingi hali okuhikirra? Abaseserweho amagita nibaija kukwataniza hamu na Yesu kwebembera entekaniza ey’okwegesa ey’eraaba hanu omu nsi omu kasumi ak’emyaka 1,000. Abe 144,000 nibaija kulema nk’abakama kandi baheereze nka banyakatagara. (Kus. 1:6; 5:10; 20:6) Nahabweki nibaija kukonyera omu ‘kukiza amahanga,’ ekirukumanyisa kukonyera abantu mpora mpora kuhikya obubarafooka abahikiriire. (Kus. 22:1, 2; Ez. 47:12) Ako kanikaija kuba akasumi ak’okusemererwa hali abaseserweho amagita!
12 Nibaha abaraaba omu “baingi” abarahindurwa hali okuhikirra? Nibaija kutwarramu abarahumbuurwa, abarakiraho obulemu bwa Haramagedoni, hamu n’abaana abasobora kuzaarwa omu nsi empyaka. Ha kumalirra kw’emyaka 1,000, boona abaliba omu nsi baliba abahikiriire. Hati nidi amabara gaabo obugarahandiikwa na bwino omu kitabu ky’obwomeezi hatali na kalamu?
EKIRENGO EKYOKUMALIRRA
13-14. Kiki boona abahikiriire omu nsi ekibarukwija kwetaaga kwoleka batakatungire obwomeezi obutahwaho?
13 Tusemeriire kukiijuka ngu kuba omuntu ahikiriire tikirukumanyisa ngu mpaka noija kutunga obwomeezi obutahwaho. Tekerezaaho Adamu na Hawa, nobubaraaba bakaba bahikiriire, kikaba nikibetagisa kukyoleka ngu niborobera Yahwe Ruhanga batakahairwe obwomeezi obutahwaho. Baitu eky’obusaasi bakalemwa kumworobera.—Bar. 5:12.
14 Ha kumalirra kw’emyaka 1,000, abo abaliba omu nsi baliba mu nyikara ki? Boona baliba bafookere abahikiriire. Abantu abo boona abahikiriire, balisagika omu bwijwire obulemi bwa Yahwe ebiro n’ebiro? Rundi abamu balifooka nka Adamu na Hawa abaalemerwe kwikara bali besigwa n’obukiraaba ngu bakaba bahikiriire? Ebikaguzo binu nibiija kwetaaga kugarukwamu, baitu omu mulingo ki?
15-16. (a) Abantu boona balitunga di omugisa ogw’okwoleka obwesigwa bwabo hali Yahwe? (b) Biki ebiraruga omu kirengo ekyokumalirra?
15 Sitaani naija kubohwa kumara emyaka 1,000. Omu kasumi ako, tarukwija kusobora kuhabisa omuntu wena, baitu ha kumalirra kw’emyaka 1,000 Sitaani naija kulekerwa. Hanyuma naija kulengaho kuhabisa abantu abahikiriire. Omu kasumi ako ak’okulengwa, abantu boona abahikiriire omu nsi, nibaija kuba baine omugisa ogw’okwoleka obubaraaba nibatekamu ekitiinisa ibara lya Ruhanga kandi nibasagika obulemi bwe. (Kus. 20:7-10) Ebibaraakora omu kasumi ako nibiija kwoleka amabara gaabo obugaraaba gasemeriire kuhandiikwa omu kitabu ky’obwomeezi habw’ebiro n’ebiro.
16 Baibuli etugambira ngu abantu abamu kusisanaho Adamu na Hawa, tibarukwija kuba besigwa, kandi nibaija kwanga obulemi bwa Yahwe. Kiki ekiraabahikaho? Ekyahandiikirwe ekiri omu Okusuku’rwa 20:15 nikigamba kiti: “Omuntu wena atarazokere ahandikirwe omu kitabu kyobwomezi yanagwa omu nyanja eyomurro.” Ego abajeemu banu nibaija kuhwerekerezebwa habw’ebiro n’ebiro. Baitu abantu abahikiriire abarukukira obwingi nibaija kusingura ekirengo ekyokumalirra. Obu nubwo amabara gaabo galihandiikwa omu kitabu eky’obwomeezi habw’ebiro n’ebiro.
OMU ‘KASUMI AKAHA MPERO’
17. Kiki Malaika ekiyagambiire Danieri ngu kyakubaireho omu kasumi kaitu? (Danieri 12:4, 8-10)
17 Kanikisemeza muno kutekerezaaho ebintu binu ebiraabaho omu kasumi ak’omu maiso! Baitu malaika akagambira Danieri n’obutumwa obundi obukuru oburukukwata ‘h’akasumi akaha mpero’ kandi ako nuko turumu. (Soma Danieri 12:4, 8-10; 2 Tim. 3:1-5) Malaika akagambira Danieri ati: “Nokumanya kulyeyongera.” Ego, ebigambo eby’obunabbi omu kitabu kye byakwetegereziibwe omu bwijwire abantu ba Ruhanga. Malaika akongera yagamba ngu omu kasumi ako “ababi balikora kubi; kunu busaho hali ababi abalyetegereza.”
18. Kiki ekirukwija kuhika h’ababi omu kasumi akatali ka hara?
18 Kasumi kanu nikisobora kuzooka ngu ababi tibarukufubirwa habw’ebikorwa by’abo ebibi. (Mara. 3:14, 15) Baitu omu kasumi akatali ka hara, Yesu naija kucwera omusango abali nk’embuzi kandi abahukanize hali abantu abandi abali nk’entaama. (Mat. 25:31-33) Ababi banu tibarukwija kukira omuhito omwingi kandi tibarukwija kuhumbuurwa kwikara omu nsi empyaka. Amabara gaabo tigarukwija kuba omu “ekitabu ekyokuijukya” ekirukubazibwaho omu Maraki 3:16.
19. Kiki ekitusemeriire kukora omu kasumi kanu, kandi habwaki? (Maraki 3:16-18)
19 Kanu nuko akasumi akatusemeriire kwoleka kuraba omu ngeso zaitu ngu tituli bamu hali abantu ababi. (Soma Maraki 3:16-18.) Yahwe aliyo nasorooza hamu abantu abaarora ‘nk’itungo ery’obweremera,’ rundi abantu ab’omuhendo haluwe. Kandi mali twakugondeze kuba bamu halibo.
Kanikiija kutusemeza kurora Danieri, abantu turugonza, hamu n’abandi baingi ‘obubalyemerra’ omu mugabo gwabo omu nsi empyaka! (Rora akacweka 20)
20. Murago ki ogw’okumalirra ogw’ahairwe Danieri, kandi habwaki olindiriire n’ekihika kurora omurago ogu niguhikirra?
20 Amananu gali ngu, tuli omu busumi oburukusemeza muno. Baitu ebintu ebirukusemeza n’okukiraho biri haihi kubaho. Omu kasumi akatali ka hara, nitwija kurora obubi bwona nibwihibwaho. Eki obukirabaho nitwija kurora omurago gwa Yahwe hali Danieri niguhikirra, ogurukugamba guti: “Olyemerra oheebwe omugabo gwawe ebiro obubirihwayo.” (Dan. 12:13, NWT) Olindiriire n’ekihika akasumi nambere Danieri, hamu n’abantu baawe ab’orukugonza ‘balyemerra’ omurundi ogundi? Obu kiraaba nukwo kiri, kora kyona ekirukusoboka kuba mwesigwa, kandi okugumye ngu ibara lyawe lyaikara lihandiikirwe omu kitabu kya Yahwe eky’obwomeezi.
EKIZINA 80 “Mwije Muroze Oburungi bwa Yahwe”
^ Ekicweka kinu nikibazaaho enyetegereza yaitu empyaka erukukwata ha ntekaniza ey’amaani ey’okwegesa erukubazibwaho omu Danieri 12:2, 3. Nitwija kubazaaho nidi obweribaho kandi nibaha abaligyejumbiramu. Ekindi, nitwija kurora omulingo entekaniza enu ey’okwegesa erakonyera kutekaniza abo abali omu nsi habw’ekirengo eky’okumalirra ha kumalirra okw’obulemi bwa Kristo obw’emyaka rukumi.
^ Okuhumbuuka nikusobora kutandika naabo abaafiire bali besigwa omu biro bya ha mpero nukwo abo abafiire ebiro ebya ha mpero bitakatandikire barahonderaho. Kakuba kinu kiba kiti, buli muntu naija kutunga omugisa ogw’okutangirra omuntu ow’akaba amanyire kurungi. Kyona ekiraabaho, Ebyahandiikirwe bibazaaho abo abaine okuhumbuuka kw’okugenda omu iguru, ngu nibaija kuhumbuuka omu mulingo ogutekaniziibwe kurungi, nahabweki nitusobora kugamba ngu n’okuhumbuuka okw’abo abaraikara omu nsi nikwija kuba omu mulingo nugwo gumu.—1 Kol. 14:33; 15:23.
^ Ensoborra enu n’ehindura enyetegereza yaitu erukusangwa omu kitabu Pay Attention to Daniel’s Prophecy! esuura 17, hamu na Watchtower eya Julaayi 1, 1987, rup. 21-25.
^ Nahabweki ebigambo “abahikiriire” hamu “nabatahikiriire” ebirukusangwa omu Engeso Ezabakwenda 24:15 hamu n’ebigambo “abakozere okurungi” hamu na “abakozere okubi” ebirukusangwa omu Yohana 5:29 nibibazaaho engeso ez’abo abahumbwirwe ezibakaba baine obu bakaba batakafiire.
