1. Habwaki kitarukuhuniriza kurora abantu batarukwesigangana omu nsi kasumi kanu?

 ABANTU omu nsi ya Sitaani tibamanyire oubasemeriire kwesiga. Emirundi erukukira obwingi, baikara nibagobezebwa ab’eby’obusubuzi, ab’eby’obulemi hamu n’abebembezi b’amadiini. Ekindi, baingi behurra ngu tibasobora kwesiga banywani baabo, abataahi hamu n’abanyabuzaale. Kinu tikisemeriire kutuhuniriza. Baibuli ekaranga ngu: “Omu biro bya ha mpero . . . , abantu baliba . . . abatali besigwa, . . . abahangirizi, . . . abagobya.” Kinu nikimanyisa ngu, abantu bakubaire nka Sitaani Ruhanga ow’obusinge bunu, ow’atasobora kwesigwa.​—2 Tim. 3:1-4, NWT; 2 Kol. 4:4.

2. (a) Nibaha abatusobora kwesigira kimu? (b) Kiki abamu ekibasobora kwekaguza?

² Baitu itwe nk’Abakristaayo tukimanyire ngu nitusobora kwesigira kimu Yahwe. (Yer. 17:7, 8) Nitukigumya ngu n’atugonza kandi ‘talihemukira’ banywani be. (Zab. 9:10) Ekindi, nitusobora kwesiga Yesu Kristo habwokuba akahayo bwomeezi bwe habwaitu. (1 Pet. 3:18) Kandi nk’oku twegere kuruga omu Baibuli, tukyeroliire ngu etuha oburagirizi oburukwesigwa. (2 Tim. 3:16, 17) Nitukigumya ngu nitusobora kwesiga Yahwe, Yesu, hamu na Baibuli. Baitu abamu nibasobora kuba nibekaguza obukiraaba nikisoboka kwikara nibesiga ab’oruganda na banyaanya itwe omu kitebe. Ekyokugarukamu obukiraaba kiri ngu ego, habwaki tusemeriire kwikara nitubesiga?

3. Mugisa ki ogw’embaganiza ogutwine? (Marako 10:29, 30)

³ Yahwe atukomere kuba kicweka ky’eka ye ey’ensi yoona ey’abaheereza be. Gunu guli mugisa ogw’embaganiza muno ogurugamu emigisa nyingi! (Soma Marako 10:29, 30.) Omu  nsi yoona twine ab’oruganda na banyaanya itwe abagonza Yahwe nkaitwe, kandi abalengaho kukora kyona ekirukusoboka kuteeka omu nkora endengo ze omu bwomeezi bwabo. Orulimi rwaitu, obuhangwa, hamu n’enjwara yaitu nibisobora kuba nibyahukana n’ebyabo, baitu tubagonza kagube guli murundi gwaitu ogw’okubanza kubatangatangana. Kukira muno tugonza kuba nabo obutuba nituramya kandi nitukugiza Isiitwe ow’omu iguru ow’okugonza.​—Zab. 133:1.

4. Habwaki nitwetaaga ab’oruganda na banyaanya itwe?

⁴ Kasumi kanu, nitwetaaga kuba omu bumu n’ab’oruganda na banyaanya itwe kukira na kara. Obwire obumu, batukonyera kwetweka emigugu yaitu. (Bar. 15:1; Bag. 6:2) Ekindi, batwekambisa kwikara nituheereza Yahwe kandi n’okwikara tugumire omu by’omwoyo. (1 Bas. 5:11; Baheb. 10:23-25) Tekerezaaho omulingo twakwehuliiremu kakuba twali tutaine obusagiki bw’ekitebe kutukonyera kurwanisa abanyanzigwa baitu, Sitaani Diabolo hamu n’ensi ye embi. Omu kasumi akatali kahara, Sitaani n’abantu abaarukulema, nibaija kutahirra abaheereza ba Ruhanga. Baitu omu kasumi ako, nikiija kutusemeza kurora ab’oruganda na banyaanya itwe nibatukonyera!

5. Habwaki abamu nikisobora kubagumira kwesiga Abakristaayo bagenzi baabo?

⁵ Baitu abamu nikisibora kubagumira kwesiga Abakristaayo bagenzi baabo, habwokuba Omukristaayo mugenzi wabo akalemwa kwahura ensita, rundi kuhikiiriza ekiyaraganiize. Rundi omuntu omu kitebe akabaza rundi y’akora ekintu ekyabasaliize muno. Ebyokurorraho nka binu nibisobora kuleetera abamu kuleka kwesiga abandi. Kiki ekisobora kutukonyera kwesiga ab’oruganda na banyaanya itwe?

6. Okugonza nikusobora kuta kutukonyera kwesiga abantu abandi? (1 Abakolinso 13:4-8)

⁶ Okugonza nukwo kutuleetera kwesiga abandi. Abakolinso ey’okubanza esuura 13  ebazaaho emiringo nyingi okugonza kusobora kutukonyera kwesiga rundi kwongera kwesiga abandi. (Soma 1 Abakolinso 13:4-8.) Ekyokurorraho, orukarra orwa 4 nirugamba ngu “okugonza nukugumisiriza, kuba nembabazi.” Yahwe atugumiisiriza n’obutumusiisira. Nahabweki, tusemeriire kugumiisiriza Abakristaayo bagenzi baitu, kakuba babaza rundi bakora ekintu ekirukutusaaliza. Orukarra orwa 5 nirwongeraho ruti: “[Okugonza] tikubihirwa, tikutekereza obubi.” Titwakugondeze kutekerezaaho kubi ab’oruganda, obu nitwikara nitwijuka ebintu ebibi ebibatukozere. Omugambizi 7:9 nirugamba ngu “otanguhiriza omutima gwawe okubihirwa.” Kakirungi kuteeka omu nkora ebigambo ebirukusangwa omu Abefeso 4:26, NWT: “Otaleka izooba kugwa okyabihiirwe”!

7. Emisingi erukusangwa omu Matayo 7:1-5 n’etukonyera eta kwesiga ab’oruganda?

⁷ Ekintu ekindi ekisobora kutukonyera kugumya obwesige bwaitu omu b’oruganda na banyaanya itwe, nukwo kubarora omu mulingo Yahwe abaroramu. Ruhanga abagonza kandi taikara naijuka ebibi byabo. (Zab. 130:3) Naitwe titusemeriire kwikara nitwijuka ebibi byabo. Omu kiikaro ky’okuteeka omutima ha nsobi zaabo, tusemeriire kukora kyona ekirukusoboka kurora emiringo yabo enungi, kandi n’okuteekerezaaho ebintu ebirungi ebibasobora kukora. (Soma Matayo 7:1-5.) Tusemeriire kubaikiririzaamu ngu nibagonza kukora ebirungi hatali kutusaaliza habwokuba okugonza “nukuikiriza byona.” (1 Kol. 13:7) Ebigambo ebi tibirukumanyisa ngu Yahwe kumara gesiga abandi hataroho ensonga enungi; oihireho, natunihirramu kubesiga habwokuba boolekere ngu besigwa. *

8. Nitusobora tuta kutandika kwesiga ab’oruganda?

⁸ Obwesigwa nibwetaaga kubukolerra kandi eki kitwara akaire. Nosobora ota kutandika kwesiga ab’oruganda? Lengaho kubamanya kurungi. Baza nabo obworukuba oizire omu nsorrokano. Kora entekaniza ey’okukora nabo omu buheereza. Bagumiisirize kandi obahe omugisa ogw’okukwoleka ngu besigwa. Ha kubanza, nikisobora kukwetaagisa kucwamu ebigambo ebyorabaliza omuntu ow’oliyo nolengaho kumanya. Enkoragana yanyu obweyeyongera, nikisobora kukwanguhira kumugambira omulingo orukwehurra. (Luk. 16:10) Baitu kiki ekyosobora kukora kakuba ow’oruganda akugobeza? Otarahuka kumaraho enkoragana yanyu. Oihireho, ensonga egi gihemu obwire. Otaikiriza ebikorwa eby’abantu abamu kukuletera kulekeraho kwesiga Abakristaayo bagenzi baawe boona. Ha nsonga enu, nitwija kubazaaho ebyokurorraho ebyatairweho abaheereza ba Yahwe baingi abesigwa abaikaire nibesiga abandi n’obukiraaba ngu bakatwazibwa kubi.

9. (a) Hana akaikara ata nayesiga entekaniza ya Yahwe, n’obukiraaba ngu abamu abakiikirraga Yahwe bakoraga ensobi? (b) Ekyokurorraho kya Hana nikikwegesa ki obukirukuhika ha kwesiga entekaniza ya Yahwe? (Rora ekisisani.)

⁹ Wakahwamuga amaani habw’ebikorwa eby’ow’oruganda ow’aine obujunanizibwa? Obukiraaba nukwo kiri, nosobora kugasirwa kuraba omu kutekerezaaho ekyokurorraho kya Hana. Omu kasumi ako Nyakatagara Omukuru Eri nuwe yayebemberaga omu kuramya Yahwe omu Isaleri. Baitu ab’omu ka ye bakaba batali kyokurorraho ekirungi. Batabani be abaheerezaaga nk’abanyakatagara bayejumbiraga butoosa omu bikorwa ebibi eby’obusihani, baitu isebo atakole eky’amaani kubahana. Yahwe atarahuke kwihaho Eri kuba nyakatagara omukuru. Baitu, Hana ataleke kuramiza ha heema  ey’okutangatanganiramu Eri obwakaba akyali nyakatagara omukuru. Eri obuyaboine Hana nasaba ali omu bujune obw’amaani, akateekereza ngu akaba atamiire. Atakabandize kwetegereza ensonga zonyini, akajunaana omukazi onu ow’akaba ali omu bujune obw’amaani. (1 Sam. 1:12-16) N’obukiraaba nukwo kyabaire kiti, Hana akaba ayeragire ngu kakuba atunga omwana ow’obwojo, akaba nagenda kumuleeta ha heema ey’okutangatanganiramu nambere yakubaire hansi y’oburolerezi bwa Eri. (1 Sam. 1:11) Ensonga erukukwata ha nyetwaza ya batabani ba Eri ekaba nekyayetaaga kuterekerezebwa? Ego, kandi Yahwe akakikoraho omu bwire bwe obusemeriire. (1 Sam. 4:17) Hanyuma y’akasumi, Ruhanga akaha Hana omwana ow’obwojo, Samuiri.​—1 Sam. 1:17-20.

10. Daudi akaikara ata nayesiga abandi n’obukiraaba ngu abantu abamu bakamugobeza?

¹⁰ Wakehurraga ogobeziibwe omunywani nfenanfe? Obukiraaba nukwo kiri, tekerezaaho ekyokurorraho ky’Omukama Daudi. Omu h’abanywani be akaba nayetwa Ahitoferi. Baitu mutabani wa Daudi Abusalomu obuyalengereho kutwaraho ise obulemi, Ahitoferi akamweteranizaaho omu bujeemu obu. Nikisobora kuba kyasaliize muno Daudi habw’okufeerwa obusagiki bwa mutabani we hamu n’omusaija ouyatwaraga kuba munywani we! Baitu Daudi ataikirize obugobya bunu kumulemesa kwesiga abantu abandi. Akagumizaamu nayesiga munywani we ondi omwesigwa arukwetwa Husai, ayayangire kubeeteranizaaho omu bujeemu. Daudi akagasirwa habw’okwesiga munywani we Husai. Habwokuba Husai akooleka ngu munywani murungi kuhika na ha rulengo orw’okuhayo obwomeezi bwe kukonyera Daudi.​—2 Sam. 17:1-16.

11. Mulingo ki omuheereza wa Nabali yayolekere ngu nayesiga abandi?

¹¹ Ekindi, tekerezaaho ekyokurorraho eky’omu h’abaheereza ba Nabali. Omu mulingo ogw’embabazi, Daudi hamu n’abasaija be bakalinda abaheereza ab’omusaija arukwetwa Nabali. Hanyuma y’akasumi, Daudi akasaba omusaija onu omuguuda Nabali kuheereza abasaija be ebyokulya byona ebyakaba nasobora kubaha. Nabali obuyayangire okusaba kunu, Daudi akabiihirwa muno kandi yacwamu ngu nagenda kwita abasaija boona abakaba bali omu ka ya Nabali. Omuheereza omu akagambiraho mukazi wa Nabali Abigairi ensonga enu.  Nk’omu h’abantu ab’omu ka egi, akaba akimanyire ngu Abigairi nasobora kujuna obwomeezi bwe. Omu kiikaro eky’okwiruka, akesiga ngu Abigairi yakusoboire kuterekereza ensonga enu. Akaba namwesiga habwokuba akaba akimanyire ngu akaba ali mukazi ow’amagezi. Ekyahondiireho kikooleka ngu akaba aine ensonga enungi habwaki yayesigire Abigairi. Abigairi akakozesa obumanzi kuraba omu kwesengereza Daudi kuleka kuhikiriza encwamu ye. (1 Sam. 25:2-35) Akesiga Daudi ngu yakukozere encwamu ey’amagezi.

12. Yesu akooleka ata ngu nayesiga abegeswa be n’obukiraaba ngu bakoraga ensobi?

¹² Yesu akesiga abegeswa be n’obukiraaba ngu bakoraga ensobi. (Yoh. 15:15, 16) Yakobo na Yohana obubasabire Yesu ekiikaro eky’embaganiza omu Bukama, Yesu atagurukyagurukye ebigendererwa byabo eby’okuheereza Yahwe rundi kubaihaho obukwenda. (Mar. 10:35-40) Hanyuma omu bwire bw’ekiro, Yesu obuyakwasirwe abegeswa be boona bakamulekaho. (Mat. 26:56) Baitu Yesu ataleke kubaikiririzaamu. Akaba amanyire kurungi obutahikirra bwabo; kandi “yabagonza kuhika hampero.” (Yoh. 13:1) Hanyuma ya Yesu kuhumbuuka, akaheereza abegeswa be 11 obujunanizibwa obukuru obw’okwebembera omu kufoora abantu abegeswa n’okurolerra entaama ze ez’omuhendo. (Mat. 28:19, 20; Yoh. 21:15-17) Akaba aine ensonga enungi habwaki yayesigire abasaija banu abatahikiriire. Boona bakaheereza n’obwesigwa kuhikya obubafiire. Hataroho kugurukyagurukya, Hana, Daudi, omuheereza wa Nabali, Abigairi, hamu na Yesu bakatuteraho ekyokurorraho ekirungi eky’okwesiga abantu abatahikiriire.

13. Kiki ekisobora kutuleetera kugumirwa kwesiga abandi?

¹³ Wakagambirahoga ow’oruganda ensita yaawe, hanyuma okakyetegereza ngu agigambiire abantu abandi? Eki nikisobora kukusaaliza muno. Munyaanya itwe omu akagambira omugurusi w’ekitebe ensita ze. Ekiro ekyahondiireho, mukazi w’omugurusi ogu akaterra munyaanya itwe esimu kumugarramu amaani, ekirukwoleka kimu ngu omugurusi akaba abalize ensita ze. Munyaanya itwe kikamugumira kwongera kwesiga omugurusi ogu. Baitu munyaanya itwe ogu akakora ekintu ekihikire eky’okusaba obukonyezi. Akahikirra omugurusi ondi, ayamukonyiire kwongera kwesiga abagurusi.

14. Kiki ekyakonyire ow’oruganda omu kwongera kwesiga abandi?

¹⁴ Ow’oruganda omu akabihirirwa abagurusi babiri kumara akasumi kaingi, ekyamuletiire kwehurra ngu tasobora kubesiga. Baitu, akatandika kutekerezaaho ebigambo by’ow’oruganda ouyatekamuga muno ekitiinisa. Ebigambo binu ebyanguhire baitu eby’amaani muno bikaba: “Sitaani nuwe munyanzigwa, hatali ab’oruganda bagenzi baitu.” Ow’oruganda akatekerezaaho muno n’obwegendereza ebigambo ebi kandi n’eky’asemeriire kukora, hanyuma y’okusaba Yahwe kumukonyera, akasobora kugarraho obusinge hagati ye n’abagurusi abo.

15. Habwaki kwongera kwesiga abantu nikisobora kutwara akasumi? Bazaaho ekyokurorraho.

¹⁵ Wakafeerwaga obujunanizibwa omu kitebe? Eki nikisobora kukusaaliza muno. Munyaanya itwe Grete na maama we bakaba bali Bakaiso ba Yahwe abesigwa omu Nazi Germany omu myaka ya 1930 omulimo gwaitu obugwali gutangirwe. Grete yayegondezaaga omu bujunanizibwa obw’okutaipingira Abakristaayo bagenzi be Watchtower. Baitu ab’oruganda obubakyetegeriize ngu ise akaba nahakaniza amananu, bakamwihaho obujunanizibwa obu habwokuba batiinaga ngu ise nasobora kuha abahakaniza obutumwa oburukukwata ha kitebe. Eki kitabe kizibu kyonka Grete eky’akaba aine kugumira. Omu Bulemu Obwakabiri obw’Ensi Yoona,  ab’oruganda tibayesigaga Grete hamu na nyina kubaha magaziini kandi bayangaga kubaza nabo obubabatangatanganaga omu muhanda. Eki kikabasaaliza muno! Obusaasi bunu bukaba bw’amaani muno kandi Grete akagamba ngu kikamutwarra akasumi kaingi kuganyira ab’oruganda abo n’okwongera kubesiga. Hanyuma y’akasumi, akakyetegereza ngu Yahwe aine kuba yabaganyire, nahabweki na uwe akaba asemeriire kubaganyira. *

16. Habwaki tusemeriire kwetantara ekintu kyona ekisobora kutulemesa kwongera kwesiga ab’oruganda?

¹⁶ Obworaaba wahikirweho ekintu ekirukusaaliza nka kinu, wekambe kwongera kwesiga abandi. Nikisobora kutwara akaire, baitu amaani ag’oratamu tigarukwija kufa busa. Ekyokurorraho, obworaaba waliireho ebyokulya byakukora kubi, nikisobora kukuleetera kwegendesereza ebyokulya ebyolya. Baitu ekiihuro kimu tikisobora kukuleetera kuleka kulya. Omu mulingo nugwo gumu, titusemeriire kwikiriza ekyokurorraho kimu ekibi, kucekya obwesige bwaitu omu b’oruganda na banyaanya itwe abatumanyire ngu bakazaarwa batahikiriire. Obuturayeyongera kwesiga Abakristaayo bagenzi baitu, nitwija kweyongera kusemererwa, kandi n’okutukonyera kwetegereza ebitusobora kukora kuletaho obwesigwa omu kitebe.

17. Habwaki obwesigwa kikuru muno, kandi kiki ekiturukwija kubazaaho omu kicweka ekirahonderaho?

¹⁷ Kigumire kwesiga abantu omu nsi enu eya Sitaani, baitu nitusobora kwesiga Abakristaayo bagenzi baitu habwokuba nitubagonza kandi nabo nibatugonza. Obwesigwa nk’obu butuleetera kusemererwa n’obumu hati, kandi nibwija kuba bulinzi obuturaaba tuli omu bwire obugumangaine omu kasumi ak’omu maiso. Kiki ekyosemeriire kukora kakuba omuntu akukora kuba kandi tokyamwesiga? Lengaho kurora ensonga omu mulingo Yahwe aziroramu, teeka omu nkora emisingi ya Baibuli, kurakuraniza okugonza hali ab’oruganda kandi oyegere ha byokurorraho kuruga omu Baibuli. Nitusobora kusingura obusaasi obuli ha mutima kandi tukongera tukesiga abandi. Obuturakora tuti, nitwija kwegondeza omu mugisa ogw’okutunga abanywani baingi ‘abehikya muno kukira mwene wabu.’ (Nfu. 18:24) Tikirukumara kwesiga abandi baitu naitwe tusemeriire kuba abarukwesigwa. Omu kicweka ekirayongeraho nitwija kubazaaho omulingo tusobora kuletera Abakristaayo bagenzi baitu kutwesiga.