Tekerezaaho omulingo Baibuli egarukamu ebikaguzo binu.

Ekyahandiikirwe ekiri omu Engeso Ezabakwenda 24:15 nikitugambira ngu nihagenda kubaho ‘okuhumbuka okwabahikiriire nabatahikiriire.’ Abahikiriire nubo abo abaayorobiire Ruhanga batakafiire, nahabweki amabara gaabo gahandiikirwe omu kitabu eky’obwomeezi. (Mara. 3:16) Abatahikiriire nibatwarramu abo abaafiire batatungire omugisa ogw’okwega hali Yahwe nahabweki amabara gaabo tigahandiikirwe omu kitabu eky’obwomeezi.

Ekyahandiikirwe ekiri omu Yohana 5:28, 29 nikibazaaho guruupu nizo zimu ibiri ezirukubazibwaho omu Engeso Ezabakwenda 24:15. Yesu akagamba ngu ‘abo abakozire okurungi’ baija kutunga ‘okuhumbuka okwobwomezi; nabo abakozire kubi hali okuhumbuka okwomusango.’ Abahikiriire bakakora ebintu ebirungi batakafiire. Nibaija kutunga okuhumbuuka okw’obwomeezi habwokuba amabara gaabo gakyahandiikirwe omu kitabu eky’obwomeezi. Baitu abatahikiriire bakakora ebintu ebibi batakafiire. Nibaija kutunga okuhumbuuka okw’omusango. Amabara gaabo tigakahandiikirwe omu kitabu eky’obwomeezi kandi nibaija kuraba omu kasumi ak’okucwerwa omusango rundi ak’okwekebiijibwa. Omu kasumi ako nibaija kutunga omugisa ogw’okwega hali Yahwe n’omugisa ogw’amabara gaabo kuhandiikwa omu kitabu eky’obwomeezi.

Ekyahandiikirwe ekiri omu Okusuku’rwa 20:12, 13 nikisoborra ngu boona abarahumbuurwa nibaija kwetaaga kworobera ‘ebi ebyahandikirwe omu bitabu,’ ekirukumanyisa, ebiragiro ebihyaka Ruhanga ebyalituha omu nsi empyaka. Abo abarayanga kubyorobera nibaija kuhwerekerezebwa. “Omusiisi alikyenwa n’obwaliba ahikize emyaka kikumi ey’obukuru.”​—Is. 65:20, NWT.

Ekyahandiikirwe ekiri omu Danieri 12:2 kikaranga ngu abamu abagwijagiire omu kufa balisisimuka hali “obwomezi obwebiro nebiro, nabandi hali ensoni nokugaywa okwebiro nebiro.” Orukarra runu nirubazaaho ekintu ekirahikaho abahumbwirwe banu ha kumalirra​—“obwomezi obwebiro nebiro” rundi ‘okugaywa okwebiro nebiro.’ Nahabweki, ha kumalirra okw’emyaka 1,000 abamu nibaija kutunga obwomeezi obutahwaho kandi abandi nibaija kuhwerekerezebwa ebiro n’ebiro.​—Kus. 20:15; 21:3, 4.

Tekerezaaho ekyokurorraho kinu. Enyikara y’abantu omu guruupu ibiri ez’abantu abarahumbuurwa n’esobora kulengesanizibwa n’abantu abarukugonza kwikara omu ihanga erindi. Abahikiriire bali nk’abantu abatunga visa ey’okukora rundi ey’okwikara omu ihanga ey’ebakonyera kumanyirirwa kandi n’okutunga obugabe obumu. Kwahukanaho n’eki, abatahikiriire nibasisana n’abantu abatunga visa ey’akacu kake rundi ey’abagenyi. Abantu abo basemeriire kubanza kwoleka ngu bantu barungi batakaikirizibwe kwikara omu ihanga erihyaka. Omu mulingo nugwo gumu, abatahikiriire abaliba bahumbuukire nibaija kwetaaga kworobera ebiragiro bya Yahwe kandi booleke ngu bahikiriire kusobora kusigara omu Rugonjo Orurungi. Abantu abaija omu ihanga kababe bahairwe visa ya mulingo ki ha kubanza, abamu hanyuma y’akasumi nibasobora kufoorwa baikazi kandi abandi nibasobora kubingwa. Kusobora kwikirizibwa kwikara omu ihanga erihyaka, nikiija kusigikirra ha ngeso zaabo n’ebikorwa byabo. Omu mulingo nugwo gumu, abo abarahumbuurwa kusobora kwikara omu nsi empyaka nikiija kusigikirra ha bwesigwa bwabo kwabo hamu n’enyetwaza yabo.

Yahwe ali Ruhanga ow’okugonza kandi ow’obwinganiza. (Bir. 32:4; Zab. 33:5) Naija kwoleka engonzi ze kuraba omu kuhumbuura abahikiriire n’abatahikiriire. Baitu naija kuba nanihirramu boona kworobera endengo ze ezirukukwata ha kihikire n’ekigwire. Abo bonka abaramugonza kandi bakorobera endengo ze nibaija kwikirizibwa kugumizaamu nibaikara omu nsi empyaka.