1. Omukwenda Petero atakafiire, Yahwe akamukozesa kukora ki?

 OMUKWENDA Petero akaheereza Yahwe n’obwesigwa kumara emyaka nyingi. Yagendaga na Yesu obwakaba natebeza, nuwe yatandikireho omulimo gw’okutebeza omu bantu abaali batali Bayudaaya, kandi akaheereza h’akatebe akalemi. Omu biro by’okumalirra eby’obwomeezi bwe, Petero obuyakimanyire ngu ali haihi kufa, akaba aine omulimo omukuru ogw’okukora. Nka hagati y’omwaka 62-64 Y.A.K., Yahwe akamukozesa kuhandiika ebbaruha ibiri hati ezitumanyire nka 1 Petero na 2 Petero. Akaba nanihira ngu ebbaruha zinu niziija kukonyera Abakristaayo hanyuma y’okufa kwe.​—2 Pet. 1:​12-15.

2. Habwaki ebbaruha Petero yahandiikire zali nizetaagwa kasumi ako?

² Petero akahandiika ebbaruha zinu omu kasumi nambere Abakristaayo bagenzi be baali betuntwire habw’ebirengo bingi. (1 Pet. 1:6) Abantu ababi baali nibalengaho kuleeta enyegesa ez’ebisuba kandi ezitasemiire omu kitebe Ekikristaayo. (2 Pet. 2:​1, 2, 14) Abakristaayo abarukwikara omu Yerusalemu baakuhikirweho “empero ya byona” kandi eki kyakubaireho Abarooma obubaakuhwerekeriize orubuga oru, na yekaru y’Abayudaaya. (1 Pet. 4:7) Hataroho kugurukyagurukya, ebbaruha za Petero zikakonyera Abakristaayo kumanya ekibaali basemeriire kukora kugumira ebitalibaine baali nibarabamu n’okwetekaniriza ebirengo eby’omu kasumi ak’omumaiso. b

3. Habwaki tusemeriire kwegaho ebbaruha za Petero?

 ³ N’obukiraaba ngu ebbaruha zinu Petero akazihandiikira Abakristaayo ab’omu kyasa eky’okubanza, Yahwe akazifoora kicweka kya Baibuli. Nahabweki ebirumu naitwe nibitugasira. (Bar. 15:4) Nitwikara omu nsi nambere abantu barukukurakuraniza engeso embi, kandi nituhikwaho enyikara ezisobora kutuleetera kugumanganirwa kuheereza Yahwe. Ekirukukirayo, nitwija kuhikwaho omuhito omwingi ogurukukira ogwabaireho Yerusalemu obuyahwerekereziibwe. Ebbaruha za Petero ibiri nizitwijukya ebintu ebikuru muno. Niziija kutukonyera kwikara tulindiriire ekiro kya Yahwe, kuleka kutiina abantu, n’okweyongera kugonzangana. Ekindi, nitwija kurora omulingo abagurusi basobora kukonyera ab’oruganda na banyaanya itwe omu bitebe byabo kwikara bagumire omu by’omwoyo.

4. Nk’oku kyolekerwe omu 2 Petero 3:​3, 4, kiki ekisobora kucekya okwikiriza kwaitu?

⁴ Twetoroirwe abantu abatarukwikiririza omu bunabbi bwa Baibuli. Abarukutuhakaniza batusekereza ngu habwokuba twikaire tulindiriire empero kumara emyaka nyingi. Abantu abamu bagamba ngu teriija. (Soma 2 Petero 3:​3, 4.) Kakuba omuntu outurukutebeza, omukozi mutaahi waitu, rundi omunyabuzaale abaza ekintu nka kinu, naitwe nitusobora kutandika kugurukyagurukya. Petero akabazaaho ekintu ekisobora kutukonyera.

5. Kiki ekiratukonyera kwikara twine entekereza ey’ehikire obukirukuhika ha mpero y’ensi enu? (2 Petero 3:​8, 9)

⁵ Abamu nibasobora kutekereza ngu Yahwe akereriirwe muno kuleeta empero y’ensi enu. Ebigambo bya Petero nibisobora kutukonyera kwikara twine entekereza ey’ehikire, habwokuba nibitwijukya ngu omulingo Yahwe aroramu obwire nigwahukana ha mulingo abantu baburoramu. (Soma 2 Petero 3:​8, 9.) Hali Yahwe emyaka rukumi eri nk’ekiro kimu. Yahwe agumiisiriize habwokuba tarukugonza omuntu wena ahwerekerre. Ekiro kye obukirahika, ensi enu embi erihwaho. Mali katwine omugisa ogw’amaani kukozesa obwire obusigaireyo kutebeza abantu omu nsi yoona.

6. Nitusobora tuta kwikara tulindiriire ekiro kya Yahwe? (2 Petero 3:​11, 12)

⁶ Petero akatwekambisa ‘kutegereza’ ekiro kya Yahwe. (Soma 2 Petero 3:​11, 12.) Eki nitusobora kukikora tuta? Buli kiro tulengeho kutekerezaaho emigisa eiturayengondezaamu omu nsi empyaka. Teeramu akasisani noikya orwoya orwecumi, nolya ebyokulya ebirumu ekiriisa, notangirra abantu baawe abaafiire, kandi n’oyegesa abantu abaabaireho emyaka nyingi muno ha bunabbi bwa Baibuli obwahikiriire. Kutekerezaaho ebintu nka binu nikiija kutukonyera kwikara tulindiriire akasumi ako n’ekihika, nitukigumya ngu empero eri haihi. Habwokuba ‘tubandize kumanya ebigambo binu’ ebirukukwata ha kasumi ak’omumaiso, titurukwija ‘kuhabisibwa’ abeegesa ab’ebisuba.​—2 Pet. 3:17.

7. Okutiina abantu nikusobora kutuleetera kukora ki?

⁷ Habwokuba tukimanyire ngu ekiro kya Yahwe kiri haihi kwija, tugambira abantu amakuru amarungi. Baitu nitusobora kutiina kutebeza. Habwaki? Obwire obumu nitusobora kutiina abantu. Eki nikyo kyahikire hali Petero. Omu bwire bw’ekiro Yesu obuyacweriirwemu omusango, Petero akatiina kugamba ngu ali omu ha begeswa be kandi akaikara namwehakana n’agamba ngu tamumanyire. (Mat. 26:​69-75) Baitu Petero akahika yaleka kutiina abantu, kandi hanyuma n’obumanzi akagamba ati: “Mutalitina okutinisa kwabu, nobukwakuba okutuntura.” (1 Pet. 3:14)  Ebigambo bya Petero nibitugumya ngu naitwe nitusobora kuleka kutiina abantu.

8. Kiki ekisobora kutukonyera kuleka kutiina abantu? (1 Petero 3:15)

⁸ Kiki ekisobora kutukonyera kuleka kutiina abantu? Petero natugambira ati: “Mweze Kristo omu mitima yanyu okuba Mukama wanyu.” (Soma 1 Petero 3:15.) Kinu nikitwarramu kukiijuka ngu Yesu Kristo nuwe Mukama waitu kandi nk’oku aine amaani maingi muno. Kakuba otunga omugisa ogw’okutebeza baitu okahurra otiinire, nyaburaiwe ijuka Omukama waitu. Teeramu akasisani ali omu iguru nalema, bamalaika baingi muno bamwehingulirize. Ijuka ngu aine “obusobozi . . . omu iguru na hansi” kandi ngu ‘ali hamu naiwe ebiro byona, okuhikya obusinge bunu obubulihwaho.’ (Mat. 28:​18-20) Petero natutererra kwikara ‘twetekaniize’ ebiro byona kubazaaho enyikiriza zaitu. Wakugondeze kutebeza ha isomero, ha mulimo rundi ahandi hoona? Tekerezaaho nidi obw’osobora kukikora kandi otekanize ebyorabaza. Saba Yahwe akuhe obumanzi, kandi okigumye ngu naija kukukonyera kuleka kutiina abantu.​—Eng. 4:29.

9. Petero akalemwa ata kwoleka okugonza? (Rora ekisisani.)

⁹ Petero akeega kwoleka okugonza okutali kw’obugobya. Akaba aroho Yesu obuyagambire  ati: “Kinu nikyo kiragiro kyange, mugonzanganege, nkokunabagondeze inywe.” (Yoh. 15:12) Baitu hanyuma, okutiina kukaleetera Petero kwanga kulya n’Abakristaayo abanyamahanga. Ekintu Petero yakozere, omukwenda Paulo akakyeta ‘kwefoora’ rundi obugobya. (Bag. 2:​11-14) Petero akaikiriza obuhabuzi kandi yabuteeka omu nkora. Omu bbaruha ze zoona, akooleka ngu titusemeriire kugarukira ha kwehurra ngu nitugonza ab’oruganda na banyaanya itwe kyonka, baitu tusemeriire kwoleka okugonza omu bikorwa.

10. Kiki ekitukonyera kwoleka ab’oruganda na banyaanya itwe okugonza okutarumu bugobya? Soborra. (1 Petero 1:22)

¹⁰ Petero akagamba ngu tusemeriire “okugonzaga [ab’oruganda na banyaanya itwe] hataloho bugobya.” (Soma 1 Petero 1:22.) Okugonza kunu tukwoleka obutworobera “ebyamazima.” Binu nibitwarramu enyegesa erukugamba ngu “Ruhanga tasorora.” (Eng. 10:​34, 35) Titusobora kworobera ekiragiro kya Yesu eky’okugonza, kakuba tugonza abamu omu kitebe baitu tukasoroora abandi. Ky’amananu ngu nitusobora kugonza muno abamu kukira abandi, kandi eki na Yesu akakikora. (Yoh. 13:23; 20:2) Baitu Petero natwijukya ngu tusemeriire kugonza ab’oruganda na banyaanya itwe nka bene baitu habwokuba bali kicweka ky’eka yaitu.​—1 Pet. 2:17.

11. Kugonza abandi kuruga ha “mutima” nikitwarramu ki?

¹¹ Petero akatutererra kugonzangana kuruga ha “mutima nokugonza kwingi.” Kusigikirra ha byetoroire orukarra runu, kwoleka okugonza okwingi nikimanyisa kugonza omuntu n’obukirukuba kitanguhire. Ekyokurorraho, turakora ki kakuba ow’oruganda abaza rundi atukora ekintu ekirukusaaliza? Nikisobora kutwanguhira kutekerezaaho kuhoora enzigu omu kiikaro ky’okumwoleka okugonza. Baitu, Petero akegera hali Yesu ngu kuhoora enzigu tikisemeza Ruhanga. (Yoh. 18:​10, 11) Petero akahandiika ati: “[Mutagarurrangana] obubi obwobubi, nobukwakuba okujuma obwokujuma; baitu okundi nkabanyakusabira omugisa.” (1 Pet. 3:9) Leka okugonza okwingi kukwekambise kuba n’embabazi n’okutwaza kurungi abantu abandi, n’obubarakusaaliza.

12. (a) Kwoleka okugonza okwingi nikwija kutwekambisa kukora ki? (b) Nk’oku kyolekerwe omu vidiyo Preserve the Precious Gift of Unity, kiki eky’ocwiremu kukora?

¹² Omu bbaruha ye ey’okubanza Petero akagamba ngu twine kwoleka “okugonza kwingi muno.” Okugonza nk’oku tikugarukira ha kuswekerra ebibi bitaito baitu “nukuswekerra ebibi bingi.” (1 Pet. 4:8) Petero n’asobora kuba yaijukire isomo erirukukwata ha kuganyira Yesu eriyamwegeseze emyaka ey’enyuma. Kasumi ako Petero n’asobora kuba yatekeriize ngu kintu ky’amaani muno kuganyira mugenzi we “okuhikya emirundi musanju.” Baitu Yesu akamwegesa, otwaliremu naitwe kuganyira kuhikya ‘emirundi 77,’ ekirukumanyisa ngu kuganyira tikwine bugarukiro. (Mat. 18:​21, 22) Obukiraaba nikikugumira kuteeka omu nkora obuhabuzi bunu otahwamu amaani. Habwokuba abantu ba Yahwe boona tibahikiriire, obwire obumu kibagumira kuganyira. Baitu ekintu ekikuru ekyoine kukora hati nukwo kuganyira ow’oruganda kandi okole ekirukwetaagisa kugarraho obusinge. c

13. Habwaki nikisobora kugumira abagurusi kukonyera ab’oruganda na banyaanya itwe omu by’omwoyo?

¹³ Hanyuma ya Yesu kuhumbuuka akagambira Petero ati: “Lisa entama zange.” (Yoh. 21:17) Nitukigumya ngu Petero akaikara  naijuka ebigambo ebi. Obworaaba oli mugurusi, okimanyire ngu ebigambo binu naiwe nibikukwataho. Obwire obumu nikisobora kugumira omugurusi kutunga obwire obw’okuhikiiriza obujunanizibwa bunu. Abagurusi basemeriire kubanza kufaaho maka gaabo omu by’omubiri, omu nyehurra, n’omu by’omwoyo. Ekindi, basemeriire kutekaho ekyokurorraho ekirungi omu kutubeza, n’okutekaniza kurungi ebicweka byabo omu nsorrokano eza buli wiiki, n’enkooto. Abamu nibaheereza h’akatebe ka Hospital Liaison Committee rundi nibakonyera omu ekitongole eky’okwombeka ekirukwetwa Local Design/Construction Department. Mali baine bingi eby’okukora!

14. Kiki ekisobora kwekambisa abagurusi kurolerra igana? (1 Petero 5:​1-4)

¹⁴ Petero akatererra abagurusi bagenzi be ati: “Mulisege igana lya Ruhanga.” (Soma 1 Petero 5:​1-4.) Obworaaba n’oheereza nk’omugurusi, nitukimanya ngu ogonza ab’oruganda na banyaanya itwe kandi n’ogonza kubakonyera omu by’omwoyo. Baitu obwire obumu n’osobora kwehurra ngu oine eby’okukora bingi rundi ojwahire muno, n’otandika kutekereza ngu tosobora kuhikiiriza obujunanizibwa bunu. Kiki eky’osobora kukora? Saba Yahwe omugambire omulingo orukwehurramu. Petero akahandiika ati: “Omuntu wena obwahereza, ahereze omu mani Ruhanga agamuha.” (1 Pet. 4:11) Ab’oruganda na banyaanya itwe nibasobora kuba nibaraba omu bizibu ebitasobora kuhweraho kimu omu businge bunu. Baitu ijuka ngu Yesu Kristo “omulisa omukuru,” n’asobora kubakonyera kukira iwe. Naija kukikora hati, n’omu nsi empyaka. Ruhanga ekyarukugonza abagurusi bakole nukwo kugonza ab’oruganda na banyaanya itwe, babagarremu amaani, kandi babe ekyokurorraho hali igana.

15. Omugurusi omu akonyera ata ab’oruganda na banyaanya itwe? (Rora ekisisani.)

¹⁵ William, ow’amazire akasumi naheereza nk’omugurusi, akarora obukuru bw’okugarramu ab’oruganda amaani. Oburwaire bwa Korona obubwacwekereho, uwe n’abagurusi abandi baketeraho ekigendererwa eky’okuhikirra buli omu, omu guruupu yabo buli wiiki. N’agamba ati: “Ab’oruganda na banyaanya itwe baingi bakaba bali muka bonka, kandi kikaba nikisobora kubanguhira kwijwamu  ebitekerezo ebitahikire.” Ow’oruganda rundi munyaanya itwe obwaba aine ekizibu, William ahuliiriza kurungi nalengaho kumanya ebirukumweraliikiriza n’ebyarukwetaaga. Hanyuma aserra vidiyo rundi ekicweka kuruga ha mukura gwaitu ekyarakozesa kukonyera ow’oruganda rundi munyaanya itwe ogu. N’agamba ati: “Kasumi kanu nitwetaaga kugarramu amaani ab’oruganda kukira na kara. Tuteekamu amaani maingi kukonyera abantu kwega hali Yahwe. Omulingo nugwo gumu, tusemeriire kuteekamu amaani maingi kurolerra igana lya Yahwe, nukwo entaama ze zikaale omu mananu.”

16. Nitusobora tuta kuteeka omu nkora amasomo twegere omu bbaruha za Petero?

¹⁶ Tubalizeeho gamu ha masomo turukwega kuruga omu bbaruha ibiri eza Petero. Obundi haroho ekyoyegere ekiwakugondeze kuteeka omu nkora. Ekyokurorraho, nogonza kwongeramu amaani omu kwecumiitirizaaho emigisa eituratunga omu nsi empyaka? Oyeteriireho ekigendererwa eky’okutebeza ha isomero, ha mulimo rundi omu kutebeza okw’ahonaaho? Otekeriizeeho emiringo osobora kweyongera kwoleka ab’oruganda na banyaanya itwe okugonza kwingi muno? Abagurusi, mucwiremu kuliisa entaama za Yahwe mwegondiize kandi musemeriirwe? N’osobora kuba nokirora ngu haroho nambere osemeriire kusemezaamu. Obukiraaba nukwo kiri, otahwamu amaani. “Mukama waitu okwali wembabazi,” naija kutukonyera kusemezaamu. (1 Pet. 2:3) Petero naturaganiza ati: “Ruhanga . . . nuwe alibahikiriza, alibagumya, alibaha amani.”​—1 Pet. 5:10.

17. Kiki ekirarugamu obuturagumizaamu nituheereza Yahwe kandi tukamwikiriza kututendeka?

¹⁷ Haroho Petero obuyayehuliire ngu tasemeriire kuba omu maiso g’Omwana wa Ruhanga. (Luk. 5:8) Baitu habw’obukonyezi bwa Yahwe na Yesu, akaikara ali muhondezi wa Kristo. Ekyarugiremu, Petero akaikirizibwa “okutaha omu Bukama obwebiro nebiro obwa Mukama waitu kandi Omujuni waitu Yesu Kristo.” (2 Pet. 1:11) Mali eki kisembo kirungi! Nka Petero, obworagumizaamu n’oheereza Yahwe n’obwesigwa, kandi okaikara n’oyorobera ebiragiro bye, noija kutunga ekisembo ky’obwomeezi obutahwaho. Kandi oliheebwa “empero eyokuikiriza [kwawe], nukwo kujunwa.”​—1 Pet. 1:9.