1. Petero akehurra ata Yesu obuyamukonyiire kukwata encu nyingi?

 PETERO akaba amazire obwire bw’ekiro bwona nasoha baitu taine ekiyakwasire. Ekirukuhuniiriza, Yesu akamugambira ati: “Irra omu nziha hagati, munage ebisoha byanyu, musohe.” (Luk. 5:4) Petero akagurukyagurukya obwaraaba n’asobora kukwata encu yoona, baitu nabwo akakora Yesu ekyakaba amugambiire. Bakasoha encu nyingi obutimba bwatandika kutaaguka. Obubaarozere ekyamahano Yesu yakozere, Petero nabakaba ali nabo ‘bakahunirra.’ Petero akagamba ati: “Ndugaho; baitu ndi muntu anyakuina ebibi Mukama wange.” (Luk. 5:​6-9) Nikisobora kuba ngu Petero akehurra ngu tasemeriire kuba na Yesu.

2. Habwaki kirungi kwegaho ekyokurorraho kya Petero?

² Petero akaba ahikire​—akaba ali musaija “anyakuina ebibi.” Ebyahandiikirwe nibyoleka ngu obwire obumu yakoraga rundi yabazaaga ebintu ebiyayeijukyaga hanyuma. Naiwe obwire obumu oyehurra nka Petero? Haroho ekintu rundi engeso eyoliyo nolengaho kweyihaho? Obukiraaba nukwo kiri, kwesomesaaho ekyokurorraho kya Petero nikisobora kukugarramu amaani. Omu mulingo ki? Tekerezaaho kinu: Yahwe yakucwiremu kutahandikisa ensobi za Petero omu Baibuli, baitu akaziteekamu nukwo tusobole kuzegeraho. (2 Tim. 3:​16, 17) Kwega ha musaija onu ow’akaba aine enyehurra n’obuceke nk’obwaitu nikisobora kutukonyera kukirora ngu Yahwe tatunihirramu kuba bantu abahikiriire. Nagonza tugumizeemu nitumuheereza n’obukiraaba ngu twine obuceke.

3. Habwaki tusemeriire kugumizaamu nituheereza Yahwe n’obukiraaba ngu twine obuceke?

³ Habwaki kikuru kutahwamu amaani? Obutwikara nitukora ekintu, tweyongera kuba bakugu. Ekyokurorraho, kakuba  omuntu aba nagonza kwega kuteera enanga, nikisobora kumutwarra akasumi kugyega. Obwaba nakyayega n’asobora kukora ensobi nyingi. Baitu hanyuma nasobora kutandika kwega mporampora kandi kakuba aikara nayerengesamu afooka mukugu. Na hanyuma y’okwega kuteera kurungi enanga, n’asobora kukora ensobi. Baitu eki tikisobora kumumaramu amaani. N’asobora kugumizaamu nasemezaamu omulingo arukugiteera. Omulingo nugwo gumu, na hanyuma y’okutekereza ngu twine obuceke obutusingwire, nitusobora kugarukirra. Baitu twikara nituteekamu amaani kweyongera kusemezaamu. Itwena tukora rundi tubaza ebintu ebitweyijukya hanyuma. Baitu kakuba tutahwamu amaani, Yahwe naija kutukonyera kwikara nitusemezaamu. (1 Pet. 5:10) Leka turole omulingo Petero yagumizeemu naheereza Yahwe, n’obukiraaba ngu akaba aine obuceke. Kumanya ngu Yesu akamwoleka embabazi n’obukiraaba ngu akakora ensobi, nikisobora kutwekambisa kugumizaamu nituheereza Yahwe.

4. Nk’oku kyolekerwe omu Luka 5:​5-10, Petero akebazaaho ata, baitu Yahwe akamugumya ata?

⁴ Baibuli tetugambira habwaki Petero yayebalizeeho ‘nk’omuntu anyakwine ebibi’ rundi bibi ki ebyakaba nabazaaho. (Soma Luka 5:​5-10.) Nikisobora kuba ngu akakora ensobi ez’amaani. Yesu akaba akimanyire ngu Petero akaba atiinire habwokuba akaba nayehurra nk’omusiisi ow’amaani. Baitu Yesu akaba akimanyire ngu Petero akaba n’asobora kwikara ali mwesigwa. Nahabweki, omu mulingo ogw’embabazi Yesu akagambira Petero ati: “Otatina.” Petero akakwatwaho obwomeezi bwe bwona Yesu obuyamwolekere ngu namwesiga. Hanyuma, Petero na mugenzi we Andereya bakasigaho omulimo gwabo ogw’okusoha baayeteranizaaho Yesu. Kandi Yahwe akabaha emigisa nyingi habw’encwamu egi.​—Mar. 1:​16-18.

5. Petero akatunga migisa ki habwokutaikiriza okutiina kumulemesa kuhondera Yesu?

⁵ Petero akatunga ebirungi bingi nk’omuhondezi wa Kristo. Akarora Yesu nakiza abarwaire, nabinga daimoni kandi nahumbuura abafu. b (Mat. 8:​14-17; Mar. 5:​37, 41, 42) Ekindi, Petero akarora okwolekwa okurukuhuniiriza okurukwoleka ekitiinisa Yesu ekiyakubaire nakyo hanyuma y’okufooka Omukama w’Obukama bwa Ruhanga. (Mar. 9:​1-8; 2 Pet. 1:​16-18) Kandi Petero akaikara naijuka  okwolekwa kunu. Akarora ebintu ebyataakurozere kakuba atarafookere muhondezi wa Yesu. Hataroho kugurukyagurukya, kikamusemeza muno kukimanya ngu ataikirize obuceke bwe kumumaramu amaani, ekyamusobozeseze kutunga emigisa enu.

6. Petero akasingura obuceke bwe ahonaaho? Soborra.

⁶ N’obukiraaba ngu Petero akaba arozere kandi ahuliire ebintu bingi, akaikara narwanisa obuceke bwe. Tekerezaaho bumu halibwo. Yesu obwakaba nabazaaho omulingo akaba nagenda kubonabona kandi hanyuma afe kusobora kuhikiiriza obunabbi, Petero akalengaho kumutanga. (Mar. 8:​31-33) Emirundi nyingi, Petero n’abakwenda abandi baateeraga empaka ha n’oha arukukirayo obukuru. (Mar. 9:​33, 34) Omu bwire bw’ekiro Yesu atakafiire, Petero akatemaho omusaija okutu. (Yoh. 18:10) Ha kiro eki kyonyini, Petero akehakana munywani we Yesu emirundi esatu. (Mar. 14:​66-72) Kandi eki kikaleetera Petero kurra muno.​—Mat. 26:75.

7. Hanyuma ya Yesu kuhumbuuka, akaha Petero mugisa ki?

⁷ Yesu atecweho omukwenda onu ow’akaba ahoiremu amaani. Hanyuma y’okuhumbuuka, akaha Petero omugisa ogw’okwoleka ngu akaba nakyamugonza. Yesu akaha Petero obujunanizibwa obwokurolerra entaama ze. (Yoh. 21:​15-17) Kandi Petero akaba ayetekaniize kuhikiiriza obujunanizibwa obu. Akaba ali omu hali abo abaabandize kuseswaho omwoyo ogurukwera ha kiro kya Pentekote omu Yerusalemu.

8. Nsobi ki ey’amaani Petero eiyakozere obwaka ali Antyokiya?

⁸ Na hanyuma y’okufooka Omukristaayo ow’aseserweho amagita, Petero akagumizaamu narwanisa obuceke bwe. Omu mwaka 36 Y.A.K., Petero akaba aroho Koruneryo ow’akaba atali Muyudaaya obuyaseserweho omwoyo ogurukwera, ekyayolekere ngu “Ruhanga tasorora” kandi ngu abantu abakaba batali Bayudaaya baali nibasobora kuba omu kitebe Ekikristaayo. (Eng. 10:​34, 44, 45) Hanyuma, Petero akatandika kulya n’abanyamahanga ekintu ekyakaba atasobora kukora omu bwire bw’enyuma. (Bag. 2:12) Bamu h’Abakristaayo Abayudaaya baatekerezaaga ngu tibasemeriire kulya n’Abakristaayo abanyamahanga. Bamu h’Abakristaayo abaali baine entekereza enu obubaizire omu Antyokiya, Petero akaleka kulya n’Abakristaayo abanyamahanga. Kinu n’asobora kuba yakikozere kutabiihiza Abakristaayo Abayudaaya. Omukwenda Paulo akarora obugobya bunu kandi akamuhana omu maiso g’abantu baingi. (Bag. 2:​13, 14) N’obukiraaba ngu akagarukirra, Petero atahwemu amaani. Kiki ekyamukonyiire?

9. Kusigikirra ha Yohana 6:​68, 69, Petero akooleka ata ngu mwesigwa hali Yesu?

⁹ Petero akaba ali mwesigwa, ataikirize ekintu kyona kumulemesa kugumizaamu nahondera Yesu. Ekyokurorraho, haroho akasumi Yesu obuyabalize ekintu kandi abegeswa be batakyetegereze. (Soma Yohana 6:​68, 69.) Baingi omulibo bakaleka kuhondera Yesu kandi batamulinde kusoborra ekyakaba namanyisa. Baitu eki Petero atakikole, akaba ali mwesigwa kandi akagamba ngu Yesu nuwe wenka aine “ebigambo ebyobwomezi obutahwaho.”

10. Yesu akooleka ata ngu nayesiga Petero? (Rora ekisisani.)

¹⁰ Yesu atalekeho Petero. Ha kiro kye eky’okumalirra omu nsi, Yesu akaba akimanyire ngu Petero n’abakwenda abandi baakumulekereho. Baitu Yesu akaba nakigumya ngu Petero naija kugaruka amuhondere, kandi aikale  ali mwesigwa. (Luk. 22:​31, 32) Yesu akakyetegereza ngu “omutima nugwo gurukugonza mali, baitu omubiri mugara.” (Mar. 14:38) Na hanyuma ya Petero kumwehakana, Yesu atamulekeho. Hanyuma ya Yesu kuhumbuuka, akabonekera Petero ow’akaba n’asobora kuba akaba ali wenka. (Mar. 16:7; Luk. 24:34; 1 Kol. 15:5) Mali eki nikisobora kuba kyagarwiremu muno Petero amaani!

11. Yesu akagumya ata Petero ngu Yahwe yakumusagikire?

¹¹ Yesu akagumya Petero ngu Yahwe yakumusagikire. Hanyuma ya Yesu kuhumbuuka, omu mulingo ogw’ekyamahano akakonyera Petero n’abakwenda abandi kukwata encu nyingi. (Yoh. 21:​4-6) Hataroho kugurukyagurukya, ekyamahano kinu kikakonyera Petero kukigumya ngu Yahwe akaba naija kumurolerra. Obundi omukwenda onu akaijuka ebigambo bya Yesu ebirukwoleka ngu Yahwe akaba naija kurolerra abo boona ‘ababanza kuserra Obukama.’ (Mat. 6:33) Eki kikakonyera Petero kwebembeza obuheereza bwe hatali omulimo gwe ogw’okusoha. N’obumanzi, akaha obwakaiso ha kiro kya Pentekote 33 Y.A.K., ekyakonyiire abantu baingi kwikiriza amakuru amarungi. (Eng. 2:​14, 37-41) Kandi hanyuma akakonyera Abasamaliya n’Abanyamahanga kwikiriza Kristo. (Eng. 8:​14-17; 10:​44-48) Yahwe akakozesa Petero kukonyera abantu baingi kufooka Abakristaayo.

12. Ekyokurorraho kya Petero nikisobora kutukonyera kita obuturukuba niturwanisa obuceke?

¹² Yahwe n’asobora kutukonyera kugumizaamu nitumuheereza. Nikisobora kutatwanguhira kukira muno obutuba twine obuceke obutwikaire niturwanisa kumara akasumi. Obwire obumu obuceke bwaitu nibusobora kuzooka nk’oburukukira obwa Petero. Baitu Yahwe n’asobora kutuha amaani kugumizaamu nitumuheereza. (Zab. 94:​17-19) Ekyokurorraho, ow’oruganda omu obwakaba atakegere amananu, akejumbira omu bikorwa eby’obukuuhya kumara akasumi. Akakora empindahinduka omu bwomeezi bwe kandi yatandika kugendera ha Baibuli eby’eyegesa. Baitu obwire obumu yatalibanizibwaga okwegomba kunu okubi. Kiki ekyamukonyiire kutagarukirra? N’agamba ati: “Yahwe atuha amaani. Habwokuba Yahwe nampa omwoyo ogurukwera . . . , nkyetegeriize ngu nikisoboka kugumizaamu nimmuheereza . . . Yahwe asoboire kunkozesa kandi n’obukiraaba ngu timpikiriire, agumizaamu nampa amaani.”

13. Nitusobora tuta kwegera ha kyokurorraho kya Petero ekiri omu Engeso Ezabakwenda 4:​13, 29, 31? (Rora ekisisani.)

 ¹³ Nk’oku turozere, Petero akakora ensobi ez’amaani habwokuba akaba natiina abantu. Baitu habwokuba akasaba obumanzi, kikamukonyera kuleka kutiina. (Soma Engeso Ezabakwenda 4:​13, 29, 31.) Naitwe nitusobora kuleka kutiina. Tekerezaaho ekyahikire ha Horst, ow’oruganda omuto ayaikaraga omu Nazi Germany. Kasumi ako, abantu baaragirwaga kuramukya nibagamba ngu “Hitler naija kutujuna.” N’obukiraaba ngu Horst akaba akimanyire ngu kibi kubaza ebigambo binu, obwire obumu yabibazaaga habw’okutiina abegesa n’abeegi bataahi be. Omu kiikaro ky’abazaire be kumutabukira, bakasaba hamu nauwe kandi baasaba Yahwe amuhe obumanzi. Habw’obukonyezi bw’abazaire be n’okwesiga Yahwe, Horst akatunga obumanzi bw’okwikara ali mwesigwa. Kandi hanyuma akagamba ati: “Mali Yahwe akankonyera.” c

14. Abagurusi nibasobora bata kugumya abahoirwemu amaani?

¹⁴ Yahwe na Yesu tibarukwija kutulekaho. Hanyuma ya Petero kwehakana Kristo, akaba aine kukora encwamu ey’amaani. Yakulekere kuhondera Kristo rundi yakugumiizeemu ali mwegeswa we? Yesu akaba asabire Yahwe akonyere Petero nukwo okwikiriza kwe kutaceka. Yesu akagambira Petero ha saara egi kandi yamugambira ngu akaba naija kugarramu abegeswa abandi amaani. (Luk. 22:​31, 32) Mali nikisobora kuba kyagumize muno Petero kwijuka ebigambo bya Yesu binu! Obutuba twine encwamu ey’amaani ey’okukora, Yahwe n’asobora kukozesa abagurusi kutuha obuhabuzi oburatukonyera kwikara tuli besigwa. (Bef.  4:​8, 11) Paul, ow’amazire akasumi naheereza nk’omugurusi omu kitebe, eki nikyo alengaho kukora. Asaba abahoirwemu amaani kwecumiitirizaaho omulingo Yahwe yabalesere omu mananu. Hanyuma, abagumya ngu Yahwe tarukwija kubalekaho habwokuba abainiire okugonza okutahwaho. N’agamba ati: “Ndozere baingi abahoirwemu amaani nibagumizaamu kuheereza Yahwe habw’obukonyezi bwe.”

15. Ekyokurorraho kya Petero n’Ow’oruganda Horst nibyoleka bita ngu ebigambo ebiri omu Matayo 6:33 bihikire?

¹⁵ Nk’oku Yahwe yaroleriire Petero n’abakwenda abandi, naitwe naija kuturolerra kakuba twebembeza kumuheereza. (Mat. 6:33) Hanyuma y’Obulemu obw’Ensi Yoona II, Horst, outusangirwe tubalizeeho, akatekerezaaho kuheereza nka payoniya. Akaba ali munaku muno, kandi atarukukigumya obwaraaba n’asobora kutunga sente eziramukonyera kakuba atandika kuheereza nka payoniya. Kiki ekiyakozere? Akacwamu kwesiga Yahwe, yamara wiiki yoona ey’omuroleerezi omu buheereza. Hakumalirra kwa wiiki egi akahunirra muno omuroleerezi w’ekicweka obuyamuhaire ebbahaasa ey’erumu sente, kandi atamugambire nambere zarugire. Ebbahaasa egi ekaba erumu sente ezakumukonyiire kugumizaamu naheereza nka payoniya kumara ameezi. Horst akarora ekisembo kinu nk’ekintu ekirukwoleka ngu Yahwe akaba naija kumurolerra. Kandi akamara obwomeezi bwe bwona nayebembeza Obukama.​—Mara. 3:10.

16. Habwaki ekyokurorraho kya Petero n’ebbaruha ze ibiri nibitugasira?

¹⁶ Mali nikisobora kuba kyasemiize muno Petero ngu Yesu atamusigeho nk’oku uwe akaba agambire! Kristo akagumizaamu natendeka Petero kuba omukwenda omwesigwa kandi ekyokurorraho hali Abakristaayo. Kandi itwena nitwega bingi omu kutendeka oku. Petero akabazaaho amasomo turukwega omu bbaruha ze ibiri eziyahandikiire ebitebe omu kyasa eky’okubanza. Ekicweka ekirukwongeraho nikiija kubazaaho gamu h’amasomo ganu n’omulingo tusobora kugateeka omu nkora kasumi kanu.