1, 2. (a) Empindahinduka eziija bwangu bwangu omu bwomeezi nizisobora kutukwataho zita? (Rora ekisisani ekiri ha rupapura 22.) (b) Kusigikirra ha Zabuli 131, kiki ekisobora kutukonyera kuba n’obusinge omu bitekerezo byaitu?

HANYUMA ya Lloyd na Alexandra kumara emyaka 25 nibaheereza ha Beseeri, bakasindikwa kugenda kuheereza omu buheereza. Ha kubanza, ekintu kinu kikababiihiza. Lloyd nagamba ngu: “Nkehurra ngu Beseeri n’omulimo nakorayoga bikaba bifokere kicweka ky’obwomeezi bwange. Nkasiima empindahinduka enu omu bitekerezo byange baitu wiiki n’ameezi agayongiireho nkehurra nk’owakaba anagiriziibwe.” Obwire obumu, Lloyd yayehurraga kurungi ha mpindahinduka enu kandi obwire obundi yamuleteraga kwenuuba.

² Obwire obumu n’obumu tutunga empindahinduka ezituba tutarukunihira kandi nizisobora kutuletera kwetuntura muno n’okweralikirra. (Enfumo 12:25) Kakuba kitugumira kwikiriza rundi kugendera ha mpindahinduka, kiki ekisobora kutukonyera kwikara  tutekaine? (Soma Zabuli 131:1-3.) Katurole ekyakonyire abaheereza ba Yahwe ab’omu busumi bwa kara n’ab’omu kasumi kanu kuba n’obusinge omu bitekerezo byabo, obwomeezi bwabo n’obuburaaba bwahindukire omu bwangu bwangu.

3. Obwomeezi bwa Yusufu bukahinduka buta omu bwangu?

³ Tekerezaho ekyokurorraho kya Yusufu. Yakobo yakiraga kugonza muno Yusufu omu batabani be boona. Ekintu kinu kikaletera bagenzi be kukwatwa ihali. Yusufu obwakaba aine emyaka 17, bagenzi be bakamutunda nk’omwiru. (Okubanza 37:2-4, 23-28) Akamara emyaka nka 13 nabonabonera omu ihanga lya Misiri, ha kubanza akakora nk’omwiru, kandi hanyuma bakamuta omu nkomo. Yusufu akaba ali hara muno na ise ou yagonzaga muno. Ekintu kinu kikaba nikisobora kumuletera kuhwamu okunihira kwona, n’okukwatwa ekiniga, baitu tali nukwo kyabaire. Kiki ekyamukonyire?

4. (a) Yusufu akakora ki obwakaba ali omu nkomo? (b) Yusufu obuyasabire Yahwe, esaara ze zikagarukwamu zita?

⁴ Yusufu obwakaba aliyo nabonabona omu nkomo, ebitekerezo bye aine kuba yabitaire ha mulingo Yahwe akaba namukonyera. (Okubanza 39:21; Zabuli 105:17-19) Kandi nasobora kuba yatekeriizeho ebirooto ebikaba birumu obunabbi ebiyatungire obwakaba akyali muto, kyamuletera kugumya ngu Yahwe akaba ali nauwe. (Okubanza 37:5-11) Nasobora kuba yasabire Yahwe emirundi nyingi yamugambira byona ebikaba bimuli ha mutima. (Zabuli 145:18) Kandi Yahwe akagarukamu esaara za Yusufu kuraba omu kumugumya ngu naija kwikara “nauwe” n’obuharabaho ki.​—Engeso Ezabakwenda 7:9, 10. * (Rora obugambo obuli hansi.)

5. ‘Obusinge bwa Ruhanga’ nibusobora kutukonyera buta kweyongera kuheereza Yahwe?

⁵ Ekizibu kyaitu n’obukyakuba kigumire muno, nitusobora kuba “nobusinge bwa Ruhanga” obulinda ‘ebitekerezo byaitu’ nibutuletera kwehurra tutekaine. (Soma Abafiripi 4:6, 7.) Kakuba tuhurra twetuntwiire kandi tweralikiriire, ‘obusinge bwa Ruhanga’ nibusobora kutuha amaani ag’okweyongera kuheereza Yahwe tutalekere. Katurole ebyokurorraho by’ab’oruganda n’abanyaanya itwe omu kasumi kanu abanyakukonyiirwe obusinge bwa Ruhanga.

6, 7. Esaara zaitu nizisobora kutukonyera zita kuba n’obusinge omu bitekerezo? Ha ekyokurorraho.

⁶ Ryan na Juliette obubamanyire ngu bakaba batakyagenda kweyongerayo kuheereza nk’abapayoniya ab’embaganiza, bakahwamu amaani. Ryan nagamba ati: “Ekintu kinu tukakigambira Yahwe omu kusaba. Kandi tukakirora nk’omugisa gw’embaganiza kwoleka Yahwe ngu nitumwesiga. Abarukukira obwingi omu kitebe kyaitu bakaba bahyaka omu mananu, nahabweki tukasaba Yahwe atukonyere tubatereho ekyokurorraho kirungi eky’okwikiriza.”

⁷ Yahwe akagarukamu ata esaara yabo? Ryan nagamba ati: “Obutukaba nitukyamara tuti kusaba, enyehurra eri embi n’okwetuntura ebitukaba twine bikahwaho. Obusinge bwa Ruhanga bukalinda emitima yaitu n’ebitekerezo byaitu. Tukakirora ngu Yahwe akaba nasobora  kwongera kutukozesa obutwakwikaire twine entekereza enungi.”

8-10. (a) Omwoyo gwa Ruhanga nigusobora kutukonyera guta obuturukuba twetuntwire? (b) Yahwe nasobora kutukonyera ata kakuba omutima gwaitu tuguta ha kumuheereza?

⁸ Omwoyo gwa Ruhanga nigusobora kutuletera kutekaana kandi nigusobora kutukonyera kutunga enkarra kuruga omu Kigambo kya Ruhanga ezisobora kutukonyera kwetegereza ekintu ekirukukirayo obukuru omu bwomeezi. (Soma Yohana 14:26, 27.) Tekerezaho ekyokurorraho kya Philip na mukazi we Mary, abaamazire emyaka 25 nibaheereza ha Beseeri. Omu meezi ana gonka, boona bakafeerwa banyinabo, omusaija akafeerwa omunyabuzaale we, kandi bakaba baine kurolerra ise Mary ow’akaba aine oburwaire obw’obwongo.

⁹ Philip nagamba ati: “Natekerezaaga ngu ebizibu binu ndiyo nimbigumisiriza, baitu haroho ekintu ekinkaba nimburwaho. Nkasanga ekyahandiikirwe eky’omu Abakolosai 1:11 omu Omunaara gw’Omulinzi ogw’okwega. Mananu ngu nkaba ningumisiriza, baitu nkaba ntarukugumisiriza omu bwijwire. Kikaba nikinyetagisa ‘kugumisiriza nyine okusemererwa.’ Ekyahandiikirwe kinu kikanyoleka ngu okusemererwa kwange kukaba kutasemeriire kusigikirra ha nyinkara ei ndumu baitu kukaba kusemeriire kusigikirra ha mulingo omwoyo gwa Ruhanga gukaba nigunkonyera omu bwomeezi bwange.”

¹⁰ Habwokuba Philip na mukazi we Mary bakata omutima gwabo ha kuheereza Yahwe, akabaha emigisa nyingi. Obuharabireho obwire buke barugire ha Beseeri, boona bakatunga abeegi ba Baibuli abaakurakuraine kandi abagonzaaga kwega emirundi nyingi omu wiiki emu. Mary nagamba: “Bakatuletera okusemererwa kandi gunu gwali mulingo Yahwe yatugambiraga ngu buli kimu nikiija kuba kurungi.”

11, 12. (a) Yusufu akakora bintu ki ebyaletiire Yahwe kumuha omugisa? (b) Yahwe akaha Yusufu mugisa ki?

¹¹ Kakuba obwomeezi bweyongera kuguma, nitusobora kwesanga nitwikara twetuntwire kandi nitwikara nitutekereza ha bizibu byaitu byonka. Yusufu nauwe akubaire ahikirweho ekintu kya mulingo gunu. Baitu akacwamu kukora kyona ekyakaba nasobora kusigikirra omu nyikara eyakaba arumu. Nk’oku Yusufu yayekambire kukorra Potifa, nobwakaba ali omu nkomo akakora kyona omulinzi w’enju ey’enkomo yamuragiraga kukora.​—Okubanza 39:21-23.

¹² Kiro kimu, Yusufu akahebwa obujunanizibwa bw’okurolerra abanyakomo babiri abakaba bakozereho omu kikaali kya Faraho. Yusufu akabooleka embabazi kyaletera abasaija banu  kumugambira ebizibu byabo n’ebiroto ebibaarosere ebyabatuntwize muno. (Okubanza 40:5-8) Omu bwire obu, Yusufu akaba atakakimanyire ngu orubazo rwabo oru rukaba nirugenda kumurugiramu obugabe. Hakarabaho emyaka ebiri bamulekera kandi yafooka mulemi w’amaani muno omu ihanga lya Misiri. Faraho wenka nuwe akaba namukira obusobozi omu ihanga lyona!​—Okubanza 41:1, 14-16, 39-41.

13. Omu nyikara yoona ei turukuba turumu, kiki ekitusobora kukora kurora Yahwe yatuha omugisa?

¹³ Nka Yusufu, naitwe nitusobora kwesanga tuli omu nyikara ei tutasobora kuhindura. Baitu kakuba tugumisiriza kandi tukakora kyona ekiturukwetagisibwa, Yahwe naija kutuha emigisa. (Zabuli 37:5) N’obutwakwehurra tusobiirwe kandi twetuntwire, titusobora ‘kufunzibwa’ rundi titusobora “kutunturra kimu.” (2 Abakolinso 4:8) Yahwe naija kuba naitwe kukira muno obuturaaba tutanagiriize obuheereza bwaitu.

14-16. Firipo omugambizi ow’enjiri akaikaza ata omutima gwe ha buheereza n’obuyatungire empindukahinduka omu bwomeezi bwe?

¹⁴ Firipo omugambizi w’enjiri akaba ali kyokurorraho kirungi eky’omuntu atarahugukire kuleka obuheereza bwe omu nyikara yoona ei yayesangiremu. Haroho akasumi obwakaba nayegondeza omu buheereza bwe omu Yerusalemu. (Engeso Ezabakwenda 6:1-6) Baitu ebintu bikamuhindukaho. Hanyuma y’okwitwa kwa Stefano, Abakristaayo bakatandika kuhiganizibwa muno, kandi bakairuka baruga omu Yerusalemu. Habwokuba Firipo akaba nagonza kwikara naheereza Yahwe, akagenda omu rubuga rwa Samaliya nambere abantu bakaba nibagonza kuhurra amakuru amarungi.​—Matayo 10:5; Engeso Ezabakwenda 8:1, 5.

¹⁵ Firipo akaba ayetegekere kugenda hona hona nambere omwoyo gwa Ruhanga gwamuragiraga kugenda. Nahabweki Yahwe akamukozesa kutebeza n’omu biikaro nambere abantu bakaba batakahurrahoga amakuru amarungi. Abayudaaya baingi bagayaaga Abasamaliya kandi babatwazaaga kubi. Baitu Firipo uwe atabasoroole, oihireho akaba aine ekihika ky’okubatebeza amakuru amarungi. Kandi Abasamaliya bakamuhuliiriza “nomutima gumu”!​—Engeso Ezabakwenda 8:6-8.

¹⁶ Hanyuma, omwoyo gwa Ruhanga gukebembera Firipo kugenda kutebeza omu bibuga by’omu Azoto na Kaisaliya, nambere hakaba hali Abamahanga baingi. (Engeso Ezabakwenda 8:39, 40) Obwomeezi bwa Firipo bukongera bwahinduka. Akatunga eka kandi yacwamu kwikara omu kiikaro kimu. Baitu n’obukiraaba ngu obwomeezi bwa Firipo bukabamu empindukahinduka nyingi, akaikara nayekambira obuheereza bwe, kandi Yahwe  akaikara namuha emigisa, uwe hamu n’eka ye.​—Engeso Ezabakwenda 21:8, 9.

17, 18. Kakuba tutunga empindahinduka omu bwomeezi, kwekambira obuheereza nikisobora kutukonyera omu mulingo ki?

¹⁷ Baingi abali omu buheereza obw’akasumi koona nibagamba ngu kwekambira obuheereza kibakonyera kwikara baine okusemererwa n’entekereza enungi enyikara yabo n’obwehinduka. Ekyokurorraho, Osborne na mukazi we Polite ab’omu ihanga lya South Africa obubarugire ha Beseeri, baali nibatekereza ngu kirayanguha kutunga ahokwikara n’omulimo ogw’okukora esaaha nke. Baitu Osborne nagamba ngu: “Eky’obusaasi, tutasobole kutunga omulimo bwangu nk’oku tukaba tutekeriize.” Polite uwe nagamba ati: “Tukamara ameezi asatu tutakatungaga omulimo, kandi tukaba tutaine akasente koona akatwali twahwire. Obwomeezi bukatugumira.”

¹⁸ Kiki ekyakonyire Osborne na Polite omu nyikara yabo enu? Osborne nagamba ati: “Kwetaba omu mulimo ogw’okutebeza hamu n’ekitebe kikatukonyera kurora ngu titwahuguka kandi twaikara nitutekereza ha bintu ebirungi.” Omu kiikaro ky’okwikarra bwikarra omu ka tweralikiriire, tukacwamu kwekambira obuheereza. Ekintu kinu kikabaletera okusemererwa kwingi! Kandi Osborne nayongera kugamba ati: “Tukaserra emirimo hona hona kandi hakumalirra tukagutunga.”

19-21. (a) Kiki ekirukwija kutukonyera kwikara twine obusinge omu bitekerezo byaitu? (b) Nitusobora kugasirwa tuta kakuba tugendera ha mpindahinduka ei turukuba tutarukunihira?

¹⁹ Nk’oku turozere, kakuba twekamba kandi tukesigira kimu Yahwe, nitwija kusobora kusigara twine obusinge omu bitekerezo n’obuturahikwaho enyikara ya buli mulingo gwona. (Soma Mika 7:7.) Obwire nibusobora kuhika niturora ngu omulingo twetwaize obuhabaireho empindahinduka kitukonyire kwongera kugumya obunywani bwaitu na Yahwe. Polite nagamba ngu kuruga ha Beseri kugaruka omu buheereza kimukonyire kwetegereza ekikirukumanyisa kwesiga Yahwe n’omu bwire obwomeezi burukuba bugumire muno. Nagamba  ati: “Enkoragana yange na Yahwe eyeyongiire kuguma.”

²⁰ Mary, ou tusangirwe tubalizeho na hati nakyarolerra ise ow’akuzire omu myaka kandi nakyaheereza nka payoniya. Nagamba ati: “Nkyetegeriize ngu obundayetunturaga, ninyija kubanzaga kuleka okweralikirra, ninsaba Yahwe, kandi nindengaho kutekana. Kuleka ensonga omu mikono ya Yahwe niryo isomo erikuru erinkizire kwega, kandi isomo linu niriija kwikara liri likuru n’omu busumi obw’omu maiso.”

²¹ Lloyd na Alexandra nibagamba ngu empindahinduka zinu zikalenga okwikiriza kwabo omu miringo ei bakaba batarukunihira. Baitu nibagamba ngu okulengwa kunu kubakonyire. Hati nibarora ngu okwikiriza kwabo kugumire, nikusobora kubahuumuza obubarukuba baine ebizibu, kandi ngu beyongiire kufooka bantu barungi.

22. Obuturakora kyona ekirukusoboka kugendera ha nyikara ei turumu, kiki ekirukwija kubaho?

²² Omu businge bunu, enyikara y’obwomeezi nesobora kuhinduka omu bwangu. Nitusobora kutunga obujunanizibwa obundi omu kuheereza Yahwe, kurwara, rundi nitusobora kwesanga twine kurolerra eka yaitu omu mulingo omuhyaka. Baitu kyona kyona ekiraabaho, okigumye ngu Yahwe nakufaaho kandi naija kukukonyera omu bwire bwonyini obw’orukuba nomwetaga. (Abaheburaniya 4:16; 1 Petero 5:6, 7) Nahabweki omu nyikara yoona ey’orayesangamu omu kasumi kanu, kora kyona eky’orukusobora n’amaani gaawe. Saba Yahwe, Isiitwe ow’omu iguru, kandi oyemanyiize kumwesigira kimu. Obworakora kinu, enyikara yaawe n’obwerahinduka eta, noija kwikaraga oine obusinge oburuga hali Yahwe omu bitekerezo byawe.