1, 2. (a) Mulimo ki ogukaba guli mukuru omu bwomeezi bwa Yesu, kandi habwaki? (b) Nk’oku “tuli abakozi hamu na Ruhanga,” kiki ekitusemeriire kukora kurora twaba basinguzi omu buheereza?

YESU KRISTO akaba ali mubaizi kandi hanyuma akafooka mwegesa. (Marako 6:3; Yohana 13:13) Emirimo enu yona akagikora kurungi muno. Nk’omubaizi, akega kukozesa kurungi ebikwato bye kukora ebintu ebirungi kuruga omu mbbaaho. Kandi nk’omwegesa, akakozesa Ebyahandikirwe kukonyera abantu aba buli kiro kwetegereza amananu agali omu Kigambo kya Ruhanga. (Matayo 7:28; Luka 24:32, 45) Obuyahikize emyaka 30, akaleka kukora nk’omubaizi yafoka omwegesa habwokuba akaba akimanyire ngu gunu nugwo omulimo ogurukukirayo obukuru ogusemeriire kukorwa. Akagamba ngu kutebeza amakuru amarungi ag’Obukama bwa Ruhanga ekaba emu ha nsonga habwaki Ruhanga yamutumire kwija omu nsi. (Matayo 20:28; Luka 3:23; 4:43) Yesu akakozesa obwomeezi bwe kutebeza amakuru amarungi kandi akaba nagonza n’abantu abandi kukora ekintu nikyo kimu.​—Matayo 9:35-38.

² Abaingi omulitwe tituli babaizi, baitu itwena tuli begesa habwokuba twegesa amakuru amarungi. Omulimo gunu mukuru muno habwokuba na Ruhanga agurumu. Amananu gali, “tuli bakozi hamu na Ruhanga.” (1 Abakolinso 3:9; 2 Abakolinso 6:4) Nitwikirraniza n’omuhandiki wa Zabuli ayagambire ngu: “Ekigambo kyawe kyona mazima.” (Zabuli 119:159, 160) Ekigambo kya Yahwe nugo mananu.  Egi niyo ensonga habwaki nitugonza kurora ngu ‘twasoborra kurungi ekigambo ky’amazima’ obuturukuba tuli omu buheereza. (Soma 2 Timoseo 2:15.) Nahabweki twikara nitulengaho kuba bantu abarukukozesa kurungi Baibuli, nk’ekikwato kyaitu ekirukukirayo ekitukozesa omu kwegesa abandi hali Yahwe, Yesu, hamu n’Obukama bwa Ruhanga. Ekitebe kya Yahwe kituhaire ebintu eby’okukozesa kwegesa, kandi twine kumanya omulingo ogw’okubikozesaamu, nukwo kitukonyere kukora kurungi omu buheereza. Ebintu binu nibyo Bikwato eby’Okukozesa Kwegesa.

3. Kintu ki ekitusemeriire kutekaho omutima omu buheereza, kandi kusigikirra ha Engeso Ezabakwenda 13:48 bantu ba mulingo ki abatusemeriire kuserra?

³ Nosobora kuba noyekaguza habwaki nitubyeta Bikwato eby’Okukozesa Kwegesa omu kiikaro ky’obubyeta Ebikwato Ebitukozesa Omu Kutebeza. Ensonga eri habwokuba “okutebeza” kimanyisa kurangirra obutumwa baitu okwegesa kimanyisa kusoborra omuntu obutumwa bwahuliire akabwetegereza kandi kikamuletera kuteka omu nkora ebyayegere. Omu bwire obutaito obusigaireyo ensi enu embi ehweho, omutima tusemeriire kuguta ha kutandika abeegi ba Baibuli n’okwegesa abantu amananu nukwo basobole kufooka abegeswa ba Kristo. Kinu nikimanyisa ngu tusemeriire kwekamba kuserra abo boona ‘abaine entekereza enungi ey’esobora kubaletera kutunga obwomeezi butahwaho’ n’okubakonyera kutandika kuheereza Yahwe.​—Soma Engeso Ezabakwenda 13:44-47, 48 * rora obugambo obuli hansi.

4. Nitusobora tuta kutunga abo abaine entekereza enungi ey’esobora kubaletera kutunga obwomeezi obutahwaho?

⁴ Nitusobora tuta kumanya abo abaine ‘entekereza enungi ey’esobora kubaletera kutunga obwomeezi obutahwaho’? Hali Abakristaayo abaabandize, kutebeza nugwo gukaba mulingo gumu gwonka ogw’okutungamu abantu ab’omulingo gunu. Yesu akagambira abegeswa be ngu: “Orubuga rwona nambere muratahamuga, rundi [ekyaro] kyona, muserrege noha omuli abo asemera.” (Matayo 10:11) Naitwe twine kukora ekintu nikyo kimu omu kasumi kanu. Tukimanyire ngu abantu abatatubaliza amananu, ab’emyehembo, rundi abatarukugonza Ruhanga, tibagonza kuhuliiriza amakuru amarungi. Tuserre abantu abarukubaza amananu, abebundaazi, kandi abarukugonza kutunga amananu. Omulimo gwaitu ogw’okuserra abantu nitusobora kugulengesaniza n’omulimo Yesu akaba aine kukora obwakaba akyali mubaizi. Atakakozere orwigi, ekikoligo, rundi ekintu kindi kyona ekyakaba asemeriire kukora, yabanzaga kuserra embbaho ezisemeriire. Hanyuma yakozesaga ebikwato bye n’obukugu bwe kukora ekintu ekyarukwenda. Nikyo kimu n’omu kasumi kanu, tusemeriire kubanza kuserra abantu abarukugonza kuhuliriza, nukwo hanyuma tukozese ebikwato byaitu, n’obukugu bwaitu kubakonyera kufooka abegeswa.​—Matayo 28:19, 20.

5. Kintu ki ekitusemeriire kumanya ekirukukwata ha Bikwato Byaitu eby’Okwegesa? Kozesa ekyokurorraho. (Rora obugambo obuli hansi.)

⁵ Buli kikwato kyaitu kiine omugaso ogukikoliirwe. Ekyokurorraho, tekerezaaho ebikwato Yesu yakozesaga nk’omubaizi. * (Rora obugambo obuli hansi.) Akaba nayetagisa ebikwato eby’okumukonyera kupima, kutekaho elaama, kusara, kudubura, kubaija, kuterekereza, hamu n’okuteraniza embbaho. Nikyo kimu n’ebikwato byaitu, buli kimu kiine omulimo ogukikora. Nahabweki  leka turole omulingo tusobora kukozesa ebikwato binu ebikuru.

6, 7. (a) Okozeseze ota kaadi ezirukuragirra abantu kugenda ha mukura gwaitu? (b) Habwaki tukozesa kaadi ez’okuraaliza abantu kwija omu nsorrokano?

⁶ Kaadi Erukuragirra Abantu Ha Mukura Gwaitu. Kaadi zinu ntaito baitu kikwato ekirukutusoborraho kandi nizisobora kuragirra omuntu kugenda ha mukura gwaitu ogwa jw.org. Ha mukura gunu naija kusangaho ebirukutukwataho kandi nasobora n’okusaba kwega Baibuli. Abantu abarukuhingura omu 400,000 nubo baakasaba kwegesebwa Baibuli kurabira ha mukura gwaitu ogwa jw.org kandi buli kiro haroho n’abandi baingi abasaba kwegesebwa! Nosobora kwikara oine kaadi nke ez’okukozesa kubaza n’abantu abooratangaana.

⁷ Kaadi ey’Okuraaliza Abantu Kwija Omu Nso’rokano. Kaadi ey’okuraliza abantu omu nso’rokano ehandikirweho ngu: “Notangirirwa kwega Baibuli n’Abakaiso ba Yahwe.” Hanyuma kaadi enu neyongera nesoborra ngu kinu nosobora kukikora kakuba oija “omu nso’rokano zaabu” rundi oyega “n’omu hali bo.” Nahabweki, kaadi enu negambira abantu ekituli kandi eraliza abo “abarukumanya eby’etaago byabo eby’omwoyo” kwija kwega Baibuli naitwe. (Matayo 5:3) Ky’amananu ngu abantu nibaralizibwa kwija omu nso’rokano zaitu kababe baikiriize kwega Baibul naitwe rundi bataikiriize. Obubaija omu nso’rokano zaitu, nubwo barora ngu haroho bingi ebibasobora kwega kuruga omu Baibuli.

8. Habwaki kikuru abantu kwija omu nso’rokano haakire omurundi gumu? Ha ekyokurorraho.

⁸ Kikuru muno kwikara nituraaliza abantu kwija omu nso’rokano zaitu haakire omuntu n’obwaraija omurundi gumu. Habwaki? Habw’okuba kakuba aija, naija kurora ngu Abakaiso ba Yahwe begesa amananu kuruga omu Baibuli kandi nibakonyera abantu kumanya Ruhanga, ekintu ediini ez’ebisuba zitakora. (Isaya 65:13) Ekyokurorraho, emyaka enyakurabireho enyuma Ray na mukazi we Linda ab’omu ihanga lya Amerika bakarora enyahukana enu. Bakaba nibaikiririza omuli Ruhanga kandi bakaba nibagonza kweyongera kumumanya kurungi. Nahabweki bakabungira amakanisa goona agakaba gali omu rubuga rwabo kandi bakaba baine ebintu bibiri ebibakaba nibagonza kurora omu diini batakagyeteranizeeho. Eky’okubanza, bakaba baine kugira ekibayega omu kanisa egi, kandi ekyakabiri, abantu abali omu kanisa egi bakaba basemeriire kujwara nk’abantu abarukugamba ngu nibaramya Ruhanga. Kikabatwarra obwire habwokuba amakanisa gakaba gali maingi omu kiikaro kyabo. Baitu bakahwamu amaani. Busaho ekihyaka ekibakaba begere, kandi abaali omu makanisa ago bakaba nibajwara kubi. Hanyuma y’okubungira ekanisa ey’okumalirra ha rukarra rwabo orwamakanisa, Linda akagenda ha mulimo kandi Ray uwe yagaruka omu ka. Obwakaba nagaruka omu ka, akacwamu kuraba ha Kyombeko ky’Obukama. Akaijwamu ekitekereza ngu, ‘Leka ngendeyo ntahemu nukwo mmanye kiki ekirukugenda omu maiso.’ Kandi kinu nikyo kintu ekyakizireyo kumukwataho omu bwomeezi bwe! Buli omu akaba aine engonzi kandi ajwaire kurungi. Ray akaikarra ha ntebe ey’omu maiso kandi akagonza ebiyayegere! Kinu nikitwijukya omulingo omukwenda Paulo yabalizeho omuntu owaija omu ruso’rokano omurundi ogw’okubanza kandi akagamba ati: “Ruhanga [mali] ali omulinywe.” (1 Abakolinso 14:23-25) Kuruga obu, Ray akatandika kwija omu nso’rokano buli Sande. Hanyuma akatandika kwija n’omu buli ruso’rokano orwa hagati omu wiiki. Mukazi we Linda nauwe akatandika kwija omu nso’rokano, kandi n’obukiraaba ngu bakaba baine emyaka erukuhingura omu 70, bakeega Baibuli kandi babatizibwa.

9, 10. (a) Habwaki kyanguhire kukozesa turakiti? (b) Soborra omulingo osobora kukozesa turakiti Obukama Bwa Ruhanga Nubwo Buha?

⁹ Turakiti. Omu bikwato byaitu harumu turakiti munaana ezirukwahukana. Kyanguhire kuzikozesa, kandi zikora kurungi obukihika ha kubaza n’omuntu omurundi ogw’okubanza. Kuruga turakiti zinu zituruka omu mwaka 2013, turakiti ezirukuhika omu buhumbe butaano nizo zitiirwe! Turakiti zinu zoona zikozerwe omu omulingo ogurukusisana. Nahabweki kakuba oyega kukozesa emu halizo, zoona noba oyegere kuzikozesa! Nosobora kukozesa ota turakiti kutandika kubaza n’omuntu?

¹⁰ Nosobora kuba nogoza kukozesa turukati erukwetwa Obukama Bwa Ruhanga Nubwo Buha? Yoleka omuntu ekikaguzo ekiri haiguru ya turakiti nukwo omukaguze: “Orayekagwizeho Obukama bwa Ruhanga nikyo kiki? Notekereza ngu . . . ?” Hanyuma omusabe akomemu kimu ha by’okugarukamu ebihairwe. Omu kiikaro ky’okugamba ngu eky’okugarukamu kye kihikire rundi kigwire, iwe sukura munda ya turakiti hansi y’omutwe “Baibuli Egamba” kandi omusomere ekyahandikirwe ekiri omu Danieri 2:44 hamu na Isaya 9:6. Hakumalirra, mukaguze ekikaguzo ekiri enyuma ya turakiti ekiri hansi y’omutwe “Eky’Okutekerezaaho”: “Obwomeezi buliba buta hansi y’obulemi bwa Ruhanga?” Nosobora kumusigira ekikaguzo eki nukwo okigarukemu omurundi ogundi. Obworagarukayo, kozesa isomo 7 ey’akatabu Amakuru Amarungi Kuruga Hali Ruhanga!, akanyakuli kamu ha bikwato byaitu ebitukozesa kutandikaho abeegi ba Baibuli.

11. Magaziini zaitu zitegekerwe na kigendererwa ki, kandi tusemeriire kubanza kumanya kintu ki?

¹¹ Magaziini. Omu nsi yoona, Omunaara gw’Omulinzi na Awake! nizo magaziini ezikyakizireyo kuturukibwa omu bwingi hamu n’okuhindurwa omu ndimi nyingi! Kusigikirra nk’oku magaziini zinu zisomwa abantu abarukwahukana, omutwe gwa ha kyesweko guba omu mulingo ogurasikiriza abantu hona hona nambere barukwikara. Tusemeriire kukozesa magaziini zinu kukonyera abantu kumanya ekintu ekirukukirayo obukuru omu kasumi kanu. Baitu kirungi kubanza kumanya buli kika kya magaziini kitegekerwe kukonyera bantu ba mulingo ki.

12. (a) Awake! etegekerwe kukonyera abantu ba mulingo ki, kandi ine ekigendererwa ki? (b) Otungire birungi ki habw’okukozesa ekikwato kinu?

¹² Awake! etegekerwe n’ekigendererwa kyokukonyera abantu abamanyire bike rundi abataine ekibamanyire hali Baibuli. Nibasobora kuba batamanyire enyegesa ez’Ekikristaayo, nibasobora kuba batarukwesiga ediini rundi nibasobora kuba batakakyetegeriize ngu Baibuli nesobora kubakonyera omu bwomeezi bwabo. Kimu ha bigendererwa ebikuru ebya magaziini ya Awake! nukwo kukonyera omusomi kugumya ngu mali Ruhanga aroho. (Abarumi 1:20; Abaheburaniya 11:6) Ekintu ekindi, magaziini enu ekonyera arukugisoma kugumya ngu Baibuli “mali . . . kigambo kya Ruhanga.” (1 Abasesalonika 2:13) Magaziini isatu ez’omwaka 2018 ziine emitwe enu: “Omuhanda Oguleeta Okusemererwa,” “Ensita 12 Eziraletera Amaka Kubamu Obusinguzi,” hamu na “Obukonyezi Hali Abo Abarukuganya.”

13. (a) Omunaara gw’Omulinzi ogw’okugaba gutegekerwe kukonyera abantu ba mulingo ki? (b) Birungi ki iwe eby’otungire habw’okukozesa ekikwato kinu?

¹³ Ekigendererwa ekikuru eky’Omunaara gw’Omulinzi ogw’okugaba omu buheereza nikyo kusoborra enyegesa za Baibuli hali abantu abanyakwine ekibamanyire hali Ruhanga na Baibuli. Nibasobora kuba baine ekibamanyire ha Baibuli, baitu batarukumanya amananu gonyini ag’erukwegesa. (Abarumi 10:2; 1 Timoseo 2:3, 4) Magaziini isatu ez’omwaka 2018 zibaire nizigarukamu  ebikaguzo binu: “Baibuli eky’Aine Omugaso Omu Kasumi Kanu?,” “Kiki Ekiraabaho Omu Busumi obw’Omu Maiso?,” hamu na “Ruhanga Akufaaho?”

14. (a) Vidiyo ina eziri omu bikwato byaitu ebitukozesa kwegesa zitekaniziibwe kukora ki? (b) Birungi ki eby’otungire kuruga omu kwoleka vidiyo?

¹⁴ Vidiyo. Omu kasumi ka Yesu, ababaizi bakozesaga ebikwato eby’okukwata n’emikono. Baitu biro binu ababaizi baine ebikwato ebirukukozesa amasanyarazi nk’emisumeni, ebyoma eby’okukozesa kudubura hamu n’ebyoma ebindi. Biro binu obutuba nitutebeza, oihireho kukozesa ebitabu ebitiirwe, twine na vidiyo enungi muno ezitusobora kwoleka abantu. Vidiyo ina halizo eziri omu bikwato byaitu nizo: Habwaki Osemeriire Kwega Baibuli,? Omulingo Twegesa Abantu Baibuli, Biki Ebikolebwa Omu Kingdom Hall?, hamu na Abakaiso ba Yahwe​—Niitwe Baha? Vidiyo engufu ezitarukuhikya edakiika ibiri, nizikora kurungi obworukuba nobaza n’omuntu ha murundi ogw’okubanza. Vidiyo eziraihireho nizisobora kukozesebwa obworukuba ogarukireyo rundi omuntu obwarukuba aine obwire. Vidiyo zinu bikwato birungi habwokuba nizisobora kwekambisa omuntu kwega Baibuli n’okwija omu nso’rokano.

15. Abantu nibasobora kukwatwaho bata kakuba barora vidiyo zaitu omu rulimi rwabo? Ha ebyokurorraho.

¹⁵ Ekyokurraho, Munyaanya itwe omu akatangatangaana omukazi ow’akaba afurukire kuruga omu ihanga lya Micronesia kandi ow’arukubaza orulimi orukwetwa Yapese. Munyaanya itwe akamwoleka vidiyo ine omutwe Habwaki Osemeriire Kwega Baibuli? omu rulimi oru Yapese. Vidiyo obuyatandikire, omukazi onu akagamba ati: “Vidiyo enu eri omu rulimi rwange. Kinu nikihuniriza! Omulingo omuntu w’omu vidiyo arukwaturamu ebigambo nigwoleka ngu naruga ha kizinga nambere nduga. Nabaza orulimi rwange!” Omukazi onu akamalirra agambire ngu nagenda kusoma byona ebiri ha mukura gwaitu ogwa jw.org ebiri omu rulimi rwe kandi naija n’okurora vidiyo zoona eziroho. (Lengesaniza na Engeso Ezabakwenda 2:8, 11.) Ekyokurorraho kindi nikyo eky’omunyaanya itwe anyakuli omu ihanga lya Amerika. Akasindikira omwana wa mugenzi we arukwikara omu ihanga lindi erya hara muno endagirro erukutwara ha mukura gwaitu nambere hali vidiyo enu omu rulimi rwe. Mwana wa mugenzi we akarora vidiyo enu hanyuma yamuhandikira namugarukamu ati: “Ekintu ekyakizire kundetera kugonza kumanya ebirukukiraho kikaba nambere baagambire ngu haroho omwoyo omubi ogurukulema ensi. Nkasaba kwegesebwa Baibuli.” Ekintu kinu nikisemeza muno habwokuba omulimo gwaitu omu ihanga eri gutangirwe!

16. Soborra ekigendererwa kya buli emu ha burocuwa zinu: (a) Huliriza Ruhanga Oyomeere Ebiro Byoona. (b) Amakuru Amarungi Kuruga Hali Ruhanga (c) Nibaha Abarukukora Yahwe eby’Agonza?

¹⁶ Burocuwa. Nitusobora kukora ki kakuba tuba nitugonza kwegesa omuntu amananu baitu atamanyire kusoma kurungi rundi kakuba ebitabu ebitukozesa kwegesa biba bitaroho omu rulimi rwe? Nitusobora kukozesa burocuwa Huliriza Ruhanga Oyomeere Ebiro Byoona. * (Rora obugambo obuli hansi.) Ekikwato ekirungi muno ekitusobora kukozesa kutandikaho omwegi wa Baibuli niyo burocuwa Amakuru Amarungi Kuruga Hali Ruhanga. Omuntu nosobora kumwoleka amasomo 14 agolekerwe ha rupapura orurukumalirrayo nukwo n’omusaba kukomamu erirukukirayo kumusikiiriza. Tandika kumwegesa isomo elyakomeremu. Waali  olengereho kukora ekintu kinu ha muntu owogarukiire? Burocuwa eyakasatu ei twine omu bikwato byaitu eby’okwegesa niyo ey’emanyirwe nka Nibaha Abarukukora Yahwe eby’Agonza omu Kasumi Kanu? Ekozerwe kukozesebwa kwegesa abeegi ba Baibuli ebintu ebirukukwata ha kitebe kyaitu. Obworaaba nogonza kumanya omulingo osobora kukozesa burocuwa enu buli murundi oraaba noyegesa omwegi waawe, rora akatabu Obwomeezi n’Obuheereza Bwaitu nk’Abakristaayo aka Maaci 2017.

17. (a) Buli katabu akatukozesa kwegesa omwegi kaine kigendererwa ki? (b) Boona abarukubatizibwa basemeriire kukora ki, kandi habwaki?

¹⁷ Ebitabu. Hanyuma y’okutandikaho omwegi wa Baibuli nokozesa burocuwa, obworukuba ogondeze, nosobora kumufurra notandika kumwegesa akatabu Baibuli Etwegesa Ki? Akatabu kanu nikasobora kukonyera abantu kwega enyegesa ez’okutandikiraho. Omwegi obwarakurakurana akamalirra akatabu kanu, mutandike kwega akatabu Mwerindirege omu Kugonza Kwa Ruhanga. * (Rora obugambo obuli hansi.) Akatabu kanu nikaija kukonyera omwegi kurora omulingo asobora kuta omu nkora emisingi ya Baibuli omu nyikara ezaarukuba narabamu omu bwomeezi bwe. Twijuke ngu na hanyuma y’okubatizibwa, tusemeriire kumwegesa kuhikya amazire obutabu bunu bwona. Kinu nikiija kumukonyera kuba n’okwikiriza okugumire omuli Yahwe n’okwikara ali mwesigwa.​—Soma Abakolosai 2:6, 7.

18. (a) Nk’abegesa ab’amananu 1 Timoseo 4:16 nirutwekambisa kukora ki, kandi kiki ekirarugamu? (b) Tusemeriire kuba na kigendererwa ki obuturukuba nitukozesa ebikwato ebitukozesa kwegesa abantu?

¹⁸ Buli bujunanizibwa bwaitu nk’Abakaiso ba Yahwe kwegesa abantu ‘ekigambo ky’amazima agenjiri’ agarukuhikya omu bwomeezi obutahwaho. (Abakolosai 1:5; soma 1 Timoseo 4:16.) Kusobora kutukonyera kuhikiriza obujunanizibwa bunu, twine ebikwato ebiturukwetaga kusobora kwegesa. (Rora akasanduuko akaine omutwe “ Ebikwato Ebitukozesa Kwegesa.”) Tukole kyona ekirukusoboka kukozesa ebikwato binu kurungi. Buli omu aine obugabe bw’okucwamu ekikwato eky’arukugonza kukozesa n’obwire obwarukugonza kukikozesezaamu. Baitu twijuke ngu ekigendererwa kyaitu tikiri eky’okugaba bugaba ebitabu, kandi ebitabu byaitu titubigabira abantu abatarukugonza kuhuliiriza obutumwa bwaitu. Ekigendererwa kyaitu nikyo kufoora abegeswa abo boona abaine omutima gw’okugonza kumanya, abebundaazi, abarukugonza kwega hali Ruhanga, kandi ‘abaine entekereza enungi ey’esobora kubaletera kutunga obwomeezi obutahwaho.’​—Engeso Ezabakwenda 13:48, NW; Matayo 28:19, 20.