1, 2. Yosuha akatunga obujunanizibwa ki obw’amaani hanyuma ya Musa kufa?

YAHWE akagambira Yosuha ati: “Musa omuiru wange afire; nukwo oimuke, oyambuke ekyambu kinu Yorudani, iwe nabantu banu bona, okutaha omu nsi eyimbahaire bo.” (Yosuha 1:1, 2) Enu kekaba mpindahinduka y’amaani hali Yosuha ow’akaba amazire haihi emyaka 40 ali muheereza wa Musa!

² Musa akaba amazire akasumi nayebembera Abaisareri, baitu hati Yosuha nuwe akaba nagenda kubebembera. Nahabweki nasobora kuba yali nayekaguza abantu obubaraaba nibaija kwikiriza obwebembezi bwe. (Ekyebiragiro 34:8, 10-12) Ekitabu kimu ekibazaaho Baibuli obukikaba nikibazaaho Yosuha 1:1, 2, kikagamba ngu obwire obukyakizireyo kuguma kandi kuba bw’akabi, kibe omu mahanga ga kara, rundi agahati, nubwo obwire nambere ihanga liba liine kuhindura omwebembezi kutaho ondi.

3, 4. Yosuha akatunga mugisa ki habw’okwesiga Yahwe, kandi kikaguzo ki ekitusobora kwekaguza?

 ³ Yosuha akaba ahikire kweralikirra. Baitu akesiga Yahwe kandi akarahuka kuhondera oburagirizi bwa Yahwe. (Yosuha 1:9-11) Ruhanga akaha Yosuha omugisa habw’okumwesiga kandi akakozesa maraika kuha Yosuha n’Abaisareri oburagirizi. Maraika onu aine kuba yali Kigambo, Omwana wa Ruhanga Omuzigaijo.​—Okuruga 23:20-23; Yohana 1:1.

⁴ Yahwe akakonyera ihanga lya Isareri kwanguhirwa kugenda n’empindahinduka eyaizireho eya Yosuha kufooka mwebembezi. N’omu kasumi kanu, haroho empindahinduka nyingi ez’amaani ezirukubaho. Nitusobora kuba nitwekaguza, ‘Nk’oku ekitebe kiriyo nikyeyongera kukurakurana, haroho ensonga yoona habwaki tusemeriire kwesiga Yesu Omwebembezi waitu owakomerwe?’ (Soma Matayo 23:10.) Kusobora kugarukamu ekikaguzo kinu, nitwija kurora omulingo Yahwe yayebembiire abantu be abaakara obubaali nibaraba omu bwire obwempindahinduka.

5. Kintu ki ekitali kya buli kiro ekyahikire hali Yosuha obwakaba ali haihi na Yeriko? (Rora ekisisani ekiri ha rupapura 16.)

⁵ Haroho ekintu ekitali kya buli kiro ekyahikire hali Yosuha hanyuma y’obwire buke bamazire kwambuka Ekyambu Yorudani. Obwakaba ali haihi n’orubuga rwa Yeriko, akatangatangaana omusaija akwasire empirima. Yosuha akamukaguza ati: “Oli habwaitu, rundi habwabanyanzigwa baitu?” Yosuha akahunirra muno omusaija onu obuyagambire ngu akaba ali “engabwa yihe lya Mukama,” maraika ow’akaba ayetegekere kurwanirra abantu ba Ruhanga. (Soma Yosuha 5:13-15.) N’obukiraaba ngu omu nkarra ezimu Baibuli egamba ngu Yahwe nuwe akaba nabaza na Yosuha, nikizooka ngu Yahwe akakozesa maraika kubaza na Yosuha nk’oku yakoraga omu busumi bwa kara. Kandi nikisisana ngu haroho n’obusumi obundi nambere Ruhanga yakozeseze maraika onu kubaza omu ibara lye.​—Okuruga 3:2-4; Yosuha 4:1, 15; 5:2, 9; Engeso Ezabakwenda 7:38; Abagaratiya 3:19.

6-8. (a) Habwaki obumu ha buragirizi maraika yahaire busobora kuba bwazokere nk’obutasobora kukora? (b) Kiki ekirukwoleka ngu oburagirizi bunu bukaba bw’amagezi kandi ngu bukaizira ha bwire bwonyini? (Rora n’obugambo obuli hansi.)

⁶ Maraika onu akagambira Yosuha ebintu byonyini eby’akaba nayetagisa kukora kusobora kusingura Yeriko. Ha kubanza, obumu ha buragirizi bunu nibusobora kuba bwazokere nk’obutaakole. Ekyokurorraho, maraika akaragira Yosuha kusara abaserikale boona. Kinu kikaba nikimanyisa ngu abarwani tibakusoboire kurwana kumara ebiro. Mali bunu nubwo bwali bwire obuhikire obw’okusara abasaija banu?​—Okubanza 34:24, 25; Yosuha 5:2, 8.

⁷ Abaserikale nibasobora kuba bayekagwize, ‘Turasobora tuta kurwanirra amaka gaitu kakuba abanyanzigwa baija omu nkambi yaitu kuturwanisa?’ Baitu haroho ekintu ekyabaireho ekibakaba batarukunihira! Omu kiikaro ky’okwija kurwanisa Isareri, abasaija ba Yeriko bakatiina Isareri. Ekyahandiikirwe nikigamba ngu: “Yeriko ekaba ekingiirwe kimu habwabana ba Isareri; busaho ayaturukire, kunu busaho ayatahire.” (Yosuha 6:1) Amakuru ganu gaine kuba galetiire Abaisareri kweyongera kwesiga oburagirizi bwa Ruhanga!

⁸ Maraika akagambira Yosuha ngu Abaisareri batarwanisa Yeriko. Oihireho, bakaba baine kumara ebiro mukaaga nibetoroora orubuga, omurundi gumu buli kiro, kandi ngu ha kiro eky’omusanju barwetoroole emirundi musanju. Abaserikale nibasobora kuba batekeriize, ‘Kunu kakusiisa obwire n’amaani gaitu!’ Baitu omwebembezi wa Isareri ow’akaba atarukurorwa akaba amanyire kiki kyonyini ekyarukukora!  Kuhondera oburagirizi bunu kikongera kugumya okwikiriza kwa Isareri kandi kitabetaagise okurwanisa abaserikale ba Yeriko.​—Yosuha 6:2-5; Abaheburaniya 11:30. * (Rora obugambo obuli hansi.)

9. Habwaki tusemeriire kuhondera oburagirizi bwona obututunga kuruga omu kitebe kya Yahwe? Ha ekyokurorraho.

⁹ Ekintu kinu ekirukukwata ha Yeriko nikitwegesa ki? Obwire obumu ekitebe kya Yahwe kikora ebintu omu mulingo omuhyaka ogutubaire tutamanyire, kandi obumu nitusobora kulemwa kumanya ensonga habwaki. Ekyokurorraho nihasobora kuba haroho akasumi obutwatekeriize ngu tikiri kirungi kukozesa ebyoma nk’amasimu rundi tabuleti omu kwesomesa, omu buheereza, rundi omu nsorrokano. Baitu hati niturora omugaso gw’okukozesa ebintu binu obuturukuba tubiine. Obuturora ebirungi ebireserwe empindahinduka nk’ezi, okwikiriza kwaitu kweyongera kuguma kandi obumu hagati yaitu n’ab’oruganda hamu n’abanyaanya itwe bweyongera.

10. Noha ayakozere entekaniza nukwo habeho orukurato rukuru orurukukwata ha kusarwa omu Yerusalemu?

¹⁰ Hanyuma y’emyaka 13 Koruneryo owakaba ali musaija atasazirwe kandi atali Muyudaaya kufooka Mukristaayo, Abakristaayo abamu Abayudaaya bakaba nibakyaikiriza ngu okusarwa kintu kikuru. (Engeso Ezabakwenda 15:1, 2) Omu rubuga rwa Antyokiya, ab’oruganda bakaba nibatera empaka ha nsonga enu. Nahabweki abagurusi bakakora entekaniza nukwo Paulo agende hali akatebe akalemi omu Yerusalemu kukaguza  ha nsonga enu. Baitu mali noha akaba nakora entekaniza enu nukwo Paulo agende Yerusalemu? Paulo akasoborra ati: “Nkatemba obwokusuku’rwa.” Kinu nikyolekera kimu ngu Kristo nuwe yahaire oburagirizi bunu obw’okugenda hali akatebe akalemi kusobora kutunga eky’okugarukamu ha nsonga enu.​—Abagaratiya 2:1-3.

11. (a) Abakristaayo abamu Abayudaaya bakaba nibakyaikiriza ki ha nsonga y’okusarwa? (b) Paulo akooleka ata ngu akaba nasagika abagurusi ab’omu Yerusalemu? (Rora n’obugambo obuli hansi.)

¹¹ Kristo akakozesa akatebe akalemu kusoborra kurungi ngu kikaba kitarukwetagisa Abakristaayo abakaba batali Bayudaaya kusarwa. (Engeso Ezabakwenda 15:19, 20) Baitu na hanyuma y’encwamu enu, hakarabaho emyaka Abakristaayo Abayudaaya nibakyasara abatabani babo. Hanyuma, abagurusi ab’omu Yerusalemu bakahurra orugambo ngu Paulo akaba atarukutamu ekitiinisa ebiragiro bya Musa. Nahabweki abagurusi bakasaba Paulo kukora ekintu ekikaba nikiija kwoleka abantu ngu natamu ekitiinisa ebiragiro binu. * (Rora obugambo obuli hansi.) (Engeso Ezabakwenda 21:20-26) Bakamuragira kutwara abasaija bbana omu yekaro beyeze nukwo abantu bakirole ngu Paulo mali akaba natamu ekitiinisa ebiragiro binu. Paulo akaba nasobora kugamba ngu: ‘Kinu tikiine makuru! Habwaki nibansaba kukora ekintu kya mulingo gunu? Abakristaayo Abayudaaya abatarukwetegereza ensonga y’okusarwa nubo baine ekizibu.’ Baitu Paulo akakyetegereza ngu abagurusi bakaba nibagonza Abakristaayo boona kwikara omu bumu, nahabweki akahondera oburagirizi bwabo. Baitu nitusobora kwekaguza habwaki Yesu yalekere ensonga enu ey’okusarwa kwikara n’etalibaniza abantu habw’akasumi kaingi kandi kunu ebiragiro bya Musa byali bihoireho Yesu obuyahanikirwe ha muti.​—Abakolosai 2:13, 14.

12. Nsonga ki esobora kuba yaletiire Kristo kuleka obwire bwingi kurabaho atakagonjoire ensonga y’okusarwa?

¹² Kitwara obwire kurora omuntu yamanyiira enyegesa empyaka. Abayudaaya abamu abakaba bali Bakristaayo kikaba nikibetagisa obwire kurora baikiriza ngu mali bakaba batakyali hansi y’ebiragiro bya Musa. (Yohana 16:12) Bakaba bamanyiriire kutekereza ngu okusarwa kaali k’okurorraho akakaba nikooleka ngu omuntu aine enkoragana y’embaganiza na Ruhanga. (Okubanza 17:9-12) Abandi baatekerezaga ngu nibaija kuhiganizibwa Abayudaaya abandi nambere baikaraga habw’okwetwaza omu mulingo ogurukwahukana. (Abagaratiya 6:12) Baitu obwire bukahika Kristo yabaha oburagirizi oburukukiraho kurabira omu bbaruha za Paulo.​—Abarumi 2:28, 29; Abagaratiya 3:23-25.

13. Kiki ekisobora kutukonyera kusagika obwebembezi bwa Kristo?

¹³ Na hati Kristo nuwe arukwebembera ekitebe Ekikristaayo omu kasumi kanu. Nahabweki kakuba ohurra osobiirwe habw’empindahinduka ei ekitebe kikozere, tekerezaaho omulingo Kristo yayebembiire abantu ba Ruhanga omu busumi  bwa kara. Bube obusumi bwa Yosuha rundi obw’abakwenda, Kristo aikaire naha oburagirizi oburungi kusobora kulinda abantu ba Ruhanga, kugumya okwikiriza kwabo, n’okubakonyera kwikara omu bumu.​—Abaheburaniya 13:8.

14-16. Oburagirizi obututunga kuruga hali omwiru omwesigwa kandi ow’amagezi nibwoleka buta ngu Kristo nagonza kutukonyera kwikara tugumire omu kwikiriza?

¹⁴ Omu kasumi kanu, omwiru omwesigwa kandi ow’amagezi natuha obuhabuzi obuturukwetaga omu kaire konyini akaturukuba nitubwetaga. (Matayo 24:45) Oburagirizi bunu nibwoleka ngu Yesu natufaho. Nyineeka arukwetwa Marc, anyakwine abaana bbana nagamba ngu: “Setani aliyo nakora kyona ekirukusoboka kurwanisa amaka nukwo acekye ebitebe. Nahabweki abanyineeka nibaba nibetegereza ensonga habwaki nibaterererwa kwebembera okuramya kw’eka buli wiiki​—nukwo basobole kutangira akabi kuhika ha maka gabo!”

¹⁵ Obuturarora omulingo Kristo arukutwebembera nitwija kwetegereza ngu nagonza kutukonyera nukwo okwikiriza kwaitu kwikale kugumire. Ekyokurorraho, omugurusi arukwetwa Patrick nagamba ati: “Ha kubanza, abatebezi abamu kitabasemeze oburagirizi obubwaizire ngu abatebezi bacwibwemu omu gurupu ez’okutebeza buli wikendi.” Baitu nagamba ngu empinduka enu neyoleka omulingo Yesu arukufaaho buli omu omu kitebe. Ekyokurorraho, ab’oruganda abamu n’abanyaanya itwe abamu abaine ensoni, rundi abataakiraga kugenda omu buheereza hati nibahurra ngu b’omugaso kandi nibetagwa. Ekintu kinu kyongiire kugumya okwikiriza kwabo.

¹⁶ Ekintu ekindi, Kristo natukonyera kwikaza omutima gwaitu ha mulimo ogw’okutebeza, ogunyakuli mulimo omukuru muno ogurukukorwa omu nsi omu kasumi kanu. (Soma Marako 13:10.) André, anyakuli mugurusi muhyaka, aikaire nalengaho muno kuhondera buli buragirizi bwona obuhyaka obuba buhairwe ekitebe kya Yahwe. Nagamba ati: “Kukehya omuhendo gw’ab’oruganda n’abanyaanya itwe abarukukora ha ofiisi z’amataagi nikyoleka obwire obuturumu n’obwetago oburoho obw’okuta amaani ha mulimo gw’okutebeza.”

17, 18. Habwaki tusemeriire kutekerezaho emigaso eri omu kugendera ha mpindahinduka?

¹⁷ Oburagirizi obututunga kuruga hali Yesu Kristo Omukama arukulema hati, nibwija kutukonyera omu kasumi kanu n’omu busumi oburukwija. Lengaho kutekereza ha mulingo ogasiirwe habw’okugendera ha mpindahinduka eziizire nizibaho. Nosobora kukozesa obwire bw’okuramya okw’eka kubazaho omulingo empindahinduka omu nsorrokano rundi omu buheereza zikonyire eka yanyu.

¹⁸ Kakuba twikara nitwijuka ngu kuhondera oburagirizi obutuheebwa ekitebe kya Yahwe kirugamu ebirungi biingi, nikiija kutwanguhira kuhondera oburagirizi n’okutunga okusemererwa. Ekyokurorraho, hati nitukozesa sente nke habwokuba titukyatera ha mpapura ebitabu bingi muno nk’oku twakoraga kara. Kandi habw’okukozesa ebyakalimagezi ebihyaka, hati nitusobora kuhikyaho abantu baingi amakuru amarungi. Kandi iwe nk’omuntu, nikisoboka kutandika kukozesa esimu rundi tabuleti kutunga ebitabu hamu na vidiyo? Gunu guli gumu ha miringo tusobora kusagika Kristo habwokuba nagonza tukozese kurungi ebintu by’ekitebe.

19. Habwaki tusemeriire kusagika oburagirizi bwa Kristo?

¹⁹ Obutuhondera oburagirizi bwa Kristo, tukonyera ab’oruganda n’abanyaanya itwe kwongera kugumya okwikiriza kwabo n’okweyongera kuba omu bumu. André nabazaho ati empindahinduka eziizire nizibaho omu Beseeri: “Omutima omurungi ogwayolekerwe ab’oruganda n’abanyaanya itwe abaakwasirweho empindahinduka zinu nigundetera kwongera kwesiga obwembembezi bwa Kristo n’okutamu ab’oruganda banu ekitiinisa. Kwikiriza omulimo gwona ogubarukuba bahairwe nikyoleka ngu nibagendera hamu n’ekitebe kya Yahwe.”

20, 21. (a) Habwaki tusemeriire kwesiga Kristo, Omwebembezi waitu? (b) Kikaguzo ki ekiturukwija kugarukamu omu kicweka ekirukuhonderaho?

²⁰ Omu bwire obutali bwa hara, Omulemi waitu Yesu Kristo naija kuturuka “asingule” kandi omukono gwe “gulihikiriza ebintu ebirukuhuniriza.” (Okusuku’rwa 6:2; Zabuli 45:4, NW) Baitu n’omu kasumi kanu, Kristo aliyo natutekaniriza obwomeezi omu nsi empyaka n’omulimo ogutulikorayo obutulyegesa abantu abaliba bahumbuukire n’obutulikonyera omu kufoora ensi yoona empyaka.

²¹ Obuturayeyongera kwesiga Omwebembezi waitu kandi Omukama waitu, naija kutuhikya omu nsi empyaka. (Soma Zabuli 46:1-3.) Omu kasumi kanu, empidukahinduka nizisobora kutugumira, kukira muno kakuba ziba nizitukwataho omu mulingo tubaire tutarukunihira. Kakuba eki kibaho, nitusobra tuta kwikara twine obusinge omu bitekerezo, n’okwikara twine okwikiriza okugumire omuli Yahwe? Ekikaguzo eki nitwija kukigarukamu omu kicweka ekirukwongeraho.