1. Ncwamu ki erukukira oburungi omuntu wena ey’asobora kukora?

EMIRUNDI erukukira obwingi, encwamu abazaire bakora zikwataho abaana baabo kumara akasumi kakooto. Kakuba abazaire bacwamu kubi, nibasobora kuleetera abaana baabo ebizibu. Kandi kakuba bacwamu kurungi, baha abaana baabo omugisa ogw’okutunga obwomeezi oburumu okusemererwa. Baitu, abaana nabo basemeriire kukora encwamu enungi. Kandi encwamu erukukira oburungi omuntu wena asobora kukora niyo ey’okuheereza Yahwe Isiitwe ow’omu iguru, ow’okugonza.​—Zab. 73:28.

2. Ncwamu ki enungi eza Yesu hamu n’abazaire be bakozere?

² Abazaire ba Yesu bakacweramu kimu kukonyera abaana baabo kuheereza Yahwe, kandi encwamu abazaire banu bakozere zikooleka ngu nikyo kikaba kigendererwa kyabo ekikuru. (Luk. 2:40, 41, 52) Yesu na uwe akakora encwamu enungi ez’amukonyire kukora Yahwe eby’akaba n’agonza akole. (Mat. 4:1-10) Yesu obuyakuzire akafooka omusaija ow’embabazi, omwesigwa kandi omu manzi. Abazaire boona abarukugonza Yahwe bakusemeriirwe kuba n’omwana nka Yesu.

3. Bikaguzo ki ebiturukwija kugarukamu omu kicweka kinu?

³ Omu kicweka kinu, nitwija kubazaaho ebikaguzo binu: Ncwamu ki enungi Yahwe eziyakozere ezirukukwata hali Yesu? Abazaire Abakristaayo nibasobora kwega ki kuruga omu ncwamu bazaire ba Yesu ab’omu nsi bakozere? Kandi Abakristaayo ensingato nibasobora kwega ki kuruga omu ncwamu Yesu yakozere?

4. Ncwamu ki ey’amaani Yahwe ei y’akozere ey’erukukwata ha Mwana we?

⁴ Yahwe akakomera Yesu abazaire abakaba nibakirayo oburungi. (Mat. 1:18-23; Luk. 1:26-38) Ebigambo bya Malyamu yabalize  kuruga ha mutima ebiri omu Baibuli, nibyoleka ngu akaba n’agonza muno Yahwe hamu n’Ekigambo kye. (Luk. 1:46-55) Kandi n’omulingo Yusufu yahondireemu oburagirizi bwa Yahwe nigwoleka ngu akaba n’atiina Ruhanga kandi n’agonza kukora ebirukumusemeza.​—Mat. 1:24.

5-6. Biki Yahwe ebiyaikirize kuhikaho Omwana we?

⁵ Wetegereze ngu Yahwe atakomere Yesu abazaire abaguuda. Ekihongwa Yusufu na Malyamu ekibahaireyo Yesu obwaka amazire kuzaarwa nikyoleka ngu bakaba bali banaku. (Luk. 2:24) Yusufu n’asobora kuba akaba aine akacweka kataito haihi n’eka ye omu Nazalesi nambere y’akorraga omulimo gwe ogw’okubaija. Nikizooka ngu bakaba bataine sente nyingi rundi ebintu bingi, kukira muno obubahikize abaana musanju n’okukiraho.​—Mat. 13:55, 56.

⁶ Yahwe akalinda Omwana We kutahikwaho akabi omu miringo emu, baitu tiyatangiraga ebizibu byona kumuhikaho. (Mat. 2:13-15) Ekyokurorraho, abanyabuzaale ba Yesu bakaba batarukumwikiririzaamu. Tekerezaaho omulingo Yesu yayehuliiremu kuba n’abanyabuzaale ababandize kwanga kwikiriza ngu nuwe Masiya. (Mar. 3:21; Yoh. 7:5) Kandi nikizooka ngu Yesu akaba aine kugumira kufa kwa Yusufu ise ay’amukulize. Yusufu kufa kyali nikimanyisa ngu Yesu nk’omwana omwojo omukuru akaba aine kukora omulimo ise yakoraga kusobora kurolerra eka. (Mar. 6:3) Yesu obuyayeyongiire kukura, akeega kurolerra eka yabo. Nikizooka ngu akaba aine kukora n’amaani kusobora kubarolerra. Nahabweki akaba amanyire kurungi omulingo omuntu ayehurramu obwaba ajwahire habw’okukora ekiro kyona.

7. (a) Bikaguzo ki ebirakonyera abaswerangaine kukuza kurungi abaana baabo? (b) Kusigikirra ha Enfumo 2:1-6, abazaire basemeriire kwegesa abaana baabo kukora ki?

⁷ Iwe na mukazi wawe obumuraaba nimugonza kuzaara abaana, mwekaguze: ‘Tuli bantu abebundaazi abagonza Yahwe hamu n’Ekigambo kye? Yahwe yakutukomere kurolerra omwana, anyakuli kisembo eky’omuhendo? (Zab. 127:3, 4) Obworaaba oli muzaire, wekaguze: ‘Nyegesa abaana bange obukuru obw’okukora n’amaani?’ (Mug. 3:12, 13) ‘Nkora ekindukusobora kulinda abaana bange batahikwa akabi omu mubiri n’omu ngeso habw’ebintu ebibi ebibasobora kutangatangana omu nsi ya Sitaani?’ (Nfu. 22:3) Tosobora kutangira ebizibu byona kuhika h’abaana baawe. Eki tikirukusoboka nakake. Baitu n’okugonza n’osobora  kubatekaniza habw’ebizibu ebisobora kubahikaho omu bwomeezi kuraba omu kugumizaamu n’obegesa omulingo basobora kutungaga obuhabuzi oburungi kuruga omu Baibuli. (Soma Enfumo 2:1-6.) Ekyokurorraho, kakuba omunyabuzaale aleka kuheereza Yahwe, konyera abaana baawe kwega kuruga omu Baibuli habwaki kikuru muno kwikara tuli besigwa hali Yahwe. (Zab. 31:23) Rundi kakuba omu h’abantu abamurukugonza afa, yoleka abaana bawe omulingo basobora kukozesa Baibuli kugumira obujune n’okutunga obusinge.​—2 Kol. 1:3, 4; 2 Tim. 3:16.

8. Kusigikirra ha Ekyebiragiro 6:6, 7, Yusufu na Malyamu bakahondera buhabuzi ki?

⁸ Abazaire ba Yesu ab’omu nsi bakamukonyera kukura akafooka muntu ow’arukusiimwa omu maiso ga Ruhanga, kandi bakahondera oburagirizi bwa Yahwe hali abazaire. (Soma Ekyebiragiro 6:6, 7.) Yusufu na Malyamu bagonzaaga muno Yahwe, kandi ekigendererwa kyabo ekikuru kyali ky’okukonyera abaana baabo nabo kuba n’okugonza nk’oku.

9. Ncwamu ki enkuru Yusufu na Malyamu bakozere?

⁹ Yusufu na Malyamu bakacwamu kuramyaga Yahwe obutoosa bali n’abaana baabo. Busaho kugurukyagurukya, baine kuba bagendaga buli wiiki omu isorrokaniro lya Nazalesi, kandi na Yerusalemu buli mwaka kujaguza Okuhingurwaho. (Luk. 2:41; 4:16) Obubabaga nibagenda Yerusalemu, nibasobora kuba bakozesaaga engendo ezi kwegesa Yesu n’abato be ebyafaayo by’abantu ba Yahwe, kandi nikisoboka kuba ngu babungiraga n’ebiikaro ebirukubazibwaho omu Byahandiikirwe. Yusufu na Malyamu obubazaire abaana abandi kiina kuba kitarabanguhiire kwikara nibaramya Yahwe butoosa. Baitu bakatunga emigisa habw’okwikara nibakikora! Habw’okwebembeza kuramya Yahwe, eka yabo ekaikara haihi na uwe.

10. Abazaire Abakristaayo nibasobora kwega ki omu kyokurorraho kya Yusufu na Malyamu?

¹⁰ Abazaire abarukutiina Ruhanga nibasobora kwega ki omu kyokurorraho kya Yusufu na Malyamu? Ekikuru muno eky’osobora kubegeraho nikyo ngu, yegesa abaana baawe omu bigambo n’omu bikorwa byawe ngu nogonza muno Yahwe. Kyetegereze ngu ekisembo ekirukukirayo oburungi eky’osobora kuha abaana baawe nikyo eky’okubakonyera kugonza Yahwe. Kandi kimu ha bintu ebikuru muno eby’osobora kwegesa abaana bawe nugwo omulingo basobora  kwikara nibejumbira butoosa omu bintu eby’omwoyo nk’okwesomesa, kusaba, ensorrokano, hamu n’okutebeza. (1 Tim. 6:6) Ky’amananu ngu osemeriire kuha abaana bawe ebyetaago byabo eby’omubiri. (1 Tim. 5:8) Baitu oijuke ngu enkoragana enungi na Yahwe niyo erabakonyera kujunwa ensi ya Sitaani obw’erahwerekerezebwa kandi n’okutaaha omu nsi ya Ruhanga empyaka, hatali sente zaabo rundi itungo. *​—Ez. 7:19; 1 Tim. 4:8.

11. (a) Okutererra okuli omu 1 Timoseo 6:17-19 nikusobora kukonyera kuta abazaire kukora encwamu enungi obubarukuba nibakuza abaana baabo? (b) Bigendererwa ki eka esobora kweteraho, kandi migisa ki esobora kurugamu? (Rora akasanduuko “ Bigendererwa Ki Eka Yaawe Erayeteraho?”)

¹¹ Kanikisemeza muno kurora ngu abazaire baingi Abakristaayo nibakora encwamu enungi kusobora kukonyera abaana baabo kwirra haihi na Yahwe! Obutoosa baramya Yahwe bali hamu n’abaana baabo. Bagenda hamu omu nsorrokano ez’ekitebe n’ensorrokano enkooto. Kandi bejumbira omu buheereza. Amaka gamu gasoboire n’okugenda kutebeza omu biikaro ebitakira kutebezebwamu. Abandi babungira Beseri rundi basagika omu kwombeka ebyombeko by’Obukama. Amaka gefereeza sente kusobora kwejumbira omu bintu binu, kandi kinu nikisobora kuba kitanguhire. Baitu agakikora, Yahwe agaha emigisa nyingi. (Soma 1 Timoseo 6:17-19.) Abaana abakurra omu maka nka ganu bakira kugumizaamu n’engeso enungi ezibayegere, kandi tibeijukya! *​—Nfu. 10:22.

12. Kiki Yesu eky’akaba aine kukora obuyakuzire?

¹² Ise Yesu ow’omu iguru akora encwamu enungi zonka, kandi n’abazaire be ab’omu nsi bakakora encwamu enungi. Baitu Yesu obuyakuzire, akaba aine kwekorra encwamu eze. (Bag. 6:5) Nkaitwe itwena, na uwe akaba aine obugabe obw’okucwamu eky’arukugonza. Akaba n’asobora kwefaaho wenka kandi n’okwanga kukora Ruhanga eby’agonza. Baitu akacwamu, kwikara aine enkoragana enungi na Yahwe. (Yoh. 8:29) Ekyokurorraho kye nikisobora kita kukonyera abato omu kasumi kanu?

13. Yesu akakora ncwamu ki enkuru obwakaba akyali muto?

¹³ Yesu obw’akaba akyali muto, akacwamu kworobera bazaire be. Atange obuhabuzi bwabo habw’okutekereza ngu amanyire bingi okubakira. Baitu, “akagumizaamu n’aborobera.” (Luk. 2:51, NW) Busaho kugurukyagurukya Yesu akekamba kuhikiriza kurungi obujunanizibwa bwe nk’omwana omukuru. Aine kuba yayekambaga kwega kubaija kuruga hali Yusufu, nukwo na uwe asobole kukonyera ise omu kurolerra eka yabo.

14. Nitukimanya tuta ngu Yesu yagonzaaga kwega Ekigambo kya Ruhanga?

 ¹⁴ Bazaire ba Yesu nibasobora kuba bamugambiire omulingo ogw’ekyamahano oguyazairwemu kandi n’obutumwa abakwenda ba Ruhanga bamubalizeeho. (Luk. 2:8-19, 25-38) Baitu atagarukire ha kuhurra ebibamugambiire byonka, na uwe wenka akesomera Ebyahandiikirwe. Nitukimanya tuta ngu Yesu yagonzaaga muno kwega Ekigambo kya Ruhanga? Habwokuba obw’akaba akyali muto, abegesa omu Yerusalemu ‘bakahunirra obw’okwetegereza kwe n’okugarukamu kwe.’ (Luk. 2:46, 47) Kandi ha myaka 12 yonka, Yesu akaba amazire ira kukigumya ngu Yahwe nuwe Ise.​—Luk. 2:42, 43, 49.

15. Yesu akole ata ngu akaba acwiremu kukora Yahwe eby’agonza?

¹⁵ Yesu obuyayegere Yahwe eby’akaba n’agonza akole, akacwamu kubikora. (Yoh. 6:38) Akaba akimanyire ngu abantu baingi bakaba nibagenda kumunoba, kandi eki kiine kuba kyamukwatahoga muno obuyakitekerezaahoga. Baitu akacwamu kworobera Yahwe. Yesu obuyabatiziibwe omu 29 C.E., ekigendererwa kye ekikuru kyali ky’okukora Yahwe eby’akaba n’agonza akole. (Baheb. 10:5-7) Yesu n’obwakaba ahanikirwe ha muti ali haihi kufa, akaikara acwerireemu kimu kukora Ise eby’agonza.​—Yoh. 19:30.

16. Isomo ki erimu abaana basobora kwegera hali Yesu?

¹⁶ Yorobera bazaire baawe. Nka Yusufu na Malyamu, bazaire baawe tibahikiriire. Baitu, Yahwe abahaire obujunanizibwa obw’okukulinda, kukutendeka, hamu n’okukuhabura. Kakuba oyorobera obuhabuzi bwabo kandi akabatamu ekitiinisa, noija ‘kwikara kurungi.’​—Bef. 6:1-4.

17. Kusigikirra ha Yosuha 24:15, ncwamu ki abato eibasemeriire kwekorra?

¹⁷ Cwamu ow’oraheereza. Iwe nk’omuntu, osemeriire kumanya Yahwe nuwe oha, eby’arukugonza, hamu n’omulingo osobora kubikoramu. (Bar. 12:2) Obu nubwo orasobora kukora encwamu erukukirayo obukuru omu bwomeezi bwawe, ey’okuheereza Yahwe. (Soma Yosuha 24:15; Mug. 12:1) Obw’oraikara n’osoma kandi n’oyega Baibuli butoosa, kugonza okwoiniire Yahwe nikwija kweyongera kandi n’okwikiriza kwawe omuli we nikwija kweyongera kuguma.

18. Ncwamu ki abato basemeriire kukora, kandi kiki ekirarugamu?

¹⁸ Cwamu kwebembeza Yahwe eby’agonza omu  bwomeezi bwawe. Sitaani n’akuraganiza ngu obw’orakozesa ebisembo eby’oine kwegasira wenka noija kutunga okusemererwa. Baitu amananu gali, abo abateeka omutima ha bigendererwa eby’okutunga itungo becumita bonka “nobujune bwingi.” (1 Tim. 6:9, 10) Baitu kakuba ohuliriza Yahwe kandi okacwamu kwebembeza eby’agonza omu bwomeezi bwawe, noija kutunga okusemererwa kandi “olibona omugisa.”​—Yos. 1:8.

19. Kiki abazaire ekibasemeriire kwijuka?

¹⁹ Abazaire mukole kyona ekimurukusobora kukonyera abaana banyu kuheereza Yahwe. Mumwesige, kandi naija kubakonyera kukora encwamu ez’amagezi. (Nfu. 3:5, 6) Mwijuke ngu abaana banyu nibaija kukwatwaho muno ebikorwa byanyu kukira ebigambo byanyu. Nahabweki mukole encwamu ezirakonyera abaana banyu kusemeza Yahwe.

20. Migisa ki abato baratunga obubaracwamu kuheereza Yahwe?

²⁰ Abato, bazaire banyu nibasobora kubakonyera kukora encwamu enungi omu bwomeezi. Baitu nainywe musemeriire kukora encwamu enungi kusobora kusemeza Ruhanga. Nahabweki mwegere ha kyokurorraho kya Yesu kandi mucwemu kuheereza Yahwe Isiitwe ow’omu iguru, ow’okugonza. Obw’orakikora, noija kutunga bingi eby’okukora hati, ekigendererwa omu bwomeezi, hamu n’okusemererwa. (1 Tim. 4:16) Kandi omu kasumi ak’omu maiso noija kutunga obwomeezi oburukukirrayo kimu oburungi!