1. Nitukimanya tuta ngu omulimo ogw’okufoora abantu abegeswa nigujuna obwomeezi?

OMULIMO ogw’okufoora abantu abegeswa gujuna obwomeezi! Eki nitukimanya tuta? Yesu obuyahaire ekiragiro ekirukusangwa omu Matayo 28:19, 20, NW akagamba ati: “Mugende, mufoole abantu abegeswa. . . , nimubabatiza.” Habwaki okubatizibwa kikuru? Tusemeriire kubatizibwa obuturaaba tuli b’okwomeera ebiro n’ebiro. Omuntu ow’arukugonza kubatizibwa asemeriire kwikiriza ngu n’asobora kutunga obwomeezi obutahwaho habwokuba Yesu akatufeera kandi yahumbuuka. Enu niyo nsonga habwaki omukwenda Petero akagambira Abakristaayo bataahi be ati: “Okubatizibwa [nukwo] hati kurukubajuna . . . kuraba omu kuhumbuuka kwa Yesu Kristo.” (1 Pet. 3:21, NW) Nahabweki, omwegeswa obw’abatizibwa, atunga okunihira okw’okwomeera ebiro n’ebiro.

2. Kusigikirra ha 2 Timoseo 4:1, 2, tusemeriire kuba begesa ba mulingo ki?

² Kusobora kufoora abantu abegeswa, tusemeriire kufooka begesa abakugu. (Soma 2 Timoseo 4:1, 2.) Habwaki? Habwokuba Yesu akaturagira ati: “Mugende mufoole abantu abegeswa. . . , nimubegesa.” Omukwenda Paulo akagamba ngu “oikalege” omu mulimo, “baitu obwokora binu olyejuna wenka, kandi olijuna nabo abakuhurra.” Enu niyo nsonga habwaki Paulo yagambire ati: “Werindege wenka nokwegesa kwawe.” (1 Tim. 4:16) Nk’oku okwegesa nukwo kuleetera abantu kufooka abegeswa, tusemeriire kwegesa omulingo omurungi muno.

3. Omu kicweka kinu, nitwija kubazaaho ki ha kwegesa abeegi ba Baibuli?

 ³ Omu nsi yoona nitwegesa obukaikuru n’obukaikuru bw’abeegi ba Baibuli. Baitu nk’oku twarozere omu kicweka ekyahoire, nitugonza kukonyera abeegi ba Baibuli abandi omu bukaikuru obu, nabo kubatizibwa. Omu kicweka kinu, nitwija kubazaaho ebintu ebindi bitaano buli mwegesa aine kukora kukonyera omwegi kukurakurana akahika ha kubatizibwa.

4. Habwaki omwegesa asemeriire kuba n’okwetanga obwaraaba nayegesa omwegi owa Baibuli? (Rora obugambo obwa hansi.)

⁴ Tugonza ebitwegesa abandi kuruga omu Baibuli. Nahabweki kinu nikisobora kutuletera kubaza muno obuturukuba nitwegesa. Baitu, katube nitwebembera Omunaara gw’Okwega, Okwega Baibuli nk’Ekitebe, rundi nitwegesa omwegi owa Baibuli, titusemeriire kubaza muno. Kusobora kuleka Baibuli niyo ekegesa, omwegesa asemeriire kuba n’okwetanga kandi atalengaho kusoborra buli kimu eky’amanyire ha rukarra rundi ha isomo. * (Yoh. 16:12) Tekerezaaho eby’okaba omanyire ha Baibuli ha bwire nambere wabatiriziibwe n’eby’omanyire hati. Nosobora kuba okaba noyetegereza enyegesa ezirukubandirizibwaho zonka. (Baheb. 6:1) Kikutwaliire emyaka kwega eby’omanyire hati, nahabweki, otalengaho kwegesa omwegi omuhyaka buli kimu kyona ha murundi gumu.

5. (a) Kusigikirra ha 1 Abasesalonika 2:13, kiki ekiturukugonza omwegi waitu ayetegereze kuruga omu kwega kwe? (b) Nitusobora tuta kwekambisa omwegi kubazaaho ebintu ebyarukwega?

⁵ Nitugonza omwegi waitu akimanye ngu eby’arukwega nibiruga omu Baibuli. (Soma 1 Abasesalonika 2:13.) Eki nitusobora kukikora tuta? Wekambise omwegi kubazaaho ebintu ebyarukwega. Omu kiikaro ky’okwikara n’omusoborra enkarra za Baibuli, musabe akusoborre zimu hali zo. Konyera omwegi kurora omulingo Ekigambo kya Ruhanga kirukumukwataho. Mukaguze ebikaguzo ebiramuleetera kubaza ekimuli ha mutima ekirukukwata ha byahandikirwe eby’asoma. (Luk. 10:25-28) Ekyokurorraho, mukaguze: “Ekyahandiikirwe kikukonyire kita kwetegereza gumu ha miringo ya Yahwe?” “Amananu agali omu Baibuli nigasobora gata kukukonyera?” “Noyehurra ota ha bintu ebiwaruga kwega?” (Nfu. 20:5) Ekikuru tikiri omwegi kumanya bingi, baitu ekikuru kiri, kugonza n’okuteeka omu nkora eby’amanyire.

6. Habwaki nikisobora kuba kirungi kugenda n’omwegesa omukugu, kwegesa omwegi wawe?

⁶ Obwoba nogenda kwegesa omwegi wa Baibuli, haroho obwogenda n’abatebezi abakugu  omu kwegesa? Obworaaba okikora, nosobora kubakaguza ha mulingo oyegesaamu kandi obworaaba okozesa kurungi Baibuli omu kwegesa. Osemeriire kwebundaaza obworaaba oli w’okusemezaamu omulingo oyegesa. (Lengesaniza na Eng. 18:24-26.) Hanyuma kaguza omutebezi omukugu obwaraaba n’arora ngu omwegi n’ayetegereza eby’arukwega. Nosobora n’okusaba omutebezi ogu kwegesa omwegi wawe obworaaba otarukwija kubaho kumara wiiki emu n’okukiraho. Eki nikiija kusobozesa omwegi kugumizaamu nasoma kandi nikiija kwoleka omwegi obukuru bw’okusoma. Otalyehurra ngu habwokuba ogu mwegi “wawe,” busaho ondi wena asobora kumwegesa. Ekikuru kiri, nogonza omwegi aikale nayega nukwo asobole kwikara n’akurakurana omu mananu.

7. Kiki ekirakonyera omwegi kugonza eby’arukwega?

⁷ Nikyetaagisa omwegi arole ngu oine obutagasi kandi ngu n’ogumya amananu agali omu Baibuli. (1 Bas. 1:5) Eki nikisobora kumuletera kugonza ebintu eby’arukwega. Obukiraaba kisemeriire, mugambire omulingo ogasiirwe habw’okuhondera emisingi ya Baibuli. Eki nikiija kumukonyera kumanya ngu Baibuli erumu obuhabuzi obusobora kumugasira.

8. Kintu ki ekindi eky’osobora kukora kukonyera omwegi wawe owa Baibuli kandi habwaki kirungi kukikora?

⁸ Obumuraaba nimwega, gambira omwegi wawe ebyokurorraho eby’abaireho kwo eby’abantu abatungire ebizibu nk’ebye kandi babisingura. Nosobora kugenda n’omutebezi ondi ow’ekyokurorraho kye kisobora kugasira omwegi ogu. Rundi nosobora kukozesa ebyokurorraho ebiri ha jw.org nambere hali “The Bible Changes Lives.” * Ebicweka na vidiyo nk’ebi nibiija kukonyera omwegi wawe kukyetegereza ngu ky’amagezi muno kuteeka omu nkora emisingi ya Baibuli omu bwomeezi bwe.

9. Nosobora ota kwekambisa omwegi kugambiraho ab’omu ka ye, hamu n’abanywani be ebyarukwega?

⁹ Omwegi obwaraaba ali omu buswere, omugonzebwa we na uwe nayega Baibuli? Obwaraaba atarukwega, muraalize abeteranizeeho. Wekambise omwegi wawe kugambiraho ab’omu ka ye hamu n’abanywani be ebyarukwega. (Yoh. 1:40-45) Omu mulingo ki? Nosobora kumukaguza oti: “Enyegesa enu nosobora ota kugisoborra ab’omu ka yawe?” rundi “Kyahandiikirwe ki eky’osobora kukozesa kusoborra munywani wawe ensonga enu?” Omu mulingo gunu, noija kuba notendeka omwegi kufooka mwegesa. Hanyuma obw’alikirizibwa, n’asobora kutandika  kutebeza n’ekitebe nk’omutebezi atakabatiziibwe. Nosobora kukaguza omwegi obwaraaba amanyire omuntu ondi wena ow’arukugonza kwegesebwa Baibuli. Obwaraaba aine ow’amanyire, muhukirre aho naaho kandi omusabe kwega na uwe Baibuli. Mwoleke vidiyo Omulingo Twegesa Abantu Baibuli? *

10. Nk’oku kyolekerwe omu 1 Abasesalonika 2:7, 8, omwegesa nasobora ata kuhondera ekyokurorraho kya Paulo?

¹⁰ Abegesa ba Baibuli basemeriire kufaaho abeegi baabo kuruga ha mutima. Barole nk’aboruganda na banyaanya itwe ab’obwire obw’omu maiso. (Soma 1 Abasesalonika 2:7, 8.) Abeegi tikibanguhira kuleka abanywani baabo ab’ensi kandi n’okora empindahinduka zoona ezirukwetagisa kuheereza Yahwe. Tusemeriire kubakonyera kutunga abanywani aburungi omu kitebe. Fooka munywani w’omwegi wawe kuraba omu kutunga obwire kuba na uwe, hatali obworaaba noyega na uwe Baibuli honka baitu na ha bwire obundi. Obw’omuterra esimu, okamusindikira obutumwa, rundi okamubungiraho kake ha biro ebindi, kyoleka ngu n’omufaaho mali.

11. Kiki ekiturukugonza abeegi baitu batunge omu kitebe, kandi habwaki?

¹¹ Haroho orufumo orukugamba ngu: “Kyetaagisa ekyaro kyona kukuza omwana.” Nitusobora kugamba ngu: “Kyetaagisa ekitebe kyona kufoora omuntu mwegeswa.” Enu niyo ensonga habwaki abegesa ba Baibuli abarungi banjura abeegi baabo hali abandi omu kitebe abasobora kubakonyera kwirra haihi na Yahwe. Eki kisobozesa abeegi kugonza kwikara n’abantu ba Yahwe, abarabasagika omu by’omwoyo hamu n’omu miringo endi. Nitugonza buli mwegi wena ayehurre ngu ali kicweka ky’ekitebe kandi ali mu ka yaitu ey’eby’omwoyo. Nitugonza omwegi asikiirizibwe okugonza okuli hagati yaitu nk’ab’oruganda. Hanyuma nikiija kumwanguhira kuleka abanywani abatarukumukonyera kugonza Yahwe. (Nfu. 13:20) Abanywani abaabaire aine obubaramunoba, naija kuba akimanyire ngu nagenda kutunga abanywani abarungi omu kitebe kya Yahwe.​—Mar. 10:29, 30; 1 Pet. 4:4.

12. Habwaki tusemeriire kubaza n’omwegi waitu ha kwehayo n’okubatizibwa?

¹² Bazaaho n’omwegi wawe otarukusereka kintu kyona ha nsonga ey’okwehayo n’okubatizibwa. Kinu kikuru habwokuba ekigendererwa kyaitu eky’okumwegesa Baibuli kiri  ky’okumukonyera kufooka mwegeswa ow’abatiziibwe. Omu meezi make hanyuma y’okutandika kwega n’omwegi Baibuli otarukwosa, kandi kukira muno obwaraaba atandikire kwija omu nsorrokano, omwegi asemeriire kukyetegereza ngu ekigenderewa eky’okwega Baibuli kiri ky’okumukonyera kutandika kuheereza Yahwe nk’omu h’Abakaiso Be.

13. Biki omwegi eby’asemeriire kukora kusobora kubatizibwa?

¹³ Mpora mpora, omwegi wa Baibuli ow’ataireho omutima naija kuhika ha kigendererwa kye eky’okubatizibwa! Omwegi atandika n’okumanya Yahwe, kumugonza, kandi n’okutunga okwikiriza omuli Uwe. (Yoh. 3:16; 17:3) Hanyuma omwegi atunga enkoragana enungi na Yahwe hamu n’ab’oruganda na banyaanya itwe omu ekitebe. (Baheb. 10:24, 25; Yak. 4:8) Ha kumalirra, omwegi aleka ebikorwa ebibi kandi ayegarukamu ebibi bye. (Eng. 3:19) Ha kaire nuko kamu, okwikiriza kwe kumwekambisa kugambiraho abandi eby’ayegere. (2 Kol. 4:13) Hanyuma ayehayo hali Yahwe kandi abatizibwa kwoleka okwehayo kwe. (1 Pet. 3:21; 4:2) Eki, mali kiretera buli omu okusemererwa! Omwegi obwaraaba n’akora ebintu eby’asemeriire kukora kusobora kubatizibwa, musiime kuruga ha mutima kandi omwekambise kugumizaamu nakurakurana.

14. Omwegesa n’asobora ata kwekebiija okukurakurana kw’omwegi?

¹⁴ Tusemeriire kugumiisiriza obuturukuba nitukonyera omwegi kukurakurana kuhika ha kwehayo n’okubatizibwe. Baitu hanyuma y’akasumi, tusemeriire kumanya obwaraaba n’agonza kuheereza Yahwe. Norora obw’okurorraho oburukwoleka ngu nalengaho kworobera ebiragiro bya Yesu? Rundi n’agonza kumanya kwonka ebiri omu Baibuli?

15. Kiki ekirayoleka omwegesa ngu omwegi n’akurakurana kuhika ha kubatizibwa?

¹⁵ Ikara n’oyekebiija nambere omwegi yahika omu kukurakurana kwe. Ekyokurorraho, omu bigambo bye ayoleka omulingo arukwehurra hali Yahwe? Asaba hali Yahwe? (Zab. 116:1, 2) Ayegondeza omu kusoma Baibuli? (Zab. 119:97) Aija omu nsorrokano obutoosa? (Zab. 22:22) Akozere empindahinduka ezirukwoleka ngu n’ateeka omu nkora ebyarukwega? (Zab. 119:112) Yakatandikire kugambiraho abanyabuzaale be hamu n’abanywani ebyarukwega? (Zab. 9:1) Ekikuru muno, n’agonza kufooka omu h’Abakaiso ba Yahwe? (Zab. 40:8) Omwegi obwaraaba atarukukurakurana omu gumu ha miringo egi, kozesa amagezi olengeho kumanya  habwaki, kandi hanyuma omu mulingo gw’embabazi bazaaho ensonga egi kandi omwoleke ekizibu kye. *

16. Kiki ekisobora kwoleka ngu osemeriire kuleka kwegesa omwegi wa Baibuli?

¹⁶ Ikara n’oyekebiija kurora obukiraaba nikyetaagisa kugumizaamu noyega n’omuntu. Wekaguze: ‘Omwegi alemwa kutekaniza ebimurukugenda kusoma? Tagonza kwija omu nsorrokano? Aky’aine engeso embi? Aky’ali omu diini ey’ebisuba?’ Ekyokugarukamu obukiraaba kiri ego, kugumizaamu nosoma na uwe nikisisana n’okulengaho kwegesa omuntu kuziha baitu atarukugonza amaizi gamukwateho! Omwegi obwaraaba atarukusiima eby’arukwega kandi tarukugonza kukora empindahiduka, habwaki ogumizaamu noyega na uwe?

17. Kusigikirra ha 1 Timoseo 4:16, abegesa ba Baibuli boona basemeriire kukora ki?

¹⁷ Omulimo ogw’okufoora abantu abegeswa mukuru muno hali itwe, kandi nitugonza kukonyera abeegi baitu aba Baibuli kukurakurana bakahika ha kubatizibwa. Enu niyo nsonga habwaki tusemeriire kukozesa Baibuli omu kwegesa kwaitu, kwegesa n’obutagasi kandi n’okwoleka ngu nitugumya ebiturukwegesa. Nitwija kwekambisa omwegi kutunga abanywani omu kitebe. Nitwija kwikara nitubazaaho obukuru obw’okwehayo n’okubatizibwa, kandi nitwija kwikara nitwekebiija okukurakurana kw’omwegi. (Rora akasanduuko “ Abegesa Ebibaine kukora Kukonyera Abeegi Kuhika ha Kubatizibwa.”) Nikitusemeza kurora ngu twine omugisa ogw’okwejumbira omu mulimo ogw’okujuna obwomeezi! Leka tucweremu kimu kukora kyona ekirukusoboka kukonyera abeegi ba Baibuli kukurakurana bakahika ha kubatizibwa.