1. Ekyahandiikirwe ekiri omu 2 Abakolinso 3:1-3 nikitukonyera kita kumanya nk’oku mugisa gw’amaani kwegesa omuntu Baibuli kandi akahika ha kubatizibwa? (Rora ekisisani ekya ha kyesweko.)

OYEHURRA ota obworora omwegi wa Baibuli kuruga omu kiikaro eky’ekitebe kyanyu kitebezaamu n’abatizibwa? Eki, kiine kuba kikusemeza muno. (Mat. 28:19) Kandi kakuba niiwe w’asomere n’omwegeswa onu omuhyaka, osemererwa muno obw’abatizibwa! (1 Bas. 2:19, 20) Abegeswa abahyaka bali ‘bbaruha ez’okuranga’ enungi habw’abo ababegeseze kandi na habw’ekitebe kyona.​—Soma 2 Abakolinso 3:1-3.

2. (a) Kikaguzo ki ekikuru ekitusemeriire kutekerezaaho kandi habwaki? (b) Omwegi wa Baibuli nuwe oha? (Rora obugambo obuli hansi.)

² Mali nikisemeza muno kukimanya ngu omu myaka ena ey’ehingwireho abantu nka 10,000,000 nubo bayegesiibwe Baibuli * buli kwezi. Kandi omu myaka egi abantu abarukuhingura omu 280,000 babatizibwaga buli mwaka nk’Abakaiso ba Yahwe kandi bafooka abegeswa ba Yesu abahyaka. Nitusobora tuta kukonyera abeegi ba Baibuli abandi omu bukaikuru obu, nabo kubatizibwa? Yahwe akyahaire abantu omugisa ogw’okufooka Abakaiso be. Egi niyo nsonga habwaki nitugonza kukora kyona ekiturukusobora kubakonyera omu bwangu kukurakurana bakahika ha kubatizibwa habwokuba obwire buhoireyo!​—1 Kol. 7:29a; 1 Pet. 4:7.

3. Biki ebiturukwija kwega omu kicweka kinu ebirukukwata ha kwegesa abantu Baibuli?

 ³ Nk’oku kiri kikuru muno hati kukonyera abantu kufooka abegeswa, Akatebe Akalemi kakakaguza ofiisi z’amataagi ebintu ebitusobora kukora kukonyera abeegi ba Baibuli abarukukiraho kukurakurana bakabatizibwa. Omu kicweka kinu hamu n’ekirukwongeraho, nitwija kurora ebitusobora kwegera ha bapayoniya abakugu, abamisaani, hamu n’abaroleerezi ab’ebicweka. * (Nfu. 11:14; 15:22) Nibasoborra ebintu abegesa hamu n’abeegi ba Baibuli ebibasobora kukora nukwo omwegi asobole kugasirwa omu kwega kwe. Omu kicweka kinu, nitwija kubazaaho ebintu bitaano buli mwegi asemeriire kusobora kukurakurana kuhikaha kubatizibwa.

4. Kiki ekitusemeriire kumanya ha kwegeseza abantu ha miryango yabo?

⁴ Ab’oruganda na banyaanya itwe baingi nibegeseza abantu Baibuli ha miryango yabo. N’obukiraaba ngu omulingo gunu gukonyera abantu kugonza kumanya ebiri omu Baibuli, kwega kunu kukira kutwara obwire buke kandi nikisobora n’okuguma kwega buli wiiki. Abatebezi abamu basaba omuntu ow’ayolekere okugonza enamba ye ey’esimu kandi b’amuterra rundi b’amusindikira obutumwa oburukukwata ha Baibuli, obubaba batakagarukireyo kwega na uwe. Nibasobora kugumizaamu nibabaza n’omuntu ogu kumara ameezi maingi baitu omuntu ogu atafookere mwegi wa Baibuli omurungi. Mali omwegi ow’amara obwire buke nayega Baibuli n’asobora kukurakurana akahika ha kubatizibwa? Tikyanguhire.

5. Kusigikirra ha Luka 14:27-33, kiki Yesu ekiyabalizeeho ekitusobora kukozesa kukonyera abeegi baitu ba Baibuli?

⁵ Kiro kimu, Yesu akakozesa ekyokurorraho kusoborra kiki omuntu asemeriire kukora kufooka mwegeswa we. Akabazaaho omuntu ow’arukugonza kwombeka orukomera [omunaara] hamu n’omukama ow’arukugonza kugenda omu bulemu. Yesu akagamba ngu ow’arukugonza kwombeka orukomera asemeriire ‘kubanza kwikarra akabalirra eby’emirimo yarwo’ kusobora kurumalirra kandi n’omukama asemeriire ‘kubanza okwikarra akahanura’ kurora amahe ge obugaraaba nigasobora kuhikiriza eky’arukwenda. (Soma Luka 14:27-33.) Omu mulingo nugwo gumu, Yesu akaba akimanyire ngu omuntu ow’arukugonza kufooka mwegeswa we, asemeriire kwecumitirizaaho kurungi eky’asemeriire kukora kumuhondera. Habw’ensonga egi, tusemeriire kwekambisa  abeegi baitu ba Baibuli kwega naitwe buli wiiki. Eki nitusobora kukikora tuta?

6. Kiki ekitusobora kulengaho kukora kusobora kukonyera abeegi baitu kukurakurana?

⁶ Tandika noyongeraho obwire obumumara nimwegera ha mulyango gwe. Obundi nosobora kubazaahoga enkarra ebiri omu kiikaro ky’orukarra rumu, buli murundi omu bungira. Kakuba omuntu ogu amara kumanyiira kwega habw’akasumi akaraihireho, mukaguze obwaraaba aine ekiikaro nambere musobora kwikarra kandi mukagumizaamu n’okwega. Ekyarakugarukamu nikiija kukwoleka obwaraaba natwara okwega kwe okwa Baibuli nk’ekikuru. Hanyuma, kusobora kumukonyera kukurakurana bwangu nosobora kumukaguza obwaraaba n’asobora kusomaga emirundi ebiri omu wiiki. Baitu, kusoma emirundi ebiri buli wiiki tikirukumara.

7. Omwegesa n’asobora ata kwetekaniza kurungi buli murundi aba n’agenda kwegesa Baibuli?

⁷ Nk’omwegesa, osemeriire kutekaniza kurungi buli murundi oraaba nogenda kwegesa. Nosobora kubanza kusoma ebimurukugenda kwega hamu n’ebyahandiikirwe. Wetegereze kurungi ensonga enkuru. Tekerezaaho omutwe ogw’isomo eri, emitwe entaito, ebikaguzo ebyolekerwe, ebyahandiikirwe ebiroho “soma”, ebisisani, hamu na vidiyo ezisobora kukukonyera kusoborra isomo eri. Hanyuma tekerezaaho omwegi wawe owa Baibuli, hamu n’omulingo oramusoborramu isomo eri omu mulingo ogwanguhire kandi oguramukonyera kwetegereza n’okuteeka omu nkora eby’ayegere.​—Neh. 8:8; Nfu. 15:28a.

8. Ebigambo eby’omukwenda Paulo ebiri omu Abakolosai 1:9, 10 nibitwegesa ki ha kusabira abeegi baitu ba Baibuli?

⁸ Omu kutekaniza kwawe, saba Yahwe omugambire ebirukukwata ha mwegi wawe, hamu n’ebyetaago bye. Saba Yahwe akukonyere kumwegesa nosigikirra ha Baibuli, omu mulingo oguramuhika ha mutima. (Soma Abakolosai 1:9, 10.) Lengaho kutekerezaaho ekintu kyona ekisobora kumugumira kwetegereza rundi kwikiriza. Kandi oikale okimanyire ngu ekigendererwa kyawe kiri ky’okumukonyera kukurakurana akahike ha kubatizibwa.

9. Omwegesa n’asobora ata kukonyera omwegi we kutekaniza kara eby’arukugenda kwega? Soborra.

⁹ Nitunihira ngu kuraba omu kwegesa omwegi butoosa, nikiija kumukonyera kusiima Yahwe hamu na Yesu habw’ebintu ebibamukoliire kandi kimuletere kugonza kumanya ebirukukiraho.  (Mat. 5:3, 6) Omwegi kusobora kugasirwa kurungi omu kwega kwe, asemeriire kuteekaho omutima eby’arukwega. Kusobora kumukonyera kutaaho omutima, musoborre habwaki kikuru kutekaniza buli murundi aba nagenda kwega, kuraba omu kusoma kara n’okwecumitirizaaho omulingo ebimurayega bisobora kumugasira. Nosobora ota kumukonyera kutekaniza? Tekaniza na uwe isomo limu nukwo kimukonyere kumanya eky’okukora. * Musoborre nk’oku asobora kuzoora eby’okugarukamu eby’ebikaguzo, kandi omwoleke nk’oku kusazaaho ebigambo ebimu nikisobora kumukonyera kwijuka bwangu eky’okugarukamu. Hanyuma omugambire kugarukamu omu bigambo bye habwe. Obw’arakugarukamu omu bigambo bye, noija kusobora kumanya omulingo ayetegeriize ebimurukwega. Haroho ekintu kindi eky’osemeriire kwekambisa omwegi wawe kukora.

10. Habwaki kikuru kusoma Baibuli buli kiro, kandi kiki omwegi eky’asemeriire kukora kugasirwa omu kugisoma?

¹⁰ Kwongerra ha kwega n’omwegesa we buli wiiki, haroho ebintu omwegi asobora kukora wenka buli kiro ebisobora kumugasira. Asemeriire kubaza na Yahwe. Omu mulingo ki? Kuraba omu kuhuliiriza n’okubaza na uwe. N’asobora kuhuliiriza Ruhanga kuraba omu kusoma Baibuli buli kiro. (Yos. 1:8; Zab. 1:1-3) Mwoleke omulingo asobora kukozesa “Puroguraamu ey’Okusoma Baibuli Buli Kiro” ey’eri ha jw.org^® * kandi ei tusobora kupuritinga. Kandi kusobora kumukonyera kugasirwa omu kusoma Baibuli, mwekambise kwecumitirizaaho eby’erukumwegesa hali Yahwe hamu n’omulingo asobora kuteeka omu nkora eby’arukwega.​—Eng. 17:11; Yak. 1:25.

11. Omwegi n’asobora ata kwega kusaba kurungi, kandi habwaki kikuru asabe Yahwe buli kiro?

¹¹ Wekambise omwegi wawe kubaza na Yahwe kuraba omu kusaba buli kiro. Saba kuruga ha mutima buli murundi oraaba n’otandika kandi n’omalirra okwega na uwe, kandi obazeeho omwegi wawe omu saara ezi. Obwaraaba n’ahuliiriza esaara zaawe, naija kwega omulingo asobora kusaba kuruga ha mutima kandi nk’oku asemeriire kusaba hali Yahwe kurabira omu ibara lya Yesu. (Mat. 6:9; Yoh. 15:16) Tekerezaaho omulingo kusoma Baibuli buli kiro (kuhuliriza Yahwe) kandi n’okusaba (kubaza na Yahwe) birakonyera omwegi wawe kwikara n’ayeyongera kwirra haihi na Ruhanga! (Yak. 4:8) Kukora ebintu binu buli kiro, nikiija kukonyera  omwegi wawe kutunga ekintu kindi ekiramurugirramu kwehayo n’okubatizibwa.

12. Omwegesa n’asobora ata kukonyera omwegi we kutunga enkoragana enungi na Yahwe?

¹² Ebintu omwegi ayega kuruga omu Baibuli tasemeriire kubimanya kwonka baitu bisemeriire kumuhika ha mutima. Habwaki? Habwokuba omutima gwaitu gutwarramu ebitwegomba, n’enyehurra zaitu, kandi nugwo gutuletera kwetwaza omu mulingo twetwazaamu. Yesu akegesa abantu ebintu bingi kandi abantu bagonzaaga abegese. Baitu abantu bamuhonderaga habwokuba yahikaga ha mitima yabo. (Luk. 24:15, 27, 32) Omwegi wawe asemeriire kukirora ngu Yahwe aroho kwo, n’asobora kutunga enkoragana enungi na uwe, kandi ngu Yahwe n’asobora kufooka Ise, Ruhanga we, kandi Munywani we. (Zab. 25:4, 5) Omu kwega kwanyu okwa Baibuli, mukonyere kwetegereza emiringo ya Yahwe erukusikiiriza. (Kurug. 34:5, 6; 1 Pet. 5:6, 7) Kinu kikole omu masomo goona agamurayegaho. Konyera omwegi wawe kukirora ngu Yahwe aine okugonza, embabazi, kandi asalirirwa abantu. Yesu akagamba ngu ‘ekiragiro ekikuru ekirukubanza’ nikyo “Gonza [Yahwe] Ruhanga wawe.” (Mat. 22:37, 38) Lengaho kukonyera omwegi wawe kugonza Ruhanga kuruga ha mutima.

13. Bazaaho omulingo gumu ogutusobora kukozesa kukonyera omwegi kwegaho emiringo ya Yahwe erukusikiiriza.

¹³ Obworaaba n’obaza n’omwegi wawe, musoborre habwaki ogonza muno Yahwe. Kinu nikisobora kumukonyera kukyetegereza nk’oku na uwe asemeriire kutunga enkoragana eye na Ruhanga. (Zab. 73:28) Ekyokurorraho, haroho akacweka omu kitabu ekimurukwega rundi omu kyahandiikirwe, akogonza muno akarukwoleka nk’oku Yahwe aine okugonza, amagezi, obwinganiza, rundi amaani? Kasoborre omwegi wawe, kandi omugambire ngu enu niyo emu ha nsonga habwaki ogonza muno Isiitwe ow’omu iguru. Haroho ekintu ekindi buli mwegi wena asemeriire kukora kusobora kukurakurana akahika ha kubatizibwa.

14. Ekyahandiikirwe ekiri omu Abaheburaniya 10:24, 25 nikitugambira ki ha nsorrokano, ekisobora kukonyera omwegi wa Baibuli kukurakurana?

¹⁴ Itwena nitugonza abeegi baitu bakurakurane bahike ha kubatizibwa. Omulingo gumu tusobora kubakonyera kukikora nugwo ogw’okubekambisa kwija omu nsorrokano ez’ekitebe. Abegesa abakugu nibagamba ngu abeegi abatandikiraho kwija omu nsorrokano bakurakurana bwangu muno. (Zab. 111:1) Abegesa abamu basoborra abeegi baabo ngu haroho  ebintu bindi bingi ebibatarukwija kubegesa baitu ebibarukwija kwegera omu nsorrokano. Soma Abaheburaniya 10:24, 25 n’omwegi wawe, kandi omusoborre ebirungi eby’aratunga obw’araija omu nsorrokano. Mwoleke vidiyo Biki Ebikolebwa omu Kingdom Hall? * Konyera omwegi wawe kucweramu kimu kutoosa orusorrokano na rumu.

15. Kiki ekitusobora kukora kwekambisa omwegi waitu kwija omu nsorrokano butoosa?

¹⁵ Kiki eky’osobora kukora kakuba omwegi wawe aba atakaizire omu rusorrokano rwona rundi aija n’ayosa? N’omuhimbo mwingi mugambire ekintu ekiwayegere omu rusorrokano orumurugire kutunga. Eki nikisobora kumuletera kugonza kwija kukira kumuraaliza kwonka. Muhe Omunaara gw’Omulinzi rundi Akatabu k’Enso’rokano ak’Obwomeezi n’Obuheereza Bwaitu nk’Abakristaayo akamuliyo nimwega omu nsorrokano. Mwoleke ebicweka ebimurayegaho omu rusorrokano orurahonderaho, kandi mukaguze ekicweka eky’amusemeza ekiyakugondeze kwegaho. Omwegi wawe eby’ararora kandi akahurra ha rusorrokano rwe orw’okubanza nibiija kukirra hara ebintu ebiyarozere n’ebiyahuliire omu rusorrokano orw’ediini endi yoona. (1 Kol. 14:24, 25) Kandi naija kutangatangana abantu abataireho ekyokurorraho ekirungi abaasobora kwegeraho kandi abaramukonyera kukurakurana akahika ha kubatizibwa.

16. Kiki ekirukwetagisibwa kusobora kwegesa abeegi ba Baibuli bakahika ha kubatizibwa, kandi kiki ekiturukwija kwega omu kicweka ekirahonderaho?

¹⁶ Nitusobora tuta kwegesa Abeegi ba Baibuli bakahika ha kubatizibwa? Nitusobora kukonyera buli mwegi kurora obukuru bw’okwega Baibuli kuraba omu kumwekambisa kwega buli wiiki hamu n’okutekaniza buli murundi aba n’agenda kwega. Tusemeriire kumwekambisa kuhuliiriza n’okubaza na Yahwe buli kiro, kandi n’okutunga enkoragana enungi na uwe. Tusemeriire n’okumwekambisa kugenda omu nsorrokano ez’ekitebe. (Rora akasanduuko ha rupapura 12, “ Abeegi Ebibasemeriire Kukora Kusobora Kukurakurana Bakahika ha Kubatizibwa.”) Baitu nk’oku ekicweka ekirayongeraho kirasoborra, haroho ebintu ebindi bitaano abegesa ba Baibuli ebibasobora kukora kukonyera abeegi baabo kuhika ha kubatizibwa.