1-2. (a) Enyikara ekaba nisisana eta omu Buyudaaya nambere omukwenda Paulo yahandiikire Abaheburaniya ebbaruha? (b) Habwaki nitugamba ngu ebbaruha enu ekaizira omu bwire bwonyini?

 ABAKRISTAAYO Abayudaaya abakaba nibaikara omu Yerusalemu na Buyudaaya baakahikwaho enyikara ezigumangaine emyaka eyahondiireho hanyuma y’okufa kwa Yesu. Omu kasumi ako, ekitebe Ekikristaayo kikatandikwaho kandi Abakristaayo bakahikwaho okuhiiganizibwa okw’amaani muno. (Eng. 8:1) Hanyuma y’emyaka 20 kurabaho, abahondezi ba Kristo bakahikwaho ebizibu omu byentahya ebisobora kuba byaleeserweho enjara ey’ekaba eri omu kicweka kyabo. (Eng. 11:​27-30) Baitu nk’omu mwaka gwa 61 Y.A.K, Abakristaayo bakaba batarukuhiiganizibwa nk’oku kikaba nikiija kubahikaho omu kasumi ak’omumaiso. Omu kasumi ako, Yahwe akakozesa omwoyo gwe ogurukwera kuteerekereza omukwenda Paulo kubahandiikira ebbaruha. Obuhabuzi obukaba buli omu bbaruha egi, nubwo bwonyini obu bakaba nibetaaga kweteekaniriza ekikaba kiri haihi kubahikaho.

² Ebbaruha eyahandiikirwe Abaheburaniya ekaizira omu bwire bwonyini habwokuba obusinge Abakristaayo bakaba nibegondezaamu omu kasumi ako, bukaba butarukwija kwikaraho. Paulo akabaha amagezi agaakubakonyiire kugumiisiriza omuhito ogu bakaba bali haihi kuhikwaho. Okuhwerekerra kwa Yerusalemu Yesu oku akaba arangire kukaba kwiriire haihi. (Luk. 21:20) Baitu k’abe Paulo rundi Abakristaayo ab’omu Buyudaaya, busaho n’omu akaba amanyire ekiro okuhwerekerra kunu kwakubaireho. Baitu nabwo, Abakristaayo abo bakaba basemeriire kukozesa obwire obukaba busigaireyo kweteekaniza obu nibakurakuraniza emiringo nk’okwikiriza n’okugumiisiriza.—Baheb. 10:25; 12:​1, 2.

3. Habwaki Abakristaayo kasumi kanu basemeriire kuteeka omutima ha bbaruha eyahandikiirwe Abakristaayo Abaheburaniya?

 ³ Naitwe tuli haihi kuhikwaho omuhito ogurukukirra hara ogu ogwahikireho Abakristaayo Abaheburaniya. (Mat. 24:21; Kus. 16:​14, 16) Nahabweki, leka tubazeeho bumu ha buhabuzi Yahwe obu yahaire Abakristaayo abo kandi turole omulingo na itwe busobora kutugasira kasumi kanu.

“MWEKAMBE KUKURAKURANA”

4. Abakristaayo Abayudaaya, bakahikwaho ebizibu bya mulingo ki? (Rora n’ekisisani.)

⁴ Abakristaayo Abayudaaya bakahikwaho ekizibu eky’amaani. Kumara akasumi, Abayudaaya baali bantu ba Yahwe abakomerwemu. Omukama ayakikirraga Yahwe yalemeraga Yerusalemu, kandi abantu baaramyaga Yahwe ha yekaru ey’ekaba eri omu Yerusalemu. Abayudaaya boona abesigwa baahonderaga Ebiragiro bya Musa ebyabeegesebwaga abebembezi baabo ab’amadiini. Enyegesa ezi zaakwatahoga ebyokulya ebi baalyaga, omulingo baaroramuga okusarwa, hamu n’enkoragana yaabo n’abanyamahanga. Baitu Yahwe akaba atakyaikiriza ebihongwa eby’Abayudaaya hanyuma y’okufa kwa Yesu. Kinu kikafooka kizibu ky’amaani hali Abakristaayo Abayudaaya abakaba bamanyiriire kuhondera Ebiragiro bya Musa. (Baheb. 10:​1, 4, 10) N’Abakristaayo abakuzire omu by’omwoyo nk’omukwenda Petero, kikabagumira kumanyirra empindahinduka zinu. (Eng. 10:​9-14; Bag. 2:​11-14) Enyikiriza zinu empyaka, zikaleetera abebembezi b’amadiini Abayudaaya kuhiiganiza Abakristaayo abo.

5. Kiki Abakristaayo Abayudaaya eki bakaba basemeriire kwetantara?

⁵ Abakristaayo Abayudaaya bakaba nibahakanizibwa guruupu ibiri ez’abantu. Guruupu ey’okubanza ekaba y’abebembezi b’ediini y’Ekiyudaaya abakaba nibabatwaza nk’abantu abecwireho ediini yaabo. Kwongerraho, bamu h’Abakristaayo omu kitebe bakaba nibagamba ngu Abakristaayo basemeriire kugumizaamu nibahondera Ebiragiro bya Musa obundi habwokuba bakaba nibagonza kwetantara okuhiiganizibwa. (Bag. 6:12) Kiki ekyakukonyiire Abakristaayo abesigwa kugumira h’amananu?

6. Paulo akekambisa Abakristaayo bagenzi be kukora ki? (Abaheburaniya 5:14–6:1)

 ⁶ Omu bbaruha Paulo ei yahandikiire Abaheburaniya, akekambisa Abakristaayo bagenzi be kusoma n’okwecumiitirizaaho Ekigambo kya Ruhanga. (Soma Abaheburaniya 5:14–6:1.) Obu naakozesa ebyahandiikirwe eby’Oruheburaniya, Paulo akasoborra ensonga habwaki omulingo baaramyamuga Yahwe gwali nigukirra hara endamya ey’Ekiyudaaya. a Paulo akekambisa Abayudaaya kumanya kurungi amananu kuruga omu byahandiikirwe n’okugetegereza, basobole kumanyirra enyegesa ezitahikire n’okuzetantara nukwo batahabisibwa.

7. Bizibu ki ebi tutangatangana kasumi kanu?

⁷ Kusisanaho n’Abakristaayo Abaheburaniya, na itwe tutangatangana abantu abarukurarangya enyegesa n’enteekereza ezitarukwikiranganiza n’endengo za Yahwe ez’okuhikirra. Abarukutuhakaniza bakira kubazaaho kubi enyegesa zaitu ezirukusigikirra ha Baibuli, ezirukukwata ha ngeso, obu nibateekereza ngu titufaaho abandi rundi ngu nitubasoroora. Omulingo abantu bateekereza nigweyongerra kimu kwahukana n’omulingo Yahwe ateekereza. (Nfu. 17:15) Nahabweki, tusemeriire kugumya obusobozi bwaitu obw’okumanyirra n’okwanga enteekereza ezitahikire abarukutuhakaniza ezi bakozesa, obu nibalengaho kutumaramu amaani n’okutuhabisa.—Baheb. 13:9.

8. Kiki ekisobora kutukonyera kugumizaamu nitukurakurana omu by’omwoyo?

⁸ Kikuru muno kuteeka omutima ha buhabuzi Paulo obu yahaire Abakristaayo Abaheburaniya obw’okugumizaamu nibakurakurana omu by’omwoyo. Kinu nikitwarramu okumanya amananu agahamire, n’okumanya kurungi omulingo Yahwe ateekerezaamu. Kinu tugumizaamu nitukikora na hanyuma y’okwehayo n’okubatizibwa. Katube tumazire obwire oburukwingana ki omu mananu, itwena tusemeriire kwikara nitusoma kandi nitwesomesa Ekigambo kya Ruhanga. (Zab. 1:2) Kuba n’enteekaniza enungi ey’okwesomesa nikiija kutukonyera kugumya omulingo Paulo ogu yabalizeeho omu bbaruha ei yahandiikire Abaheburaniya kandi ogu nugwo okwikiriza.—Baheb. 11:​1, 6.

‘TUBE N’OKWIKIRIZA KUSOBORA KUJUNA OBWOMEEZI BWAITU’

9. Habwaki Abakristaayo Abaheburaniya bakaba nibetaaga okwikiriza okugumire?

⁹ Abakristaayo Abaheburaniya bakaba nibetaaga okwikiriza okugumire kusobora kukiraho omuhito ogukaba nigugenda kwija omu Buyudaaya. (Baheb. 10:​37-39) Yesu akaba ateererire abahondezi be ngu obu baakurozere Yerusalemu eyehinguliriziibwe amahe, bakaba basemeriire kwirukira omu nsozi. Obuhabuzi obu yahaire bukaba nibukwataho Abakristaayo boona kababe bakaba nibaikara omu rubuga rundi omu byaro. (Luk. 21:​20-24) Abantu omu kasumi ako, obu baatiinisirizibwaga amahe agaabaga nigagonza kubataahirra, bairukiraga omu mbuga eziine ebisiika nka Yerusalemu. Nahabweki, okwirukira omu nsozi kyali nikizooka nk’ekitali ky’amagezi kandi kyali nikibetaagisa kuba n’okwikiriza okugumire.

10. Okwikiriza okugumire kwakuletiire Abakristaayo kukora ki? (Abaheburaniya 13:17)

¹⁰ Ekindi, Abakristaayo Abaheburaniya kyali nikibetaagisa kwesiga abo Yesu abakaba naakozesa kwebembera ekitebe. Nikisobora kuba ngu abo abakaba nibebembera ekitebe baahaga oburagirizi kukonyera boona omu kitebe kuhondera oburagirizi bwa Yesu omu kaire akahikire, hamu n’omulingo oguteekaniziibwe kurungi. (Soma Abaheburaniya 13:17.) Ekigambo muhurrege eky’Oruyonaani ekikozesiibwe omu Abaheburaniya 13:17 nikimanyisa ngu  omuntu naasikirizibwa kworobera oburagirizi habwokuba naayesiga omuntu ow’abumuhaire. Kinu tikirukugarukira ha kumworobera ngu habwokuba aine obusobozi obw’okukuha oburagirizi. Nahabweki, Abakristaayo Abaheburaniya bakaba baine kugumya obwesige bwabo omuli abo abarukubebembera omuhito gutakatandikire. Kakuba Abakristaayo baayorobiire oburagirizi obw’abo abarukubebembera omu kasumi ak’obusinge, kyakubanguhiire muno kubworobera omu kasumi ak’omuhito.

11. Habwaki kuba n’okwikiriza okugumire kikuru muno hali Abakristaayo kasumi kanu?

¹¹ Kusisanaho n’Abakristaayo Abayudaaya Paulo abaayahandiikire ebbaruha, na itwe kasumi kanu nitwetaaga okwikiriza okugumire. Nitwikara omu kasumi nambere abantu abarukukira obwingi banga kandi basekereza okuteererra kwa Baibuli okurukukwata ha kuhwaho okw’obusinge bunu. (2 Pet. 3:​3, 4) Kwongerraho, n’obu kiraaba ngu Baibuli ebazaaho ebintu ebiraabaho omu kasumi ak’omuhito omwingi, hakyaroho ebintu bingi ebi tutarukumanya. Nitwetaaga kuba n’okwikiriza okugumire ngu empero ey’obusinge bunu niija kwizira omu kasumi akahikire kandi ngu Yahwe naija kuturolerra omu kasumi ako.—Hab. 2:3.

12. Kiki ekiratukonyera kukiraho omuhito omwingi?

¹² Ekindi, tusemeriire kugumya okwikiriza kwaitu omu mwiru omwesigwa Yahwe ow’akozesa kutwebembera kasumi kanu. (Mat. 24:45) Omuhito omwingi obu guraatandika, nitusobora kutunga oburagirizi oburajuna obwomeezi bwaitu nk’oku Abakristaayo Abaheburaniya basobora kuba baatungire, ihe ly’Abarooma obu lyayehinguliriize Yerusalemu. Kanu nuko akasumi ak’okugumya obwesige bwaitu omu buragirizi obu tutunga kuruga hali abo abarukwebembera ekitebe kya Yahwe. Titusobora kunihira ngu nitwija kuhondera oburagirizi bwabo omu kasumi ak’omuhito omwingi obu kiraaba nikitugumira kubuhondera kasumi kanu.

13. Habwaki obuhabuzi oburukusangwa omu Abaheburaniya 13:5 bukaba nibwetaagisibwa?

¹³ Abakristaayo Abaheburaniya obu bakaba balinzire akokurorraho nukwo basobole kwiruka, bakaba basemeriire n’okwikaza obwomeezi bwabo bwanguhire obu nibetantara ‘kugonza sente.’ (Soma Abaheburaniya 13:5.) Bamu hali bo bakaba bahikirweho enjara n’obunaku. (Baheb. 10:​32-34) N’obu kiraaba ngu ha kubanza bakaba behaireyo kugumira emitalibaine habw’amakuru amarungi, abamu nibasobora kuba bakaba batandikire kuteeka omutima ha kulengaho kutunga sente nyingi nukwo zibalinde hali akabi rundi obunaku. Baitu busaho muhendo gwa sente ogukaba nigusobora kujuna obwomeezi bwabo, Yerusalemu obu yakuhwerekereziibwe. (Yak. 5:3) Amananu gali ngu, omuntu weena ayagonzaaga muno itungo kyakumugumiire kwiruka kandi akaleekaho eka ye hamu n’ebintu bye.

14. Kasumi kanu, okwikiriza okugumire nikukwataho kuta encwamu zaitu obukirukuhika h’itungo?

¹⁴ Obu turaaba twine okwikiriza okugumire ngu Yahwe ali haihi kuhwerekereza ensi enu embi, titurukwija kuteekereza ngu kuba na sente nyingi rundi ebintu kikuru. Baibuli egamba ngu abantu, “balinaga efeza yabu omu makute,” habwokuba balikyetegereza ngu“efeza yabu nezabu yabu tibirisobora kubajuna omu kiro kyokubihirwa kwa [Yahwe].” (Ez. 7:19) Omu kiikaro ky’okuteeka omutima ha kutunga sente nyingi muno, tusemeriire kukora encwamu eziratukonyera kwikaza obwomeezi bwaitu bwanguhire kandi eziratukonyera kuheereza Yahwe. Eki nikitwarramu kwangirra ekyohyo eky’okutunga amabanja agatarukwetaagisa rundi kukozesa obwire bwaitu oburukukira obwingi niturolerra itungo. Ekindi, tusemeriire kwetantara kugonza muno ebintu ebi twine. (Mat. 6:​19, 24) Obu nitwirra haihi n’empero ey’obusinge bunu, okwikiriza kwaitu nikusobora kulengwa obu kirukuhika h’itungo n’ensonga ezindi.

 “NIMWETAAGA OKUGUMISIRIZA”

15. Habwaki Abakristaayo Abaheburaniya bakaba nibetaaga muno okugumiisiriza?

¹⁵ Abakristaayo Abaheburaniya bakaba nibetaaga kugumira ebirengo habwokuba omuhito gukaba guli haihi kuhika. (Baheb. 10:36) N’obu kiraaba ngu bamu h’Abakristaayo abaheburaniya bakaba bahikirweho okuhiiganizibwa okw’amaani, baingi bakaba bafookere Bakristaayo omu kasumi ak’obusinge. Paulo akagamba ngu n’obu kiraaba ngu bakaba bahikirweho ebizibu, ebyalengere okwikiriza kwabo, bakaba batabonabonesiibwe nk’oku Yesu yabonabonesiibwe kuhika ha rulengo orw’okufa. (Baheb. 12:4) Abayudaaya baingi obu bafookere Bakristaayo, abarukubahakaniza bakeyongera kubatwaza kubi. Emyaka nke enyuma Paulo atakahandiikire ebbaruha ye, ekitebe ky’abantu kikataahirra Paulo obu akaba naatebeza omu Yerusalemu. Abayudaaya abarukuhingura omu 40 ‘bakarahira muno nibagamba tibarukugenda kulya nobukwakuba okunywa okuhikya obubalikaita Paulo.’ (Eng. 22:22; 23:​12-14) N’obu kiraaba ngu Abakristaayo bakaba nibaija kunobwa n’okuhiiganizibwa, bakaba nibetaaga kugumizaamu nibasorrokana hamu kuramya, kutebeza amakuru amarungi, n’okwikaza okwikiriza kwabo kugumire.

16. Ebbaruha Paulo yahandikiire Abaheburaniya n’esobora eta kutukonyera kuba n’enteekereza ey’ehikire ha kuhiiganizibwa? (Abaheburaniya 12:7)

¹⁶ Kiki ekyakukonyiire Abakristaayo Abaheburaniya kugumira okuhakanizibwa oku bakaba nibarabamu? Paulo akaba akimanyire ngu bakaba basemeriire kurora okulengwa kwabo omu mulingo oguhikire. Egi niyo nsonga habwaki yasoboroire ngu, Abakristaayo obu bahikwaho ekirengo, Ruhanga naasobora kukikozesa kubatendeka. (Soma Abaheburaniya 12:7.) Okutendekwa nk’oku nikusobora kukonyera Omukristaayo kukurakuraniza emiringo ey’erukusemeza Yahwe. Kuraba omu kuteeka omutima ha byakurugire omu birengo bakaba nibarabamu, Abakristaayo Abaheburaniya kyakubanguhire kugumiisiriza.—Baheb. 12:11.

17. Kiki Paulo eki akaba ayegere obu kirukuhika ha kugumira okuhiiganizibwa?

 ¹⁷ Paulo akateererra Abakristaayo Abaheburaniya kutajwaha omu kugumira ebirengo. Omukwenda Paulo nuwe akaba ahikire kubaha obuhabuzi oburukukwata ha kugumira okuhiiganizibwa. Obu akaba atakafookere Omukristaayo, akahiiganiza Abakristaayo kandi akaba narora omulingo babatwazaamuga kubi. Ekindi, akaba amanyire omulingo ogw’okugumira okuhiiganizibwa. Habwokuba akaba ahikirweho okuhakanizibwa okurukwahukana hanyuma y’okufooka Omukristaayo. (2 Kol. 11:​23-25) Egi niyo nsonga habwaki Paulo yabazaaga n’obumanzi obu kirukuhika ha bintu Omukristaayo asemeriire kukora kugumiisiriza. Akaijukya Abakristaayo abo ngu obu barukuba nibagumira ebirengo, tibasemeriire kweyesiga bonka baitu kwesiga Yahwe. Egi niyo nsonga habwaki Paulo yagambire n’obumanzi ati: “[Yahwe] nuwe mukonyezi wange; tinditina.”—Baheb. 13:6.

18. Kiki ekirukwija kutuhikaho itwena omu kasumi ak’omumaiso, kandi kiki eki tusemeriire kukora hati?

¹⁸ Kasumi kanu, bamu h’ab’oruganda nibagumira okuhiiganizibwa. Nitusobora kubasagika kuraba omu kubasabira, kandi obwire obumu kubakonyera kuraba omu kubaha ebi barukwetaaga. (Baheb. 10:33) Baitu Baibuli egamba ngu “bona abarukwenda okukwata engeso ezokutina Ruhanga omu Kristo Yesu balihiganizibwa.” (2 Tim. 3:12) Habw’ensonga egi, itwena tusemeriire kweteekaniriza ekiraabaho omu kasumi ak’omumaiso. Leka tugumizeemu nitwesigira kimu Yahwe obu nitukigumya ngu naija kutukonyera kugumira ekirengo kyona ekisobora kutuhikaho. Omu kasumi akahikire, naija kuhuumuza abo boona abarukumuheereza n’obwesigwa.—2 Bas. 1:​7, 8.

19. Kiki ekitusobora kukora kweteekaniriza omuhito omwingi? (Rora n’ekisisani.)

¹⁹ Hataroho kugurukyagurukya, ebbaruha ya Paulo ekakonyera Abaheburaniya kweteekaniriza omuhito ogukaba nigugenda kubahikaho. Paulo akateererra Abakristaayo bagenzi be kwesomesa Ekigambo kya Ruhanga n’obwegendereza kandi n’okukyeteegereza kurungi. Obu baakukozere eki, kyakubakonyiire kumanya n’okwangirra enyegesa ezaakuletiire okwikiriza kwabo kuceka. Akabekambisa kwikaza okwikiriza kwabo kugumire nukwo basobole kwanguha kuhondera oburagirizi bwa Yesu hamu n’obw’abo abarukwebembera ekitebe. Ekindi, akakonyera Abakristaayo kugumya okugumiisiriza kwabo kuraba omu kuba n’enteekereza ey’ehikire ha birengo, n’okubirora nk’omugisa ogw’okutendekwa Isebo ow’okugonza. Na itwe leka tuteeke omu nkora obuhabuzi bunu kuruga omu Baibuli. Eki nikiija kutukonyera kugumiisiriza n’obwesigwa kuhikira kimu ha mpero.—Baheb. 3:14.