Nkazaarwa omu 1934, abazaire bange bakaba barugire Switizeland kandi baatandika kwikara omu Timmins, etawuni enyakuli omu Ontario, Canada. Nk’omu mwaka 1939, nyinanyowe akatandika kusoma magaziini eya Watchtower, kandi yatandika n’okugendaga omu nsorrokano ez’Abakaiso ba Yahwe. Nyowe na bagenzi bange mukaaga yatutwaraga omu nsorrokano. Hanyuma y’akaire kake, akafooka omu h’Abakaiso ba Yahwe.

Encwamu ye etasemeze isenyowe, baitu nyinanyowe yagonzaaga muno amananu kandi akaba acweriiremu kimu kugagumiraho. Akagumira ha ncwamu ye n’omulimo gw’Abakaiso ba Yahwe obu gukaba gutangirwe omu Canada omu myaka 1940. Akaikara n’atwaza isenyowe omu mulingo ogw’embabazi kandi ogw’ekitiinisa, n’obu kiraaba ngu yamujumaga. Ekyokurorraho kye ekirungi kikakonyera nyowe na bagenzi bange kucwamu kutandika kuheereza Yahwe. Ekirukusemeza kiri ngu Isenyowe akahinduramu enyetwaza ye kandi yatandika kutwaza eka yaitu omu mulingo ogw’embabazi.

Omu Agusto 1950, nkagenda ha rusorrokano orukooto orukaba rwine omutwe Theocracy’s Increase omu New York City. Hanyuma y’okutangatangana ab’oruganda na banyaanya itwe kuruga omu nsi yoona na hanyuma y’okuhuliiriza okukaguza n’okugarukamu okw’abeegi abakaba barugire omu Isomero lya Gilead, bikanyekambisa kwongera ha buheereza bwange hali Yahwe! Nkeyongera kucweramu kimu kukira na kara kutaaha obuheereza obw’akasumi koona. Hanyuma y’akaire kake ngarukire omuka, nkahayo okusaba kwange kuheereza nka payoniya ow’akasumi koona. Ofiisi y’Itaagi erya Canada ekampandiikira n’engambira ngu nsemeriire kubanza kubatizibwa. Nkabatizibwa omu Okitobba 1, 1950. Hanyuma y’okurabaho okwezi kumu, nkafooka payoniya  ow’akasumi koona, kandi obujunanizibwa bwange obw’okubanza bukaba omu Kapuskasing. Orubuga oru rukaba ruli hara muno kuruga nambere naikaraga omu kasumi ako.

Omu 1951, ofiisi y’itaagi lya France ekaraaliza Abakaiso ba Yahwe abakaba nibasobora kubaza Orufaransa kuteekerezaaho kugenda omu kiikaro kya Quebec nambere baabazaaga Orufaransa. Hakaba haliyo obwetaago obw’amaani. Nkakura nimbaza Orufaransa n’Orungereeza, nahabweki nkaikiriza okusaba kwabo kandi nasindikwa omu Rouyn. Nkaba ntaine muntu weena ou manyire omu kiikaro eki. Ekintu eki nkaba nyine kyonka niyo endagirro ei mbagambiirehoga ha kubanza. Baitu ebintu bikagenda kurungi. Nyowe na Marcel tukafooka banywani abarungi, kandi nkegondeza omu buheereza bwange omu Quebec kumara emyaka ena kandi ha kumalirra, nkakomwa kuheereza nka payoniya ow’embaganiza.

Obu nkaba ndi omu Quebec, kinkasemeza muno kutunga okuraalizibwa okw’okuba omu kilaasi eya 26 ey’Isomero lya Gilead omu South Lansing, New York. Ekiro kyaitu eky’okumalirra isomero kikabaho Febwali 12, 1956, kandi nkasindikwa omu ihanga hati erirukumanywa nka Ghana, b omu West Africa. Baitu obu nkaba ntakagenzere, nkaba nyine kugaruka omu Canada kumara “wiiki nke” kuhikya ebihandiiko byange ebirukunyikiriza kugenda bimazire kukorwaho.

Nkaikara omu Toronto obu ndindiriire ebihandiiko ebi kumara emyezi musanju. Omu kasumi ako, ab’eka ya Cripp bakanyikiriza kwikara na bo, kandi oku nuho namanyiire muhara wabo Sheila. Tukatandika kugonzangana. Obu nkaba ndi haihi kumusaba kutaaha na uwe obuswere, visa yange ekaija. Hanyuma y’okusaba ha nsonga enu. Nyowe na Sheila tukacwamu ngu ngende nambere baansindikire kuheereza. Baitu tukaikara nitusindikirangana amabbaruha kandi twalindirra turole obu kiraaba nikisoboka kutaaha obuswere omu kasumi ak’omumaiso. Encwamu egi ekaba etanguhire, baitu hanyuma tukakyetegereza ngu ekaba ehikire.

Nkahika omu Accra Ghana, hanyuma y’okumara okwezi kwona omu rugendo obu ninkozesa egaali y’omwika, emeeri hamu n’enyonyi. Nkakomwa kuheereza nka district overseer. Eki kikatwarramu  kwetoroora ihanga lya Ghana lyona, otwaliiremu n’amahanga agali haihi nalyo nk’ihanga lya Ivory Coast (hati erirukwetwa Côte d’Ivoire) hamu na Togoland (hati ey’erukumanywa nka Togo.) Obusumi oburukukira obwingi nagendaga nyenka omu motoka ey’ekaba empairwe itaagi. Nkegondeza muno omu kubungira ab’oruganda!

Ha wiikendi nabaga nyine ebicweka ha nsorrokano enkooto. Tukaba tutaine biikaro eby’ensorrokano enkooto. Nahabweki ab’oruganda baayombekaga obuju obutali bw’orutekerro nibakozesa emiseke obu nibasakaaza amataagi g’emikiindo nukwo gabakonyere ha musana. Habwokuba tukaba tutaine fridge, ebisoro twabyahuraga nibirora, kandi bisarwa ha kiro eki kyonyini, nukwo bisobole kuliibwa abo boona abaizire ha rusorrokano.

Haroho ekintu ekyabaire ha nsorrokano ezi ekirukusemeza. Kiro kimu omumiisani mugenzi wange ow’arukwetwa Herb Jennings, c akaba naaha orubazo kandi ente yatoroka kuruga nambere bakaba bagyahwire. Ekaija yayemerra hagati y’akatuuti hamu n’abarukuhuliiriza. Ow’oruganda Herb akabanza yaleka kubaza, kandi n’ente yabuzabuzibwa. Baitu ab’oruganda bbana ab’amaani bakasobora kugikwata, baagigarra nambere ekaba erindiirwe obu abarukuhuliiriza nibatokera haiguru.

Omu wiiki ey’orusorrokano orukooto, nkooleka filimu enyakwine omutwe The New World Society in Action omu byaro ebikaba biri haihi. Kusobora kukikora, nasiimbaga ebiti bibiri mpanikaho orugoye orurukwera kandi hanyuma nkozesa projector kwoleka filimu. Abantu ab’ekyaro baagigonzaaga muno! Abantu abarukukira obwingi niyo filimu y’okubanza ei bakaba baakarora omu bwomeezi bwabo. Baateraga omu ngaro obu baaroraga ebisisani by’abantu nibabatizibwa. Filimu egi mali ekabakonyera kukyetegereza ngu Abakaiso ba Yahwe bakaba bali omu bumu, kandi bali omu nsi yoona.

Hanyuma y’okumara emyaka nk’ebiri omu Africa, kikansemeza muno kugenda ha rusorrokano orukooto omu New York City omu 1958. Nkasemererwa muno kwongera kurora Sheila, ow’akaba arugire omu Quebec nambere akaba naaheereza nka payoniya ow’embaganiza. Tukaba nituhandiikirangana amabbaruha, baitu hati tukaba niturorangana maiso ha maiso, Nkamusaba kutaaha na uwe obuswere kandi yaikiriza. Nkahandiikira Ow’oruganda Knorr d nimukaguza Sheila obu araaba naasobora kugenda omu Isomero lya Gilead kandi hanyuma akanyeteranizaaho omu Africa. Ow’oruganda Knorr akaikiriza. Hanyuma, Sheila akaija omu Ghana. Tukataaha obuswere obu tukaba tuli omu Accra omu Okitobba 3, 1959.  Tukehurra ngu Yahwe akaba atuhaire emigisa habw’okumwebembeza omu bwomeezi bwaitu.

Omu 1961 tukasindikwa kuheereza omu ihanga lya Cameroon. Nkaba na bingi muno eby’okukora habw’okuba ab’oruganda bakansaba kukonyera kutandikaho ofiisi y’itaagi empyaka. Habw’okuba nkakomwa kurolerra omulimo ogukaba nigukorwa ha itaagi omu Cameroon, nkaba na bingi muno eby’okwega. Hanyuma omu 1965 tukakyetegereza ngu Sheila akaba aine enda. Amananu gali kikatugumira muno kukiikiriza ntu tukaba nitugenda kufooka bazaire. Baitu obu tukaba tuliyo nitwetekaniriza obujunanizibwa bunu obuhyaka kandi nitukora n’entekaniza z’okugaruka omu Canada, haroho ekintu ekibi ekyatubaireho.

Enda ya Sheila ekarugamu. Dakitaali akatugambira ngu enda y’omwana ow’akaba arugiremu akaba ali mwojo. Ekintu kinu kikabaho emyaka 50 enyuma, baitu titukakyebwaga. N’obu kiraaba ngu ekyabaireho kikatusaaliza muno, tukagumizaamu omu buheereza bwaitu obu twagonzaaga muno.

Ab’oruganda ab’omu Cameroon baakiraga kuhikwaho okuhiiganizibwa habwokuba bakaba batarukugwera rubaju omu by’obulemi. Enyikara ekeyongera kusiisikara omu bwire bw’okuteera oburuuru obw’okukoma omwebembezi w’ihanga. Enyikara ekeyongerra kimu kutugumira omulimo gw’Abakaiso ba Yahwe obu gwatangiirwe kimu mu butongole omu Maayi 13, 1970. Gavumenti ekatwara ekyombeko kyaitu ekihyaka ekya ofiisi y’itaagi nambere tukaba twakamara emyezi etaano yonka. Omu wiiki emu yonka abamiisani boona otwaliiremu nyowe na Sheila, bakabingwa omu ihanga. Kikaba kigumire kulekaho ab’oruganda na banyaanya itwe habwokuba tukaba nitubafaaho muno, kandi tukaba tweralikiriire ekisobora kubahikaho omu busumi oburukuhonderaho.

Emyezi endi mukaaga eyahondiireho tukagimara ha ofiisi y’itaagi erya France. Obu tukaba tuliyo, nkakora kyona ekirukusoboka kurolerra ab’oruganda omu Cameroon. Omu Desemba omwaka nugwo gumu, tukasindikwa kuheereza ha itaagi lya Nigeria, eryatandikire kurolerra omulimo gwaitu omu Cameroon. Ab’oruganda na banyaanya itwe omu Nigeria bakatutangirra muno kandi tukegondeza omu kuheereza na bo kumara emyaka nyingi.

Omu 1973 tukaba twine kukora encwamu ey’egumire muno. Sheila akaba aine kugumira oburwaire obw’amaani obukaba nibumutalibaniza. Obu tukaba tuli omu New York ha rusorrokano orukooto, akarra kandi yangambira ati: “Tikirukusoboka kugumizaamu nimpeereza! Obwire oburukukira obwingi nimba njwahire kandi ndwaire.” Tukaba tumazire emyaka ey’erukuhingura 14 nituheereza hamu omu West Africa. Namwesiimisaaga habw’okuheeraza n’obwesigwa, baitu tukaba twine kikoramu empindahinduka. Hanyuma y’okubazaaho enyikara yaitu n’okusaba muno, tukacwamu kugaruka omu Canada nambere yakutungiire obujanjabi oburungi. Kuleka kuheereza nkabamiisani hamu n’okuruga omu buheereza obw’akasumi koona, ekaba eri ncwamu ey’erukukirayo kuguma ei tukaba twine kukora.

Hanyuma y’okuhika Canada, munywani wange ow’akaba aine bizinesi y’okutunda motoka omu Toronto akampa omulimo. Tukapangisa enju, twagura ebintu ebikaba bikozereho eby’okukozesa omu nju kandi twasobora kutandika obwomeezi obuhyaka tutagwire omu mabanja. Tukaba nitugonza kwikaza  obwomeezi bwaitu bwanguhire obu nitunihira ngu kiro kimu nitusobora kugaruka omu buheereza obw’akasumi koona. Kikatuhuniiriza muno obu twayongiire kwikirizibwa kwejumbira omu buheereza obw’akasumi koona.

Nkatandika kukonyera buli kyamukaaga ha project y’okwombeka Ekyombeko eky’ensorrokano enkooto omu Norval, Ontario. Hanyuma y’akasumi, nkasabwa kuheereza nka Assembly Hall overseer. Sheila akaba aliyo naakira mporampora kandi tukakirora ngu obujunanizibwa bunu obuhyaka naabusobora. Nahabweki tukatandika kwikara ha Kyombeko eky’ensorrokano enkooto omu Juuni 1974. Kikatusemeza muno kugaruka omu buheereza obw’akasumi koona!

Ekirukusemeza kiri ngu, Sheila akagumizaamu naakira. Hanyuma y’emyaka ebiri, tukasobora kwikiriza obujunanizibwa obw’okubungira ebitebe. Ebitebe ebi twabungiraga bikaba biri omu Manitoba, ekiikaro ekiri omu Canada ekimanyirwe habw’obufuki obw’amaani. N’obu kiraaba ngu ekiikaro kikaba nikifuka, tukasobora kwegondeza omu kugonza ab’oruganda na banyaanya itwe oku baatwolekaga. Tukeega ngu nambere turukuheereza tikiri kikuru, baitu ekikuru nikyo kwikara nituheereza Yahwe hoona nambere tuli.

Hanyuma y’okumara emyaka nyingi muno tuli omu mulimo gw’okubungira ebitebe, tukaraalizibwa kuheereza ha Beseri ya Canada omu 1978. Omu kaire kake nkeega isomo erirukusaaliza muno baitu erikuru. Nkasabwa kuha orubazo omu Rufaransa orw’esaaha emu n’ekicweka ha rusorokano orw’embaganiza omu Montreal. Eky’obusaasi, orubazo rwange rutasemeze ebarukuhuliiriza, kandi ow’oruganda kuruga h’Akatebe ak’Obuheereza akampa obuhabuzi. Amananu gali, naakukimanyire omu kasumi ako nk’oku hati nkimanyire ngu tindi muhi w’embazo omurungi. Baitu obuhabuzi obu ntabwikirize. Tutabalizengana omu mulingo omurungi. Nkehurra ngu akaba nanserramu ensobi zonka, habwokuba atansiime habw’ebintu ebi nakozere kurungi omu rubazo oru. Nkakora ensobi ey’okuteeka muno omutima ha mulingo nahairwemu obuhabuzi, n’omulingo narozeremu ayabumpaire.

Hanyuma y’ebiro bike ow’oruganda kuruga h’Akatebe k’Itaagi akabaza na nyowe ha nsonga egi. Nkaikiriza ngu nkaba ntetwaize kurungi, kandi namwoleka ngu nkaba ninyeijukya. Hanyuma nkabaza n’ow’oruganda ow’akaba ampaire obuhabuzi. N’obwebundaazi nkamusaba ekiganyiro kandi yanganyira. Ekintu kinu kikanyegesa obukuru obw’okuba mwebundaazi, kandi tindyebwa isomo erinayegere. (Nfu. 16:18) Nkasaba Yahwe emirundi nyingi muno ha nsonga enu, kandi ncweriiremu kimu kutongera kuba n’entekereza ey’etahikire kakuba omuntu ampa obuhabuzi.

Hati mmazire emyaka ey’erukuhingura omu 40 nimpeereza ha Beseri ya Canada kandi kuruga omu 1985, ntungire omugisa ogw’okuheereza h’Akatebe k’Itaagi. Omu Febwali 2021, mukazi wange omugonzebwa Sheila akafa. Kwongerra ha kugumira obusaasi obu, nanyowe nyenka obwomeezi bwange tibuli burungi. Baitu obuheereza bwange hali Yahwe bunyikaza nyine bingi muno eby’okukora kandi nsemeriirwe, ntarukuteeka omutima ha buli kiro ekirukurabaho.” (Mug. 5:20) N’obu kiraaba ngu ntungire emitalibaine nyingi muno omu bwomeezi bwange, haroho n’ebintu ebindi bingi ebindetiire okusemererwa ebirukukirra hara emitalibaine ei ndabiremu. Kwebembeza Yahwe omu bwomeezi bwange n’okwegondeza omu myaka 70 ei mmazire omu buheereza obw’akasumi koona bindetiire okumarwa kwonyini. Ninsabira ab’oruganda na banyaanya itwe abakyali bato kugumizaamu nibebembeza Yahwe omu bwomeezi bwabo, habwokuba ninkigumiza kimu ngu na bo nibaija kwegondeza omu bwomeezi oburungi kandi obwine ekigendererwa, obu tutunga obu tuba nituheereza Yahwe.