1-2. Kiki ekireetera abantu ba Ruhanga kuba n’okusemererwa? (Yakobo 1:​22-25)

 YAHWE n’Omwana we omugonzebwa nibagonza tube n’okusemererwa. Omuhandiiki wa Zabuli 119:2 naagamba ati: “Bayina omugisa abakwata ebiyamanyisize, abanyakumuserra nomutima gwona.” Ekindi, Yesu akagamba ati: ‘Banyina omugisa abarukuhurra ekigambo kya Ruhanga nibakikwata.’—Luk. 11:28.

² Nk’abaheereza ba Yahwe, tuli bantu abaine okusemererwa. Habwaki? Habw’ensonga nyingi muno, baitu ensonga enkuru niyo ngu tusoma Ekigambo kya Ruhanga buli kiro kandi twekamba kuteeka omu nkora ebi turukwega.—Soma Yakobo 1:​22-25.

3. Tugasirwa tuta obu tuteeka omu nkora ebi tusoma omu Kigambo kya Ruhanga?

³ Tugasirwa omu miringo erukwahukana ‘obu tuba abakozi b’ekigambo.’ Ekyokurorraho obu tuteeka omu nkora ebi turukwega kuruga omu Kigambo kya Ruhanga, tusemeza Yahwe kandi naitwe kituleetera okusemererwa. (Mug. 12:13) Obu tuteeka omu nkora ebi turukwega kuruga omu Kigambo kya Ruhanga, amaka gaitu gabamu okusemererwa, kandi tutunga enkoragana ey’amaani n’ab’oruganda na banyaanya itwe. Hataroho kugurukyagurukya, kinu n’osobora kuba ekyeroliire omu bwomeezi bwawe. Ekindi, twetantara ebizibu ebihika hali abo abatarukuhondera ebiragiro bya Yahwe. Mali nitwikiranganiza n’ebigambo eby’Omukama Daudi. Hanyuma y’okubazaaho ebiragiro bya Yahwe, hamu n’omulingo acwamu emisango, akamaliira naagamba ati: “Omu kubikwata harumu empera nyingi.”—Zab. 19:​7-11.

4. Habwaki kigumire kufooka abakozi b’Ekigambo kya Ruhanga?

⁴ Kusobora kufooka abakozi b’Ekigambo kya Ruhanga, tusemeriire  kusoma n’okwesomesa Baibuli butoosa kusobora kwetegereza Yahwe ebi arukugonza tukole. Baitu amananu gali, emirundi erukukira obwingi kinu tikyanguhire kukikora habwokuba twine bingi eby’okukora. Nahabweki tusemeriire kutunga obwire obw’okusoma n’okwesomesa Baibuli butoosa. Hati, leka turole amagezi agamu agasobora kutukonyera kusoma Baibuli buli kiro. Ekindi, nitwija kubazaaho ebintu ebisobora kutukonyera kuteekerezaaho ebi turukuba tusomere kandi turole omulingo tusobora kubiteeka omu nkora omu bwomeezi bwaitu.

TUNGA OBWIRE OBW’OKUSOMA EKIGAMBO KYA RUHANGA

5. Bujunanizibwa ki obukira kutwara obwire bwaitu?

⁵ Abantu ba Yahwe abarukukira obwingi baine bingi eby’okukora. Tumara obwire oburukukira obwingi nitwejumbira omu bintu ebirukubazibwaho omu Baibuli nk’ebikuru. Ekyokurorraho, baingi omuli itwe, tukora emirimo ey’etusobozesa kwehikyaho ebyetaago byaitu hamu n’ab’omu maka gaitu. (1 Tim. 5:8) Abakristaayo baingi nibarolerra abanyabuzaale baabo abanyakuli barwaire rundi abakuzire omu myaka. Kandi itwena nitwetaaga kurolerra obwomeezi bwaitu, ekintu ekitwara obwire. Kwongerra ha bujunanizibwa bunu, twine obujunanizibwa obundi omu kitebe. Obujunanizibwa obukuru nubwo obw’okwejumbira omu mulimo ogw’okutebeza n’obwekambi. Hanyuma y’okurora obujunanizibwa bunu bwona obu oine, nosobora ota kutunga obwire obw’okusoma Baibuli buli kiro, kwecumiitirizaaho ebi orukusoma n’okubiteeka omu nkora?

6. Nosobora ota kufoora okusoma Baibuli ekintu ekikuru omu bwomeezi bwawe? (Rora n’ekisisani.)

⁶ Okusoma Baibuli kiri kimu ha ‘bintu ebirukukirayo obukuru’ omu bwomeezi bwaitu nk’Abakristaayo, nahabweki, tusemeriire kukigumya ngu twatunga obwire obw’okugisoma. (Baf. 1:10) Zabuli ey’okubanza ebazaaho omuntu ow’aine okusemererwa eti: ‘Baitu ebiragiro bya Yahwe nibyo bimusemeza; asoma ebiragiro bye kandi abitekerezaaho nyamusana n’ekiro.’ (Zab. 1:​1, 2) Eki nikyoleka kurungi ngu tusemeriire kutunga obwire obw’okusoma Baibuli. Bwire ki oburungi obw’okusoma Baibuli? Nikisigikirra ha bwire obw’orukurora burungi hali iwe. Baitu ekikuru kiri ngu busemeriire kuba obwire  obu osobora kwikara nokikora buli kiro. Ow’oruganda ow’arukwetwa Victor naagamba ati: “Ngonza kusoma Baibuli nyenkyakara. Nobu kiraaba ngu tingonza kuzinduuka, omu bwire bwa nyenkyakara haba hataroho ebintu bingi ebirukuhugura. Mba taine bingi eby’okuteekerezaaho kandi kinyanguhira kuteekaho omutima.” Naiwe nukwo oyehurra oti? Wekaguze, ‘Bwire ki oburukukirayo oburungi obu nsobora kusomeramu Baibuli?’

WECUMIITIRIZEEHO EBI ORUKUSOMA

7-8. Kiki ekisobora kutulemesa kugasirwa omu bwijwire ebintu ebi turukuba tusomere? Bazaaho ekyokurorraho.

⁷ Amananu gali nitusobora kwikara nitusoma ebintu bingi, baitu bitarukutuhika ha mutima. Wakasomahoga ekintu baitu hanyuma y’obwire buke okaba otakyaijuka eki osomere? Itwena eki kikatuhikaho. Eky’obusaasi kinu nikisobora kutuhikaho obukirukuhika ha kusoma Baibuli. Obwire obumu nitusobora kuba tweteriireho ekigendererwa eky’okusoma obwingi bw’esuura ezimu ez’ekitabu kya Baibuli buli kiro. Kandi eki kirungi. Tusemeriire kweteeraho ebigendererwa kandi twekambe kubihikiriza. (1 Kol. 9:26) Baitu kusoma Baibuli eri ntandikwa enungi, baitu kusobora kugasirwa omu kusoma kwaitu okwa Baibuli, tusemeriire kukora ekirukukiraho.

⁸ Tekerezaaho ekyokurorraho kinu: Ebimera byetaaga enjura kusobora kukura. Baitu enjura obu egwa nyingi muno omu kaire kake, itaka libamu amaizi maingi muno. Baitu enjura obu egwa nyingi muno itaka liijura amaizi kandi ebimera tibigasirwa. Kiba kirungi enjura egwe mpora mpora nukwo amaizi gataahe omu itaka kandi gasobole kukonyera ebimera kukura. Omu mulingo nugwo gumu, tusemeriire kwetantara kusoma Baibuli nitwanguhiriza, tukalemwa kutunga obwire obw’okutekerezaaho, kwijuka, kuteeka omu nkora ebi turukuba tusomere.—Yak. 1:24.

9. Kiki eki tusemeriire kukora kakuba tuba twine engeso ey’okusoma Baibuli nitwanguhiriza?

⁹ Haroho obw’oyesanga ngu obwire obumu osoma Baibuli noyanguhiriza? Kiki eki osobora kukora? Soma mpora mpora. Tunga obwire obw’okutekerezaaho ebi orukusoma rundi hanyuma y’okusoma tunga obwire otekerezeeho ebi osomere. Kinu tosemeriire kukigumanganiza. Nosobora kucwamu kwongera ha bwire  obw’okwesomesa nukwo oyongeremu obwire obw’okwecumiitiriza. Rundi nosobora kusoma enkarra nke nukwo okozese obwire obusigaireyo kuteekerezaaho ebi osomere. Victor ou tusangirwe tubalizeeho naagamba ati “Timmara obwire bwingi ninyesomesa Baibuli, obundi nsoma esuura emu yonka. Habwokuba nsoma nyenkyakara, kikonyera kwikara ninyecumiitirizaaho eki nsomere ekiro kyona.” Nosobora kucwamu obwingi bw’ebintu ebi orayesomesaaho, baitu ekikuru kiri ngu osemeriire kusoma mpora mpora nukwo otunge obwire obw’okutekerezaaho ebi orukusoma.—Zab. 119:97; rora akasanduuko “ Ebikaguzo eby’Okutekerezaaho.”

10. Bazaaho ekyokurorraho ekirukwoleka omulingo osobora kuteeka omu nkora ebi orukwega. (1 Abasesalonika 5:​17, 18)

¹⁰ Obu orasoma zimu ha nkarra kuruga omu Baibuli, kigumye ngu watekerezaaho ebi orukusoma. Obu oraaba nosoma Ekigambo kya Ruhanga, wekaguze, ‘Ninsobora nta kuteeka omu nkora ebi ndukusoma hati rundi omu kasumi ak’omumaiso?’ Ekyokurorraho, tugambe ngu omu kwesomesa kwawe kwa Baibuli, oliyo nosomaho ebiri 1 Abasesalonika 5:​17, 18. (Soma.) Hanyuma y’okusoma enkarra ezi ibiri, nosobora kwemerramu kandi okekaguza, mirundi ingaha ei nsaba kuruga ha mutima? Ekindi, nosobora kutekerezaaho ebintu ebi orukusiimira Yahwe. Nososbora kucwamu kusiimaga Yahwe habw’ebintu bisatu buli kiro. N’obu oraamara edakiika nke notekerezaaho amasomo ag’oyegere, nikiija kukukonyera kuba muhuliizi kandi omukozi w’Ekigambo kya Ruhanga. Tekerezaaho omulingo osobora kugasirwa obu oraikara nohondera ekyokurorraho kinu, obu oraaba noyesomesaaho ebicweka ebindi bya baibuli! Ego noija kukurakurana ofooke omukozi w’Ekigambo kya Ruhanga. Baitu, kiki eki osemeriire kukora kakuba okyetegereza ngu omu kwesomesa kwawe kwa Baibuli oine ebintu bingi ebi osemeriire kukoraho?

WETEREHO EBIGENDERERWA EBI OSOBORA KUHIKIIRIZA

11. Habwaki obwire obumu nosobora kwehurra ohoirwemu amaani? Bazaaho ekyokurorraho.

¹¹ Obu osoma Baibuli, obwire obumu nosobora kuhwamu amaani kakuba okyetegereza ngu haroho ebintu bingi ebi osemeriire kusemezaamu. Tekerezaaho ekyokurorraho kinu: Tugambe ngu omu kusoma kwawe kwa Baibuli habairemu obuhabuzi oburukukwata ha kusoroora. (Yak. 2:​1-8) Okyetegereza ngu osemeriire kusemezaamu omulingo otwazaamu abandi, nahabweki ocwamu kukora empindahinduka ezimu. Ekyo kirungi muno! Hanyuma ekiro ekirukuhonderaho osomaho obukuru obw’okulema ebigambo byawe. (Yak. 3:​1-12) Hanyuma okyetegereza ngu ebigambo byawe bibaire bitali by’embabazi rundi ebirukumaramu amaani. Nahabweki ocwamu kutandika kukozesa ebigambo eby’embabazi kandi ebirukwombeka. Hanyuma, ekiro ekindi, okusoma kwawe kwa Baibuli kubamu  okutererra okurukukwata ha kwetantara kuba munywani w’ensi. (Yak. 4:​4-12) Okyetegereza ngu osemeriire kuhinduramu obu kirukuhika ha by’okwesemeza byawe. Nambere ekiro kyakana kiraahikira, nosobora kwehurra ngu kigumire muno kukora empindahinduka zinu zoona.

12. Habwaki otasemeriire kuhwamu amaani, kakuba omu kusoma kwawe kwa Baibuli okyetegereza ngu osemeriire kukora empindahinduka? (Rora n’obugambo obuli hansi.)

¹² Kakuba okyetegereza ngu osemeriire kukora empindahinduka nyingi, otahwamu amaani. Bunu buli bwakaiso oburukwoleka ngu oli mwebundaazi kandi oine ebigendererwa ebirungi. Omuntu omwebundaazi kandi ow’atarukwebihabiha asoma Ebyahandiikirwe nekigendererwa eky’okurora ebintu ebi asemeriire kukoraho. a Ekindi, ijuka ngu kujwara ‘omuntu omuhyaka’ kiri kintu eki tusemeriire kugumizaamu nitukurakuraniza. (Bak. 3:​10, NWT; lengesaniza the study note “is being made new.”) Kiki ekirakukonyera kwikara oli mukozi w’Ekigambo kya Ruhanga?

13. Nosobora ota kweteraho ebigendererwa ebi osobora kuhikiiriza? (Rora n’ekisisani.)

¹³ Omu kiikaro eky’okuteeka omu nkora buli kimu kyona eki orasoma ha murundi gumu, wetereho ebigendererwa ebi osobora kuhikiiriza. (Nfu. 11:2) Nosobora kulengaho kinu: Tunga orukarra orw’ebintu ebi osemeriire kukoraho hanyuma okomemu kimu rundi bibiri ebi orabanza kukoraho. Ninkaha nambere osemeriire kutandikira?

14. Bigendererwa ki ebi osobora kutandiikiraho?

¹⁴ Nosobora kucwamu kutandiika n’ekigendererwa ekisobora kukwanguhira kuhikiiriza. Rundi nosobora kucwamu ninkaha nambere orukukira muno kugonza kubanza kuhinduramu. Obu oramanya eki oru kugonza kubanza kuhinduramu, kora okuseruliiriza omu bitabu byaitu,  obundi n’okozesa Watch Tower Publications Index rundi Ekitabu Ekikonyera Abakaiso ba Yahwe Kuseruliiriza. Saba Yahwe akuhe ‘okugonza n’amaani ag’okukora.’ (Baf. 2:13) Hanyuma oteeke omu nkora ebi oyegere. Hanyuma y’okuhikiiriza ekigendererwa kyawe eky’okubanza, nikiija kukwekambisa kukora ha kigendererwa ekindi. Amananu gali, obu orasemezaamu obwomeezi bwawe nk’Omukristaayo rundi omulingo ogw’Ekikristaayo, nikiija kukwanguhira kugumizaamu n’okora empindahinduka omu nyikara ezindi.

LEKA EKIGAMBO KYA RUHANGA ‘KIKORRE OMULINYWE’

15. Abantu ba Yahwe nibahukana bata n’abantu abandi abarukusoma Baibuli? (1 Abasesalonika 2:13)

¹⁵ Abantu abamu bagamba ngu basomere Baibuli emirundi nyingi. Baitu mali nibaikiririza omu Baibuli? Bataire omu nkora ebibarukusoma kandi bagikiriza kukwataho obwomeezi bwabo? Eky’obusaasi, emirundi erukukira obwingi eky’okugarukamu kiri ngu nangwa. Mali eki kanikyahukanira kimu hali abantu ba Yahwe! Nk’Abakristayo ab’omu kyasa eky’okubanza, nitwikiriza Baibuli “nkokukiri mali amazima, ekigambo kya Ruhanga.” Egi niyo nsonga habwaki tukora kyona ekirukusoboka kuteeka omu nkora obuhabuzi bwa Baibuli omu bwomeezi bwaitu.—Soma 1 Abasesalonika 2:13.

16. Kiki ekiratukonyera kuba abakozi b’Ekigambo kya Ruhanga?

¹⁶ Tikyanguhire kusoma n’okuteeka omu nkora ebi turukuba tusomere omu Kigambo kya Ruhanga. Nikisobora kutatwanguhira kutunga obwire obw’okusoma. Rundi nitusobora kusoma Baibuli nitwanguhiriza kandi tulemwe kutekerezaaho ebi turukusoma. Rundi nitusobora kuhwamu amaani habw’empindahinduka nyingi ezi tusemeriire kukoraho. Kakibe kizibu kya mulingo ki, nosobora kukisingura habw’obukonyezi bwa Yahwe. Leka itwena tucweremu kimu kwikiriza obukonyezi kuruga hali uwe kandi tutaba abahulizi abarukwebwa baitu abakozi b’Ekigambo kya Ruhanga. Hataroho kugurukyagurukya, obu turayeyongera kusoma Ekigambo kya Ruhanga kandi tukateeka omu nkora ebi turukusoma omu bwomeezi bwaitu, nitwija kutunga okusemererwa.—Yak. 1:25.