1. Kiki Yesu eki alihaihi kukora?

 TULI omu kasumi nambere empindahinduka ez’amaani zirukwija kubaho! Omu kasumi akatali ka hara, Yesu naija kucwera omusango buli muntu wena omwomeezi. Yesu akabazaaho ebintu ebyakubaireho kuhika omu kasumi ak’okucwa omusango obu naaha abegeswa be “akokurorraho” omu mulingo ogw’obunabbi ak’okwija kwe “nakensi enu okuhwaho.” (Mat. 24:3) Obunabbi bunu, nibusangwa omu Matayo esuura 24 na 25 hamu n’omu byahandiikirwe ebindi ebiri omu Marako esuura 13 na Luka esuura 21.

2. Byokurorraho ki ebi turabazaaho kandi nibiija kutukonyera bita?

² Yesu akatutererra naakozesa ebyokurorraho bisatu nukwo tusobole kwetekaniza. Ebyokurorraho Yesu yakozeseze nibyo, ekyokurorraho eky’entaama n’embuzi, abaisiki ab’amagezi n’abadomadoma, hamu n’ekyokurorraho eky’etaranta. Buli kyokurorraho nikitukonyera kwetegereza omulingo engeso z’omuntu zirikwataho omulingo alicwerwamu omusango. Omu kicweka kinu, nitwija kubazaaho ebyokurorraho binu kandi turole omulingo tusobora kubyegeraho. Leka tubanze tubazeeho ekyokurorraho eky’entaama n’embuzi.

ENTAAMA N’EMBUZI

3. Nidi Yesu obu alicwera abantu omusango?

³ Omu kyokurorraho eky’entaama n’embuzi, Yesu akagamba ngu naija kucwera abantu omusango naasigikirra ha mulingo baayetwaizeemu hali amakuru amarungi, rundi obu baraaba baasagakire bagenzi be abaseserweho amagita. (Mat. 25:​31-46) Omu kasumi ‘ak’omuhito omwingi,’ obu nihaburayo akaire kake obulemu bwa Haramagedoni butandike, naija kucwamu obu baraaba bali mbuzi rundi ntaama. (Mat. 24:21) Nk’oku omuliisa abaganizaamu entaama hali embuzi, Yesu, naija kubaganizaamu abo abasagika  abahondezi be abaseserweho amagita n’obwesigwa, hali abo abatabasagika.

4. Kusigikirra hali Isaya 11:​3, 4, habwaki nitukigumiza kimu ngu Yesu naija kucwera abantu omusango omu mulingo ogw’obwinganiza? (Rora ekyaha kyesweko.)

⁴ Obunabbi bwa Baibuli nibwoleka ngu Yesu omucwi w’emisango Yahwe ow’akomere, naija kucwa omusango ogw’okuhikirra. (Soma Isaya 11:​3, 4.) Naayetegereza embaza n’enyetwaza ey’abantu—otwaliiremu n’omulingo batwazaamu bagenzi be abaseserweho amagita (Mat. 12:​36, 37; 25:40) Yesu naija kumanya abo abaasagikire bagenzi be abaseserweho amagita, n’omulimo ogu barukukora. a Omulingo gumu omukuru abo abali nk’entaama basagikamu bagenzi ba Kristo nugwo ogw’okubakonyera omu mulimo ogw’okutebeza. Abo abasagika bagenzi ba Kristo nibaija kucwerwa omusango ‘nk’abahikiriire’ kandi nibaija kutunga omugisa ogw’okutunga ‘obwomeezi obutahwaho’ omu nsi. (Mat. 25:46; Kus. 7:​16, 17) Mali, egi ka mpeera enungi muno hali abo abalirinda obwesigwa bwabo! Kuraba omu kwikara bali besigwa omu kasumi ak’omuhito omwingi na hanyuma y’akasumi ako, baikaza amabara gaabo omu “kitabu kyobwomezi.”—Kus. 20:15.

5. Isomo ki eri turukwegera ha kyokurorraho eky’entaama n’embuzi, kandi nibaha abasobora kugasirwa omu kyokurorraho kinu?

⁵ Kigumye ngu waikara oli mwesigwa. Ekyokurorraho kya Yesu eky’entaama n’embuzi kikira kukwataho abo abaine okunihira okw’okwikara omu nsi ebiro n’ebiro. Booleka ngu baine okwikiriza kuraba omu kukonyera bagenzi ba Kristo omu mulimo ogw’okutebeza kandi n’obwesigwa bahondera oburagirizi obw’omwiru omwesigwa kandi ow’amagezi Yesu ow’akomere kutwebembera. (Mat. 24:45) Baitu n’abo abaine okunihira okw’okugenda omu iguru na bo basemeriire kuteeka omutima ha kutererwa okurukusangwa omu kyokurorraho kinu. Habwaki? Habwokuba Yesu arora ebikorwa byabo, ebitekerezo byabo, n’omulingo babazaamu. Na bo basemeriire kukigumya ngu baikara bali besigwa. Yesu akongera yabazaaho ebyokurorraho ebindi bibiri ebirumu okutererra hali abaseserweho amagita. Ebyokurorraho binu nibisangwa n’omu Matayo esuura 25. Hati, leka tubazeeho ekyokurorraho eky’abaisiki ab’amagezi, n’abadomadoma.

ABAISIKI AB’AMAGEZI N’ABADOMADOMA

6. Abaisiki bataano bakookeka bata ngu b’amagezi? (Matayo 25:​6-10)

⁶ Omu kyokurorraho eky’abaisiki, Yesu akabazaaho abaisiki ikumi abaagenzere kutangatangana omuswezi. (Mat. 25:​1-4) Boona bakaba nibanihira kumusendekereza ha bugenyi bwe obw’okugaitwa. Yesu akabazaaho bataano hali bo ‘nk’ab’amagezi’ kandi bataano abandi ‘nk’abadomadoma.’ Abaisiki ab’amagezi, bakaba betekaniize kandi bali bulindaara. Bakaba betekaniize kulindirra omuswezi hoona nambere yakwiziire, n’obu yakwizire omu bwire bw’ekiro muno. Egi niyo ensonga habwaki baizire n’etabaaza ezirumu amagita, nukwo zibakonyere kutunga ekyererezi omu mwirima. Ekindi, bakaija n’amagita agandi kakuba omuswezi akerererwa. Nahabweki, bakaba betekaniize kwikaza etabaaza zaabu nizaaka. (Soma Matayo 25:​6-10.) Omuswezi obu yaizire, abaisiki ab’amagezi bakataahamu na uwe ha bugenyi obw’okugaitwa. Omu mulingo nugwo gumu, Abakristaayo abaseserweho amagita aboolekere ngu betekaniize, kuraba omu kwikara bali bulindaara kandi bali besigwa kuhika akasumi Yesu obu aliija kucwa omusango, nibaija kweteranizaaho omuswezi kandi ogu nuwe Yesu omu Bukama bwe obw’omu iguru. b (Kus. 7:​1-3) Kandi kiki ekirihika h’abaisiki bataano abadomadoma?

7. Kiki ekyahikire hali abaisiki abadomadoma, kandi habwaki?

 ⁷ Kwahukanaho n’abaisiki ab’amagezi, abaisiki bataano abadomadoma, bakaba batetekaniize nambere omuswezi yaiziire. Etabaaza zaabo zikaba ziri haihi kuzima, kandi bakaba bataizire n’amagita agandi. Obu baakyetegeriize ngu omuswezi ali haihi kwija, bakagenda kugura amagita agandi. Bakaba batakagarukire, nambere omuwezi yaiziire. Omu kaire ako, abaisiki “abakaba betekaniize bahingura nauwe omu bugenyi obwobugole: oruigi rwakingwaho.” (Mat. 25:10) Hanyuma abaisiki abadomadoma obu baagarukire nibagonza kutaahamu, omuswezi akabagambira ati: “Tindukubamanya.” (Mat. 25:​11, 12) Abaisiki abo bakaba batetekaniize kulindirra omuswezi hoona nambere araizira. Isomo ki abaseserweho amagita eri barukwega?

8-9. Isomo ki abaseserweho amagita eri barukwegera ha kyokurorraho eky’abaisiki? (Rora n’ekisisani.)

⁸ Kigumye ngu waikara oyetekaniize kandi oli bulindaara. Yesu akaba atarukuranga ngu hakaba nihaija kubaho guruupu ibiri ez’abaseserweho amagita, ngu guruupu emu ekaba niija kwikara eyetekaniize kuhikira kumu ha mpero ey’obusinge bunu kandi ngu endi etetekaniize. Oihireho, akaba naasoborra ekyakuhikire hali abaseserweho amagita kakuba baba batetekaniize kugumiisiriza n’obwesigwa kuhikira kimu ha mpero. Kakuba eki kibaho, tibaakutungire empeera yabo. (Yoh. 14:​3, 4) Egi nsonga nkuru! Okunihira kwaitu kakube okw’okugenda omu iguru rundi kwikara omu nsi, itwena tusemeriire kuteeka omutima ha kutererra okuli omu kyokurorraho eky’abaisiki. Buli omu hali itwe asemeriire kwikara ali bulindaara kandi ayetekaniize kuhika ha mpero.—Mat. 24:13.

⁹ Hanyuma ya Yesu kubazaaho ekyokurorraho eky’abaisiki obu naayoleka obukuru obw’okwikara twetekaniize kandi tuli bulindaara, akongera yabazaaho ekyokurorraho eky’etaranta. Ekyokurorraho kinu, kibazaaho obukuru obw’okuba bekambi.

ETARANTA

10. Abairu babiri bakooleka bata ngu besigwa? (Matayo 25:​19-23)

¹⁰ Omu kyokurorraho eky’etaranta, Yesu akabazaaho  abairu babiri abakaba bali besigwa hali mukama wabo hamu n’ow’akaba atali mwesigwa. (Mat. 25:​14-18) Abairu banu babiri bakooleka ngu bali besigwa kuraba omu kukora n’amaani kukorra mukama wabo amagoba. Obu akaba atakagenzere omu nsi endi, akabasigira etaranta kandi ezi zikaba ziri sente nyingi muno. Abairu babiri abesigwa bakaba bekambi kandi baakozesa sente omu mulingo ogw’amagezi. Kiki ekyarugiremu? Mukama wabo obu yagarukire, akasanga sente ezi yabahaire, bazitaizeemu emirundi ebiri. Mukama wabo akabasiima—kandi baataaha ‘omu kusemererwa kwa mukama wabo.’ (Soma Matayo 25:​19-23.) Baitu kiki ekyahikire hali omwiru owakasatu? Kiki eki yakozeseze sente mukama we ezi yamuhaire?

11. Kiki ekyahikire hali omwiru “omugara” kandi habwaki?

¹¹ Omwiru owakasatu, akatunga etaranta emu, baitu akaba ‘mugara.’ Mukama we akaba naamunihirramu kukozesa etaranta ye omu mulingo ogw’amagezi. Baitu uwe akagiziika omu itaka. Mukama we obu yagarukire, omwiru ogu, akaba ataine amagoba goona ag’okumugarurra. Omwiru onu, akaba ataine enteekereza enungi. Omu kiikaro eky’okusaba ekiganyiro habw’okulemwa kukorra mukama we amagoba, omwiru ogu akeeta mukama we ‘omusaija ow’agumangaine.’ Omwiru onu, atasiimwe mukama we. Kandi ekirukusaasa muno, etaranta egi ekamwihwaho, kandi yabingwa omu ka ya mukama we.—Mat. 25:​24, 26-30.

12. Kasumi kanu, abairu babiri abesigwa, nibakikirra baha?

¹² Abairu babiri abesigwa nibakikirra Abakristaayo abaseserweho amagita abesigwa. Omukama wabo, kandi ogu nuwe Yesu, naabaraliza, ‘kutaaha omu kusemererwa kwa mukama wabo.’ Batunga empeera yabo ey’omu iguru, kuraba omu kuhuumbuka okw’okubanza. (Mat. 25:​21, 23; Kus. 20:5b) Ha rubaju orundi, ekyokurorraho ekibi eky’omwiru omugara, nikitererra abaseserweho amagita. Omu mulingo ki?

13-14. Isomo ki abaseserweho amagita eri barukwegera ha kyokurorraho eky’etaranta? (Rora n’ekisisani.)

¹³ Kigumye ngu waikara oli mwekambi kandi oli bulindaara. Kusisanaho n’ekyokurorraho eky’abaisiki, omu kyokurorraho eky’etaranta, Yesu akaba atarukumanyisa ngu abaseserweho amagita, nibaija kuba bagara. Oihireho, akaba naasoborra  ekisobora kubaho kakuba bafooka bagara. Baakulemerwe kugumya ‘okwetwa kwabo nokukomwamu kwabo,’ kandi tibakwikiriziibwe kutaaha omu Bukama obw’omu iguru.—2 Pet. 1:10.

¹⁴ Ebyokurorraho bya Yesu ebirukukwata h’abaisiki hamu na ha taranta nibyolekera kimu ngu Abakristaayo boona abaseserweho amagita, basemeriire kwikara betekaniize, bali bekambi, kandi bali bulindaara. Baitu haroho ekintu ekindi Yesu eki yabalize, ekirukutererra abaseserweho amagita? Ego, ebigambo bya Yesu ebirukusangwa omu Matayo 24:​40, 41 nabyo nibikwataho okucwa omusango ogw’okumaliira hali abo abaseserweho amagita.

NOHA “ALITWARWA”?

15-16. Ebigambo ebirukusangwa omu Matayo 24:​40, 41 nibyoleka bita obukuru obw’abaseserweho amagita kwikara bali bulindaara?

¹⁵ Yesu obu akaba atakabalizeeho ebyokurorraho bisatu, akabazaaho okucwerwa omusango okw’okumalirra okw’abo abaseserweho amagita okulyoleka ogu ow’arukusiimwa. Akabazaaho abasaija babiri abarukukora omu musiri, n’abakazi babiri abarukusa harubengo. Abasaija nibasisana nk’abarukukora omulimo gumu, kandi n’abakazi na bo nikyo kimu, baitu Yesu akagamba ngu “omu alitwarwa, ondi alisigwa.” (Soma Matayo 24:​40, 41.) Hanyuma, akatererra abahondezi be ati: “Nukwo murolege; baitu timumanyire ekiro okukiri Mukama wanyu ekyaliiziramu.” (Mat. 24:42) Yesu akabazaaho ekintu nikyo kimu hanyuma y’okubazaaho ekyokurorraho eky’abaisiki. (Mat. 25:13) Ebigambo binu biine akakwate? Nikizooka nibisobora kuba nibikwatagana. Abaseserweho amagita abesigwa bonka, nubo ‘abalitwarwa’ kandi batangirirwe Yesu omu Bukama obw’omu iguru.—Yoh. 14:3.

¹⁶ Kigumye ngu waikara oli bulindaara. Abaseserweho amagita abataliikara bali bulindaara omu by’omwoyo tibalisorolezebwa hamu n’abo ‘abakomerwemu.’ (Mat. 24:31) Kutwarra hamu, abantu ba Yahwe boona, kababe baine okunihira kwa mulingo ki, basemeriire kurora ebigambo bya Yesu nk’okutererra okw’okwikara bali bulindaara kandi besigwa.

17. Habwaki tutasemeriire kweralikirra kakuba Yahwe acwamu kuseesaho abamu amagita n’omwoyo ogurukwera omu kasumi kaitu?

¹⁷ Hati twamanya kurungi Yahwe, nahabweki tusemeriire kwesiga omulingo acwamu omusango. Titusemeriire kweralikirra Yahwe obu aracwamu kuseesaho amagita abaheereza be abesigwa omu kasumi kaitu. c Tusemeriire kwijuka Yesu eki yagambire h’abakozi abaizire omu saaha eya ikumi n’emu omu kyokurorraho eky’emizabbibbu. (Mat. 20:​1-16) Abo abaayeserwe kukora omu musiri ogw’emizabbibbu hanyuma, bakatunga omusaara nugwo gumu n’abo abatandikire kukora kara. Omu mulingo nugwo gumu, akasumi abaseserweho amagita bakomwa tikiri kikuru, oihireho nibaija kutunga empeera yabo ey’omu iguru, obu baraikara bali besigwa.

TEEKA OMUTIMA HA KUTERERWA

18-19. Masomo ki n’okutererwa ebi tubalizeeho?

¹⁸ Biki ebi twegere? Hali abo abaine okunihira okw’okwikara omu nsi ebiro n’ebiro, ekyokurorraho eky’entaama n’embuzi, nikibatererra kwikara bali besigwa hali Yahwe—hati hamu n’omu kasumi ak’omuhito omwingi. Obu haraaba nihaburayo akaire kake obulemu bwa Haramagedoni kutandika, Yesu naija kucwera omusango abesigwa boona nk’abasemeriire kutaaha “omu bwomeezi obutahwaho.”—Mat. 25:46.

¹⁹ Ekindi, turozere ebyokurorraho bibiri ebirukutererra abaseserweho amagita. Omu kyokurorraho kya Yesu ekirukukwata h’abaisiki ab’amagezi n’abadomadoma, bataano hali bo, bakooleka amagezi. Bakaba beteekaniize kandi bali bulindaara, kulindirra omuswezi hoona  nambere yakwiziire. Baitu abaisiki abadomadoma, bakaba batetekaniize. Kandi omuswezi atabaikirize kutaaha obugenyi bwe obw’okugaitwa. Omu mulingo nugwo gumu, naitwe tusemeriire kwikara twetekaniize kulindirra akasumi nambere Yesu alimaraho obusinge bunu, kakabe karaihire kwingana nkaha. Ekindi, omu kyokurorraho kya Yesu eky’etaranta, tubalizeeho abairu babiri abesigwa abakaba bali bekambi kandi bali bulindaara. Bakakorra mukama wabo n’obwekambi kandi yabasiima. Baitu omwiru omugara, uwe atasiimwe. Isomo ki eri turukwega? Tusemeriire kwikara twine bingi eby’okukora omu buheereza bwaitu hali Yahwe kuhikira kimu ha mpero. Eky’okumalirra, turozere omulingo abaseserweho amagita basemeriire kwikara bali bulindaara obu baraaba bali ‘b’okutwarwa’ Yesu nukwo batunge empeera yabo ey’omu iguru. Balindiriire nekihika akasumi ‘akokusorozebwa’ kugenda hali Yesu omu iguru. Hanyuma y’obulemu bwa Haramagedoni, nibaija kufooka omugole wa Yesu omu bugole bw’omwana gw’Entaama.—2 Bas. 2:1; Kus. 19:9.

20. Kiki Yahwe eki alikorra abo abahondera okutererra kwe?

²⁰ N’obu kiraaba ngu akasumi ka Yesu ak’okucweramu omusango kali haihi kuhika, tikirukutwetaagisa kweralikirra. Obu turaikara tuli besigwa, Isiitwe ow’omu iguru ow’okugonza, naija kutuha “amani agali amaingi” nukwo tusobole ‘kwemerra omumaiso G’omwana Gw’entama.’ (2 Kol. 4:7; Luk. 21:36) Okunihira kwaitu kakube okw’okugenda omu iguru rundi kwikara omu nsi, nitwija kusemeza Isiitwe obu turahondera okutererwa okurukusangwa omu byokurorraho bya Yesu. Habw’embabazi za Yahwe ezitatusemeriire amabara gaitu nigaija kuba “gahandiikirwe omu kitabu” eky’obwomeezi.—Dan. 12:1; Kus. 3:5.