1-2. Tugasirwa tuta habw’okuhangwa n’obusobozi obw’okutunga okusemererwa okwingi okuruga omu kugaba okukira okuheebwa?

 YAHWE obu yahangire abantu, akabahanga n’obusobozi obw’okutunga okusemererwa kwingi okuruga omu kugaba okukira okuheebwa. (Eng. 20:35) Hati tugambe ngu titutunga okusemererwa kwona obu tuheebwa? Nangwa. Itwena tukimanyire kurungi ngu tusemererwa obu tuheebwa ekisembo. Baitu, tutunga okusemererwa okurukukiraho obu tugaba. Kandi mali kinu kirungi habwokuba Yahwe akatuhanga omu mulingo gunu. Habwaki nitugamba tuti?

² Habwokuba Yahwe akatuhanga omu mulingo gunu, nitusobora kwongera ha kusemererwa kwaitu. Nitusobora kwongera ha kusemererwa kwaitu kuraba omu kuserra emiringo tusobora kugabira abandi kandi hanyuma tukakikora. Mali kinu nikisemeza ngu Yahwe akatuhanga omu mulingo gunu?—Zab. 139:14.

3. Habwaki Yahwe n’abazibwaho nka Ruhanga “ow’asemeriirwe”?

³ Ebyahandiikirwe bitugumya ngu okugaba kuleeta okusemererwa, kandi egi niyo nsonga habwaki Baibuli eyeta Yahwe “Ruhanga ow’asemeriirwe.” (1 Tim. 1:​11, NWT) Nuwe Omugabi ow’okubanza kandi ow’arukukirrayo kimu. Nk’oku omukwenda Paulo yagambire, “omuluwe ntwomera, ntugenda, ntuikaraho.” (Eng. 17:28) Mali, “ekisembo kyona ekirungi nekisembo kyona ekihikiriire” kiruga hali Yahwe.—Yak. 1:17.

4. Kiki ekiratukonyera kutunga okusemererwa okwingi?

⁴ Hataroho kugurukyagurukya, itwena twakugondeze kutunga okusemererwa okwingi okuruga omu kugaba. Eki nitusobora kukikora kuraba omu kwegera ha mulingo gwa Yahwe ogw’okugaba. (Bef. 5:1) Omu kicweka kinu nitwija kubazaaho ekyokurorraho kya Yahwe ekirungi eky’okugaba, kandi twege eki tusobora kukora kakuba twehurra ngu abantu tibarukusiima habw’ebi turukubakorra.  Kinu nikiija kutwekambisa kwikara tuli bantu abagabi, ekiratuleetera okusemererwa okwingi.

BA MUGABI NKA YAHWE

5. Bintu ki ebimu Yahwe ebi atuha?

⁵ Miringo ki emu Yahwe ey’ayolekamu ngu ali muntu omugabi? Tekerezaaho ebyokurorraho binu. Yahwe atuha ebintu ebi turukwetaaga. Nitusobora kuba tutaine byona ebi turukwetaaga kusobora kuba n’obwomeezi oburungi muno, baitu nitusiima Yahwe habwokuba ngu baingi omuli itwe twine ebi turukwetaaga. Ekyokurorraho, atusobozesa kutunga ebyokulya, ebyokujwara n’oburaaro. (Zab. 4:8; Mat. 6:​31-33; 1 Tim. 6:​6-8) Hati tugambe ngu Yahwe atuhikyaho ebyetaago byaitu ngu habwokuba aine kukikora? Nangwa! Hati habwaki akikora?

6. Kiki eki turukwega kuruga omu Matayo 6:​25, 26?

⁶ Yahwe atuha ebyetaago byaitu habwokuba naatugonza. Tekerezaaho ebigambo bya Yesu ebirukusangwa omu Matayo 6:​25, 26. (Soma.) Yesu akakozesa ebyokurorraho kuruga omu byahangirwe. Obu akaba nabazaaho ebinyonyi akagamba ati: “Tizisiga, tizigesa, nobukwakuba okuhunika omu nguli.” Baitu wetegereze ebigambo ebi yayongiireho: “Isinywe ali omu iguru azirisa.” Hanyuma akakaguza ati: “Inywe timurukukira muno ezi?” Isomo ki eri turukwega? Yahwe arora abaheereza be nk’ab’omuhendo muno kukira ebisoro. Nahabweki, Yahwe obu araaba afaaho ebisoro, nitusobora kukigumya ngu naitwe naija kutuha ebi turukwetaaga habwokuba tuli b’omuhendo muno hali uwe kukira ebisoro! Kusisanaho na taata ow’arukufaayo, Yahwe ahikyaho ab’eka ye ebyetaago byabo habwokuba naabagonza.—Zab. 145:16; Mat. 6:32.

7. Mulingo ki ogumu ogu tusobora kwegera ha kyokurorraho kya Yahwe eky’okugaba? (Rora n’ekisisani.)

⁷ Kusisanaho na Yahwe, naitwe nitusobora kugabira abandi ebi barukwetaaga habwokuba nitubagonza. Ekyokurorraho, haroho ow’oruganda rundi munyaanya itwe ow’orukumanya ow’arukwetaaga ebyokulya rundi eky’okujwara? Yahwe naasobora kukukozesa kumuhikyaho ebyetaago ebi. Abantu ba Yahwe bamanyirwe nk’abantu abanguha kukonyera obu habaho ekigwererezi. Ekyokurorraho, omu kasumi ak’oburwaire bwa Korona, ab’oruganda na banyaanya itwe bakagabira abantu abakaba bali omu bwetaago ebyokulya, ebyokujwara hamu n’ebindi. Kandi baingi bakahayo begondiize kusagika omulimo ogw’ensi yoona. Kandi kinu kikakonyera kusagika ab’oruganda omu nsi yoona abakaba bali omu bwetaago habw’ekigwererezi. Bakateeka omu nkora ebigambo ebirukusangwa  omu Abaheburaniya 13:16 ebirukugamba ngu: “Baitu mutebwa okukora kurungi nokuterana hamu: baitu ebyonzira ebirukusisana biti Ruhanga nabisima muno.”

8. Yahwe atuha amaani ag’okukora ki? (Abafiripi 2:13)

⁸ Yahwe aha amaani. Yahwe kimusemeza muno kuha abaheereza be abesigwa amaani ge agataine bugarukiro. (Soma Isaya 40:29.) Wakasabaga Yahwe kukuha amaani ag’okwangirra ekyohyo rundi kukuha amaani ag’okugumiisiriza ekirengo eky’amaani? Ekindi, n’osobora kuba osabire Yahwe kukuha amaani ag’okukora ebintu eby’okora buli kiro. Esaara ei wasabire Yahwe kukuha amaani obu yagarukirwemu, n’osobora kuba waikiranganiize n’omukwenda Paulo ayahandiikire ati: “Ninsobora okukora byona habwogu arukumpa amani.”—Baf. 4:13.

9. Miringo ki emu ei tusobora kwegera hali Yahwe obu nitukozesa amaani gaitu kukonyera abandi? (Rora n’ekisisani.)

⁹ N’obu kiraaba ngu titwine amaani agataine obugarukiro nk’aga Yahwe, kandi ngu titusobora kuha abandi amaani nk’oku Yahwe akora, nitusobora kumwegeraho kuraba omu kukozesa amaani gaitu kukonyera abandi. Ekyokurorraho, nitusobora kukonyera abaceke n’abakuzire omu myaka kuraba omu kubagurra ebyokulya n’okubakonyera omu mirimo yabo ey’omuka. Enyikara zaitu obu ziraaba nizitusobozesa, nitusobora kwehayo kukonyera omu kuyonja n’okudaabiriza Ekyombeko ky’Obukama. Obu tukozesa amaani gaitu kukora ebintu binu, kigasira ab’oruganda na banyaanya itwe.

10. Nitusobora tuta kugarramu abandi amaani kuraba omu bigambo byaitu?

¹⁰ Ijuka ngu n’osobora kugarramu abandi amaani kuraba omu bigambo ebi okozesa. N’osobora kutekerezaaho omuntu ow’asobora kugasirwa kakuba omusiima kuruga ha mutima? Haroho omuntu weena ow’orukumanya ow’arukwetaaga kuhuumuzibwa? Obu araaba aroho, kigumye ngu omuntu ogu yakimanya ngu n’omufaaho. N’osobora kumubungira maiso ha maiso, kumuterra esimu obundi n’omusindikira kaadi rundi obutumwa. Tikirukukwetaagisa kukozesa ebigambo bingi. Ebigambo ebike, ebyanguhire kandi ebirukuruga ha mutima nibisobora kuba nibyo byonyini ow’oruganda rundi munyaanya itwe ebi arukwetaaga kusobora kwikara ali mwesigwa, rundi kweyongera kwehurra kurungi.—Nfu. 12:25; Bef. 4:29.

11. Yahwe aha ata abantu abandi amagezi ge?

¹¹ Yahwe aha amagezi. Omwegeswa Yakobo akahandiika ati: “Baitu omuntu wena omulinywe obwaburwa amagezi, asabe Ruhanga, arukuha bona okutaima kunu tarukuhana.” (Yak. 1:5) Nk’oku ebigambo binu birukwoleka, Yahwe tayesigaliza amagezi ge. N’okugonza agagabira abandi. Wetegereze ekintu ekindi, Yahwe obu aha amagezi, akikora “atarukuhana” rundi ekirukumanyisa ngu tatuserramu ensobi. Tagonza twehurre kubi ngu habwokuba nuwe turukwesiga  kutuha obuhabuzi. Oihireho naatwekambisa kumusaba obuhabuzi.—Nfu. 2:​1-6.

12. Migisa ki ei twine ey’okugaba amagezi gaitu?

¹² Kandi itwe? Nitusobora kwegera hali Yahwe kuraba omu kugaba amagezi gaitu? (Zab. 32:8) Abantu ba Yahwe baine emigisa nyingi ey’okugabiraho abandi ebi beegere. Ekyokurorraho, tukira kutendeka abahyaka omu buheereza. Abagurusi, n’okugumiisiriza batendeka abaheereza omu kitebe hamu n’ab’oruganda ababatiziibwe kumanya omulingo basobora kuhikirizaamu obujunanizibwa bwabo omu kitebe. Abo abaine obukugu omu kwombeka n’okudaabiriza bakonyera omu kutendeka abandi kukora emirimo ey’ekorwa ha byombeko by’ekitebe.

13. Nitusobora tuta kwegera ha mulingo Yahwe agabamu amagezi obu turukuba nitutendeka abandi?

¹³ Abo abatendeka abandi basemeriire kwegera ha mulingo Yahwe agabamu amagezi ge. Ijuka ngu Yahwe agaba amagezi okutaima. Omu mulingo nugwo gumu, naitwe tugambira abandi byona ebi tumanyire tutarukwesigaliza ekintu kyona. Titurukugonza kwesigaliza gamu h’amagezi obu nitutiina ngu ou turukwegesa naasobora kutwara obujunanizibwa obu twine. Kandi titusemeriire kuba n’entekereza ey’erukugamba ngu: ‘Busaho ayantendekere! Leka na uwe ayeyegese.’ Busaho muheereza wa Yahwe weena ow’asemeriire kuba n’entekereza nk’egi. Oihireho, n’okusemererwa, titusemeriire kugarukira ha kubagambira ebi turukumanya, baitu tusemeriire n’okuhayo ‘obwomezi bwaitu itwenka’ kubatendeka. (1 Bas. 2:8) Nitunihira ngu na bo, “[balisobora] okwegesa abandi.” (2 Tim. 2:​1, 2) Kakuba itwena tugambira abandi ebi turukumanya twegondiize, nitwija kweyongera kutunga amagezi maingi n’okusemererwa kwingi.

ABANTU OBU BAZOOKA NK’ABATARUKUSIIMA

14. Kiki abarukukira obwingi eki bakora obu tubakorra ekintu?

¹⁴ Obu tuba abantu abagabi kukira muno hali ab’oruganda na banyaanya itwe, emirundi erukukira obwingi batusiima. Nibasobora kutuhandiikira aka kaadi ak’okusiima, rundi nibatusiima omu mulingo ogundi. (Bak. 3:15) Obu batusiima tutunga okusemererwa kwingi habw’okumanya ngu haroho eki tubakoliire.

15. Kiki eki tusemeriire kwijuka omuntu obu atatusiima?

¹⁵ Baitu obwire obumu abantu abamu tibatusiima habw’ekintu eki tuba tubakoliire. Obwire obumu nitusobora kuhayo obwire bwaitu, amaani gaitu rundi ebintu byaitu kandi hanyuma nitusobora kwekaguza omuntu obu araaba asiimire habw’ekintu eki tumukoliire. Kakuba eki kibaho, nitusobora tuta kwetantara kubiihirwa rundi kuhwamu amaani? Ijuka ebigambo ebirukusangwa omu kyahandiikirwe ekyebembiire ekicweka kinu, Engeso Ezabakwenda 20:35. Okusemererwa kwaitu okuruga omu kugaba tikusigikirra ha mulingo omuntu ayetwazaamu hanyuma y’okumukorra ekintu. Nitusobora kucwamu kwegondeza omu kugaba n’obu kiraaba ngu abandi nibazooka nk’abatarukusiima. Omu mulingo ki? Tekerezaaho emiringo enu.

16. Kiki eki tusemeriire kuteekaho omutima obu turukuba nitugaba?

¹⁶ Teeka omutima ha kwegera hali Yahwe. Aha abantu ebintu ebirungi kababe nibasiima rundi nangwa. (Mat. 5:​43-48) Yahwe naatunihiza ngu kakuba naitwe tugaba “tutarukunihira kugarurwa ekintu kyona; empeera [yaitu] eriba nyingi.” (Luk. 6:​35, NWT) “Ekintu kyona” nikisobora kutwarramu ebigambo rundi ebikorwa ebirukwoleka okusiima. Abantu n’obu baakutusiima rundi nangwa, Yahwe naija kwikaraga naatuha empeera habw’okuba abantu abagaba kuruga ha mutima.—Nfu. 19:17; 2 Kol. 9:7.

17. Kiki ekisobora kutukonyera kwikara twine entekereza ey’ehikire? (Luka 14:​12-14)

¹⁷ Ekintu ekindi eki tusobora kwegera hali Yahwe obu turukuba nitugaba, nikyo kuteeka omu nkora ebigambo bya Yesu ebirukusangwa omu  Luka 14:​12-14. (Soma.) Tikiri kibi kwoleka amakune rundi kuba muntu omugabi hali abo abasobora kukukorra ekintu nikyo kimu. Baitu, kakuba tukyetegereza ngu emirundi erukukira obwingi twikaire nitugaba habwokuba nitunihira ngu nitwija kugarurrwa? Obu kiraaba nukwo kiri, lengaho kukora Yesu eki yagambire. Nitusobora kwoleka amakune omuntu ou tumanyire ngu taine busobozi obw’okutukorra ekintu nikyo kimu. Kinu nikiija kutuleetera okusemererwa habwokuba nitwegera hali Yahwe. Kakuba tuba tutarukunihira abantu kutugarurra ekintu kyona habw’okubakorra ebirungi, nikiija kutukonyera kwikara twine okusemererwa n’obu barukuba batatusiimire.

18. Kiki eki tutasemeriire kukora, kandi habwaki?

¹⁸ Wetantale kutekereza ngu abantu abandi tibarukusiima. (1 Kol. 13:7) Abantu abandi obu batatusiima, nitusobora kwekaguza: ‘Mali gali mananu ngu tibarukusiima rundi beberwe?’ Obundi haroho ensonga ezindi habwaki batetwaize omu mulingo tubaire nitunihira. Abamu nibasobora kuba basiimire baitu nikibagumira kukyoleka. Nibasobora kuswara habw’okutunga obukonyezi kukira muno obu barukuba nubo baakonyeraga abandi omu busumi obwa kara. K’ebe nsonga ki, okugonza okw’Ekikristaayo nikwija kutwekambisa kugumizaamu nitubakonyera kandi tukaikara nitutunga okusemererwa omu kuba bantu abagabi.—Bef. 4:2.

19-20. Habwaki kuba bantu abarukugumiisiriza guli mulingo omukuru obu turukuba nitugabira abandi? (Rora n’ekisisani.)

¹⁹ Ba muntu arukugumiisiriza. Obu kirukuhika ha kuba bantu abagabi, Omukama Sulemani akahandiika ati: “Naga ebyokulya byawe ha maizi: baitu olibibona ebiro bingi bihinguireho.” (Mug. 11:1) Nk’oku ebigambo binu birukwoleka, abantu abamu nibasobora kutusiima habwokuba bantu abagabi hanyuma ‘y’ebiro bingi kuhinguraho.’ Tekerezaaho ekyokurorraho ekirukwoleka amananu g’ebigambo binu.

²⁰ Emyaka nyingi muno enyuma, mukazi w’omuroleerezi w’ekicweka akasindikira munyaanya itwe ow’akaba nakyaruga kubatizibwa ebbaruha ei yahandiikire kuruga ha mutima obu n’amutererra kwikara ali mwesigwa. Hanyuma  y’okurabaho emyaka nka munaana, munyaanya itwe akagarukamu ebbaruha naagamba ati: “Nimpurra ngu nsemeriire kukuhandiikira nkugambire nkoku ebbaruha ei wampandikiire ikaire nenkonyera emyaka enu yoona iwe otakimanyire.” Akongera yagamba ati: “[Ebbaruha yaawe] ekabamu ebigambo eby’embabazi baitu ekyahandiikirwe nikyo kyakizireyo muno kunkwataho, kandi tinkakyebwaga.” a Hanyuma y’okubazaaho ebizibu ebi yatangatangaine, munyaanya itwe akagamba ati: “Obwire obumu nagonzaaga kubirugaho kandi ndeke kuheereza Yahwe. Baitu naikaraga ninyijuka ekyahandiikirwe eki wampandikiire kandi nikimpa amaani ag’okugumizaamu ndi mwesigwa.” Munyaanya itwe akongeraho ati: “Omu myaka egi yoona munaana, busaho ekintu ekikizire kungarramu amaani kukira ebbaruha ei wampandikiire hamu n’ekyahandiikirwe ekikaba kirumu.” Tekerezaaho omulingo mukazi w’omuroleerezi w’ekicweka yasemeriirwe kutunga ebbaruha enu hanyuma ‘y’okuhinguraho ebiro bingi’! Naitwe nitusobora kusiimwa hanyuma y’okurabaho ebiro bingi tukoliire omuntu ekintu ekirungi.

21. Habwaki ocweriiremu kimu kwikara n’oyegera ha kugaba kwa Yahwe?

²¹ Nk’oku tusangirwe tugambire, Yahwe akatuhanga n’obusobozi obw’embaganiza. N’obu kiraaba ngu tutunga okusemererwa obu tuheebwa, tutunga okusemererwa okwingi obu tugabira abandi. Twehurra kurungi obu tusobora kukonyera Abakristaayo bagenzi baitu. Kandi tusemererwa obu batusiima. Baitu kababe nibasiima rundi nangwa, kitusemeza kukimanya ngu tukozere ekintu ekihikire. Otalyebwa ngu ekintu kyona eki ohayo, “[Yahwe] nasobora okukuha bingi muno” okukira eki ohaireyo. (2 Byom. 25:9) Nahabweki tosobora kuha abandi kukira Yahwe eki asobora kukuha! Kandi busaho kusemererwa kwona oku otunga okurukukira oku otunga obu osasurwa Yahwe. Leka itwena tucweremu kimu kugumizaamu nitwegera hali Isiitwe ow’omu iguru omugabi.