Habwokuba abegeswa ba Yesu 70 bakaba bataroho Yesu obu yatandikireho Ekiihuro kya Mukama Waitu Ekyarwebagyo, tikirukumanyisa ngu Yesu akaba atakyabagonza rundi ngu bakaba bamulekereho. Yesu akaba naagonza kuba n’abakwenda be ha mukoro ogu.

Abegeswa be boona 12 hamu na 70 akaba naabagonza. Omu begeswa be boona, Yesu akabanza kukomamu abasaija 12 abaayayesere abakwenda. (Luk. 6:​12-16) Akaba ali omu Galiraaya “[obuyasoroize] ahamu ikumi na babiri” kandi “yabatuma okutebeza Obukama bwa Ruhanga, nokukiza abarwaire.” (Luk. 9:​1-6) Hanyuma, obu akaba ali omu Buyudaaya, “akakomamu abandi ensanju, yabatuma babiri babiri.” (Luk. 9:51; 10:1) Nahabweki, Yesu akaba aine abegeswa omu biikaro ebirukwahukana abakaba nibatebeza amakuru amarungi.

Abayudaaya abaafookere abegeswa ba Yesu bakaba nibakyajaguza Okuhingurwaho, obundi bali hamu n’ab’amaka gaabo. (Kurug. 12: 6-11, 17-20) Omu kaire kake Yesu atakafiire, akagenda n’abakwenda be Yerusalemu. Baitu ateete abegeswa be boona kuruga omu Buyudaaya, Galiraaya, na Pereya kwija kujaguza na uwe Okuhingurwaho. Ekirukwoleka ngu Yesu akaba naagonza kuba n’abakwenda be ha mukoro gunu. Akabagambira ati: “Nokwegomba nyegombere okuliira hamu nainywe Okuhingurwaho kunu ntakasaliziibwe.”—Luk. 22:15.

Akaba aine ensonga enungi habwaki yakozere eki. Yesu akaba ali haihi kufa “[nk’Omwana] gwentama ogwa Ruhanga, arukuihaho ebibi byensi.” (Yoh. 1:29) Eki kikaba kisemeriire kubaho omu Yerusalemu nambere ebihongwa byaheebwayoga hali Ruhanga. Akataama ak’Okuhingurwaho kaijukyaga Abaisaleri ngu Yahwe akaba abajunire kuruga omu Ihanga lya Misiri. Ekihongwa kya Yesu kikaba nikiija kukonyera abantu kulekerwa kuruga omu kibi n’okufa. (1 Kol. 5:​7, 8) Habw’ekihongwa kya Yesu, abakwenda 12 baakufookere omusingi gw’ekitebe Ekikristaayo. (Bef. 2:​20-22) Ekitabu ekya Okusuku’rwa nikigamba ngu orubuga orurukwera Yeusalemu rwine “emiganda ikumi naibiri” ey’ehandikirweho “amabara ikumi nabiri, agabakwenda ikumi nababiri Abomwana Gwentama.” (Kus. 21:​10-14) Mali, abakwenda abesigwa bakaba nibaija kuba n’omulimo omukuru muno omu kuhikiriza ekigendererwa kya Ruhanga. Nahabweki, nikyetegerezebwa habwaki Yesu akaba naagonza kuba na bo ha mukoro ogw’Okuhingurwaho ogw’okumalirra hamu n’omukoro ogwahondiireho ogw’Ekiihuro kya Mukama Waitu Ekyarwebagyo.

Abegeswa ba Yesu 70 hamu n’abandi bakaba batali hamu na Yesu ha kiihuro eki. Baitu, abegeswa ba Yesu boona abaakwikaire bali besigwa, baakugasiirwe omu kintu Yesu yatandikireho, kandi eki nikyo Ekiihuro kya Mukama Waitu Ekyarwebagyo. Abegeswa ba Yesu boona abaakufookere Abakristaayo abaseserweho amagita baakutaahire omu kiragaano ky’obukama, Yesu eki yagambiire abakwenda be rwebagyo oru.—Luk. 22:​29, 30.