1. Tugasirwa tuta obu tubaho ha mukoro ogw’okwijuka okufa kwa Yesu buli mwaka?

 HATAROHO kugurukyagurukya, nokiikiriza ngu ekicunguro kiri ky’omuhendo mwingi muno! (2 Kol. 9:15) Habwokuba Yesu akahayo obwomeezi bwe nk’ekicunguro, noosobora kutunga enkoragana enungi na Yahwe Ruhanga. Ekindi, noosobora kuba n’okunihira okw’okutunga obwomeezi obutahwaho. Mali twine ensonga nyingi muno ez’okusiimira Yahwe ow’atuhaire ekicunguro, habwokuba naatugonza muno! (Bar. 5:8) Kusobora kwikara nitusiima kandi nitwijuka ekintu Yahwe na Yesu baatukoliire, Yesu akatandikaho omukoro ogw’okwijukaga okufa kwe buli mwaka.—Luk. 22:​19, 20.

2. Kiki eki turukwija kubazaaho omu kicweka kinu?

² Omwaka gunu, Ekiijukyo nikiija kubaho Kyamukaaga, Apuli 12, 2025. Hataroho kugurukyagurukya, itwena twetekaniize kubaho. Nitwija kugasirwa muno kakuba tutunga obwire omu kasumi ak’Ekiijukyo kwecumiitirizaaho a ekintu Yahwe n’Omwana we baatukoliire. Omu kicweka kinu, nitwija kubazaaho ekicunguro eki kirukutwegesa hali Yahwe hamu n’Omwana we. Kandi omu kicweka ekirukuhonderaho, nitwija kwetegereza omulingo tusobora kugasirwa omu kicunguro, n’omulingo tusobora kwoleka okusiima kwaitu.

EKICUNGURO EKI KIRUKUTWEGESA HALI YAHWE

3. Okufa kw’omuntu omu nikusobora kuta kucungura obukaikuru n’obukaikuru bw’abantu? (Rora n’ekisisani.)

³ Ekicunguro kitwegesa ha bwinganiza bwa Yahwe. (Bir. 32:4) Omu mulingo ki? Tekerezaaho kinu: Kurugira kimu hali Adamu omujeemu, tukagweterwa ekibi ekirugamu okufa. (Bar. 5:12) Kusobora kulekerwa kuruga omu kibi n’okufa, Yahwe akasindika Yesu kuhayo obwomeezi bwe nk’ekicunguro. Baitu ekicunguro eky’omuntu omu ow’ahikiriire, kikaba nikiija kucungura kita  obukaikuru n’obukaikuru bw’abantu? Omukwenda Paulo asoborra ati: “Habwokuba kuraba omu bujeemu bw’omuntu omu [Adamu] baingi bakafoorwa abasiisi, kuraba omu buhulizi bw’omuntu omu [Yesu] baingi balifoorwa ab’okuhikirra.” (Bar. 5:19; 1 Tim. 2:6) Hanu Paulo akaba naagamba ngu abantu boona bali basiisi kandi bafa habwokuba omuntu omu ow’ahikiriire akajeemera Ruhanga. Nahabweki, kikaba nikyetaagisa omuntu omu ow’ahikiriire kandi omuhulizi, kutulekera kuruga omu kibi n’okufa.

4. Habwaki Yahwe ataraikiriize abaijukuru ba Adamu abaakumworobiire kwomeera ebiro n’ebiro?

⁴ Baitu mali kikaba nikyetaagisa Yesu kubanza kufa nukwo atujune? Yahwe akaba atasobora kucwamu kwikiriza abaijukuru ba Adamu abaakumworobiire kwomeera ebiro n’ebiro? Hali abantu abatahikiriire, eki kikaba nikisobora kuzooka nk’ekikorwa eky’embabazi kandi ekirukwoleka okwetegereza. Baitu hali Yahwe, kinu kikaba ekintu eky’obwinganiza eki akaba asemeriire kukora habwokuba kyakusisaine oti rundi Adamu atakole ekibi eky’amaani kandi ngu n’abaana be batabe basiisi. Baitu ago gakaba gatali mananu.

5. Habwaki nitukigumya ngu Yahwe naija kwikaraga naakora ekihikire?

⁵ Ekindi, kakuba Yahwe atarahaireyo ekicunguro, baitu akaikiriza abaijukuru ba Adamu kwomeera ebiro n’ebiro n’obukiraaba ngu bakaba batahikiriire, eki kyakwolekere ngu Yahwe tarukutwara endengo ze ezirukukwata ha kihikire n’ekitahikire nk’ekikuru. Ekyakurugiremu, abantu baakweralikiriire ngu naasobora kwongera kutatwara endengo ze nk’ekikuru kandi alemwe kuhikiriza ebi yaraganiize omu kasumi ak’omumaiso. Baitu titusemeriire kweralikirra ngu eki nikisobora kubaho. Habwokuba Yahwe akakora ekintu eky’obwinganiza n’obukiraaba ngu kikamwetaagisa kwehikyaho obusaasi obw’amaani muno obu naahayo Omwana we omugonzebwa, kinu nikitugumya ngu naija kwikaraga naakora ekihikire.

6. Ekicunguro kyokeka kita okugonza kwa Ruhanga? (1 Yohana 4:​9, 10)

⁶ Haroho omulingo ogundi ogwakizireyo kuleetera Yahwe kusindika Omwana we kutufeera; kandi ogu nugwo okugonza. (Yoh. 3:16; soma 1 Yohana 4:​9, 10.) Enyegesa ey’ekicunguro eyoleka ngu Yahwe tagarukira ha kugonza abantu kuba n’obwomeezi obutahwaho kyonka, baitu naagonza babe ekicweka ky’eka ye. Tekerezaaho kinu: Adamu obu yasiisire, Yahwe akamubinga omu ka ey’abaheereza be. Ekyarugiremu, itwena tukazaalirwa aheeru y’eka ya Ruhanga. Baitu habwokuba ekicunguro kikasasurwa, abantu boona abaikiririza omuli Ruhanga kandi bakamworobera, kiro kimu nibaija kufooka kicweka ky’eka ye. Baitu n’akasumi kanu nitusobora kuba n’enkoragana enungi  na Ruhanga hamu n’Abakristaayo bagenzi baitu. Mali, Yahwe naatugonza muno!—Bar. 5:​10, 11.

7. Okubonabona kwa Yesu nikutukonyera kuta kumanya omulingo Yahwe atugonzaamu?

⁷ Nitusobora kwetegereza kurungi omulingo Yahwe atugonza kakuba tutekerezaaho omulingo kyamusaliize kurora Omwana we naabonabona. Sitaani agamba ngu busaho omuheereza wa Ruhanga ow’asobora kwikara ali mwesigwa hali Ruhanga obu kiba kigumire kukikora. Kusobora kwoleka ngu eki tikihikire, Yahwe akaikiriza Yesu kubonabona atakafiire. (Yob. 2:​1-5; 1 Pet. 2:21) Yahwe akaba naarora abantu obu bakaba nibasekereza Yesu, abaserikale nibamuteera, n’obu akaba naahanikwa ha muti. Kandi hanyuma, Yahwe akarora Omwana we omugonzebwa naafa omu mulingo ogw’obusaasi. (Mat. 27:​28-31, 39) Yahwe akaba aine amaani ag’okutangira Yesu kuhikwaho ebintu binu byona. Ekyokurorraho, abahakanizi obu baagambire ngu: “Leka [Ruhanga] amujune hati obu araaba namugonza,” Yahwe akaba naasobora kukikora. (Mat. 27:​42, 43) Baitu kakuba Ruhanga yakikozere, ekicunguro tikyakusaswirwe, kandi twakusigaire tutaine okunihira. Nahabweki, Yahwe akaikiriza Omwana we kubonabona kuhikya obu yafiire.

8. Notekereza Yahwe akasaasa obu yarozere Omwana we nabonabonesebwa? Soborra. (Rora n’ekisisani.)

⁸ Leka tuleke kuteekereza ngu habwokuba Ruhanga aine obusobozi, taine enyehurra! Akatuhanga omu kisisani kye n’obusobozi obw’okuba n’enyehurra, ekirukwoleka ngu na uwe aine enyehurra. Baibuli emubazaaho nk’omuntu ‘ow’abiihirwa’ kandi ‘ow’asaalizibwa.’ (Zab. 78:​40, 41) Ekindi, tekerezaaho ekyokurorraho ekya Iburahimu na Isaka. Ijuka ngu Yahwe akagambira Iburahimu kuhayo omwana we nk’ekihongwa. (Kub. 22:​9-12; Baheb. 11:​17-19) Tekerezaaho omulingo Iburahimu yayehuliire obu akaba naatekaniza omwana we kumwita. Mali Yahwe kaakasaalirwa muno obu yarozere Omwana we nabonabonesebwa omu mulingo ogw’obukaali kuhika obu yafiire!—Rora ha jw.org vidiyo enyakwine omutwe Yegera ha Kwikiriza Kwabo—Iburahimu, Ekicweka 2.

9. Kiki eki orukwegera hali Abarooma 8:​32, 38, 39 obu kirukuhika ha kugonza Yahwe oku akwiniire hamu n’abaheereza be abandi?

⁹ Ekicunguro nikitwegesa ngu busaho n’omu ow’atugonza nk’oku Yahwe atugonza n’obu yakuba omunyabuzaale ow’akirayo kukugonza rundi omunywani waawe nfenanfe. (Soma Abarooma 8:​32, 38, 39.) Hataroho kugurukyagurukya, Yahwe atugonza muno kukira nk’oku twegonza. Ogonza kwomeera ebiro n’ebiro? Yahwe naagonza oyemeere ebiro n’ebiro n’okukukira. Nogonza kuganyirwa ebibi byawe? Yahwe naagonza biganyirwe n’okukukira. Ekintu kyonka eki arukutunihirramu, nikyo kwoleka okusiima habw’ekisembo eky’embabazi eky’ekicunguro  kuraba omu kumwikiririzaamu n’okumworobera. Mali ekicunguro kiri kisembo eky’omuhendo mwingi muno ekyoleka okugonza Yahwe oku atwiniire. Kandi omu nsi empyaka, nitwija n’okumanya ebintu ebirukukiraho ebi akozere habwokuba naatugonza.—Mug. 3:11.

EKICUNGURO EKI KIRUKUTWEGESA HALI YESU

10. (a) Kiki ekyakizire kutuntuza Yesu obu kirukuhika ha kufa kwe? (b) Yesu akeeza ibara lya Yahwe omu miringo ki? (Rora n’akasanduuko “ Obwesigwa bwa Yesu Bukooleka ngu Yahwe Ahikire.”)

¹⁰ Yesu afaayo muno ha ibara lya Ise. (Yoh. 14:31) Yesu aketuntura muno ngu abantu bakaba nibaija kutekerezaaho kubi Ise habwokuba akaba naija kwitwa nk’omuntu ow’arukujumisa ibara lya Ruhanga kandi nk’omucwi w’ebiragiro. Egi niyo ensonga habwaki yasabire ati: “Taata, obu kiraaba nikisoboka, nyihaho ekikopo kinu.” (Mat. 26:39) Baitu habwokuba Yesu akaikara ali mwesigwa hali Ise okuhikya obu yafiire, akoolekera kimu ngu ekintu Sitaani yabalize hali Ise kikaba kitahikire.

11. Yesu akooleka ata okugonza okwingi oku ainiire abantu? (Yohana 13:1)

¹¹ Ekindi, ekicunguro kitwegesa ngu Yesu afaaho muno abantu, kukira muno abegeswa be. (Nfu. 8:31; soma Yohana 13:1.) Ekyokurorraho, Yesu akaba akimanyire ngu bimu ha bintu ebi akaba naija kukora omu nsi, bikaba bigumire muno, kukira muno eky’okwitwa omu mulingo ogw’obusaasi. Baitu Yesu akakora ebintu binu byona ebigumire hatali habwokuba ngu nikyo Yahwe akaba amuragiire kukora, baitu kukira muno akakikora habwokuba akaba naagonza abantu. Yesu akooleka ngu akaba naagonza abantu kuraba omu kubatebeza, kubeegesa, n’okubakonyera. Na ha kiro eky’okufa kwe, Yesu akatunga obwire yanaabya abegeswa be ebigere, kandi yabagambira ebigambo eby’okumalirra ebyabagarwiremu amaani kandi byabahuumuza. (Yoh. 13:​12-15) Kandi hanyuma, n’obukiraaba ngu akaba ali omu busaasi bw’amaani kandi  ali haihi kufa ha muti, akaha okunihira omucwi w’ebiragiro ow’akaba ahanikirwe haihi na uwe obu naamugambira ngu aliba omu rugonjo. Kandi akooleka ngu naafaaho nyina, obu yasabire Yohana kumurolerra. (Luk. 23:​42, 43; Yoh. 19:​26, 27) Nahabweki, Yesu atagarukire ha kwoleka okugonza kwe okwingi obu akaba naafa honka, baitu akakwoleka obwomeezi bwe bwona obu akaba ali omu nsi.

12. Yesu naakyagumizaamu kutukorra ebintu omu mulingo ki?

¹² N’obukiraaba ngu Kristo “akafa omurundi gumu,” akyaliyo naatukorra ebintu bingi. (Bar. 6:10) Omu mulingo ki? Aikara naakora kurora ngu yatuhikyaho ebintu bingi ebirungi ebi turukwegondezaamu habw’ekicunguro eki yahaireyo. Tekerezaaho ebintu ebi aliyo naakora. Naaheereza nka Omukama waitu, Nyakatagara Omukuru, kandi nk’omutwe gw’ekitebe. (1 Kol. 15:25; Bef. 5:23; Baheb. 2:17) Nuwe arukwebembera omulimo ogw’okusorooza hamu abaseserweho amagita, hamu n’ab’ekitebe ekingi, omulimo ogu alimalirra kukora omuhito omwingi gutakahoire. b (Mat. 25:32; Mar. 13:27) Ekindi, akigumya ngu abaheereza be abesigwa, baalisibwa kurungi omu by’omwoyo omu kasumi kanu ak’omu biro ebya ha mpero. (Mat. 24:45) Kandi n’omu kasumi ak’Obulemi bwe obw’Emyaka Rukumi, naija kugumizaamu naatukorra ebintu bingi. Mali, Yahwe obu yahaireyo Omwana we hali itwe, atakikole n’ekigendererwa eky’okutufeera kyonka, baitu n’okutukorra ebintu bingi muno!

OTALIREKA KWEGA

13. Okwecumitiiriza nikusobora kukukonyera kuta kwikara nooyega ha kugonza Ruhanga na Kristo oku bakwiniire?

¹³ Noosobora kwikara nooyega ha kugonza Yahwe Ruhanga na Yesu Kristo oku batwiniire kakuba ogumizaamu nokwecumitirizaaho. Obundi omu kasumi kanu ak’Ekiijukyo, nosobora kusoma n’obwegendereza ekitabu kimu eky’Enjiri rundi kukiraho. Otasoma ebintu bingi ha murundi gumu. Oihireho, soma ebintu bike kandi oserre ensonga ezindi habwaki tusemeriire kugonza Yahwe na Yesu. Kandi gambiraho abandi ebintu ebi oyegere.

14. Kusigikirra ha Zabuli 119:​97, okuseruliiriza nikusobora kutukonyera kuta kwikara nitwega hali ekicunguro otwaliiremu n’enyegesa ezindi? (Rora n’ekisisani.)

¹⁴ Obu oraaba oikaire omu mananu kumara emyaka nyingi, noosobora kwekaguza obu kiraaba nikisoboka kuzoora ebintu ebihyaka obu kirukuhika ha nsonga nk’obwinganiza bwa  Ruhanga, okugonza kwe, hamu n’ekicunguro. Amananu gali, eby’okwega tibihwayo obu kirukuhika ha nsonga zinu hamu n’ezindi. Hati, kiki eki osemeriire kukora? Kozesa omu bwijwire obutumwa oburukusangwa omu bitabu byaitu ebirukusigikirra ha Baibuli. Obu oratangana enkarra ezi otarukwetegereza kurungi omu Baibuli, kora okuseruliiriza. Kandi hanyuma omu kiro kyona, ikara noyecumirizaaho ebintu ebi ozoire, n’eki birukukwegesa hali Yahwe, Omwana we, n’okugonza oku bakwiniire.—Soma Zabuli 119:97.

15. Habwaki kikuru kwikara nitwega ebintu ebihyaka omu Baibuli?

¹⁵ Otahwamu amaani obu orabaga otatungire ekintu ekihyaka rundi ekirukusemeza buli murundi oratungaga obwire kusoma Baibuli rundi kukora okuseruliiriza. Wesisanirize omuntu ow’arukulengaho kuserra ezaabbu. Emirundi erukukira obwingi, omuntu ow’arukuserra ezaabbu, kimwetaagisa kumara esaaha nyingi rundi ebiro bingi atakatungire n’akacweka akataito muno ak’ezaabbu. Baitu agumiisiriza habwokuba, buli kacweka ak’ezaabbu akaatunga, k’omuhendo muno hali uwe. Mali, buli kintu kyona ekihyaka eki twega kuruga omu Baibuli, kyomuhendo muno kukira ezaabbu! (Zab. 119:127; Nfu. 8:10) Nahabweki gumiisiriza kandi oikale nohondera entekaniza yaawe ey’okusoma Baibuli.—Zab. 1:2.

16. Nitusobora tuta kwegera hali Yahwe na Yesu Kristo?

¹⁶ Obu oraaba noyesomesa, serra emiringo ey’okuteeka omu nkora ebi orukuba oyegere. Ekyokurorraho, yegera ha bwinganiza bwa Yahwe kuraba omu kutwaza abandi otarukubasoroora. Yegera ha kugonza Yesu oku ainiire Ise hamu n’abandi kuraba omu kwehayo kubonabona habw’ibara lya Yahwe hamu n’okwehayo kukonyera abandi n’obu kiraaba ngu nikiija kukugumiraga obwire obumu. Ekindi, yegera hali Yesu kuraba omu kutebeza abandi nukwo na bo batunge omugisa ogw’okwikiriza ekisembo kya Yahwe eky’omuhendo omwingi.

17. Kiki eki turukwija kubazaaho omu kicweka ekirukuhonderaho?

¹⁷ Obu turayeyongera kwetegereza kandi tukasiima ekicunguro, nitwija kweyongera kugonza Yahwe n’Omwana we. Kandi habwokuba nitubagonza muno, na bo nibaija kutugondeza kimu. (Yoh. 14:21; Yak. 4:8) Nahabweki, leka tugumizeemu nitukozesa kurungi buli kimu kyona Yahwe eki arukutuha kusobora kwikara nitwega hali ekicunguro. Omu kicweka ekirukuhonderaho, nitwija kubazaaho emu ha miringo ei tusobora kugasirwa omu kicunguro n’omulingo tusobora kwoleka okusiima kwaitu habw’ekicunguro.