1. Kintu ki ekigumire, itwena eki tusemeriiire kukora?

 BULI kiro tuba twine kukora encwamu. Ezimu ziba zanguhire kukora, nk’okumanya kiki eki turalya nyenkyakara rundi ni di obu turagenda kubyama. Ezindi ziba zigumire. Nizisobora kukwataho obwomeezi bwaitu, okusemererwa kwaitu, abantu abaturukugonza rundi okuramya kwaitu. Nitugonza encwamu zaitu zitugasire and zigasire n’eka yaitu. Kandi ekirukukira obukuru, tusemeriire kutekerezaaho omulingo Yahwe aroramu encwamu zaitu.—Bar. 12:​1, 2.

2. Bintu ki ebirakukonyera kukora encwamu ez’amagezi?

² N’osobora kukora encwamu ey’amagezi kakuba (1) omanya amananu, (2) otekerezaaho omulingo Yahwe aroramu ensonga, kandi (3) okatekerezaaho ebirukuzingirwamu. Omu kicweka kinu nitwija kubazaaho ebintu binu bisatu kandi nikiija n’okutukonyera kurora omulingo tusobora kutendekamu obusobozi bwaitu obw’okwetegereza.—Nfu. 2:11.

MANYA AMANANU

3. Bazaaho ekyokurorraho ekirukwoleka habwaki osemeriire kubanza kumanya amananu otakakozere encwamu.

³ Ekintu eky’okubanza ekisobora kutukonyera kukora encwamu enungi nikyo kumanya amananu. Habwaki eki kikuru? Tekerezaaho omurwaire ow’agenda hali dakitaali kuserra obukonyezi obu aba aine oburwaire obw’amaani. Dakitaali naasobora kumuha obujanjabi atabandize kumukebera rundi kumukaguliriza ha burwaire bwe? Nangwa. Na iwe noija kukora encwamu enungi kakuba obanza kutekerezaaho amananu agarukukwata ha ncwamu ey’orukugenda kukora. Eki noosobora kukikora ota?

4. Kusigikirra ha Enfumo 18:​13, kiki eki osobora kukora kumanya amananu? (Rora n’ekisisani.)

 ⁴ N’osobora kumanya amananu kuraba omu kukaguza ebikaguzo. Ekyokurorraho, teramu akasisani oraliziibwe kugenda ha bugenyi. Osemeriire kugendayo? Obu oraaba otarukumanya kurungi mukama w’obugenyi rundi entekaniza ezikozerwe, nikiija kukwetagisa kumukaguza ebikaguzo nka: “Obugenyi nibwija kuba nkaha kandi buraabaho di? Bantu baingaha abarukwija kubaho? Nooha ow’arukwija kwebembera entekaniza? Nibaha abaraabaho? Bintu ki ebirukwija kukorwa? Haraabayo amarwa?” ebyokugarukamu eby’ebikaguzo binu nibiija kukukonyera kukora encwamu ey’amagezi.—Soma Enfumo 18:13.

5. Kiki eki osemeriire kukora hanyuma y’okumanya amananu?

⁵ Ekindi, hanyuma y’okumanya mananu, wetegereze kurungi enyikara yoona. Ekyokurorraho, kakuba okimanya ngu nihaija kubayo abantu abatatekamu emisingi ya Baibuli ekitiinisa rundi ngu nihaija kubayo kunywa amarwa hataroho omuntu ow’arukurora abantu obu baraaba nibanywa muno? Norora ngu obugenyi bunu nibusobora kubamu abantu abarukunywa muno amaarwa hamu n’engeso embi ez’obusiihani? (1 Pet. 4:3) Harubaju orundi, kiki eki osemeriire kukora kakuba okyetegereza ngu kugenda ha bugenyi nikiija kukulemesa kugenda omu nsorrokano rundi omu buheereza? Obu oratekerezaaho amananu goona agarukukwata ha nyikara enu, nikiija kukwanguhira kukora encwamu ey’amagezi.  Baitu haroho ekintu ekindi eki osemeriire kukora. Hati n’omanya kurungi enyikara; baitu wekaguze, uwe Yahwe nayehurra ata?—Nfu. 2:6.

TEKEREZAAHO OMULINGO YAHWE ARORAMU ENSONGA

6. Kusigikirra hali Yakobo 1:​5, habwaki tusemeriire kusaba Yahwe obukonyezi?

⁶ Saba Yahwe akukonyere kumanya entekereza ye. Yahwe naaraganiza kutuha amagezi ag’okumanya encwamu ei turaaba nitugenda kukora obu eraaba niija kumusemeza. Atuha amagezi ago “okutaima kunu tarukuhana.”—Soma Yakobo 1:5.

7. N’osobora ota kutunga entekereza nk’eya Yahwe? Bazaaho ekyokurorraho.

⁷ Hanyuma y’okusaba Yahwe kukuha oburagirizi, teeka omutima ha ky’okugarukamu kye. Ekyokurorraho: kakuba oba oli omu rugendo kandi okabura, n’osobora kukaguza omuntu ow’omu kiikaro eki. Baitu noosobora kurugaho okagenda atakakugarukiremu? Nangwa. Noija kuhuliiriza kurungi oburagirizi obu arakuha. Omu mulingo nugwo gumu, hanyuma y’okusaba Yahwe, lengaho kumanya eky’okugarukamu kye kuraba omu kuserra ebiragiro hamu n’emisingi omu Baibuli ebirukukwata ha nyikara yaawe. Ekyokurorraho, obu oraaba n’ocwamu kugenda ha bugenyi obubaziibwe eruguru rundi nangwa, n’osobora kutekerezaaho Baibuli eki egamba ha bugenyi obutasemiire, abanywani ababi, hamu n’obwetaago obw’okwebembeza Obukama omu kiikaro ky’okwebembeza ebi orukugonza.—Mat. 6:33; Bar. 13:13; 1 Kol. 15:33.

8. Kiki eki osobora kukora kakuba okyetegereza ngu n’oyetaaga obukonyezi kutunga obutumwa obu orukuserra? (Rora n’ekisisani.)

 ⁸ Baitu nabwo obwire obumu noosobora kwetaaga obukonyezi kutunga ebintu ebi orukuserra, noosobora kutunga obuhabuzi kuruga hali ow’oruganda rundi munyaanya itwe ow’akuzire omu by’omwoyo. Baitu noija n’okugasirwa kuraba omu kwekorra okuseruliiriza. Haroho ebintu bingi muno ebirukusangwa omu bikwato byaitu ebitukozesa omu kwesomesa nka Ekitabu Ekikonyera Abakaiso ba Yahwe Kuseruliiriza hamu na Scriptures for Christian Living. Ijuka ekigendererwa kyawe kiri ky’okukora encwamu ey’erasemeza Yahwe.

9. Nitusobora tuta kukigumya ngu encwamu yaitu niija kusemeza Yahwe? (Abefeso 5:17)

⁹ Nitusobora tuta kukigumya ngu encwamu yaitu niija kusemeza Yahwe? Eky’okubanza, tusemeriire kumumanya kurungi. Baibuli egamba eti; “Nokumanya Ogu Arukwera nukwo kwetegereza.” (Nfu. 9:10) Ego, okwetegereza okuhikire kuruga omu kumanya emiringo ya Yahwe, ekigendererwa kye, hamu n’ebintu ebi agonza rundi ebi anoba. Wekaguze, ‘kusigikirra ha bindukumanya hali Yahwe, ncwamu ki ei nsemeriire kukora, ekamusemeza?’—Soma Abefeso 5:17.

10. Habwaki emisingi ya Baibuli nkuru muno kukira emigenzo y’eka rundi obuhangwa bw’ekiikaro nambere twakuliire?

¹⁰ Kusobora kusemeza Yahwe, obwire obumu nikitwetagisa kukora ekintu ekiraabiihiza abo abaturukugonza. Ekyokurorraho, abazaire abarukugondeza muhara wabo ebirungi, nibasobora kumuhambiriza kuswerwa omusaija owaine sente—rundi ow’arahayo omukaaga omwingi n’obu araaba atagumire omu by’omwoyo. Kyamananu ngu nibagonza muhara wabo afiibweho, baitu nooha arukwija kumukonyera kukurakurana omu by’omwoyo? Yahwe arora ata ensonga? Ekyokugarukamu nitukisanga omu Matayo 6:33. Ekyahandiikirwe eki kitererra Abakristaayo kiti “Mubanzeege muserre Obukama.” N’obukiraaba ngu nituteekamu abazaire baitu hamu n’abantu ab’omu kiikaro kyaitu ekitiinisa, ekigendererwa kyaitu ekikuru kisemeriire kuba kusemeza Yahwe.

TEKEREZAAHO EBIRUKUZINGIRWAMU

11. Mulingo ki ogurukubazibwaho omu Abafiripi 1:​9, 10 ogurakukonyera kumanya ebirukuzingirwamu?

¹¹ Hanyuma y’okutekerezaaho emisingi ya Baibuli ey’erukukwataho encwamu ey’orukugenda kukora, osemeriire kumanya ebirukuzingirwamu. (Soma Abafiripi 1:​9, 10; rora study note on “full discernment”) Okwetereza okurungi nikwija kukukonyera kuteekerezaaho ebisobora kuruga omu ncwamu yaawe. Obwire obumu encwamu neesobora kuba eyanguhire kukora. Baitu tikiri buli ncwamu yoona ngu eyanguhire kukora. Okwetegereza nikwija kukukonyera kukora encwamu ez’amagezi n’omu nyikara ezigumire.

12-13. Okwetegereza nikusobora kukukonyera kuta kukora encwamu ey’amagezi obu orukuba noserra omulimo?

¹² Tekerezaaho enyikara enu. Oliyo noserra omulimo ogurakukonyera kusagika eka yaawe. Hanyuma hazooka emirimo ebiri. Otekerezaaho amananu agarukukwata ha mulimo nka, mulimo gwa mulingo ki, nigunyetaagisa kukora ebiro bingaha, ndamaraga esaaha zingaha omu muhanda, hamu n’ebindi. Emirimo enu yoona ebiri, nungi kusigikirra ha misingi ya Baibuli. Obundi haroho gumu ogu orukukira kugonza habw’omulingo gurukukorwamu rundi habw’okuba omusaara gwa haiguru. Baitu haroho ebintu ebindi ebi osemeriire kutekerezaaho otakakozere encwamu.

¹³ Ekyokurorraho, gumu ha mirimo egi nigwija kutahiirra entekaniza yaawe ey’okugenda omu rusorrokano? Haroho omulimo ogurukwija kukwetagisa kukehya ha bwire obu omara nofaaho eka yaawe omu nyehurra n’omu by’omwoyo? Kwekaguza ebikaguzo nk’ebi nikiija kukukonyera kwebembeza “ebintu ebirukukira obukuru” —kandi ebi nibyo okuramya kwawe n’ebyetaago by’eka yaawe omu kiikaro ky’okwebembeza itungo. Kandi hanyuma noija kukora encwamu Yahwe ey’araaha omugisa.

14. Okwetegereza hamu n’okugonza nibiija kutukonyera bita kutatabaijura abandi?

¹⁴ Okwetegereza nikusobora n’okutukonyera kutekerezaaho omulingo encwamu yaitu erakwataho abandi, nukwo tusobole kwetantara ‘kutabaijura abandi.’ (Baf. 1:10) Kinu kikuru muno obu turukuba nikutukora encwamu obu kirukuhika ha kujwara n’okwekoraho. Ekyokurorraho, nitusobora kuba twine omulingo tugonza kujwaramu n’okwekoraho. Baitu kakuba osanga ngu ab’oruganda na banyaanya itwe rundi abantu abali aheeru y’ekitebe batabaijuka habw’omulingo ojwara rundi oyekoraho? Okwetegereza nikwija kutukonyera kutamu enyehurra zaabo ekitiinisa. Okugonza nikwija kutwekambisa kuserra eby’abandi n’okujwara omu mulingo ogutatabaijule abandi. (1 Kol. 10:​23,  24, 32; 1 Tim. 2:​9, 10) Nitwija kukora encwamu ezirukwoleka ngu nitugonza abandi kandi nitubatamu ekitiinisa.

15. Kiki eki osemeriire kukora otakakozere encwamu ey’amaani?

¹⁵ Obu oraaba otakakozere encwamu ey’amaani, tekerezaaho ebirukwetagisa kusobora kugihikiiriza. Yesu akatwegesa “kubalirra.” (Luk. 14:28) Nahabweki tekerezaaho obwire, ebintu ebirukwetaagisa, hamu n’amaani ebi orayetaaga kurora encwamu yaawe yahikirra. Omu nyikara ezimu nikiija kukwetaagisa kukaguzaaho ab’omu ka yaawe kurora buli omu eki arukwetaaga kukora kurora yasagika encwamu egi. Habwaki enteekaniza ya mulingo gunu nkuru? Neesobora kukukonyera kumanya encwamu yaawe obu eraaba neyetaaga kuhinduramu, rundi obu haraaba haraho omulingo ogundi omurungi ogw’okugihikirizaamu. Kandi obu orayekaguzaaho ab’omu ka yaawe kandi okahuliriiza kurungi entekereza zaabo, nibaija kukorra hamu na iwe kurora ngu encwamu yaawe yahikirra.—Nfu. 15:22.

KORA ENCWAMU EY’ERARUGAMU EBIRUNGI

16. Bintu ki ebirakukonyera kukora encwamu ey’erarugamu ebirungi? (Rora n’akasanduuko “ Omulingo Osobora Kukora Encwamu ez’Amagezi.”)

¹⁶ Obu oraaba ohondiire ebintu ebibaziibweho eruguru, hataroho kugurukyagurukya encwamu ey’orakora niija kuba y’amagezi. Otungire amananu kandi otekeriizeeho emisingi ya Baibuli ey’erakukonyera kukora encwamu ey’erasemeza Yahwe. Hati noosobora kusaba Yahwe kukukonyera kurora ngu encwamu yaawe yarugamu ebirungi.

17. Kintu ki ekikuru ekiratukonyera kukora encwamu enungi?

¹⁷ N’obu kiraaba ngu oikaire nookora encwamu enungi omu bwire obwenyuma, ijuka ngu ekintu ekikuru ekisobora kukukonyera kukora encwamu enungi, nukwo kwesiga amagezi kuruga hali Yahwe, hatali kwesiga amagezi gaawe n’obukugu obu oine. Yahwe wenka nuwe asobora kukuha okumanya okuhikire n’okwetegereza, ebintu ebikuru muno ebisobora kukukonyera kutunga amagezi. (Nfu. 2:​1-5) Yahwe naasobora kukukonyera kukora encwamu eziramusemeza.—Zab. 23:​2, 3.