EKICWEKA KY’OKWEGA 5
EKIZINA 108 Okugonza kwa Ruhanga Okutalekera
Omulingo Okugonza kwa Yahwe Kutugasira
“Kristo Yesu akaija omu nsi okujuna abasisi.”—1 TIM. 1:15.
EBI TURAYEGA
Nitwija kurora omulingo tugasirwa omu kicunguro, n’omulingo twolekamu okusiima kwaitu hali Yahwe.
1. Kiki eki tusobora kukora kusemeza Yahwe?
TEERAMU akasisani ohaire omuntu ow’ogonza ekisembo ekyembaganiza, ekisemiire kandi eky’omugaso. Nikisobora kukumaramu amaani kakuba okyetegereza ngu omuntu ekisembo akakyahura kandi takagarukaga n’okukitekerezaaho! Ha rubaju orundi, nikisobora kukusemeza kakuba okyetegereza ngu ekisembo eki akakikozesa kurungi kandi naayoleka ngu naasiima. Nsonga ki ei turukubazaaho? Yahwe akahayo Omwana we kutufeera. Yahwe asemererwa muno obu arora ngu nitusiima ekisembo eki eky’omuhendo hamu n’okugonza, okwamwekambisize kuhayo ekicunguro!—Yoh. 3:16; Bar. 5:7, 8.
2. Kiki eki turukwija kubazaaho omu kicweka kinu?
2 Baitu hanyuma y’obwire kurabaho, nitusobora kutandika kutwara ekisembo eky’ekicunguro nk’ekitali ky’embaganiza. Kakuba tuleka kusiima habw’ekicunguro, tusisana oti rundi tutaire hara ekisembo ekirungi Ruhanga eki yatuhaire nambere tutasobora kukirora rundi kukitekerezaaho. Kusobora kwetantara eki kubaho, tusemeriire kwikara nitutekerezaaho ebintu byona Ruhanga na Yesu Kristo ebi batukoliire. Ekicweka kinu nikiija kutukonyera kurora omulingo tusobora kukikoramu. Nitwija kurora omulingo tugasirwa omu kicunguro hati, n’omulingo kirukwija kutugasira omu kasumi ak’omumaiso. Ekindi, nitwija kurora omulingo tusobora kwoleka ngu nitusiima habw’okugonza kwa Yahwe, kukira muno omu kasumi kanu ak’Ekiijukyo.
OMULINGO TUGASIRWA KASUMI KANU
3. Mulingo ki ogumu ogu tugasirwa omu kicunguro kasumi kanu?
3 Tutandikire ira kugasirwa omu kicunguro kya Yesu Kristo. Ekyokurorraho, Yahwe atuganyira ebibi byaitu naasigikirra ha kicunguro. Tikiri kiragiro ngu asemeriire kutuganyira. Baitu atuganyira habwokuba naagonza kukikora. Omuhandiiki wa zabuli obu naayoleka okusiima akagamba ati: “Baitu iwe, [Yahwe], oli murungi, orahuka okuganyira.”—Zab. 86:5; 103:3, 10-13.
4. Bantu ba mulingo ki, Yahwe abayaheriireyo ekicunguro? (Luka 5:32; 1 Timoseo 1:15)
4 Abantu abamu nibasobora kwehurra ngu okuganyira kwa Yahwe tikubasemeriire. Amananu gali, itwena okuganyira kwa Yahwe tikutusemeriire. Omukwenda Paulo akakyetegereza ngu akaba “atasemeriire okwetwa omukwenda,” habwokuba ‘akahiiganiza ekitebe kya Ruhanga.’ Baitu kandi akongera yagamba ati: “Obwembabazi za Ruhanga nkokundi nukwo ndi.” (1 Kol. 15:9, 10) Obu twegarukamu ebibi byaitu, Yahwe atuganyira. Habwaki? Tatuganyira ngu habwokuba kitusemeriire, baitu atuganyira habwokuba naatugonza. Obu oraaba noyehurra ngu tosemeriire kuganyira kwa Yahwe, ijuka ngu Yahwe ataheyo ekicunguro habw’abantu abataine ekibi, baitu akakihayo habw’abasiisi abegarukamu.—Soma Luka 5:32; 1 Timoseo 1:15.
5. Kiragiro ngu Yahwe asemeriire kutukwatirwa embabazi? Soborra.
5 Busaho n’omu hali itwe asemeriire kwehurra ngu asemeriire embabazi za Yahwe n’obu yakuba amuheriize kumara emyaka nyingi. Kyamananu ngu Yahwe aijuka ebintu byona ebi tuba tumukoliire omu buheereza bwaitu hali uwe. (Baheb. 6:10) Akatuha ekisembo eky’ekicunguro habwa busa hatali kutusasura habw’ebintu ebirungi ebi tumukoliire. Kakuba tugamba ngu tusemeriire embabazi za Yahwe, tuba nitusisana nk’abarukugamba ngu Kristo akafeera busa.—Lengesaniza na Abagaratiya 2:21.
6. Habwaki Paulo yakozere n’obwekambi omu buheereza bwe hali Yahwe?
6 Paulo akimanyire ngu n’obu yakukozere ebintu ebirukwingana nkaha, Yahwe akaba atasemeriire kumuganyira. Hati, habwaki yakozere n’obwekambi omu buheereza bwe hali Yahwe? Atakikole habwokuba ngu akaba naagonza kwokeka ngu kikaba kimusemeriire, baitu akakikora kwoleka ngu akaba naasiima habw’embabazi za Yahwe ezitamusemeriire. (Bef. 3:7) Kusisanaho na Paulo, na itwe tugumizaamu nituheereza n’obwekambi hatali habwokuba ngu nitugonza Yahwe atwoleke embabazi ze, baitu tukikora habwokuba nitugonza kwoleka okusiima habw’embabazi ze ezitatusemeriire.
7. Mulingo ki ogundi ogu tugasirwa omu kicunguro kasumi kanu? (Abarooma 5:1; Yakobo 2:23)
7 Omulingo ogundi ogu tusobora kugasirwa omu kicunguro kasumi kanu nugwo ngu nitusobora kutunga enkoragana enungi na Yahwe. a Nk’oku twarozere omu kicweka ekyahoire, tuzaarwa tutaine enkoragana enungi na Ruhanga. Baitu habw’ekicunguro, nitusobora kwegondeza “omu businge na Ruhanga” kandi kinu kitukonyera kwirra haihi na uwe.—Soma Abarooma 5:1; Yakobo 2:23.
8. Habwaki tusemeriire kusiimira Yahwe omugisa ogw’okusaba ogu twine?
8 Tekerezaaho ekintu ekindi ekiruga omu kuba n’enkoragana enungi na Yahwe, kandi eki nikyo omugisa ogu twine ogw’okusaba. Yahwe tagarukira ha kuhurra esaara ez’abantu be obu bamusaba besoroize hamu kyonka, baitu ahurra n’esaara eza buli omu hali itwe obu aba ali wenka. Okusaba kutuletera kutekaana n’okutunga obusinge omu bitekerezo, baitu gunu tiguli nugwo omulingo gwonka ogu tugasirwamu. Okusaba nikusobora n’okutukonyera kugumya enkoragana yaitu na Ruhanga. (Zab. 65:2; Yak. 4:8; 1 Yoh. 5:14) Yesu obu akaba ali omu nsi, akasaba emirundi nyingi habwokuba akaba akimanyire ngu Yahwe naamuhurra kandi okusaba kwaikazaaga enkoragana ye na Ise egumire. (Luk. 5:16) Mali nitusiima muno ngu habw’ekihongwa kya Yesu, nitusobora kufooka banywani ba Yahwe, kandi twine n’omugisa ogw’okubaza na uwe kuraba omu kusaba!
OMULINGO TURAAGASIRWA OMU KASUMI AK’OMUMAISO
9. Ekicunguro nikiija kugasira kita abaheereza ba Yahwe abesigwa omu kasumi ak’omumaiso?
9 Abaheereza ba Yahwe abesigwa, nibaija kugasirwa bata omu kicunguro omu kasumi ak’omumaiso? Yahwe naija kubaha obwomeezi obutahwaho. Abantu baingi batekereza ngu tikirukusoboka kutunga obwomeezi obutahwaho habwokuba baikaire nibafa kumara enkumi n’enkumi y’emyaka. Baitu ekigendererwa kya Yahwe ekya kara kikaba kiri ngu abantu bomeere ebiro n’ebiro. Kakuba Adamu atarasiisire, busaho n’omu ayakutekeriize ngu obwomeezi obutahwaho, kiri kintu ekitarukusoboka. N’obu kiraaba ngu omu kasumi kanu kigumire kukiikiriza ngu nitusobora kutunga obwomeezi obutahwaho, nitusobora kukiikiriza ngu nitwija kwomeera ebiro n’ebiro habwokuba tukimanyire ngu Yahwe akasasura omuhendo gw’amaani muno kandi ogu nugwo obwomeezi bw’Omwana we nukwo asobozese kinu kubaho.—Bar. 8:32.
10. Kiki abaseserweho amagita n’ab’entaama ezindi eki balindiriire?
10 N’obu kiraaba ngu nitwija kwegondeza omu bwomeezi obutahwaho omu kasumi ak’omumaiso, Yahwe naagonza tubutekerezeeho kasumi kanu. Abaseserweho amagita, balindiriire obwomeezi oburungi obu barukwija kutunga omu iguru obu nibalema ensi bali hamu na Kristo. (Kus. 20:6) Ab’entaama ezindi balidiriire kwegondeza omu rugonjo orurungi hanu omu nsi nambere hataliba obusaasi n’enaku. (Kus. 21:3, 4) Oli omu h’ab’entaama ezindi kandi olindiriire kwomeera ebiro n’ebiro hanu omu nsi? Kinu kiri kisembo eky’amaani muno! Yahwe akatuhanga n’ekigendererwa eky’okwikara omu nsi. Nahabweki, kwikara omu nsi ebiro n’ebiro, nikiija kutusemeza muno.
11-12. Migisa ki emu ei tulindiriire kwegondezaamu omu Rugonjo Orurungi? (Rora n’ebisisani.)
11 Tekerezaaho omulingo obwomeezi buliba omu Rugonjo Orurungi omu nsi. Torukwija kweralikirra habw’oburwaire rundi okufa. (Is. 25:8; 33:24) Yahwe naija kukuha buli kintu kyona ekirungi eki ogonza. Bintu ki ebi orukugonza kwegaho? Nogonza kwega ha bisoro rundi ebinyonyi? Nogonza kwega kutera ebyoma eby’okukozesa omu kuzina? Rundi nogonza kwega kuteera ebisisani n’okubumba? Hataroho kugurukyagurukya, nihaija kubaho obwetaago bw’abantu abateera pulaani z’ebyombeko, abombeki, hamu n’abalimi. Ekindi, nikiija kwetaagisa abantu kulima kuteekaniza ebyokulya, kuheesa ebikwato eby’okukozesa kubyara n’okurolerra emisiri. (Is. 35:1; 65:21) Habwokuba noija kwomeera ebiro n’ebiro, noija kutunga obwire obw’okwetegereza n’okwega ekintu kyona eki orukugonza.
12 Mali kanikiija kutusemeza muno kutangirra abantu baitu abaturukugonza abaafiire abaliba bahuumbukire! (Ebik. 24:15) Tekerezaaho omulingo olyegondeza omu kwega bingi ebirukukwata hali Yahwe kuraba omu kwecumiitirizaaho ebyahangirwe. (Zab. 104:24; Is. 11:9) Kandi ekirukukirayo obukuru, nikiija kukusemeza muno kuramya Yahwe hataroho okwecwera omusango! Mali noija kwikiriza kufeerwa emigisa enu yoona ngu habwokuba noogonza kwejumbira omu ‘kwesemeza okwekibi okurukuhwaho bwangu’? (Baheb. 11:25) Mali eki tiwakukigondeze! Emigisa egi nekirra hara okwefeereza kwona oku osobora kukora. Ijuga ngu Orugonjo Orurungi tikiri kintu eki turukwija kwikaraga nitunihira omu kasumi ak’omumaiso. Akasumi nikaija kuhika kibe kintu eki turukwija kwegondezaamuga buli kiro. Binu byona tibyakusobokere kakuba Yahwe ataratugondeze muno obu naatuha ekisembo eky’Omwana we!
Migisa ki oy’olindiriire kurora nehikirra omu Rugonjo Orurungi? (Rora akacweka 11-12)
YOLEKA NGU NOSIIMA HABW’OKUGONZA KWA YAHWE
13. Nitusobora tuta kwoleka ngu nitusiima habw’okugonza kwa Yahwe? (2 Abakolinso 6:1)
13 Nitusobora kwoleka tuta ngu nitusiima Yahwe habw’okutuha ekicunguro? Kuraba omu kwebembeza omulimo gwe omu bwomeezi bwaitu. (Mat. 6:33) Habwokuba Yesu akafa nukwo “abanyakwomiire baleke okwomera habwabu bonka, baitu habwogu ayafire nahumbuka habwabu.” (2 Kol. 5:15) Mali titwakugondeze kufeerwa ekigendererwa kya Yahwe eky’embabazi ze ezitatusemeriire.—Soma 2 Abakolinso 6:1.
14. Nitusobora tuta kwoleka ngu nitwikiririza omu buragirizi bwa Yahwe?
14 Nitusobora kwoleka ngu nitusiima habw’okugonza Yahwe oku atwiniire kuraba omu kwikiririza omu buragirizi obu atuha. Omu mulingo ki? Obu tuba twine encwamu ez’okukora, nk’ekyokurorraho turaasoma kuhika ha rulengo ki rundi mulimo ki ogu turaakora, tusemeriire kutekerezaaho Yahwe eki arukugonza tukole. (1 Kol. 10:31; 2 Kol. 5:7) Obu twoleka okwikiriza kwaitu omu bikorwa, harugamu ekintu ekirungi muno, kandi eki nikyo okwikiriza kwaitu hamu n’enkoragana yaitu na Yahwe byeyongera kuguma. Kandi okunihira kwaitu okw’okwomeera ebiro n’ebiro nakwo kweyongera kuguma.—Bar. 5:3-5; Yak. 2:21, 22.
15. Nitusobora tuta kwoleka okusiima kwaitu omu kasumi ak’Ekiijukyo?
15 Haroho omulingo ogundi ogu tusobora kwolekamu ngu nitusiima habw’okugonza kwa Yahwe. Kandi ogu nugwo kukozesa akasumi kanu ak’Ekiijukyo kwoleka ngu nitusiima Yahwe habw’ekicunguro. Oihireho kubaho ha Kiijukyo, nitusobora n’okuraaliza abantu abandi kutweteranizaaho. (1 Tim. 2:4) Soborra abo aboraaliize ekirukwija kubaho ha Kiijukyo. Nikiija kukukonyera kubooleka vidiyo eziri ha jw.org eziine omutwe Habwaki Yesu Yafiire? hamu na Ijuka Okufa kwa Yesu. Abagurusi basemeriire kuraaliza abo abafukire omu by’omwoyo. Tekerezaaho okusemererwa okubaho omu iguru n’omu nsi entaama za Yahwe ezimu ezaabuzire obu zigaruka omu igana lye! (Luk. 15:4-7) Ha kiro eky’Ekiijukyo, leka tukifoole kigendererwa kyaitu kutagarukira ha kuramukyangana baitu baitu leka tukire muno kuramukya abahyaka rundi abamazire akasumi batarukwija omu nsorrokano. Nitugonza kubaletera kwehurra batangiriirwe!—Bar. 12:13.
16. Habwaki tusemeriire kutekereza ha kwongeraho obuheereza bwaitu omu kasumi ak’Ekiijukyo?
16 Noosobora kweyongera kwejumbira omu ntekaniza zaawe ez’eby’omwoyo omu kasumi ak’Ekiijukyo? Obu turaakikora, nitwija kwoleka okusiima habw’ebintu byona Ruhanga na Kristo batukoliire. Obu turayeyongera kwejumbira omu buheereza bwaitu hali Yahwe, nitwija kweyongera kurora obusagiki bwa Yahwe kandi ekirarugamu, obwesige bwaitu omuli uwe nibwija kweyongera kuguma. (1 Kol. 3:9) Ekindi, kigumye ngu weyejumbira omu kusoma okwa Baibuli okw’Ekiijukyo okurukusangwa omu katabu Kwekebiija Ebyahandiikirwe Buli Kiro rundi caati ey’erukusangwa omu akatabu k’ensorrokano eza hagati omu wiiki. Nosobora n’okukozesa enkarra ezi nk’ekintu eki orasigikirraho omu kwesomesa kwawe.
17. Kiki ekisemeza Yahwe? (Rora n’akasanduuko “ Emiringo Osobora Kwoleka Okusiima habw’Okugonza kwa Yahwe.”)
17 Kyamananu ngu enyikara zaawe nizisobora kukulemesa kukora kyona ekibaziibweho omu kicweka kinu. Baitu ijuka ngu Yahwe talengesaniza obuheereza bwawe n’obw’abantu abandi; oihireho, arora ekiri omu mutima gwawe. Asemererwa obu arora noosiima kuruga ha mutima ekisembo kye eky’omuhendo kandi eki nikyo ekicunguro.—1 Sam. 16:7; Mar. 12:41-44.
18. Habwaki nitusiima Yahwe Ruhanga na Yesu Kristo?
18 Ekicunguro nikyo ekisobozesa ebibi byaitu kuganyirwa, kutunga enkoragana enungi na Yahwe, n’okutunga okunihira okw’okwomeera ebiro n’ebiro. Leka twikale nitwoleka okusiima kwaitu habw’okugonza kwa Yahwe, okwamuleetiire kutuhikyaho emigisa enu yoona. (1 Yoh. 4:19) Ekindi, leka twoleke ngu nitusiima Yesu ayatugondeze muno naahayo obwomeezi bwe habwaitu!—Yoh. 15:13.
EKIZINA 154 Okugonza Okutahwaho
a Yahwe akaganyira abaheereza be abaabaireho kara Yesu atakahaireyo ekicunguro. Yahwe akakora eki habwokuba akaba nakigumya ngu Omwana we akaba naija kwikara ali mwesigwa kuhika ha kufa. Nahabweki, hali Yahwe kikaba nikisisana oti rundi ekicunguro kikahebwayo kara Yesu atakafiire.—Bar. 3:25.
