Habwaki Orugonjo rwa Adeni Nirukukwataho

KIMU ha bintu ebirukuhuniiriza abaseruliiriza ekibagamba nikyo ngu ebirukukwata hali Adeni tibirukusagikwa omu byahandiikirwe ebindi omu Baibuli. Ekyokurorraho, Purofeesa ow’ayegesa eby’ediini arukwetwa Paul Morris nagamba ati: “Busaho nkarra ezindi ezirukubazaaho Adeni oihireho ebiri omu kitabu eky’Okubanza.” N’obukiraaba ngu ebiyabalize nibisobora kuleetera abakugu abandi kwikiranganiza nauwe,” eki tikirukumanyisa ngu ago mananu.

Amananu gali ngu, omu nkarra nyingi Baibuli ebazaaho orugonjo rwa Adeni, Adamu, Hawa hamu n’enjoka. * Baitu ensonga enu nkuru muno, habwokuba abo abagamba ngu ebiri omu kitabu ky’Okubanza tibihikire baba nibamanyisa ngu Baibuli yoona tehikire. Omu mulingo ki?

Kikuru muno kwetegereza ebyabaireho omu rugonjo rwa Adeni habwokuba nikikukonyera kwetegereza Baibuli yoona. Ekyokurorraho, Ekigambo kya Ruhanga kitekaniziibwe kutukonyera kutunga eby’okugarukamu eby’ebikaguzo abantu bekaguza. Emirundi nyingi, eby’okugarukamu Baibuli eby’eha biine akakwate n’eki ekyabaireho omu rugonjo rwa Adeni. Wetegereze bimu ha byokurorraho.

● Habwaki tukaikura, tugurusa kandi tufa? Adamu na Hawa baakwomiire ebiro n’ebiro kakuba bayorobiire Ruhanga. Ekintu kyonka ekyakubaletiire kufa nukwo kujeemera Ruhanga. Nahabweki ekiro bamujeemiiremu, bakatandika kufa. (Okubanza 2:16, 17; 3:19) Bakafeerwa obwomeezi obuhikiriire, kandi bakaba nibagenda kugweta abaana baabo ekibi n’okutahikirra. Nahabweki Baibuli nesoborra ngu: “Nukwo, nkekibi okukyatahire omu nsi obwomuntu omu, kandi nokufa obwekibi; nukwo nokufa kwahikire kuti ha bantu bona, baitu bona bakasisa.”​—Abarumi 5:12.

● Habwaki Ruhanga aikiriza ebintu ebibi kubaho? Omu rugonjo rwa Adeni, Sitaani akagamba ngu Ruhanga mubiihi owaima ebihangirwe bye ebintu ebirungi. (Okubanza 3:3-5) Omu kukora eki, Sitaani akaleetaho okugurukyagurukya ha busobozi bwa Yahwe kulema. Adamu na Hawa bakacwamu kuhondera Sitaani; nahabweki bakanga obusobozi bwa Yahwe kulema, kandi baayoleka ngu omuntu n’asobora kwecweremu ekirungi n’ekibi. Omu bwinganiza bwe n’amagezi, Yahwe akaba akimanyire ngu haroho omulingo gumu gwonka ogw’okugonjoora ensonga enu​—kuleka obwire kurabaho, kuha abantu omugisa ogw’okwerema nk’oku barukugonza. Abantu baikaire nibakozesebwa Sitaani, kandi kyeyolekiire kimu ngu tibasobora kwerema bonka hataloho Ruhanga.​—Yeremiya 10:23.

● Ekigendererwa kya Ruhanga hali ensi nikyo kiha? Yahwe obuyahangire orugonjo rwa Adeni, akooleka nk’oku akaba nagonza ensi yoona esisane. Akaragira Adamu na Hawa kulya ensi n’okugiijuza abaana baabo kuhikya yoona obubaligifoora orugonjo orurungi. (Okubanza 1:28) Nahabweki, ekigendererwa kya Ruhanga nikyo ngu ensi efooke orugonjo orurungi orukwikarwamu abantu abahikiriire, kandi eka ey’abaana ba Adamu na Hawa enyakuli omu bumu. Ebirukukira obwingi omu Baibuli nibibazaaho Ruhanga ekyarukwija kukora kuhikiiriza ekigendererwa kye eky’okubanza.

● Habwaki Yesu Kristo yaizire omu nsi? Obujeemu obwabaire omu rugonjo rwa Adeni bukaleetera Adamu na Hawa hamu n’abaana babo boona abaakuzairwe kufa. Baitu habw’okugonza kwe, Yahwe akasindika Omwana we kwija omu nsi nukwo aheyo obwomeezi bwe nk’ekicunguro kujuna abantu. (Matayo 20:28) Eki nikimanyisa ki? Baibuli eyeta Yesu “Adamu owahanyuma” baitu kutasisanaho na Adamu, Yesu uwe akaikara ali mwesigwa hali Yahwe. Hanyuma akahayo obwomeezi nk’ekihongwa ayegondiize, rundi nk’ekicunguro, kandi eki kisobozesa abantu boona abesigwa kuganyirwa ebibi byabo nukwo hakumalirra batunge obwomeezi Adamu na Hawa bayegondezaamuga batakasiisire. (1 Abakolinso 15:22, 45; Yohana 3:16) Nitusiima habw’ekihongwa Yesu yahaireyo, hati nitukigumiza kimu ngu ekigendererwa kya Yahwe eky’okufoora ensi orugonjo orurungi nikiija kuhikirra. *

Ekigendererwa kya Ruhanga hali ensi nikyetegerezebwa kurungi kandi nikiija kuhikirra. NK’oku orugonjo rwa Adeni kikaba kiri kiikaro kyonyini, ekirumu ebisoro n’abantu, n’ekigendererwa kya Ruhanga ha busumi obw’omu maiso titusobora kugurukyagurukya ngu kiri haihi kuhikirizibwa. Wakugondeze kwerora ebintu binu nibihikirizibwa? Eki kiri hali iwe. Ruhanga nagondeza abantu boona ebiro ebirungi eby’omu maiso, otwaliiremu n’abantu abakora ebintu ebibi​—1 Timoseo 2:3, 4.

Yesu obw’akaba aliyo naafa, akabaza n’omusaija ow’akaba ali nkozi y’ebibi; omusaija ogu akaba akimanyire ngu asemeriire kuhanikwa. Baitu akasaba Yesu kumuhuumuza n’okumuha okunihira. Yesu akamugarukamu ati: “Oraba nanyowe omu nsi ya Ruhanga.” (Luka 23:43) Obukiraaba ngu Yesu n’agonza omusaija ogu abe omu rugonjo orurungi orukusisana na Adeni, kigumye ngu Yesu hamu na Ise nibagonza naiwe obeyo! Obworaaba n’ogonza kuba omu rugonjo orurungi, kora kyona ekyorukusobora kwega ebirukukwata hali Ruhanga, ayakozere orugonjo rwa Adeni.

[Obugambo obuli hansi]

[Akasanduuko/​Ebisisani]

OBUNABBI OBURUKUTUKONYERA KWETEGEREZA BAIBULI YOONA

“Nanyowe ndatahoga okuhigana hagati yawe nomukazi, kandi hagati yoruzaro rwawe noruzarorwe: alikuhutaza omutwe gwawe, naiwe olimuhutaza ekikongoijokye.”​—Okubanza 3:15.

Obu bunabbi bwa Baibuli obwagambirwe Ruhanga omu rugonjo rwa Adeni. Omukazi, n’oruzaaro rwe, enjoka, n’oruzaaro rwayo nubo baha? “Okuhigana” okuli hagati yabo kukaba nukwija kubaho kuta?

ENJOKA

Sitaani Diabolo.​—Okusuku’rwa 12:9.

OMUKAZI

Ekitebe kya Yahwe eky’ebihangirwe eby’omu iguru. (Abagaratiya 4:26, 27) Isaya akabaza ha “mukazi” ngu akaba naija kuzaara ihanga ery’omwoyo.​—Isaya 54:1; 66:8.

ORUZAARO RW’ENJOKA

Abo abacwamu kukora Sitaani ebyagonza.​—Yohana 8:44.

ORUZAARO RW’OMUKAZI

Ekicweka ekikuru eky’oruzaaro runu nuwe Yesu Kristo, ayarugire omu kicweka eky’omu iguru eky’ekitebe kya Yahwe. Abandi abali omu ‘ruzaaro’ runu nubo bagenzi ba Kristo omu by’omwoyo abarukwija kulema nauwe omu iguru. Abakristaayo banu abaseserweho amagita bakora ihanga ery’omwoyo erirukwetwa “Isareri owa Ruhanga.”​—Abagaratiya 3:16, 29; 6:16; Okubanza 22:18.

KUHUTAAZA EKIKONGOIJO

Bunu busaasi obw’akacu kake obwakuhikire hali Masiya. Sitaani akasobora kuleetera Yesu kwitwa omu nsi. Eki kikamara akacu kake habw’okuba Yesu akahumbuurwa.

KUHUTAAZA OMUTWE

Yesu naija kumaraho ebizibu byona Sitaani ebyalesereho, hanyuma amuhwerekereze.​—1 Yohana 3:8; Okusuku’rwa 20:10.

Kusobora kumanya ensonga enkuru erukubazibwaho omu Baibuli, rora akatabu The Bible​—What Is Its Message? Akaatiirwe Abakaiso ba Yahwe.

[Ekisisani]

Adamu na Hawa bakabonabona habw’okusiisa kwabo