Obunabbi 4. Kutagonza Abandi

“Abantu . . . balireka kugonza ab’omu maka gaabo.”​—2 TIMOSEO 3:1-3, God’s Word Bible

● Chris akora omu kitongole ekirukurwanisa obutabanguko omu maka omu matemba g’ihanga lya Wales. N’agamba ati; “Ninyijuka kiro kimu, omukazi ow’akaba atiirwe kubi muno akaija kandi nkaba ntakyasobora kumumanyirra. Abakazi abandi bababonaboneseze kuhika ha rulengo ngu nibatiina n’okurora omuntu ha maiso.”

AMANANU NIGOOLEKA KI? Omu ihanga limu erya Afirika, haihi omukazi 1 omu bakazi 3 bakamusobyaho akyali muto. Okuseruliiriza okwakozerwe omu ihanga eri kukazoora ngu abasaija abarukuhingura kimu kyakasatu bakaba nibehurra ngu kikaba nikiikirizibwa kuteera abakazi baabo. Baitu abakazi tinubo bonka barukukwatwaho obutabanguko omu maka. Ekyokurorraho omu Canada, haihi abasaija 3 hali abasaija 10 nibaterwa rundi nibajumwa abagonzebwa baabo.

ABANTU BAGAMBA KI? Obutabanguko omu maka bwikaireho kuruga na kara. Oihireho ngu kasumi kanu abantu nibabubazaaho muno kukira na kara.

MALI ENTEKEREZA EGI EHIKIRE? Omu myaka nke enyuma obutabanguko omu maka bweyongiire kumanywa. Baitu kweyongera kumanywa kikonyire kubukeehya? Nangwa, eki tunukwo kiri. Okutagonzangana omu bantu nikweyongerra kimu kukira na kara.

NOTEKEREZA KI? Ebigambo ebiri omu 2 Timoseo 3:1-3 nibihikirizibwa? Mali abantu baingi tibakyagonza ab’omu maka gaabo, ekintu ekisemeriire kwereeta kyonka?

Obunabbi obwakataano obworukurora nibuhikirra nibutwarramu eka yaitu, ensi. Wetegereze Baibuli eky’erukugamba ha nsonga enu.

[Ebigambo ebikomerwemu]

“Obutabanguko omu maka nibumanywa nk’emu ha misango ey’etakira kutwarwa omu mbuga z’ebiragiro. Okuseruliiriza nikwoleka ngu omukazi n’asobora kuteerwa musaija we emirundi 35 atakanyegeriire ha poliisi.”​—A SPOKESWOMAN FOR WALES DOMESTIC ABUSE HELPLINE.