Baibuli Ehindura Obwomeezi

KIKI ekyaletiire omuteezi w’ejaara kandi omusuma kuleka ebikorwa binu? Soma orole ekyarukugamba.

“Nagonzaga Kuvuga Embaraasi.”​—RICHARD STEWART

AKAZAARWA: 1965

IHANGA: JAMAICA

EBYAFAAYO: MUTEEZI W’EJAARA KANDI OMUCWI W’EBIRAGIRO

OBWOMEEZI BWANGE OBWA KARA: Nkakurra omu kiikaro ekinaku, ekirumu abantu baingi omu Kingston, orubuga orukuru orwa Jamaica. Ibura ly’emirimo likaba liri lingi n’obucwi bw’ebiragiro bukaba bukanyire. Abasuma baikazaaga abantu nibatiina. N’ahurraga amasasi haihi buli kiro.

Nyina nyowe yakoraga n’amaani kurolerra nyowe na muto wange omwisiki. Akakora kyona ekirukusoboka kurora twatunga obwegese oburungi. Tinagonzaaga muno kusoma baitu nagonzaaga kuvuga embaraasi. Nakiraga kwosa isomero kandi ngenda nambere bavugira embaraasi. Nanyowe navugaga embaraasi.

Hanyuma y’akacu kake nkatandika kwejumbira muno omu kuzaana ejaara n’okuvuga embaraasi ez’akalitango. Nkatandika kwejumbira omu busiihani kandi nagonzaaga muno abakazi. Ekindi, nkatandika kunywa enjaahi n’okwiba ninkosesa emundu nukwo nsobole kwebaisaaho. Nkaba nyine emundu nyingi, baitu hati ninsiima Ruhanga ngu busaho n’omu ayaisirwe omu kwiba okunayejumbiramuga.

Hakumalirra, poliisi ekankwata kandi nasindikwa omu nkomo habw’emisango yange. Hanyuma y’okulekerwa, nkatandikira nambere nkaba ngarukiire. Amananu gali nkakira na nk’oku nkaba ndi kara. N’obukiraaba ngu ha maiso nazookaga nk’omuntu ow’ataine kabi, nkaba nyine amaani, ninkwatwa bwangu ekiniga kandi nintabuka kubi. Tinafaahoga muntu ondi weena oihireho nyowe nyenka.

OMULINGO BAIBULI YAHINDWIRE OBWOMEEZI BWANGE: Obunkaba nkyali omu bwomeezi bwange obubi, nyina nyowe akeega Baibuli kandi yafooka omu h’Abakaiso ba Yahwe. Nkarora empindahinduka enungi ez’akaba akozere omu bwomeezi bwe kandi nakwatwaho. Nkacwamu kumanya ekyaletiire nyina nyowe kuhinduka, nahabweki nkatandika kwega Baibuli n’Abakaiso ba Yahwe.

Nkakyetegereza ngu enyegesa z’Abakaiso ba Yahwe zaali nizahukana n’ez’amadiini agandi kandi buli kintu ekibaagambaga kyasigikirraga ha Baibuli. Niyo guruupu y’abantu bonka abankaba manyire ngu batebeza nju ha nju nk’Abakristaayo aba kara. (Matayo 28:19; Engeso Ezabakwenda 20:20) Nkakigumya ngu nzoire ediini ey’amananu obunarozere okugonza okubainiirengana kuruga ha mutima.​—Yohana 13:35.

Kusigikirra ha binayegere kuruga omu Baibuli, nkakirora ngu nyine kukora empindahinduka ez’amaani omu bwomeezi bwange. Nkakyetegereza ngu Yahwe anoba obusiihani kandi ngu obundaaba ningonza kumusemeza, nkaba nyine kuleka ngeso ezaali nizisiisa omubiri gwange. (2 Abakolinso 7:1; Abaheburaniya 13:4) Nkakwatwaho obunamanyire ngu Yahwe aine enyehurra kandi ebikorwa byange nibisobora kumusaaliza rundi kumusemeza. (Enfumo 27:11) Nahabweki nkacwamu kuleka kunywa enjaahi, nkeerekesa emundu zange kandi nahinduramu enyetwaza yange. Empindahinduka ezakizireyo kungumira kukora nukwo kuleka obusiihani n’okuleka kuzaana ejaara.

Ha kubanza, nkaba ntarukugonza abanywani bange bamanye ngu ninyega Baibuli n’Abakaiso ba Yahwe. Baitu nkamanya eky’okukora obunasomere Matayo 10:33, nambere Yesu yagambire ati: “Wena alinyehakana omu maiso gabantu, uwe ndimwehakana omu maiso ga Isenyowe ali omu iguru.” Ebigambo ebi bikandetera kugambiraho banywani bange nk’oku nkaba ninyega Baibuli n’Abakaiso ba Yahwe. Bakahuniirra muno. Batakiikirize ngu omuntu nka nyowe ninsobora kufooka Mukristaayo. Baitu nkabagambira ngu tinkyagonza kukora ekintu ekibi kyona nk’oku nakoraga kara.

OMULINGO NGASIIRWE: Nyina nyowe akasemererwa muno obuyarozere ntandikire kuhondera emisingi ya Baibuli. Hati takyayeraliikirra habw’ebintu ebibi ebinsobora kukora. Tubazaaho ekintu ekitwine kandi ekiturukusisaniza​—okugonza okutwiniire Yahwe. Obwire obumu, ntekerezaaho nk’oku nayetwazaaga kandi kingumira kukikiriza ngu Ruhanga akankonyera kukora empindahinduka. Tinkyayegomba obwomeezi obw’obusiihani, n’okugonza itungo obunkaba nyine.

Kakuba ntaraikiriize obutumwa bwa Baibuli, nakubaire nfiire rundi ndi omu nkomo kasumi kanu. Baitu hati, eka yange erumu okusemererwa. Kimpa okusemererwa kw’amaani kuheereza hamu Yahwe Ruhanga ndi na mukazi wange na muhara waitu. Ninsiima muno Yahwe habw’okunyikiriza kuba kicweka ky’oruganda orw’Ekikristaayo kandi orwine okugonza. Ninsiima muno ngu omuntu akatamu amaani kunyegesa amananu agali omu Baibuli. Kandi omugisa ogunyine ogw’okukonyera abandi kumanya Baibuli eky’eyegesa ngutwara kuba gw’omuheendo. Ekirukukirayo obukuru, ninsiima Yahwe Ruhanga habw’okunyoleka embabazi ze ezitansemeriire kandi yanyiriza haihi nauwe.

[Ebigambo ebikomerwemu]

“Nkamanya ngu Yahwe aine enyehurra kandi ebikorwa byange nibisobora kumusaaliza rundi kumusemeza.”

[Ekisisani]

Nkarora epindahinduka enungi nyina nyowe ez’akaba akozere omu bwomeezi bwe

[Ekisisani]

Ndi na mukazi wange na muhara waitu