Nkazaarwa omu kicweka kya Santo Domingo, omu ihanga lya Dominican Republic, kandi ninyowe mwana w’okumalirra omu baana bbana. Bazaire bange bakaba basomere muno kandi bakaba nibagonza kukuliza abaana baabo omu kiikaro ekirumu abantu abaine engeso enungi kandi abesigwa. Bazaire bange bakatangatangana abamiisani b’ediini y’Abamomoni emyaka ena enyuma ntakazairwe. Habwokuba abasigazi abo bakaba bali becumi kandi nibetwaza kurungi, bazaire bange bakakwatwaho muno kandi bacwamu ngu eka yaitu ebe y’okubanza kweteranizaaho ediini ey’Abamomoni omu Dominican Republic.

Obunagenzere ninkura, nayegondezaaga muno kukora omu emirimo y’ekanisa kandi nateekamuga muno ekitiinisa enyegesa z’Abamomoni ezirukukwata ha bwomeezi obw’amaka hamu n’engeso. Kyansemezaaga muno okuba omu hali bo kandi kinu kikandetera kugonza kufooka mumiisani.

Obunkaba nyine emyaka 18, eka yaitu ekafurukira omu United States nukwo nsobole kugenda omu univasite enungi. Hanyuma y’omwaka gumu, nyinento nyowe na musaija we abakaba bali Bakaiso ba Yahwe, bakaija kutubungira. Bakaturaaliza kugenda nabo ha rusorrokano orukooto orw’Abakaiso ba Yahwe. Nkakwatwaho muno obunarozere abantu abanyetoroire nibahuliiriza bataireho omutima, nibasuukura ebyahandiikirwe kandi nibahandiika ebibarukwega. Nahabweki nkasaba peni hamu n’orupapura, natandika kukora ekintu nikyo kimu.

Hanyuma y’orusorrokano, nyinento nyowe na musaija we bakangambira ngu nk’oku nkaba ningonza kuba mumiisani, bakaba nibasobora kunkonyera kwega Baibuli. Nkateekereza ngu eki kirungi habwokuba kasumi ako nkaba manyire muno ebiri omu kitabu ky’Abamomoni kukira ebiri omu Baibuli.

Nyinento nyowe na musaija we obubaabaga nibanyegesa Baibuli kurabira ha simu, baakiraga kunyekambisa kulengesaniza enyikiriza zange hamu n’ebintu Baibuli erukwegesa. Baali nibagonza nkyegumize nyenka ngu ebinkaba ninyega mananu.

Haroho enyegesa nyingi ez’Abamomoni ezinkaba ninyikiririzaamu baitu ntarukukigumya obuziraaba nizisigikirra ha Baibuli. Nyinento nyowe akasindikira Awake! eya Novemba 8, 1995, eyatiirwe Abakaiso ba Yahwe, ey’ekaba erumu ebicweka ebimu ebirukukwata ha nyegesa z’Abamomoni. Kikampuniiriza muno kukimanya ngu haali haroho enyegesa z’Abamomoni nyingi ezinkaba ntamanyire. Eki kikandetera kugenda ha mukura ogw’Abamomoni kukigumya ngu Awake! Eby’ekaba egambire obugaraaba gaali mananu. Gakaba gali mananu, kandi obunagenzere omu lyahurro ly’Abamomoni omu kicweka kya Utah nkakigumiza kimu.

Nakiraga kuteekereza ngu ekitabu ky’Abamomoni hamu na Baibuli nibikwatagana. Baitu obunatandikire kusoma Baibuli n’obwegendereza, nkakyetegereza ngu enyegesa z’Abamomoni nizihakaniza enyegesa za Baibuli. Ekyokurorraho, omu Ezekyeri 18:4, Baibuli n’egamba ngu ‘obwomeezi’ rundi omwoyo gufa. Baitu omu kitabu ky’Abamomoni omu Alma 42:9 nihagamba ngu: “Obwomeezi rundi omwoyo tigusobora kufa.”

Oihireho enyegesa zaabo ezitarukwikiranganiza na Baibuli, enyegesa z’Abamomoni ezikukurakuraniza omwoyo gw’ihinga nazo zikantabura muno. Ekyokurorraho, Abamomoni nibeegesa ngu orugonjo rwa Adeni rukaba ruli omu Amerika, omu rubuga orukwetwa Jackson County, oruli omu kicweka kya Missouri. Kandi nibeegesa ngu akasumi nikaija kuhika Ruhanga aleme ensi yoona narabira omu gavumenti y’Amerika.

Nkekaguza ngu, obukiraaba nukwo kiri, kiki ekirahika h’amahanga agandi, otwaliiremu n’ihanga nambere nazaliirwe? Kiro kimu obunkaba nimbaza n’omusigazi Omumomoni ow’akaba n’atendekwa kufooka omumiisani, tukabazaaho ensonga egi. Nkamukaguza obw’araaba n’asobora kurwanisa Abamomoni abali omu mahanga agandi obubarukuba nibarwana omu bulemu. Kikampuniiriza muno obuyagambire ngu ego! Nkeyongera kuseruliiriza ha nyegesa ez’ediini yange kandi nakaguza n’abarukutwebembera. Bangambiraga ngu eby’okugarukamu eby’ebikaguzo byange tibyanguhire kwetegereza baitu ngu nakubyetegeriize hanyuma y’ekyererezi kugenda nikyeyongera.

Habw’omulingo bangarukamuga ogutarukunanura, nkatandika kwecumiitiriza ha nsonga habwaki nkaba ningonza kufooka mumiisani. Nkakyetegereza ngu, nkaba ningonza kufooka mumiisani habwokuba nkaba ningonza kukonyera abantu. Ekindi, nkaba ningonza abantu abandi banteekemu ekitiinisa. Baitu amananu gali ngu, nkaba manyire bike muno ebirukukwata hali Ruhanga. N’obukiraaba ngu nkaba nsomere Baibuli emirundi nyingi, nkaba ntarukugitwara nk’ey’omuhendo. Nkaba ntamanyire ekigendererwa kya Ruhanga hali ensi n’abantu.

Kurabira omu kwega Baibuli n’Abakaiso ba Yahwe, nkeega ebintu bingi muno, otwaliiremu kumanya ibara lya Ruhanga, kiki ekibaho omuntu obw’afa, n’obujunanizibwa Yesu obw’aine omu kuhikiriza ekigendererwa kya Ruhanga. Ha kumalirra, nkatandika kwetegereza kurungi Baibuli kandi nayegondezaaga omu kugambiraho abandi amananu agankaba ninyega. Nkaba nkimanyire ngu Ruhanga aroho, baitu hanyuma y’okwega Baibuli nkatandika kumusaba kurugira kimu ha mutima. Nkabatizibwa omu Julaayi 12, 2004 nafooka omu h’Abakaiso ba Yahwe, kandi hanyuma y’emyezi mukaaga, nkatandika kuheereza Yahwe nk’omutebezi ow’akasumi koona.

Nkamara emyaka etaano nimpeereza ha kitebe ekikuru eky’Abakaiso ba Yahwe ekiri omu Brooklyn, New York. Nayegondezaaga muno omu mulimo ogw’okuturukya Baibuli hamu n’ebitabu ebirukusigikirra ha Baibuli, ebikonyera obukaikuru n’obukaikuru bw’abantu omu nsi yoona, kandi nk’eyongera kukonyera abantu kwega ebirukukwata ha Baibuli.