Nkakurra omu Warialda, tawuni entaito omu New South Wales. Tawuni eya Warialda ijwiremu abantu ab’emiringo erukwahukana, baliisa entaama n’ente, kandi nibalima ebyokulya eby’enjuma n’ebimera ebindi ebitaito. Etawuni enu nyecumi kandi n’obucwi bw’ebiragiro tibukanyire.

Habwokuba ninyowe nkaba ninkirayo obukuru omu baana ikumi, ha myaka 13, nkatandika kukora nukwo nkonyere omu kuhikyaho eka ebyetaago. Habwokuba nkaba ntasomere muno, nakoraga omu faamu. Ha myaka 15, nkaba ninkora omu kurolerra ebisoro n’okutendeka embaraasi.

Kukora ha faamu kyali kirumu ebirungi n’ebibi. Baitu kandi, nayegondezaga omu mulimo gwange hamu n’omulingo ekiikaro kyazookamuga. Naikarraga ha murro ekiro, nindora okwezi n’iguru erijwire enyunyuuzi obu ninterwa amabeho ga rwebajo n’okuboya kw’ekisaka ekyali kinyehinguliriize. Ninyijuka nintekereza ngu haine kuba haroho omuntu ayahangire ebintu binu ebirungi. Harubaju orundi, ha faamu ezinakoramuga hakaba haliyo ebintu ebyakabi hali nyowe. Nahurraga abantu nibabaza kubi kandi kyanyaguhiraga kutunga etaaba. Omu bwire butaito, kubaza kubi n’okunywa etaaba butoosa bikafooka kicweka ky’obwomeezi bwange.

Obunahikize emyaka 18, nkagenda Sydney. Nkalengaho kutaaha amahe baitu ntaikirizibwe habwokuba nkaba ntasomere. Nkatunga omulimo kandi naikara omu Sydney kumara omwaka gumu. Obu nubwo nabandize kutangatangana Abakaiso ba Yahwe. Bakandaaliza kugenda omu rumu ha nsorrokano zaabo, kandi aho naaho nkakyetegereza ngu enyegesa zaabo z’amananu.

Baitu hanyuma y’akacu kake, nkacwamu kugarukayo mu kisaka. Nkagenda Goondiwindi, omu Queensland. Nkatunga omulimo, naswera kandi eky’enaku, nkatandika kunywa amaarwa.

Nyowe na mukazi wange tukazaara abaana babiri. Hanyuma y’okuzaarwa kwa batabani baitu, nkatandika kutekerezaaho muno nambere obwomeezi bwange bukaba nibugenda. Nkaijuka ebinkaba mpulire ha rusorrokano rw’Abakaiso ba Yahwe omu Sydney, kandi nacwamu kugira ekinakoraho.

Nkatunga magaziini eya Watchtower enkuru, ey’ekaba eroho endagirro ya ofiisi y’itaagi ery’Abakaiso ba Yahwe omu Australia. Nkasindika ebbaruha ninsaba obukonyezi. Omu h’Abakaiso ba Yahwe, anyakwine embabazi n’engonzi akaija kumbungira. Akatandika kunyegesa Baibuli.

Obunayeyongiire kwega Baibuli, nkakirora ngu nkaba nsemeriire kukora empindahinduka ez’amaani omu bwomeezi bwange. Orukarra rumu kuruga omu Baibuli orwankwasireho muno nirusangwa omu 2 Abakolinso 7:1. Orukarra oru rututererra ‘kweyogyaho okusiisikara kwona okw’omubiri.’

Nkacwamu kuleka kunywa etaaba n’okunywa amaarwa maingi. Kyali kitanguhire kukora empindahinduka zinu, habwokuba nkaba mmazire obwire bwingi nimbikozesa. Baitu nkaba ncweriiremu kimu kutwaza obwomeezi bwange omu mulingo ogurukusemeza Ruhanga. Ekyakizireyo kunkonyera nukwo kuteeka omu nkora omusingi oguli omu Abarumi 12:2: “Mutasisanizibwa nkobusinge bunu: baitu muhindurwe omu magezi ganyu amahyaka.” Nkakyetegereza ngu kusobora kuhindura engeso zange, nsemeriire kuhindura entekereza yange, n’okurora engeso ezinkaba ningonza kwecwaho nka Ruhanga okwazirora. N’obukonyezi bwe, nkasobora kusingura kunywa etaaba n’amaarwa maingi.

Ekyakizireyo muno kungumira nukwo kuleka engeso y’okubaza kubi. Nkaba mmanyire obuhabuzi bwa Baibuli oburukusangwa omu Abefeso 4:29: “Ekigambo kyona ekitasemiire kitaliruga omu kanwa kanyu.” Baitu nabwo, kitanyaguhire kusemeza omulingo nabazaamuga. Kwecumiitirizaaho ebigambo ebiri omu Isaya 40:26 kikankonyera muno. Orukarra oru oburuba nirubazaaho iguru erijwire enyunyuuzi rugamba ruti: “Muimukye amaiso ganyu haiguru, murole ogu ayahangire ezi, aihayo ihe lyazo nkomuhendo gwazo okuguli: azeta zona amabara; habwobukuru bwamanige, kandi uwe okuba wamani omu busobozi, tihabuzireho nemu.” Nkakitekerezaaho ngu Ruhanga obwaraaba aine amaani g’okuhanga iguru n’ensi ebinagonzaaga kurora, ​mali n’asobora kumpa amaani kusobora kukora empindahinduka eziramusemeza. Habw’okwekamba n’okusaba muno, mpora mpora nkatandika kuleka kubaza kubi.

Obunkaba nindolerra ebisoro, nkaba ntakatungaga mugisa gw’amaani kubaza n’abantu habwokuba omu faamu ezinakoramuga habayoga abantu bataito. Baitu kandi, kurabira omu kutendekwa okututunga omu nsorrokano ez’Abakaiso ba Yahwe, nyegere kwesoborraho n’okubaza n’abantu abandi. Ekindi, okutendekwa oku kunsobozeseze kugambiraho abantu abandi amakuru amarungi ag’Obukama bwa Ruhanga.​—Matayo 6:9, 10; 24:14.

Omu myaka nyingi ey’erabireho, nyegondiize omu kuheereza nk’omugurusi omu kitebe. Ngurora nk’omugisa ogw’amaani kukora kyona ekindukusobora kukonyera abaheereza bagenzi bange. Baitu, omugisa ogundora ngu nigukirrayo kimu nugwo ogw’okuheereza Yahwe omu bumu hamu na mukazi wange omugonzebwa n’abaana baitu abarungi.

Ninsiima Yahwe habw’okunyikiriza​—nyowe atarasomere muno kandi akanyegesa. (Isaya 54:13) Ninyikiraganiza n’ebigambo ebiri omu Enfumo 10:22, ebirukugamba ngu: “Omugisa gwa [Yahwe] gutungisa itungo.” Nyowe n’eka yange twine ekihika eky’okwega hali Yahwe n’okumuheereza ebiro n’ebiro.