Michelle: Orohota, Sophia. Nasemererwa kukusanga omu ka.

Sophia: Nanyowe nasemererwa kukurora.

Michelle: Omurundi ogwahoire, tukabazaaho omulingo Ruhanga ayehurramu obutuba nitubonabona. * Okangambira ngu oikaire n’oyekaguza ekintu kinu, kukira muno hanyuma ya maama wawe kutunga obutandwa bwa motoka. Ntakeeberwe, maama wawe hati aroho ata?

Sophia: Obumu aba ali kurungi kandi obundi atali kurungi. Baitu kiro kinu ali kurungi.

Michelle: Eki nikigarramu amaani. Kiine kuba nikikugumira kwikara oine entekereza enungi omu nyikara nk’enu.

Sophia: Ego, tikyanguhire. Haroho obunyekanguza nti, naija kubonabona kuhikya di.

Michelle: Ky’obuhangwa kwehurra oti. N’osobora kuba n’okyaijuka ekikaguzo ekinakusigiire ekirukugamba ngu, Ruhanga obwaraaba aine amaani ag’okumaraho okubonabona habwaki akyakulekereho.

Sophia: Ego, ninyijuka.

Michelle: Tutakarozere eky’okugarukamu kuruga omu Baibuli, leka tubanze tweyijukyemu zimu ha nsonga ezitwabalizeeho omurundi ogwahoire.

Sophia: Kale.

Michelle: Eky’okubanza tukarora ngu n’omusaija omwesigwa arukubazibwaho omu Baibuli nauwe akekaguza habwaki Ruhanga alekereho okubonabona. Baitu Ruhanga atamuhane habw’okukaguza ekikaguzo eki, kandi Ruhanga atamugambire ngu aine okwikiriza kuke.

Sophia: Eki kikaba kihyaka hali nyowe.

Michelle: Ekindi, tukarora ngu Yahwe Ruhanga anobera kimu kuturora nitubonabona. Ekyokurorraho, Baibuli egamba ngu abantu be obubaahikwahoga emihito, “yasalirwaga.” * Tikirukuhuumuza kukimanya ngu Ruhanga atusaalirirwa obutuba nitubonabona?

Sophia: Ego, nikihuumuza mali.

Michelle: Ha kumalirra tukarora ngu habwokuba Omuhangi waitu aine amaani n’obusobozi ebirukukirayo, n’asobora kumaraho okubonabona obwire bwona.

Sophia: Eki nikyo ntarukwetegereza. Habwaki Ruhanga aikiriza ebintu binu byona ebibi kubaho kandi kunu aine amaani ag’okubitanga?

Michelle: Nitusobora kutunga eky’okugarukamu obu nitusoma omu kitabu kya Baibuli eky’Okubanza. Omanyire ebirukubazaaho Adamu, Hawa n’ekijuma?

Sophia: Ego bakabitwegesa ha kanisa. Ruhanga akabatanga kulya ha muti, baitu bayanga kumworobera bacwamu kugulyaho.

Michelle: Ohikire. Hati leka turole ekyaletiire Adamu na Hawa kusiisa. Ekyabaireho nikiija kutukonyera kumanya habwaki nitubonabona. Ninkusaba osome Okubanza esuura 3, orukarra 1 kuhika 5.

Sophia: Ego. “Kandi enjoka ekaberi engobya okukira ebisoro byona ebyomu kisaka Mukama Ruhanga ebiyakozire. Kandi ekagambira omukazi eti Nukwo Ruhanga yagambire ati mutalirya ha miti yona eyomu rugonjo? Omukazi yagambira enjoka ati Ebyana ebyemiti eyomu rugonjo ntusobora okubiryaho: baitu ha byana ebyomuti oguli hagati omu rugonjo, Ruhanga akagamba ati Mutaligulyaho, nobukwakuba okugukoraho mutafa. Enjoka yagambira omukazi eti Okufa timulifa: baitu Ruhanga amanyire ha kiro ekimuliguliraho amaiso ganyu nuho galiigukira, nainywe muliba nka Ruhanga okumanya ebirungi nebibi.”

Michelle: Webale. Leka tubanze twetegereze kurungi enkarra zinu. Eky’okubanza, wetegereze ngu enjoka ekabaza n’omukazi, Hawa. Ebyahandiikirwe ebindi nibyoleka ngu Sitaani Diabolo nuwe akaba nabaza nauwe kurabira omu njoka. * Sitaani akakaguza Hawa ebirukukwata ha muti. Oyetegeriize Ruhanga ekiyagambire ngu kikaba nikiija kubaho Adamu na Hawa obubaakuliire ha muti?

Sophia: Baakufiire.

Michelle: Ohikire. Baitu omu bigambo bya Sitaani ebyahondireho, akahakaniza Ruhanga. Wetegereze ekiyagambire: “Okufa timulifa.” Hanu Sitaani akaba nayoleka ngu Ruhanga akabaza ebisuba!

Sophia: Ebigambo ebi mbaire ntakabihurrahoga.

Michelle: Kandi obuyagambire ngu Ruhanga nabaza ebisuba, ‘akaletaho ekikaguzo ekyakwetaagire akasumi kusobora kukigarukamu. N’osobora kutekerezaaho ekikaguzo eki?

Sophia: Hmm. Tinkimanyire.

Michelle: Leka tukozese ekyokurorraho kinu. Leka tugambe ngu kiro kimu naija nambere oli natandika kwehaisaniza ngu ninkukira amaani. N’osobora kukora ki kwoleka ngu nonkira amaani?

Sophia: Nintekereza ngu nitusobora kukihamu akasumi.

Michelle: Nikyo eki kyonyini. Obundi nitusobora kuserra ekintu ekirukulemeera niturora nooha arasobora kukihimba. Mali kyanguhire kumanya ow’arukukira amaani.

Sophia: Ensonga ndiyo ningirora.

Michelle: Baitu omu kiikaro ky’okugamba ngu ninkukira amaani, kakuba nyehaisaniza ngu ninkukira kuba ow’amananu? Mali eki kigumire kukigumya, tinukwo?

Sophia: Ego.

Michelle: Nugo mananu, habwokuba tosobora kupima obwesigwa nk’oku osobora kupima amaani.

Sophia: Ago mananu.

Michelle: Nahabweki kusobora kugonjoora ensonga enu, nikyetaagisa kuleka akasumi kakarabaho, nukwo abandi bakarora nooha mali arukukirayo kuba ow’amananu.

Sophia: Eki nikyetegerezebwa kurungi.

Michelle: Hati, yongera orole ebitusomere omu kitabu ky’Okubanza. Sitaani akagamba ngu nakira Ruhanga amaani?

Sophia: Nangwa.

Michelle: Ruhanga akaba n’asobora kwoleka aho naaho ngu Sitaani tahikire. Oihireho, Sitaani akagamba ngu n’abaza amananu kukira Ruhanga. Akasisana nk’owarukugambira Hawa ati: ‘Ruhanga nakubiiha, baitu nyowe ninkugambira amananu.’

Sophia: Eki nikihuniiriza.

Michelle: Habwokuba Ruhanga aine amagezi, akakimanya ngu omulingo ogurukukirayo oburungi ogw’okugonjooramu ensonga enu nukwo kuleka obwire bukarabaho. Hanyuma, kyakweyolekere kurungi nooha ayabalize amananu kandi nooha ayabalize ebisuba.

Sophia: Baitu hanyuma ya Hawa kufa, eki kitagumye ngu Ruhanga akaba abalize amananu?

Michelle: Eki nukwo kiri. Baitu haroho ekigendererwa ekindi Sitaani eky’akaba aine. Rora orukarra rwa 5. Wetegeriize ekintu ekindi Sitaani ekiyagambiire Hawa?

Sophia: Akamugambira ngu obuyakuliire ekijuma, amaiso ge gakwigukire.

Michelle: Ego, kandi ngu ‘yakufookere nka Ruhanga, amanye ekirungi n’ekibi.’ Nahabweki Sitaani akaba nagamba ngu haroho ekintu Ruhanga eky’akaba aimire abantu.

Sophia: Ninkirora.

Michelle: Kandi oku nakwo kukaba kusosoimya kw’amaani.

Sophia: Nomanyisa ki?

Michelle: Sitaani akaba namanyisa ngu Hawa, otwaliiremu n’abantu boona, nibasobora kuba kurungi batali hansi y’obulemi bwa Ruhanga. N’omu nyikara enu, Yahwe akakimanya ngu omulingo ogurukukirayo oburungi ogw’okugonjoora ensonga enu nukwo kuleka Sitaani akooleka eky’akaba nabaza obugaraaba gali mananu. Nahabweki Ruhanga akaikiriza Sitaani kulema ensi enu habw’akasumi. Enu niyo ensonga habwaki omu nsi haijwiremu okubonabona. Sitaani nuwe mulemi w’ensi hatali Ruhanga. * Baitu haroho amakuru amarungi.

Sophia: Nugo gaha?

Michelle: Baibuli eyegesa ebintu binu bibiri ebikuru ebirukukwata hali Ruhanga. Eky’okubanza, Yahwe atufaaho kandi akwatwaho obutuba nitubonabona. Ekyokurorraho, tekerezaaho ebigambo by’Omukama Daudi ebirukusangwa omu Zabuli 31:7. Daudi akahikwaho ebizibu bingi omu bwomeezi bwe, baitu wetegereze ekiyagambire obw’akaba nasaba Ruhanga. Ninkusaba osome orukarra oru?

Sophia: Kale. Nihagamba ngu: “Ndahirrwa, ndasemererwa obwokuganyira kwawe: Baitu okarora omuhito gwange; okamanya obwomezi bwange omu bujune.”

Michelle: N’obukiraaba ngu Daudi akaraba omu kubonabona kwingi, kikamuhuumuza kumanya ngu Yahwe akaba n’arora byona eby’akaba narabamu. Naiwe nikikuhuumuza kukimanya ngu Yahwe amanyire byona ebiturukurabamu, otwaliiremu n’obusaasi abantu abandi obutasobora kwetegereza kurungi?

Sophia: Ego, nikihuumuza.

Michelle: Ekintu ekindi ekyakabiri nikyo ngu Ruhanga tarukwija kuleka okubonabona kukaikaraho ebiro n’ebiro. Baibuli eyegesa ngu alihaihi kwihaho obulemi bwa Sitaani obubi. Kandi alimarraho kimu ebintu byona, otwaliiremu n’okubanabona iwe na maama wawe okumurukurabamu. Ninsobora kugaruka wiiki erukwija nkwoleke habwaki nitusobora kukigumya ngu Ruhanga ali haihi kumaraho okubonabona kwona? *

Sophia: Ego, ninkigonza.