Obunazairwe, abazaire bange baali baine faamu entaito omu kyaro ekiri omu Galicia, omu matemba ga ihanga lya Spain. Tukaba tuli baana munaana kandi nyowe nkaba ndi wa kana. Omuka tukaba twine obusinge kandi nitwegonza. Omu kasumi ako, omu Spain, amaka agarukukira obwingi gasindikaga hakiri omwana omu ha isomero ly’abaseminariyo rundi omu kigo. Omu ka yaitu, basatu hali itwe nikyo twakozere.

Obunkaba nyine emyaka 13, nketeranizaaho munyaanya nyowe ow’akaba ali omu kigo omu Madrid. Omu kigo, enyikara ekaba etanguhire. Haali hataliyo kuba n’abanywani oihireho ebiragiro ebigumangaine, okusaba, n’okumigiirizibwa. Twazindukaga nyenkyakara nitwesorooleza omu kelezia nukwo twecumiitirize, n’obukiraaba ngu obwire oburukukira obwingi tinyine ekinayecumiitirizaahoga. Hanyuma twazinaga ebizina kandi nitutunga misa omu rulimi Orulatini rwonka. Ebirukukira obwingi tinabyetegerezaaga kandi nkehurra ndi hara muno na Ruhanga. Haihi ekiro kyona kyahwaga ntaine oumbalize nauwe. Obunaroraga munyaanya nyowe nagarukiraga ha kumugambira ngu, “Ahaisibwe Bikiramaliya omuhikiriire.” Buli hanyuma y’ekiihuro, abasisita batwikirizaaga kubaza habw’edakiika 30. Kinu kyali nikyahukanira kimu ha kusemererwa okutukaba twine omuka! Nayehurraga ndi nyenka kandi nakiraga kurra muno.

N’obukiraaba ngu nkaba ntarukwehurra ndi haihi na Ruhanga, nkateera ebirahiro kandi nafooka musisita nyine emyaka 17. Amananu gali ngu, kinu nkakikora habwokuba nikyo baali nibanihirramu, baitu hanyuma nkatandika kugurukyagurukya Ruhanga obw’araaba ankomere kufooka omusisita. Abasisita bagambaga ngu omuntu ow’aine okugurukyagurukya nka kunu naija kugenda omu murro ogutaraara! Baitu nabwo nkaikara ninkyagurukyagurukya. Nkaba nkimanyire ngu Yesu tiyaikaraga ali wenka baitu yaikaraga n’atebeza kandi n’akonyera abantu abandi. (Matayo 4:23-25) Obunahikize emyaka 20, nkaba ntarukurora habwaki nsemeriire kugumizaamu ndi musisita. Ekyampuniriize, mukuru w’abasisita akangambira ngu, obundaaba ntarukugonza kwikara ndi musisita, nduge omu kigo omu bwango. Nintekereza, n’asobora kuba akaba natiina ngu ninyija kuleetera abandi nabo kutandika kugurukyagurukya. Nahabweki nkarugayo.

Obunahikire omuka, abazaire bange bakanyetegereza kurungi. Baitu nk’oku nkaba ntaine omulimo omu kyaro, nkagenda Bugirimaani nambere mugenzi wange omwojo akaba naikara. Akaba ali kicweka ky’ekitebe eky’abarwanirraga obugabe bw’abantu kuruga omu Spain. Nanyowe nkenteraniza h’abantu abarwanirraga obugabe bw’abakozi hamu n’abakazi. Nahabweki nkafooka omu ha ba Communist kandi hanyuma nkaswerwa omusaija nauwe ow’akaba ali omu guruupu enu. Nkatekereza ngu ninyija kukora ekintu eky’omugaso, kurabira omu kugaba ebitabo bya guruupu enu n’okwejumbira omu kwesalinga.

Baitu hanyuma y’akasumi, nkongera nahwamu amaani. Nkehurra ngu abantu ab’omu kitebe kyaitu tibakorraga ha bibatebezaaga. Kinu nkakigumya omu 1971, abaisiki n’abasigazi abamu omu kitebe kyaitu obubayokeze ofiisi y’omuhikirwa w’ihanga lya Spain ey’ekaba eri omu Frankfurt. Bakakikora kwoleka okusaasa kwabo habw’obutalibwinganiza obukaba buli omu bulemi obwa ngamba nyenka omu Spain. Baitu nkaba nkimanyire ngu gunu tinugwo omulingo oguhikire ogw’okwolekamu okusaasa kwabo.

Obutwazaire omwana waitu ow’okubanza, nkagambira iba nyowe ngu ningenda kuleka kugenda omu nkurato z’ekitebe ekya ba Communist. Nkehurra ndi nyenka, habwokuba tiharoho munywani wange wena ayaizire kundora hanyuma y’okuzaara. Nkatandika kwekaguza obwomeezi obuburaaba bwine ekigendererwa. Mali kyali ky’omugaso kutekamu amaani kukonyera abantu?

Omu 1976, Abakaiso ba Yahwe kuruga Spain bakaija baateera kodi ha rwigi rwaitu kandi batuha ebitabu ebirukubazaaho Baibuli, kandi nkabiikiriza. Obubaagarukire, nkabakaguza ebikaguzo bingi ebirukukwata ha kubonabona, n’obutalibwinganiza. Nkahunirra muno kurora ngu bakakozesa Baibuli kugarukamu buli kikaguzo! Aho naaho nkaikiriza kwega Baibuli.

Ha kubanza nkaba ningoza kumanya ebiri omu Baibuli kyonka. Baitu ebintu bikahinduka nyowe na iba nyowe obutwatandikire kugenda omu nsorrokano ha Kyombeko ky’Obukama. Omu kasumi ako tukaba twine abaana babiri. Abakaiso ba Yahwe baijaga nibatutabarra kandi baaleraga abaana baitu ensorrokano obuzabaga nizigenda omu maiso. Nkatandika kubagonza muno.

Baitu nabwo nkaikara nkyaine okugurukyagurukya kuke. Nkacwamu kugaruka Spain kubungiraho ab’omuka. Isento nyowe ow’akaba ali mupaadiri, akalengaho kunyekambisa kuleka kwega Baibuli. Baitu Abakaiso ba Yahwe ab’omu kiikaro eki bakankonyera muno. Nabo bakagarukamu ebikaguzo byange nibakozesa Baibuli, nk’oku ab’omu Bugirimaani bakaba bakozere. Obunagarukire Bugirimaani nkongera natandika kwega Baibuli. N’obukiraaaba ngu iba nyowe akaleka kwega Baibuli, nyowe nkagumizaamu ninyega. Omu 1978, nkabatizibwa nk’omu h’Abakaiso ba Yahwe.

Amananu kuruga omu Baibuli gankonyiire kuba n’ekigendererwa omu bwomeezi n’okumanya ekihikire ekinsemeriire kukora. Ekyokurorraho, 1 Petero 3:1-4 nihekambisa abakazi ‘kworobera’ baiba bo, kubatekamu ekitiinisa kingi n’okukurakuraniza ‘omwoyo omuculeezi’ ogunyakuli “ogwomuhendo omwingi omu maiso ga Ruhanga.” Emisingi nk’enu enkonyiire kuhikiriza kurungi obujunaanizibwa bwange nka nyinabwenge kandi k’omuzaire.

Harabireho emyaka nka 35 kuruga nfooka omu h’Abakaiso ba Yahwe. Nimpurra nsemeriirwe muno habw’okuheereza Ruhanga ndi hamu n’eka yange ey’eby’omwoyo, n’okurora ngu omu baana bange bataano, bbana nibaheereza Yahwe.