Nk’oku kyolekerwe omu kicweka ekihoire, Yesu akateeka omutima ha “kutebeza ebigambo ebirungi ebyobukama.” (Luka 8:1) Akekamba muno, kandi akarubata enkumi n’enkumi za mailo kwetoroora Isaleri nukwo ayegese abantu ha Bukama. Obuheereza bwa Yesu bukahandiikwa omu bitabu bbina eby’enjiri ebinyakurumu ebyahandiikirwe ebirukuhingura 100 ebirukukwata ha Bukama. Ebingi hali byo birumu ebigambo bya Yesu baitu nabwo biri bike ha bintu byona Yesu ebiyabalize ha Bukama bwa Ruhanga!—Yohana 21:25.

Habwaki Obukama bwa Ruhanga kyali kikuru muno hali Yesu obw’akaba ali omu nsi? Eky’okubanza, Yesu akaba akimanyire ngu Ruhanga amukomere kuba mulemi wabwo. (Isaya 9:6; Luka 22:28-30) Baitu Yesu atateeke omutima ha kutunga obusobozi n’ekitiinisa. (Matayo 11:29; Marako 10:17, 18) Akebembeza Obukama kukira n’ebyetaago bye. Ensonga enkuru eri ngu, Yesu akaba n’agonza Obukama bwa Ruhanga * kandi nahati nakyabugonza habw’ebintu bulikorra abo abaagonza kandi ogu nuwe Ise ow’omu iguru hamu n’abahondezi be abesigwa.

Yesu yagonzaaga muno Ise ow’omu iguru. (Enfumo 8:30; Yohana 14:31) Agonza emiringo ya Ise emirungi nk’okugonza, embabazi n’obwinganiza. (Ekyebiragiro 32:4; Isaya 49:15; 1 Yohana 4:8) Hataroho kugurukyagurukya Yesu ayehurra kubi obwahurra ebisuba ebibazibwa hali Ise ebirukugamba ngu—Ruhanga tafaaho abantu obubaba nibabonabona kandi ngu n’agonza tubonabone. Enu eri emu ha nsonga habwaki Yesu yagonzaaga kutebeza ‘amakuru amarungi ag’Obukama,’ habwokuba akaba akimanyire ngu akasumi nikaija kuhika Obukama bweze ibara lya Ise. (Matayo 4:23; 6:9, 10) Kinu bulikikora buta?

Kurabira omu Bukama, Yahwe alikorra abantu ebirungi. “Alisusura amaizi gona” ha maiso g’abantu abesigwa. Yahwe naija kwihaho ebintu ebireta okurra nikyo arukugambira ngu “tihakiroho okufa; nobukwakuba okutera empamo, nobukwakuba okura, nobukwakuba okusasa.” (Okusuku’rwa 21:3, 4) Kurabira omu Bukama, Ruhanga naija kwihaho okubonabona kwona. *

Tikirukuhuniiriza ngu Yesu yagonzaaga muno kugambira abantu ha Bukama! Akaba akimanyire ngu eki kyakwolekere omulingo Ise ali w’amaani kandi w’embabazi. (Yakobo 5:11) Ekindi, Yesu akaba akimanyire ngu Obukama bwakugasiire abantu abesigwa abaarukugonza.

Yesu obw’akaba atakaizire omu nsi, akaba naikara omu iguru na Ise. Ise akamukozesa kuhanga ebintu byona kurugira kimu ha iguru erirukuhuniiriza, obutabarwa bw’enyunyuuzi n’ebikonjonjo kuhikira kimu ha nsi yaitu enungi hamu n’ebisoro ebigirumu. (Abakolosai 1:15, 16) Baitu omwebi byona, Yesu ‘akasemerererwa’ abaana ba bantu.—Enfumo 8:31.

Okugonza Yesu okwainiire abantu nitukuroora ha buheereza bwe. Kurugira kimu ha kubanza, akakyoleka kurungi ngu akaija omu nsi “okutebeza abasege ebirungi.” (Luka 4:18) Baitu Yesu atagarukire ha kubazaaho kukonyera abantu. Emirundi nyingi akooleka nk’oku akaba n’agonza abantu. Nk’ekyokurorraho, ekitebe ky’abantu baingi obubaayesoroize kumuhurra n’abaza, Yesu ‘akabaganyira yakiza abarwaire baabo.’ (Matayo 14:14) Omusaija ow’akaba aine oburwaire obw’amaani obuyayolekere okwikiriza ngu Yesu n’asobora kumukiza kakuba agonza, okugonza kukaletera Yesu kugira ekiyakoraho. Omu mulingo ogw’embabazi Yesu akakiza omusaija n’amugambira ati: “Ningonza: semezebwa.” (Luka 5:12, 13) Yesu obuyarozere munywani we Maliza narra habw’okufa kwa mugenzi we Lazaro, “yasinda omu mutima,” “natuntura,” kandi “yarra amaizi.” (Yohana 11:32-36) Hanyuma akakora ekintu ekirukuhuniiriza—akahumbuura Lazaro n’obukiraaba ngu akaba amazire ebiro bbina afiire!—Yohana 11:38-44.

Baitu Yesu akaba akimanyire ngu obukonyezi obuyahaire kasumi ako bwali buli bw’akacu kake. Akakyetegereza ngu akasumi nikaija kuhika abo boona abayakirize bongere barwale kandi boona abayahuumbwire bakwongiire bafa. Baitu ekindi, akaba akimanyire ngu Obukama bwa Ruhanga nibwija kumarraho kimu ebizibu nk’ebi. Egi niyo ensonga habwaki Yesu atarakozere ebyamahano kwonka; akatebeza n’obwekambi ‘amakuru amarungi ag’Obukama.’ (Matayo 9:35) Ebyamahano ebiyakozere ekaba eri ndozo y’ebintu Obukama bwa Ruhanga bulikora omu nsi yoona. Wetegereze Baibuli eby’eraganiza omu kasumi ako.

• Obwomeezi buliba burungi.

  “Nubwo amaiso gabafu bamaiso galiiguka, namatu gabafu bamatu galiigurwa. Nubwo omuntu omulema aliguruka nkensa, norulimi rwakifa munwa rulizina.” Kwongerraho, “anyakuikarayo taligamba ati Ndi murwaire.”—Isaya 33:24; 35:5, 6.

• Okufa Kuliba Kutakyaroho.

  “Abahikiriire baligwetwa ensi, baragiikaramuga ebiro nebiro.”—Zabuli 37:29.

  “Amiriire kimu okufa ebiro byona; kandi Mukama Ruhanga aliragaza amaizi ha maiso gona”—Isaya 25:8.

• Abo abaafiire balyongera babe bomeezi.

  “Bona abali omu bituro balihurra iraka lye kandi balirugamu.”—Yohana 5:28, 29.

  “Halibaho okuhumbuka.”—Engeso Ezabakwenda 24:15.

• Tihalibaho ibura ly’emirimu rundi oburaaro.

  “Balyombeka enju balizitahamu; balibyara emisiri eyemizabibu, baliryaho ebyana. Tibalyombeka bo, ondi atahemu; tibalibyara bo, ondi alyeho. . . . Abakome bange balisemererwa omwanya omukoto omulimo ogwengaro zabu.”—Isaya 65:21, 22.

• Obulemu buliba butakyaroho.

  “Amaraho obulemu okuhika ha mpero zensi.”—Zabuli 46:9.

  “Ihanga erimu tiririimukiza ihanga erindi busitama, kunu tibalyega obundi okurwana.”—Isaya 2:4.

• Talibaho ibura ly’ebyokulya.

  “Itaka lyanire ebyana byalyo: Ruhanga nuwe Ruhanga waitu alituha omugisa.”—Zabuli 67:6.

  “Halibaho omweru [gwoburo] omu nsi, ha mutwe gwensozi.”—Zabuli 72:16.

• Tihalibaho obunaku.

  “Abasege tibalyeba ebiro byona.”—Zabuli 9:18.

  “Alijuna omunaku obwakunga; nomusege atanyina mukonyezi. Aliganyira abasege nabanaku, nobwomezi bwabanaku alibujuna.”—Zabuli 72:12, 13.

Obworukutekerezaaho emirago egi ey’erukukwata ha Bukama bwa Ruhanga, n’orora ensonga habwaki Obukama kiri kikuru muno hali Yesu? Yesu obw’akaba ali omu nsi, akaba aine ekihika ky’okubazaaho Obukama bwa Ruhanga hali buli omu ayamuhuliirizaaga, habwokuba akaba akimanyire ngu Obukama nibwija kumaraho ebizibu byona ebirukututuntuza kasumi kanu.

Emirago ya Baibuli ey’erukukwata ha Bukama n’ekusemeza? Obukiraaba nukwo kiri, n’osobora kumanya ebirukukiraho ebirukukwata ha Bukama obu? Kandi, kiki eky’osemeriire kukora kurora ngu wagasirwa omu migisa eibulireeta? Ekicweka eky’okumalirra omu kitabu kinu nikiija kugarukamu ebikaguzo ebi.