1-2. Bible wãã ne naa ti waŋre maa po wo Israyel na ga hãylà?

 Bible ngaɓ jar dedaŋ 40 a ga hay joŋ wo waŋre Israyele. Á sii fẽẽre maaga waŋre maa po wo yoo ɓaara hay joŋ wo ra go ne naa ti ngeel ɓe keɗede. Ko ba ɗa, koh waŋre maaga hay wo de deele joŋ wo fẽẽre maa debaywoore wo. Ɗig ba ti saɓlaŋ Dafid waŋ maa de eln ɗa. Jeofa wãã ga : “wejõõ ɓi Dafid. . . maga hay ɗaw jag liŋgi ɓin wo, maga go de tayge de ɓi de jag jiili ɓe ɓuy, ma joŋge diŋ mo maga de el nen ɓi mono.” (1 Waŋ. 14:8) Amaa, blo sen hay legãɗ de wãy jobo, lan joŋ ga à mo ĩĩ war wãy sen le go ti durgi.—2 Sam. 11:​4, 14, 15.

² Ti ɓaŋ maa po mono, waŋre maaga bay wo de deele wa wo ngaɓa joŋ wo fẽẽre maa de el wo. Naa ko wee saɓlaŋ Robowam ɗa. Nen Jeofa á hay “ joŋ ɓlagge.” (2 Kron. 12:14) Amaa, Robowam hay hoo sug ti jag liŋgi maaga Jeofa hã ga wer jar maa hwal mo caa wo ɓil go de twaywaŋ maa ɓen mono. Á hay kol ɓi leege po wo ngaɓa go de ẽgre maa gor ti jar maa ni Baan wo do jar hee ɓen wo no.—1 Waŋ. 12:​21-24; 2 Kron. 11:​5-12.

3. Naa mo hay wii jag see naa ti wiigi jag maa hõnla, day naa ndal yaŋ ɓil hadge sen la diŋ ti maylà?

³ Á de woore debaŋ maaga naa mo yiŋ jag ti wiigi jag maa ti’ la no: Hayga waŋre maa Israyenl hay joŋ wo fẽẽre maa de woore wo de maa de ɓlagge wo pa lay, day Jeofa oo diŋ ti mayse maa  wããge ga á hay wo de deele peel se là? Yiŋgi jag ti wiigi jag sen kay naa yaŋ maa laa wer ne fẽn maaga Jeofa ko see naa mono. Naa ko fẽẽre yaŋ wo swa’ ga Jeofa hay ɗig ti ɓaara ga kay wo ne maa koge ga waŋre sen wo de deele yaw noga bay wa yawla: jiili ɓaara, mbiɗgi faale ne ɓlagge ɓaara, lan hãge jiili ɓaara ti goŋge Baa no.

Á HAY WO GOŊ JEOFA GO DE JIILI ƁAARA ƁUY

4. Mayse hay go ɓrew ɓil waŋre maa de deelen wo go de waŋre maaga bay wo de deele wa là?

⁴ Waŋre maaga hay wo de cõõre jag Jeofa hay wo goŋge ɓe go de jiili b ɓaara ɓuy. Waŋ Josafaɗ maa de eln “hay kiɗ Jeofa de jiili ɓe ɓuy.” (2 Kron. 22:9) Bible wãã ga: “waŋ po hay bay de joŋge doo Josiyas nono ga joŋ nen ferge see [Jeofa] de jiili ɓe ɓuy [ . . . ] wa.” (2 Waŋ. 23:25) Naa wãã ti Salomoŋ maaga hay joŋ fẽn maa de ɓlagge ti naw ɓe maa blam tawn wo na ga hãy lay là? “Jiili ɓe joŋ go de hãge ne [Jeofa] ɓuy [ . . . ] ga.” (1 Waŋ. 11:4) Bible wãã ti Abiyam waŋ maaga hay bay de deele wa ga: “jiili ɓe kal joŋ ge go diŋ ma [Jeofa] Baa ɓen ɓuy gà.”—1 Waŋ. 15:3.

5. Naa wer wããre maaga wãã ga goŋ Jeofa go de jiili ɓo ɓuy mo ɗa.

⁵ Goŋge Jeofa go de jiili naa ɓuy da wããge ga hãylà? Jobo maaga go de hã jiili ɓe ɓuy ne Jeofa de goŋ ne diŋ werga á de wããge nono tawa ga. Yaw mono, á goŋ Jeofa diŋ werga á da ne, lan se hoo sug ti ɓe go de jiili ɓe ɓuy.

6. Naa joŋ joŋge maa ɗaw jiili naa keɗed ɓuy là? (Jag Jõõ wo 4:23; Matiye 5:​29, 30)

⁶ Naa joŋ joŋge maaga naa maŋ saɓlaŋ waŋre maaga goŋ wo Jeofa go de jiili ɓaara ɓuy là? De ɗeege go see fẽẽre maa de ɓlaggen wo. Doo kããrebe maa de ɓlagge wo, ɗiggi dage hroge, noga hrage maa de yeeɗe. De maaga naa ko we ga mopo go de gay dage naa see Jeofa no, naa mo joŋ deparday maa niigi ɓe go.—Jaŋ Jag Jõõ wo 4:23; Matiye 5:​29, 30.

7. Wer mayse ga á de el maaga naa mo ɗee go see fẽẽre maaga woo wo dage naa go see Jeofa là?

⁷ Naa mo men ɗiggi naa caa ɓil wa. Hayga naa joŋ hayya we ne see naa ga no, maapo ga naa kal ɗiggi ga wer maaga naa go de hã see naa ti joŋre maa ni Jeofan, ɗiggi maa debaywoore hãy ge wo naa ga. Naa ngaɓ wee ne de saɓlaŋ po ɗa, ko ba mbo see ɓo go siigi ga ceere debaŋ, lan leege de fiɗge debaŋ lay ɗa. Ndo a liŋ ne kay ndo laa wuu. Day hayga ndo men jag tiŋn we go de bulgi no, wuu sen kay mo na kayge là? Ceere laa go ɓil tiŋn deparday tu. Sen maa wããge ga hãylà? Naa mo hay kaŋ ɗiggi diŋ ti rege maa ti nenterse maaga ya’ holaŋ naa ciŋ de Jeofa tawa wa. Amaa, naa mo hay ma’ jag tiŋn nen maaga ɗiggi maa debaywoore maa ti tamsir mo laa wo ne naa jiili, lan maa caa ɓil ɗiggi naa wa.—Efe. 2:2.

Á MBIƊ WO FAALE NE ƁLAGGE ƁAARA NO

8-9. Waŋ Dafid wo de waŋ Esekiyas ɗig wo ɗiggi de maaga à ruu ra mo là? (Ko foto maa nen

⁸ Doo maaga naa hay ko le go ciŋ la no mono, waŋ Dafid joŋ fẽn maa de ɓlagge debaŋ. Amaa de maaga profed Nataŋ wo wiigi ɓe ti ɓlagge ɓen mono, se yããn de fer ti gesiŋ. (2 Sam. 12:13) Doo maaga naa ko wããre ɓen wo ɓil Siŋ wora 51 mono, naa ko go tu ga á hay mbiɗ faale ne ɓlagge ɓen go de jiili ɓe ɓuy. Dafid hay bay laage diŋ logom see ɓe maa baa bii Nataŋ, noga maa yããge go jag poɗge ɓlagge ɓen tawa wa.—Siŋ. 51:​3, 4, 17, ko verse maa 2 lay.

⁹ Waŋ Esekiyas hay joŋ ɓlagge see Jeofa lay. Bible wãã ga “á hay kol maŋ ti see ɓe ciŋ. Ɓil Jeofa kal cege ɓe ne hẽn ti, cen ti jar Juda wo  de jar Jerusalem wo lay.” (2 Kron. 32:25) Wer mayse ga Esekiyas kol maŋ ti see ɓe ciŋ là? Maapo diŋ werga Jeofa hay hã horog ne hẽne, noga hay kay ne maa yãã sir Asiri wo, lan pẽẽn go jag cege ɓen mono. Maapo se wer maŋge ti ɓe ciŋn ga hay kaŋ wer ɓe go ngaɓ horog ɓen wo ne jar Babilon wo, fẽn maaga joŋ nen maaga profed Esay mo ruu ne mono. (2 Waŋ. 20:​12-18) Amaa, Esekiyas fer ti see ɓe gesiŋ doo Dafid no lay. (2 Kron. 32:26) Ti ɓo’ge ti ɓe mokay, Baa kon doo jobo maa de deele ga “joŋ hẽẽne do [Jeofa] debaŋ” nono.—2 Waŋ. 18:3.

10. Waŋ Amatsiya ɗig ɗiggi de maaga à ruu ne mo là?

¹⁰ Sar de Dafid wo de Esekiyas mono, Waŋ Amatsiya maa Juda joŋ fẽn maa de deele “ama jiili ɓe hay de bes ɓili.” (2 Kro. 25:2) Á joŋ mayse de ɓlagge ne? Blam maaga Jeofa kay ne maa nii jar Edom wo mo kay, Amatsiya le’ monɗra gesiŋ goŋ baa ɓaaran wo. c De maaga profed Jeofa wãã wo ne hẽn ti ɓlagge ɓen mono, se laa dayge yãã wããre ɓaaran ga.—2 Kron. 25:​14-16.

11. Doo maaga naa da’ ɓil 2 Korente wo 7:​9, 11 no mono, naa joŋ diŋ mayse maaga Jeofa mo fug ɓil go ne naa ti là? (Ko foton wo lay.)

¹¹ Naa had mayse see saɓlaŋ jar sen wo ne? Naa mo hay mbiɗ faale ne ɓlagge naan wo no, lan dur go de ẽgre naa ɓuy maaga naa mo fer joŋ rage wa so. Mayse hres de maaga jar maa peel tayge baa wo yaŋ we ne naa, koh hay ba ti fẽn po maa mẽ’ là? Naa mo hay ɗig ga Jeofa wo de jar maa peel taygen bay wo da naa wa na wa. Koh waŋre maa Israyeln wo dra’ hay wo de sãy yaŋ wo de ruugi ti lay. (Heb. 12:6) De maaga à liŋ naa we no, naa mo (1) yããn de fer ti gesiŋ, (2) dur maa cooge, lan (3) ya’ wer goŋ Jeofa go de jiili naa ɓuy. Hayga naa mbiɗ faale we ne ɓlagge naan wo no, Jeofa fug gi ɓil go ne naa ti.—Jaŋ 2 Korente wo 7:​9, 11.

Á GOŊ WO JEOFA TI FAAGE ƁE

12. Mayse hay go caa ɓil waŋre maa de deelen wo de waŋre maaga bay wo de deele wa mo là?

¹² Waŋre maaga Jeofa hay ko rage de deele hay wo goŋ Jeofa ti faage ɓe. Day saara hay jor glog jar sir ɓaaran wo maaga á mo joŋ wo doo saara no lay. Doo maaga naa ko le go la no mono, á hay mbaara joŋ fẽẽre maa de ɓlagge wo lay. Amaa, á hay wo go de hã see ɓaara ne Jeofa, lan dur wo go de ẽgre ɓaara ɓuy maa fãã sir ɓaaran go do goŋge sõõre wo. d

13. Wer mayse ga Jeofa wãã ga Akab bay de deele wa là?

¹³ Naa wãã ti waŋre maaga Jeofa wãã ga á bay wo de deele wa na ga hãy laylà? Cwãy tu, fẽẽre maaga á hay joŋ wo ra ɓuy bay wo diŋ fẽẽre maa de ɓlagge ɓuy wa. Sen diŋ doo maaga waŋ Akab maa de hããn laa ga à ĩĩ Nabod go wer se mono, á fer ti see ɓe gesiŋ mẽ’ẽ, lan se hay nen lawge mẽ’ lay. (1 Waŋ. 21:​27-29) Á boo ɓi leege wo, lan se hay naa blum ne jar Israyel wo pa. (1 Waŋ. 20:​21, 29; 22:39) Amaa Akab hay joŋ fẽn po maa de baywoore pa. De maaga wãy ɓe srog glog ɓe mono, á ɓo’ faage goŋge Baa maaga bay wo ti ngeel ɓe wa. De sen ɓuy se ko ɓlagge ɓe sen ti boŋ ga hase.—1 Waŋ. 21:​25, 26.

14. (a) Wer mayse ga Jeofa ko waŋ Robowam doo jobo maaga bay de deele wa là? (b) Daŋge waŋre maaga hay bay wo de deele wa hay joŋ wo mayse de ɓlagge là?

¹⁴ Naa ko wee saɓlaŋ Robowam—waŋ po maaga bay de deele wa ɗa pa. Doo maaga naa hay ko le go ciŋ la no mono, á hay joŋ fẽẽre maa de woore wo de maaga á hay ti waŋ mono. Amaa blam maaga á kol diŋ waŋ maa de ẽgre mokay, se men hoo sug go ti jag liŋgi maa ni  Jeofa no, lan tĩĩ wer goŋ Baa maaga bay wo ti ngeel ɓe wa mono. (2 Kron. 12:1) Blam sen ya’ ta’ se goŋ Jeofa, ya’ ta’ se goŋ Baa maaga bay wo ti ngeel ɓe wa. (1 Waŋ. 14:​21-24) Hay men goŋ Baa go ti faage ɓe bay diŋ waŋ Robowam wo de Akab tawa wa. Daŋge waŋre maaga hay bay wo de deele wa hay wo goŋ Baa maaga bay wo ti ngeel ɓe wa, lan hay wo jor glog jar sir ɓaaran wo joŋge doo saara no lay. Cwãy tu, maa nen Jeofan, goŋge ɓe ti ngeel ɓe diŋ fẽn po maaga ɓo’ nen ga waŋ Israyel de deele yaw baywa yawla.

15. Wer mayse ga goŋge Baa maa ti ngeel ɓen daŋgo nen Jeofa?

¹⁵ Wer mayse ga goŋge Baa hay diŋ mopo maaga daŋgo nen Jeofa là? Wer fẽn po boŋ. Joŋre hay de hãge ne waŋre wo do maa koɗ jar maa ni Baan wo maa goŋ Baa maa cwãy no. Dedaŋ sen pa, de maaga jar yaŋ goŋ Baa maaga bay wo ti ngeel ɓe wa no, se jor glog ɓaara maa joŋ ɓlagge maa kwũy, lan maa joŋ jar lan wo de baywoore. (Ose 4:​1, 2) Dedaŋ sen ɓuy pa, waŋren wo de jar sir ɓaaran hay wo go de hã see ɓaara ne Jeofa. Se diŋ wersen so ga Bible tab goŋge Baa ɓaara maaga bay wo ti ngeel ɓe wa de suugi de wãy noga war jobo mono. (Jer. 3:​8, 9) De maaga jobo legãɗ we go de wãy noga war jobo no, se ma’ ɓil jee teɓog ɓen debaŋ. Doo sen no lay, jee maaga go de hã see ɓe ne Jeofa ga men see ɓe goŋ Baa maaga bay wo ti ngeel ɓe wa, ma’ ɓil Jeofa debaŋ. e —Dog. 4:​23, 24.

16. Nen Jeofa mono, mayse caa ɓil jee maa de deelen go de jee maaga bay de deele wa mo là?

¹⁶ Sen had naa de may ne? Naa mo hay go de  baa wer maa ɗeege go see fẽn maaga de sa’ge see goŋge Baa maaga bay ti ngeel ɓe wa mo ɓuy. Amaa, naa mo hay tum goŋge diŋ Jeofa de ɗeŋ maaga á da ne, lan naa mo hay tum de hã see naa ti joŋre maa ɓe no. Profed Malasi wãã go de woore ti fẽn maaga caa ɓil jee maa de eln wo de jee maaga bay de el wa mono. Á wãã ga: “Nday ko ge fen maga ɓrew ɓil je ma keɗedn wo de je ma de ɓlaggen yaŋ, je maga joŋ joŋre ne Baa wo de je maga bay joŋ joŋre ne hẽn wa wo yaŋ go.” (Mal. 3:​18, NWT) Diŋ wersen so ga naa mo hay men mopo, koh ɓlagge maa see naa wo de hugli naa wo go woo do naa nen maaga naa men goŋ Jeofa go wa. Á diŋ ɓlagge maa kwũy de maaga naa men goŋ Jeofa go mono.

17. Wer mayse ga naa mo hay joŋ hayya ne see naa ti jee maaga naa ɗig ga naa da ne mo là?

¹⁷ Hayga ndo bay we de da wãy noga da war wa ɗa no, wããre maa ɓil Malasin kay ndo yaŋ maa kiɗ wãy noga war maa ti ngeel ɓe. Day maapo joŋre jee ɓen joŋ mbaara de woore; amaa hayga á bay we goŋ Baa maa cwãyn wa no, á joŋ mbe nen Jeofa diŋ jobo maa de deele yawlà? (2 Kor. 6:14) Hayga ndo da jee ɓen we no, á kay mbe ndo maa ooge de deele peel Jeofa, maa kay ndo maa dage ɓe de peel ni, noga maa kolge bar ɓe yawlà? Ko ba ɗa: maapo ga joŋre naare maa ni waŋ Salomoŋ maaga hay bay wo goŋ Jeofa wa hay mbaara de woore. Amaa, á hay bay wo goŋ Jeofa wa, day mẽ’ mẽ’ saara srog Salomoŋ go goŋ Baa maaga bay wo ti ngeel ɓe wa.—1 Waŋ. 11:​1, 4.

18. Pããrebe mo hay had wo mayse ne weere ɓaara wo là?

¹⁸ Pããrebe wo, nday mbay de kããge maa joŋ joŋre de saɓlaŋ waŋre maa ɓil Bible wo maa gẽẽ ɗiggi goŋge Jeofa ne weere ɓayn wo ɓili. Kay wee ra maa koge ga waŋre maaga hay wo de cõõre jag Jeofa wo diŋ jar maaga hay wo goŋge ɓe, lan hay wo jor glog jar lan wo maa goŋge ɓe mono. Had wee ra de fẽẽre maaga  nday wãɗ ra lan joŋ ra, de fẽẽre maaga kay wo nday maa lagge maŋ see Jeofa; doo fruggi nen wããre Baa, woge ti taygeti wo, siigi wããre Baa, ga wo diŋ fẽẽre maaga daŋ wo go nen naw naa mono. (Mat. 6:33) Bay we wa no, weere ɓayn wãã ge wo ga saara Sedeewa Jeofa diŋ werga “pããre saara wo diŋ Sedeewa”, bay diŋ werga saara da Jeofa wa. Ɓo’ge ti ɓen diŋ ga maapo, saara ko goŋge Jeofa go diŋ mopo halla ga, noga men wo goŋ Jeofa go.

19. Mayse de kaŋge peel ne jar maaga men wo goŋ Jeofa go mo là? (Ko ngeel maa de gaɗge “ Ndo mbo de kããge maa ferge see Jeofa!”)

¹⁹ Hayga jobo men goŋ Jeofa we go no, sen da wããge ga á fer bar Jeofa ti boŋ ga so yaw? Baywa, werga á de kããge maa mbiɗ faale ne ɓlagge ɓen wo, lan fer le goŋ Jeofa tigriŋ. Maa joŋ sen, nen daga á hay fer ti see ɓe gesiŋ, lan hay yãã kayge maaga jar maa peel tayge hãn wo ne hẽn mono. (Jag. 5:14) Fẽn maaga á hay dur maa joŋge ɓe ga daŋgo diŋ ferge baa barge de Jeofa!

20. Hayga naa maŋ saɓlaŋ waŋre maa de deelen wo we no, Jeofa ko ge naa na koge là?

²⁰ Hadge maa hõn wo ga naa da’ see waŋre maa Israyeln wo so là? Hayga naa hã see naa we go ti joŋre maa ni Jeofan de jiili naa ɓuy no, ni naa joŋ yaŋ doo waŋre maa de deele maa Israyeln wo no lay. Naa da’ wee koge re wer ɓlagge naan wo, naa mbiɗ wee faale ne hara, lan naa mo coo seele naa. Lan daga naa mo fer wee ɗiggi ti de el maaga naa de goŋge diŋ Baa maa ti ngeel ɓe ga boŋ tu lay mono. Hayga ndo oo we de deele peel Jeofa no, ndo kol ge yaŋ nen ɓe doo jobo maa joŋ fẽẽre ti ngeel ɓe nono.