HADGE 27
SIŊ 73 Donne-nous de la hardiesse.
Hay de coɓge doo Sadog nono
“Sadog wel ma jõõ ma twar debaŋ ga de egre lay no.” —1 KRON. 12:28.
FẼN MAA KLUU ƁIL HADGE SEN LA
Saɓlaŋ Sadog kay naa maaga naa mo hay de coɓge na kayge là.
1-2. Sadog hay diŋ wose là? (1 Kronig wo 12:22, 26-28)
Ɗig ba mbo ti ngaɓa jar maa dedaŋ 340,000 ga tay wo maa kol Dafid waŋ ti Israyel ɓuy mo ɗa. Nen naw 3, jar sen lag wo ciŋ ti húulì wo ti jeŋ Hebroŋ, ti fege, de ndalge, lan togoɗ Jeofa de siŋ de fruygi. (1 Kron. 12:39) Yoo jar sen wo, weejõõ po hay we ni, à ɗen ga Sadog. Maapo ga jar hay bay de koge ga á hay yoo kããra ni wa. Amaa, Jeofa hay kon yoo kããra ni, lan se da ga naa mo hay ko ga á hay yoo kããra ni lay. (Jaŋ 1 Kronig wo 12:22, 26-28.) Sadog hay diŋ wose là?
2 Sadog hay diŋ pretre po maaga hay joŋ joŋre de Abiyatar, jee sid jag maa kluu. Baa hã koge re ne Sadog, lan hã ẽgre ne hẽn maa da’ wer ne ɗiggi ɓe. (2 Sam. 15:27) Jar mbiɗ nen see Sadog maa kiɗ yaŋ maa de ko re. Á hay diŋ jobo maa de coɓge debaŋ pa. Ɓil hadge sen la, naa ko ge ɗeŋ maaga Sadog hay ngaɓ go ga se de coɓge mono yaŋ.
3. (a) Wer mayse ga jar goŋ Jeofa wo de sãy coɓge ti là? (b) Naa ko yaŋ ɓil hadge sen la diŋ maylà?
3 Ti wur se maa glogn wo la, Manhúulí ya’ wer hãy jar maa ni Baan wo debaŋ. (1 Pi. 5:8) Diŋ wersen so ga naa de sãy coɓge ti maa soɗ re sen wo, hãã wo ti wur maaga Jeofa caa wer Satan wo de tamsir maa ɓen go mono. (Siŋ. 31:25) Naa ko wee ɗeŋ po wo 3 ga kay wo naa maaga naa mo hay de coɓge doo Sadog no lay mo ɗa.
KAY TWAYWAŊ MAA NI BAA NO
4. Wer mayse ga jar maa ni Jeofan wo de sãy coɓge ti maa kay twaywaŋ maa ni Baan là? (Ko foton lay.)
4 Naa jar maa ni Jeofan, naa kay twaywaŋ maa ni Baa no, amaa day maa po se wii coɓge do naa. (Mat. 6:33) Ko ba ɗa, ti tamsir se maa de ɓlagge waran mono, naa de sãy coɓge ti maa seege doo ga Jeofa da nono, lan maa sii wããre maa de cõõre maa ti twaywaŋn go. (1 Tes. 2:2) Day de ngar ngeel maa po á wii coɓge do naa maaga naa mo maŋ ti ɓaŋ politig po wa, de maaga tamsir de ya’ wer car ɓil de peel ni mono. (Jaŋ 18:36) Jar po wo ngaɓa yoo tayge maa ni Jeofan joŋ wo bon debaŋ do coo coo, mbarge, noga da’ wo see ɓaara go ti daŋgay wer maaga á hay laa wo dayge hee see ɓaara nen politig, noga kolge go soode durgi ga mono.
De maaga jar po maŋ wo we go wer jar politig po wo no, ndo joŋ ge jonge là? (Ko paragraf maa 4)
5. Wer mayse ga Sadog hay de sãy coɓge ti maa kay Dafid là?
5 Sadog hay le Hebron bay diŋ maa joŋ few maaga kol Dafid waŋ tawa wa. Á hay le ni de wuu ɓen do, lan go gorge maa durgi. (1 Kron. 12:38) Á hay go de bag jag see ɓe maa woge ti durgi wer Dafidi, lan maa dur jar hee jar Israyel wo no. Maapo ga koh de maaga Sadog hay bay mbe de ko durgi doo soode wo no wa laybla mono, á hay de coɓge debaŋ.
6. Dafid naa nen coɓge maa ti ngeel ɓen go na naage ga jor glog Sadog maŋ glog ɓe là? (Siŋ wora 138:3)
6 Pretre maa doo Sadog hay had maaga se mo hay de coɓge na gen là? Á hay yoo jar maaga hay wo de ẽgre, lan wo de coɓge lay mono. Sen go tinoo tu ga á hay kiɗgi ga se joŋ doo jar sen wo no lay. Se diŋ tee maaga jar Israyel hay kiɗ wo ga saara baa Dafid waŋ wer maaga á hay diŋ job maa de coɓge, lan diŋ jee durgi maa kluu mo lay. (1 Kron. 11:1, 2) Dafid hay tum kiɗ kayge do Jeofa maa naa blum jar hee ɓen wo no. (Siŋ. 28:7; Jaŋ Siŋ wora 138:3.) Jar maa tigriŋ hay wo ti jeŋ ni ngaɓa maaga Sadog mo hay ko see ɓaara pa—Yehoyada wo de weel ɓe Benaya, jee durgi maa kluu no, de waŋre maa tigriŋ wo 22 ga hay wo wer Dafid ni mono. (1 Kron. 11:22-25; 12:26-28) Jar sen hay wo go de maŋ ɗiggi maaga saara kol Dafid waŋ, lan saara gor ti ɓe.
7. (a) Hẽẽre naa maa de coɓge maa hõn wo wara ga naa joŋ doo saara ne lay là? (b) Ndo da’ mayse see saɓlaŋ hẽn naa Nsilu maaga naa da’ ɓil videyon sen là?
7 De maaga naa ɗig we ti ɗeŋ maaga jar lan joŋ wo maa lagge de deele peel Jeofa, lan peel twaywaŋ maa ɓen de coɓge mono, se jor glog naa maa lagge de coɓge lay. Waŋ naa Yeso Kris laa dayge hayge waŋ de maaga á hay ti tamsir la mo ga. (Mat. 4:8-11; Jaŋ 6:14, 15) Á hay tum deŋ see ɓe see Jeofa maa da’ coɓge. Nen wur maa ni naa la lay mono, maa jõõre yaŋ wo ngaɓa debaŋ ga laa wo dayge kolge soode maa durgi ga, noga laa wo dayge joŋ politig ga. Ndo da’ wããre maa ti ɓaara yaŋ ɓil jw.org. a
KAY HẼẼRE ƁO WO
8. Ti wur maa hõn wo ga jar maa peel tayge joŋ wo de sãy coɓge ti maa kay hẽẽrebe wo de woore là?
8 Jar maa ni Jeofan da wo kay kããra. (2 Kor. 8:4) Amaa, day maa po sen wii coɓge maa joŋ se no. Ko ba ɗa, de maaga waŋ le’ we no, jar maa peel tayge ko wo ga hẽẽre naa wo de sãy coɓge, kayge, lan maapo ga wo de sãy Bible wo de kefder naa wo ti, noga rege, õõbe, lan ngeel maaga saara lag ni ti. Jar maa peel tayge da wo hẽẽrebe wo debaŋ. Á hã wo fẽẽre maaga á wo de sãy ɓaara ti ne hara, koh á mo hay ba de gayri debaŋ maa joŋge. (Jaŋ 15:12, 13) De maaga á yaŋ wo joŋge doo sen nono, ni saara de maŋge diŋ saɓlaŋ coɓge maa ni Sadog no.
9. Doo maaga naa jaŋ ɓil 2 Samuyel 15:27-29 mono, Dafid hay wãã ne Sadog ga á mo joŋ maylà? (Ko foton lay.)
9 Naw Dafid hay nen re debaŋ. Absalom weel maa ni Dafidn hay go de baa wer maa ĩĩ pan ɓe go maaga se kol ti waŋ. (2 Sam. 15:12, 13) Dafid de hay men Jerusalem go deparday tu seŋ! Á raw riŋ weere jõõre ɓen wo ga: “Hoo we go ciŋ, naa daŋ we de ɗeere, werga faage maga naa yãã yaŋ go do Absalom bay wa so!” (2 Sam. 15:14) De maaga weere jõõre ɓen wo de seege mono, Dafid kal wããge ga jobo mo hay gwan le glog boŋ maa ɓo’ sug saara ti fẽẽre maaga Absalom le de joŋ rage blam mono. Day, Dafid fer Sadog wo de jar maa siɗ jag maa tigriŋ wo ɓi leege maa ɓod sug ɓaara. (Jaŋ 2 Samyel 15:27-29.) Á de hay joŋ wo hayya ne see ɓaara debaŋ. Fẽn maaga Dafid wãã ne jar siɗ jagn wo hay bay diŋ mopo maa gus wa—lan á hay bas wo tenen ɓaara go ni. Ɗig ba mbo ti fẽn maaga Absalom—jee maa debaycõõre, ga da sa’ bole, de hãã de hay joŋ Sadog wo de pretren wo de maaga á hay ko we ga á wo de ɓod ẽŋre se maa yãã Dafid go mo ɗa!
Dafid hã joŋre maaga maapo ga hay kaŋ Sadog jag húulí ne hẽn do (Ko paragraf maa 9 no)
10. Sadog wo de jar maaga á hay wo de kããra koɗ wo Dafid na koɗge là?
10 Dafid hay wii Sadog wo de bar ɓe maa tigriŋ maa de deele, Husay, maa kayge ɓe maa bag jag ɗiggi ɓe go. (2 Sam. 15:32-37) Husay de hay joŋ doo ga se de kay Absalom, lan hay sii ɗeŋ ne hẽn maa baa Dafid, fẽn maaga kay Dafid yaŋ maa bag jag see ɓe go see durgin mono. Blam de maaga Absalom laa yaŋ ɓen mo kay, Husay sii ɗeŋ sen wo ne Sadog wo de Abiyatare. (2 Sam. 17:8-16)Jar sen wo ɓog ɓuy sii wo wããre sen wo ne Dafid lay. (2 Sam. 17:17) De kayge maa ni Jeofan, Sadog wo de Pretre maa wer ɓen joŋ wo joŋre de woore debaŋ maa yãã Dafid go.—2 Sam. 17:21, 22.
11. Naa maŋ saɓlaŋ coɓge maa ni Sadogn na maŋge maa kay hẽẽrebe wo là?
11 Naa joŋ de coɓge doo Sadog ne lay na joŋge de maaga hẽẽre naa yaŋ wo nen re maa de gayri, lan ga á yaŋ wo de sãy kayge ti là? (1) Hoo sug ti jag liŋgin wo. Á de woore maaga naa hay hoo sug nen ngeel maa de maŋ sen wo maaga jag naa mo hay go boŋ. Hoo sug ti jag liŋgi maaga a wo le ti filiyal mono. (Heb. 13:17) Jar maa peel tayge mo hay wo ko nen ti jag liŋgi maaga ngaɓ ɗeŋ bagge jag see go see fẽẽre maa doo leege, bii maŋge. . . , lan ti ɗeŋ maaga naa joŋ joŋge hayga naa da’ see naa we nen ngeel sen la mono. (1 Kor. 14:33, 40) (2) Hay de coɓge, day de ɗeŋ. (Jõõ. 22:3) Ɗig go de woore taŋgu maaga ndo joŋ mopo mono. Joŋ mopo maaga a de re ne ndo ti de koɗ koɗ wa. (3) Kaŋ ɗiggi ti Jeofa. Fer ɗiggi ga Jeofa da ga nday mo hay go de yããge de hẽẽre ɓo wo. Á kay mo yaŋ maa kay rage nen ngeel maa de gayri sen de woore.
12-13. Ndo had mayse see saɓlaŋ Viktor wo de Vitali là? (Ko foton lay.)
12 Naa ko wee saɓlaŋ hẽẽre naa Viktor wo de Vitali, ga wo ɓog ɓuy hay wo joŋ joŋre maa hã rege wo de bii ne hẽẽrebe maa Ukraine wo mo ɗa. Viktor wãã ga “Wùr hay kiɗ rege go ti ngeel ɓuy”, day “Wur maa po wo wuu raa go ti ngeel ɓuy. Hẽnbe po hã rege maa ɓi “boutique” ɓe go ne hẽẽrebe wo de koɗe. Rege maaga hẽnbe sen hãn kay hẽẽre naa wo nen naw pur debaŋ. De maaga wùr de hoo regen ti kamiyoŋ mono, bombe le’ ti jeŋ wùr meder 20. Ndi sii wur sen hẽẽ kem Jeofa ga á mo hã coɓge maaga ndi hay de sãy ɓe ti maa ya’ wer kay hẽẽrebe wo me.”
13 Vitali wãã ga: “Se hay de sãy coɓge ti debaŋ.” Á wãã pa ga “Raŋge ɓi maa taŋgun yãã wur do ɓi boore 12. Jag raŋge sen ndi sii hẽẽ tos Jeofa.” Vitali hay de coɓge debaŋ, day se hay de ɗeŋ lay. Á wãã ni pa ga: “Ndi hay bay men wii koge re wo de koge ngar hugli see ɓi doo Jeofa wa. Ndi hay ya’ mooda diŋ ti faage maaga jar kluuri sir hã wo faage ɓe mo tawa tu. Hãge ɓil ɓi ya’ ciŋ de maaga ndi hay ko hẽẽrebe wo joŋ joŋre de tay jag boŋ mono. Á hoo wo fẽẽre maa de baywoore maa ti faagen wo go, tay wo ti õõbe wo de rege wo, day saara laa ra ɓil kamiyoŋ, lan saara hã rege wo de ngeel maaga wùr ig ti faage ni ne wùr pa.”
Nen wur maa de ɓlagge wo mono, naa mo hay de coɓge, amaa de ɗeŋ de maaga naa de kay hẽẽrebe wo mono (Ko paragraf maa 12-13)
OO DE DEELE PEEL JEOFA
14. Maapo ga á joŋ see ne naa na joŋge hayga jobo maaga naa da ne men Jeofa we go là?
14 Re po bay de gayri doo maaga jobo maa liŋ ni naa, noga bar naa po men goŋ Jeofa go ne wa hase. (Siŋ. 78:40; Jõõ. 24:10) Maapo ga werga naa da jee ɓen debaŋ, se joŋ de gayri debaŋ maa soɗ re se no. Hayga tee re sen hay we de da’ ndo lay no, saɓlaŋ de deele maa ni Sadogn coɓ ndo yaŋ.
15. Wer mayse ga Sadog hay de sãy coɓge ti maaga se mo hay tum de deele peel Jeofa là? (1 Waŋre wo 1:5-8)
15 Sadog oo de deele peel Jeofa de maaga bar ɓe Abiyatar oo de deele ga mono. Sen hay hres ti wur tawgeti waŋ maa ni Dafid no. De maaga Dafid hay go de tããbe, lan go maa húulí mono, weel ɓe Adoniya kiɗ ga se kol ti waŋ koh de maaga Jeofa hay de dage ga mo kol ni diŋ Salomoŋ mono. (1 Kron. 22:9, 10) Abiyatar maŋ ga se kay Adoniya. (Jaŋ 1 Waŋre wo 1:5-8.) De joŋge doo sen, Abiyatar hay bay de deele wa bay diŋ peel Dafid tawa wa, amaa peel Jeofa lay! Naa kol wee ba see naa ti tu Sadog ko maaga á joŋ see ne hẽn debaywoore, lan ko see ɓe go de gwange glog mo ɗa! Á wo de Abiyatar joŋ wo joŋre ti jeŋ kããra doo pretre nono nen kiŋgi 40 de ti. (2 Sam. 8:17). Á hay wo ko nen ti “komrom maa ni Baan” ɓog ɓuy. (2 Sam. 15:29) Á wo ɓog ɓuy hay kay wo Dafid ti waŋ ɓe no, lan hay joŋ wo fẽẽre maa tigriŋ wo ngaɓa ti joŋre maa ni Jeofan pa.—2 Sam. 19:11-14.
16. Mayse kay Sadog maaga á mo hay tum de deele là?
16 Sadog oo de deele peel Jeofa koh de maaga Abiyatar maŋ ɓen ga se oo de deele ga mono. Dafid hay de koge ga Sadog diŋ jobo maaga se kaŋ ɗiggi ti ɓe tum. De maaga ɗeŋ maaga Adoniya hay kiɗ laa seege ga mono, Dafid fer see Sadog, Natan, lan Benaya maaga á mo kaa wo noo ne Salomoŋ ti maa kol waŋ ti sir Israyele. (1 Waŋ. 1:32-34) Sen go tinoo tu ga Sadog hay da’ coɓge see saɓlaŋ jar goŋ Jeofa maa tigriŋ wo doo Natan, ga hay de deele see ɓe, lan hay kay waŋ Dafid lay mono. (1 Waŋ. 1:38, 39) De maaga Salomoŋ kol waŋ mono, se kal “kaŋ Sadog je siɗ jag go ti ngel Abiyatar.”—1 Waŋ. 2:35.
17. Ndo maŋ saɓlaŋ Sadog na maŋge hayga jee maaga ndo da ne men goŋ Jeofa we go là?
17 Ndo joŋ doo Sadog ne na joŋge lay là? Hayga jobo maaga ndo dan wãã we ga se men Jeofa go no, ngaɓ go ne Baa ga ndo maŋ ɓon ga ndo oo de deele peel ɓe. (Jos. 24:15) Jeofa hã ge ẽgre wo de coɓge maaga ndo de sãy ɓaara ti yaŋ ne ndo. Kaŋ ɗiggi ti Jeofa de tosge ɓe, lan de hayge maŋ see hẽẽrebe maaga wo de deele mono. Ooge de deele ɓon de cõõre jag Jeofa, day á poɗ ge ndo yaŋ ti se no.—2 Sam. 22:26.
18. Ndo had mayse see saɓlaŋ Marko wo de Sidse là?
18 Naa ko saɓlaŋ Marko wo de wãy ɓe Sidse. Mãyre ɓaaran wo ɓog ɓuy men wo Jeofa go. Marko wãã ga: “Ndo tõõ da weeren ɓon wo le hãã le ti wur biŋgi ɓaara. Ndo joŋ fẽẽren ɓuy tu maa yãã rage go jag re maaga á yiŋ wo de ɓaara mono. Day de maaga á maŋ wo we ga saara men Jeofa go no, á ce debaŋe. Amaa, Jeofa kay wùr maa soɗge ɓe. Á hay joŋ ga wùr mo coɓ kããra. De maaga ndi ko see ɓi we go nen lawge do re maaga hres no, wãy ɓi coɓ ndi lan jor glog ɓi maa joŋ fẽn maa de deele. De maaga á ko see ɓe we nen lawge lay no, ndi joŋ doo sen ne lay.” Sidse wãã pa ga: “Hayga Jeofa de hay hã ẽgre we ne wùr ga no, wùr de hay joŋ de kããge maa soɗ ren ga. Ndi hay go nen lawge debaŋe, lan ndi hay ɗiggi ga ren hay diŋ see ɓi ti maaga mãyre wùrn men wo goŋ Jeofa go mono. Diŋ wersen so ga ndi wãã fẽn maaga á joŋ see me ne Jeofa. Go blam mẽ’ mo kay, mãygemanbe po ga ndi hay ig kiŋgi pur bay koge ɓe a le see ɓi, laa do ɓe me bay, day ko me nene, se wãã me ga: ‘Fer ɗiggi Sidse, ren bay diŋ see ɓo wa!’ De kayge maa ni Jeofan, ndi dur mbi maa ɗaw fruygi ɓin ti joŋre maa ɓe no.”
19. Ndo go de baa wer maa joŋ mayse là?
19 Jeofa da ga jar maa goŋ segen mo hay wo de coɓge doo Sadog nono. (2 Tim. 1:7) Amaa, á bay dage ga naa mo kaŋ ɗiggi ti ẽgre naa de see naa wa. Á da ga naa mo kaŋ ɗiggi ti se. Wersen, de maaga naa da’ see naa we nen re maaga wii coɓge do naa no, naa mo mbiɗ nen naa ne Jeofa ti. Naa joŋ yaŋ go de bawge jag jiili naa ga á coɓ ge naa yaŋ doo Sadog no lay!—1 Pi. 5:10.
Siŋ 126 «Reste éveillé, tiens ferme, deviens fort »
